20
Yesuusay haybowafa dendosa
Mat 28:1-8; Mrq 16:1-8; Luq 24:1-12
1 Hude wonte ketiya sho'e sahay geejjho baanne Magdoolaxhi Maaramey Yesuusa ahay yecho boossa i hando. Boossa sumaafa shuchi ooxutti yesune i beedo. 2 Hinne isini Simoone sungicha Phexhrosekowara Yesuusay eehicho fede e erusichoshukowara woxxhi handi "Laaxe boossaafa etti aya u gaddosa eruwanxhiko" hidi i oto.
3 Hinne Phexhrosiyara fede Yesuusay erusichoshaaray kessi boossaaka u hando. 4 Usini be lam'una woxhiya u yecha. Ye fede e erusichoshi woxxhi Phexhrose gardi handi esume buro boossa e ello. 5 Boossaaka ullaydi e beedoniya acecha maa'oy yaha yecha. Boossaani gello baasso. 6 Simoone Phexhrosey e geede yoodi boossaaka gello. Esini acecha maa'oy yaha yesune e beedo. 7 Yesuusa qinowa xhaaxhuttecha maa'oy acecha maa'ome are dakusutti yesune e beedo. 8 Ye e geede buro yoodecha e erusichoshi ye boossaa gelli be beedoniya "Aadeko" hidi e hido. 9 Ye esini haybowafa dendey esuse worguse base e maaqenike Hayla Fissharowa ohuttechashe yenniya gaxxho badiko u yecha. 10 Ye e geede e erusichoshiti lam'e maaddhi dhaddi be zawa u hando.
Yesuusay Magdoolaxhi Maaramese bentosa
Mat 28:9-10; Mrq 16:9-11;
11 Magdoolaxhi Maaramey yeekisine boossa sumaa wudena i ee'icha. Yeekisineni zuddi boossaa i beedo. 12 Yesuusa ahay woydhecho godo booxi maa'o maadhese lam'i Wonto woosaxi bidzi qinixo badena bidzi tokixo badena uttiya u yesune i beedo. 13 Usini Maarame "Nuunde! Am ne yeeke?" hidi u oycco. Isini "Ta Laaxi aha hayafa etti aya u gaddosa eruwasso" hidi i hido. 14 Yeydi be hido geede be geede maaddhi i beeneniya Yesuusay ee'usune i beedo. Esa e maaqesa i hallo. 15 Yesuusani "Nuunde! Am ne yeeke? Ooni ne worge?" hidi e oycco. Isini ye gatiya hantesa iso e bisshine "Ta laaxo! Yesuusa aha hayafa ettesso an godo ne gaddesesa, odde, taase ohuwa, ta effeese" hidi i hido.
16 Esini "Maarame!" hidi e hido. Isini esuko maaddhi Ibrayste nuunana "Rabbune!" hidi i hido. E birchey "Eruseyo!" hidi hiyoko. 17 Yesuusani "Haga nuwadeko hando badi ta yese gisha tamba aytofuna. Nuundo na'axheko handi ' "Dhaddiko taaseni ade hinuseni ade taaseni Wonto hinuseni Wonto maaqesuko wokke ta hange" yeydi e hido' hidi handi ohuwa!" hidi e hido. 18 Hinne Magdoolaxhi Maaramey e erusichoshituko handi "Laaxuko ta beedo" hidi i oto. Ye e geede isuko e otosani i oto.
Yesuusay be erusichoshituse bentosa
Mat 28:16-20; Mrq 16:14-18; Luq 24:36-49
19 Ye wonte ye esini ye hude wonte sahay qando. Yenniya e erusichoshiti Ayhuda afana maagita be jhassho gisha be gasa aysi zawa u bhikkiluttecha. Yesuusay gasay ayke yesune u giddaa gelli eedhi "Modhetey hinuse maaquwaye!" hidi e hido. 20 Yeydi be hido geede be kuchiyara be miliyara uso e beyso. E erusichoshiti laaxe be beedoniya orjena u maddo. 21 Sekkeni assi Yesuusay "Modhetey hinuse maaquwaye! Nuwadey tamba ansonikeko tanini hinumba anxe" hidi e hido. 22 Yeydi zeerdi "Uffu" beydo geede "Ayaana Geeshe ekkuwayte. 23 Hinuni axi cubbo 'Attuwaye' hidi hiita'ayko u cubboni 'Attuwaye' hidiko e hiyutte. Hinuni axiti cubbo 'Attuwaye' hiye hi dheeba'ayko u cubboni 'Attuwaye' hiyuttuwasso" hidi e hido.
Yesuusaara Toomaasiyara
24 Yesuusay be erusichoshituko yoodoniyaka tamma lam'ukaafa bidzo maaqicha Didimosea sunge Toomaasey yenniya usaara badiko e yecha. 25 Hinne fede e erusichoshiti "Laaxe nu beedo" hidi Toomaaseko u oto. Toomaasey "E kuchiyana mismaarey cadecho godo ta beedo baa aallo ye godowaka ta kuche gil'a gelsi yeydiwo e caduttecho milliyanna ta kuche ta gelso baa aallo tani ha hi ohesa 'Aadeko' hidi hiwasso" hidi e hido.
26 Hazzuppi wonta geede e erusichoshiti sekke assi zawa bhikkilutti u yecha. Yenniyani Toomaasey usaara wolko e yecha. Gasay ayke yesune Yesuusay u gidda gelli eedhi "Modhetey hinuse maaquwaye" hidi e hido. 27 Ye e geede Toomaaseko "Ne gil'a ta kuche gara gaddi beewwa! Ne kucheni ansi ta mille casshaanna gelsuwa! Aadexuwa baaka eezzofuna" hidi e hido.
28 Toomaaseni "Ta Laaxo, ta Wonto!" hidi e hido. 29 Yesuusay Toomaaseko "Nenimay tamba ne beedo gishako ne aadesso. Tamba beedo badesine aadexarasiti suuzutteseesitako" hidi e hido.
Ha fissharoy abase diizuttosa