Zua gbi'id zua
55
1 Kɛlisimi m sɔsʋg, O Wina'am,da zan'asi m sɔsʋgɔ.
2 Kɛlisim ka sʋŋim.
M tɛn'ɛsa la daa daamim nɛ ka m fabili gɛn.
3 M dataas la tansid agɔla kpɛn'ɛsidim dabiem;
ba kɛ ka m nyɛt namisʋg
ka katim nɛ sʋnpɛɛn.
4 M sʋnf san'am nɛ hali;
ka kum dabiem mɔrim.
5 Dabiem kpɛn'ɛm nɛ ka m kirid;
dabiem nyaŋim nɛ hali.
6 Ka m yɛl ye, “M ya'a mɔrin dawan kpʋkpama!
M naan ianki lalig ka vʋ'ʋsin.
7 M naan ianki laligi
bɛɛn pipirisin.
8 M naan zɔɔ laligi ieen su'asig zin'ig,
ka lal nɛ sisi'em linɛ vuud hali la.”
9 Fɛndigim nimbɛ'ɛdnam la ya'am, O Zugsɔbaa,
kɛl ka ban gban'e si'el wʋsa lieb zaalim,
bɔzugɔ m nyɛ zaba nɛ bugusim
ka li pɛ'ɛl tempʋʋg la wʋsa.
10 Nintaŋ nɛ yʋ'ʋŋ wʋsa ba giligid zaŋguoma la ni wʋʋ ba guri teŋ la;
kisidim nɛ tʋʋmbɛ'ɛd ma'aa zu'oe teŋ la pʋʋgin.
11 Tʋʋmsa'aŋ dim ma'aa pɛ'ɛl teŋ la pʋʋgin;
banɛ kpɛn'ɛsid nidib dabiem nɛ ziri dimi bɛ suoraadin la.
12 Li ya'a aannɛ m dataa tʋ'ʋdim,
m naan mɔdigin;
li ya'a aannɛ m bi'em duoe zabid nɛ m,
m naan su'an ka bas o.
13 Amaa li anɛ fʋn, ninkanɛ nwɛnɛ mam nɛ,
m zɔɔng, ka aan m zua.
14 Fʋn onɛ ka fʋ dɔllim daa malisim
ka ti dɔl taaba la'am ken Wina'am pʋ'ʋsim yin.
15 Kɛl ka kum libigi m dataas la;
kɛl ka ba sig kpi'im teŋ vʋt,
bɔzugɔ bɛ'ɛd bɛɛ ba san'anɛ giilim.
16 Amaa m buol Wina'am,
ka Zugsɔb la faanm.
17 Zaam nɛ bɛogʋn nɛ nintaŋ wʋsa
m kaasid nɛ sʋnsa'aŋ,
ka o wʋmmi tisidim.
18 Zaba giligi m zin'ig wʋsa
ka o faanm ka ba pʋ pu'alimi ma,
hali baa nɛ nidib bɛdegʋ duoe zabid nɛ m la.
19 Wina'am onɛ zin' o na'am gbauŋ zug saŋa wʋsa la,
na wʋmi ba yɛla ka namisi ba.
Ba anɛ nimbanɛ pʋ tiakidi ba suorɛ,
ka mɛ pʋ zɔt Wina'am baa bi'elaa.
20 M dɔllim taa la zabid nɛ o zuanam;
o san'ami o nɔnaar la.
21 O pian'ad anɛ saaliga wʋʋ kpaam nɛ,
la'am nɛ wala zaba bɛɛ o sʋnfʋn;
o pian'ad bʋgʋsnɛ nwɛnɛ kpaam nɛ,
la'am nɛ wala li anɛ linɛ yisid zaba sʋ'ʋs na.
22 Nɔkimi fʋ ziid wʋsa tis Zugsɔb la
ka onɛ na sʋ'ʋŋif;
o kʋ kɛ ka pʋpielim sɔb lii.
23 O Wina'am, fʋ lɛɛ na kɛ ka nimbɛ'ɛdnam la li
ba na li bʋmbɔk linɛ an san'auŋ la ni;
ninkʋʋdib nɛ ziri dim la
na dɛŋ kum ka kʋ paae ba yʋma bɛnnɛ.
Amaa ya'a kpɛlim nɛ mam, fʋn ka man ti'e.