Onɛ bɛ yɛla nii fabin si'em tisid Wina'am
109
1 Wina'am onɛ ka mam zun'oda,da kpɛn an baanlimm
2 ka nimbɛ'ɛdnam nɛ ziri dim la
ya'ae ba nɔya pian'adi pɔ'ɔgidi ma;
ba nɔɔr ku'om anɛ faad nɛ tʋ'ʋd.
3 Ba giligimnɛ ki'isidim pian'ad ma'aa;
ba zabidimnɛ zaalim-zaalim.
4 Man kpɛn'ɛdi ba da' nɛ ligidi ka ba kpɛn'ɛdi m da' nɛ kuga,
amaa man anɛ ninkanɛ bɔɔd winsɔsʋg.
5 M maali ba sʋm ka ba lɛbis bɛ'ɛd,
ka m zuod an kisidim tisi ba.
6 Ba yɛt ye, “Gaŋim onɛ na pian' o yɛla bɛ'ɛd;
kɛl ka dataa la kena zi'enɛ kpi'enɛ o datiuŋ.
7 Kɛl ka ba ya'a ti tu'ad o antu'a, on di nyan,
ka o winsɔsʋg lieb bɛ'ɛdi tis o.
8 Da kɛ ka o dabisa yuugɛ;
kɛl ka sɔ' di'e o tʋʋma tʋm.
9 Kɛl ka o biis lieb kpiibis
ka o pu'a lieb pʋkɔɔnr.
10 O biis la na ginnɛ sɔsid;
ka kɛ ka ba ya lieb dabɔɔd
ka ba kadi baa yis.
11 O samdaan na faaɛn on mɔr si'el wʋsa;
on tʋm namisi nyɛ si'el la, saam na faaɛn li.
12 Sɔ' kʋ maal o sʋm
bɛɛ zɔɔ o kpiibis la nimbaanliga.
13 O yaas na kpii naae,
ka ba yʋ'ʋr kʋ pʋdig zʋmaan kanɛ na ti kena la nii.
14 Zugsɔb na kpɛn tɛnri o yaanam bɛ'ɛd la yɛla;
ka o ma tʋʋmbɛ'ɛd mɛ kʋ yi ka kɛɛ o.
15 Zugsɔb na kpɛn tɛnri li yɛla saŋa wʋsa,
ka na kɛ ka sɔ' kʋ lɛn tɛnri ba yɛla teŋgbauŋ nwa nii.
16 Bɔzugɔ o nan zi' tɛn'ɛs ye o tʋm sʋm,
amaa o kʋʋd nɔŋ dim
nɛ fara dim nɛ banɛ mɔr sʋnsa'aŋ.
17 On nɔŋ si'el anɛ nɔpɔɔr
li na lɛb o mɛŋ zugin.
O pʋ mɔr ya'amlɛog nɛ on na niŋ sɔ' albareka;
ala ka bareka mɛ na lalig ka kɛɛ o.
18 O nɔk nɔpɔɔri yɛɛd wʋʋ dansik nɛ;
ka li kpɛn' o niŋgbina ni wʋʋ ku'om,
ka kpɛn' o kɔnba ni wʋʋ kpaam nɛ.
19 Kɛl ka o nɔpɔɔr la vil o niŋgbina wʋʋ fuug,
ka nwɛnɛ sɛnbidiŋ nɛ lɔɔ o siaa saŋa wʋsa.”
20 Kɛl ka nɛ' anɛ Zugsɔb la yɔɔdi m dataas la sam,
nɛ banɛ pian'adi m yɛla bɛ'ɛd la.
21 Amaa fʋn Zugsɔb onɛ an Paŋtita'ar Sɔba,
maalim mam sʋ'ʋŋa fʋ yʋ'ʋr zug;
fʋ nɔŋilim zu'oe si'em la zugɔ, faanmim.
22 Man an nɔŋdaan nɛ fara sɔb la zug,
ka m sʋʋnr wʋsa san'am.
23 M naadi tɔ'ɔtɔ wʋʋ zaam ma'asim nɛ;
ba pisigimi bas wʋʋ sisɔm nɛ.
24 Kɔ'ɔm kɛ ka m duma wʋsa ka' paŋa;
ka m niŋgbina naae ka m an gɛr-gɛr.
25 M lieb nɛ bʋnla'adiri tis banɛ pian'adi m yɛla bɛ'ɛd la;
ba ɛɛnti nyɛɛm ka lɔbidi ba zut.
26 M Zugsɔb Wina'am, sʋŋim;
faanmim wʋʋ fʋ nɔŋilim zu'oe si'em la.
27 Kɛl ka ba baŋ ye li anɛ fʋ paŋ,
ka baŋ ye fʋnɛ tʋmmi li, O Zugsɔba.
28 Ba ya'a bɔɔd ban pɔɔm nɔɔri tisim, amaa fʋn na tisim bareka;
ba ya'a duoe zab ba na di nyan,
amaa man kanɛ aan fʋ tʋmtʋm la na mɔr sumalisim.
29 Banɛ pian'adi m yɛla bɛ'ɛd la na di nyan tita'ar
ka nyan na pili ba wʋʋ fuugnɛ.
30 M na dʋ'ʋs Zugsɔb la nɛ m nɔɔr pian'ad,
ka wɔ'ɔg o, nidib la wʋsa sʋʋgin.
31 Bɔzugɔ o zi'e onɛ an fara sɔb la nya'aŋ
ye o faaɛn o yis banɛ kʋʋsid o bɛ'ɛd la nu'usin.