21
Yesuusani laappi e erusichoshitani
1 Ye e geede Yesuusay be erusichoshituse Xhibiriyadoose bagadea da'aa assi bemba e beyso. Bemba e beysosini ha esukeko. 2 Simoone sungicha Phexhrosey, Didimose sungicha Toomaasey, Galila Qaana katamaxe maaqe Natina'eeley, Zabdoose na'axhiyara fede lam'i e erusichoshitaaray wolko u yecha. 3 Simoone sungicha Phexhrosey "Tani gulxhe aykiyako dhaddi hange" hidi e hido. Usini "Neerako nunini hange" hidi hissine yahafa kessi handi zabhaaka u gello. Ye qama bidzoni gulxhe ayto badi u adho.
4 Sahay wonto geede Yesuusay erusichoshiti bagade nuuna e ee'usune beedi esa u hallo. 5 Yesuusani "Gere! Hi aytese gulxhey yesa yese?" hidi e oycco. Usini "Bidzini baasso" hidi u hido. 6 Esini "Maarabe zabhase oshichi badena dakkuwayte, aykoko hi ayke" hidi e hinne bagadiya maarabe u datto. Laga gulxhe e aytese gisha maarabe goosshi kessey uso iissho.
7 Yesuusay eehicho e erusichoshi Simoone sungicha Phexhroseko "Laaxema!" hidi e hido. Phexhroseni ye esa be siidonikewo be garafa afana maa'o be kessecho gisha sekke be maa'o maadhi Yesuusako yoowese bagadiya doondi e gello. 8 Fede e erusichoshiti bidzi xhiixi meetire ellesawo sahame zardi be yecho gisha gulxhey essaaka kundese maarabe zabhana goosshi u yoodo. 9 Bagade nuuna yoodi zabhaafa be kesso geede booraara tama aa'a gara yese gulxhiyara u beedo.
10 Yesuusani "Hatte hi ayto gulxhiyafa oowayte!" hidi hido. 11 Hinne Simoone sungicha Phexhrosey zabhaaka e gello. Bidzi xhiixe ichichi tamma haydze malla malla gulxhena kundese maarabe waassaafa goosshi bade gara e kesso. Maarabey haanxhi gulxhe aytakoni feedhutto badiko e yecha. 12 Yesuusani "Yoodi muuwayte!" hidi uso hido. Laaxi Yesuusa e maaqenike be erdecho gisha usaafa ooneni "Neni oonew?" hidi esa oyceshe naassay bidzini badiko yecha. 13 Esini hanke uddhi boora etti u miyorosa ususe e indo. Yeydiwo gulxheni e indo. 14 Haybowafa e dendo geede e erusichoshiti esa u beesune ha esi haysso woggako e maaqicha.
Yesuusaara Phexhrosiyara
15 Kaxa u muudo geede Yesuusay Simoone sungicha Phexhroseko "Yoona yele Simoone! Ha usume garsi taa eeha ne eehe?" hidi e oycco. Esini "Eewa Laaxo! Nemba ta eehenike neni erako ere" hidi e hido. Yesuusani "Ta qalincha muussuwa!" hidi e hido. 16 Lakkunxo assi "Yoona yele Simoone! Taa eeha ne eehe?" hidi e oycco. Phexhroseni "Eewa Laaxo, nemba ta eehenike neni erako ere" hidi e hido. Esini "Ta dorita yeenguwa" hidi e hido. 17 Haysso assi "Yoona yele Simoone! Tamba eeha ne eehe?" hidi e oycco. Haysso wogga "Tamba eehaa ne eehe?" hidi e hidosa Phexhrosey higilli "Laaxo! Neni uddi basuko ne ere. Nemba ta eehenikeni erako ne ere" hidi e hido. Yesuusani "Ta dorita muussuwa! 18 Neese ta ohesi aadeko. Mulla yesine neese ne maa'o maadhi ne eeto wude ne hangicha. Ne cindo geedema ne kuche neni beyse, fede axi nemba maysi ne worguwa wudeni etti e hange" yeydi e hido.
19 Ha esa esume e zeerdosini Phexhrosey abakeydi haydhi Wonto e kuxusesa ohesuko. Ye e geedeni Phexhroseko "Taara yoowwa!" hidi e hido
20 Phexhroseni be geede maaddhi Yesuusay eehicho bidzi e erusichoshi u geede yoosune e beedo. Ye esini buro ye qamete u muusune Yesuusa washeko uddhi "Nemba garsi ingesi oonewa?" hidi hissine oycechashuko e maaqicha.
21 Phexhrosey ye axeni beedi Yesuusako "Laaxo, ha axichi?" hidi e oycco. 22 Yesuusani "Tani 'Ta yoone aallo yesuwaye' hidi esa ta hidako am nemba essaaka gelsesa? Neni neese taara yoowwa" hidi e hido. 23 Ye e gisha aadexeesiti giddaaka "Ha axi hay'uwasso" yeydi hine odoy e budutto. Yesuusamay "Tani 'Ta yoone aallo yesuwaye' hidi esa ta hidako am nemba essaaka gelsesa?" hidi e hidosa baaka "Hay'uwasso" hidi hido baasso.
Aallicira maxo
24 Haanxhi zeere beedi otasaara ha esita diizesaaray ye e erusichoshako. E otosini aade maaqenike erako nu ere. 25 Yesuusay hanto laga abakitako assiwo yesa. Taase e bishenike e hanto hantiti uddi e bidzi bidzina diizuttesesa maaddhako ye diizutta fissharo beese ha sahay aykese danda'uwadiko e yecha.