19
Yesuusa gara haybo yaa'ay yaa'utto
Mat 27:15-32; Mrq 15:6-21; Luq 23:13-25
1 Ye e geede Philaxhosey Yesuusa etti durusso. 2 Tooraxitini anke xhaaxhi e qinowa u gaddo, zo'o maa'oni u mayso. 3 Esuko uddhi "Ayhuda kaato, sawoyte, modheyte!" hidi hissine e anqani u baqicha. 4 Philaxhoseni sekke assi wude kessi Ayhudaxituko "E gara bidzi baysoni ta dheeddosa esuna hi eroronike hatte esa hinukoko wude ta kesse" hidi e hido. 5 Hinne Yesuusay ankey e qinowa gadutti zo'o maa'o maaddhi be yesenike wude e kesso. Philaxhoseni "Hay beewayte!" hidi e hido.
6 Kahinituse afana maagitaara yebitaaray esa be beedoniya "Suxhuwa! Suxhuwa!" hidi u koysso. Philaxhosey "Tani ta badena e gara bidzi baysoni ta beedoy baasso. Eeha'ayko hinuse aandi suxhuwayte" hidi e hido. 7 "Nuni woga keemako nu keenge. 'Wonto yeleko tani' yeydi hinesa ye wogay eehuwasso. Ha e gisha ha axi hay'uwaye!" yeydi u hido. 8 Philaxhosey yeydi u hidosa be siido geede burome garsi iitana e jhassho. 9 Qeyshi giddaa assi hanke gelli "Doo! Neni ayafani?" hidi Yesuusa e oycco. Esini hanke esuse bidzoni mahe e dheeddo. 10 Hinne Philaxhosey "Taara zeerashuna? Tani nemba birchesheni nemba suxheseni adeto ta keengesa eruwanu?" hidi e hido.
11 Yesuusani "Wontokofa adetoy neese ingutte dheeddako ta gara aba adeteni fetto keenguwadiko ne yecha. Ne kuchiya tamba garsi inda axi neeme gardese cubboko e keenge" hidi e hido.
12 Philaxhosey Yesuusay zeerdosa be siido woggaa esa birshi dafese e wordo. Ayhudaxiti "Ha axe birchesha ne maaqo'ayketese Rooma kaatusea u bade maaquwannako. Ye esini bemba kaate mahesi Rooma kaatuse e iilaxuko" yeydi hissine u koysso.
13 Philaxhoseni ye esa be siido geede Yesuusa wude e kesso. Shuchi Loche sunge godob yaa'ese e utto. Ye godoni Ibrayste nuunana Gabatako e sungicha. 14 Ye wontay Garo Massalase Ayhudaxiti naqutte wonteko e maaqicha. Wontaafa izzuppi saate e elle wogga Philaxhosey Ayhudaxita "Hay hi kaati!" hidi e hido.
15 Usini "Sena ooxuwa, ooxuwa! Suxhuwa!" hidi u koysso. Philaxhoseni "Hi kaate suxhaa ta suxhe?" hidi e oycco.
Kahinituse afana maagiti "Rooma kaate baaka fede kaate nuni keenguwanxhiko" hidi u hido. 16 Yenniyani Philaxhosey Yesuusay suxhuttorosa usuko garsi e indo. Usini ayti etti dhaddi u hando.
Yesuusay suxhuttosa
Mat 27:32-44; Mrq 15:21-32; Luq 23:26-43
17 Ye e geede Yesuusay be suxi mixe beesewo iddi "Qino Qoocec" yeydi hiyutte godo e kesso. Ye godoy Ibrayste nuunana Golgotako e sungicha. 18 Yahani esa u suxxho. Esaara wolkoni lam'i axiti se bade ha bade hissi Yesuusa giddaa gaddi u suxxho. 19 Philaxhoseni "Nazrataxi Yesuusa Ayhuda kaate" yeydi hine diizuttesesa esuna erorosa e suxhutto mixi gara e gaduttoronike e mato. 20 Esuna e diizuttosini Ibrayste nuunana, Grike nuunana, Rooma nuunanako e maaqicha. Yesuusay suxhuttosi katamase ukke e maaqicho gisha laga Ayhudaxiti ye esa u zeerussicha.
