Zugsɔb la gaŋ o na'ab la yɛla
110
1 Zugsɔb la yɛli m Zugsɔb ye,“Zin'inimi m datiuŋ
hali ka m ti kɛ ka fʋ bi'emnam
bɛɛ fʋ nɔba teŋir.”
2 Zugsɔb la na kɛ ka fʋ na'am paŋ yi Zion teŋin na;
fʋ na di na'am fʋ dataas sʋʋgin.
3 Daakanɛ ka fʋ ye fʋ keŋ zaba la,
fʋ zabzabidib la na siaki yina.
Fʋ na zi'en nɛ na'am paŋ linɛ an kasi la,
bɛogʋ ti nied la;
na'akim la na kɛɛn fʋ san'an na
ka li nwɛnɛ bɛogʋn mɛligim nɛ.
4 Zugsɔb la pɔya
ka kʋ tiaki o pʋtɛn'ɛrɛ; o yɛl ye,
“Fʋ anɛ maanmaan onɛ tʋʋma ka' naar
nwɛnɛ Melkizedek la.”
5 Zugsɔb la aan fʋ paŋ;
o sʋʋnr ya'a ti duoe o na nyaŋ na'anam wʋsa.
6 O na kad tɛɛns la saria,
ka la'as banɛ kpi la digil dʋʋr-dʋʋr
ka nyaŋ banɛ sʋ'oe dunia sʋ'ʋlim la wʋsa.
7 O na nu bulig kanɛ bɛ suor kpikpɛŋ la ku'om;
ala ka o na paam paŋ nɛ nyaŋir.