21 Kahinituse afana maagiti Philaxhose "Neni 'Ayhuda kaatuko' hissine diizzofuna, ne diizorosi 'Esi "Tani Ayhuda kaatuko" hidiko e hido' hidi hinesa diizuwa" hidi u hido. 22 Philaxhoseni "Yey, ta diizosa diizziko ta yese" hidi e hido.
23 Tooraxiti Yesuusa be suxxho geede e maa'o etti wol genno genno e elloronike oyddi godo u shato. Essaafa e gara kumena maa'uttesi e yecha. Ye esini keliyafa ayti qicamilina bidzowo maaddhi meddhuttesesa e maaqicha. 24 Hinne "Ha maa'o feedhuwanxhiko, oone e ellenike hixha olliko nu effe" hidi wolko u kundo. Ye esuna
"Ta maa'o woluse u shato, ta maa'o efese hixha e gara u ollo"
yeydi Hayla Fissharowa ohuttecha kaayoy itto. Tooraxiti matosi ye esako.
25 Yesuusay suxhutti yesune e da'aa esindoy, esindoyndo bushoy, Qelepha macho maaqe Maaramey, Magdoolaxhi Maaramey hidi ee'iya u yecha. 26 Yenniyani Yesuusay esindowara e eehicho bidzi e erusichoshaaray yaha ee'iya u yesesa beedi beyndo "Nuunde! Beewwa, esa ne yele mahuwa!" yeydi e hido. 27 Ye be erusichoshuko "Beewwa, iso neyndo mahuwa!" hidi e hido. Yenniyafa ayti be zawa etti handi e gaddo.
Yesuusay haydhosa
Mat 27:45-56; Mrq 15:33-41; Luq 23:44-49
28 Ye e geede Yesuusay uddi abakoy ittosa be erdo geede Hayla Fissharowa diizuttecha katoy aalorosa "Waaxuko ta sazzo" hidi e hido. 29 Yahani dhooqo abakoy essaaka kundese otay e yecha. Hinne yaha yecha axiti huxha bissheshesha etti ye dhooqowaaka gelsi "Hisoophe" hidi hisso mixi qinowa gaddi e nuunaa u uqusso. 30 Yesuusani ye dhooqo laaqiyo be xhunxho geede "Uddi abakoy ittose" hidi e hido. Be qino ullaysi kaxe e kesso.
31 Ye e geede Ayhuda afana maagiti ye suxhutta geriti ahay suxi mixi gara e yeseeme u fashane meyssi u hoxoronike Philaxhose u shidho. Esume u shidhosini ye wontey sanbatase u naqutticho wonta e maaqicho gishaara sanbataafa ye sanbatay fetto fede sanbatitume keddaydesesa e maaqicho gishaarako. 32 Hinne tooraxiti handi Yesuusaara suxhuttecha geriti fashane u meysso. 33 Yesuusako u uddhoniya burona e haydhesesa beedi e fashane meyse u dhaddo. 34 Meyse dhabuttuwaye baa toorasaafa bidzi e milliyanna toorana e caddo. Ye e caddonikewo suuxaara waaxaaray kesso. 35 Hinuni "Aadeko" hidi hiyorosa ye esa beeda axi ato maaddhi zeerdiko e yese. E atoni aadeko, aade be zeerenike beese erako e ere. 36 Yeydini e maaddhosi Hayla Fissharowa "E meqetiyafa bidzini me'uwasso" hidi ohuttechashi ittorosako. 37 Fede godo assi "Ye be caddechosha beetako u beene" yeydi hinesi yecho gishako.
Yesuusay mooguttosa
Mat 27:57-61; Mrq 15:42-47; Luq 23:50-56
38 Ye e geede bidzi Yoosefe sunge Armatiyase katamaxi Ayhuda afana maagita be jhassho gisha aachiyaanna Yesuusa bade maaqichashi Philaxhoseko gelli Yesuusa aha e ingete etti mooggese e oycco. Philaxhoseni "Ekkuwa!" hidi hido. Hinne Yoosefey handi aha etto. 39 Ha esume buro bidzi qama Yesuusako yoodecha Niqodomosey haydzi tamma oyddi kiilod elle karawaara col'e cichaaray wolko worquttese shitto etti e yoodo. 40 Usini aha etti hade Ayhudaxiti aha aykichonike ayti shittona tisshi talbaafa hantuttese maa'ona u acco. 41 Yesuusay suxhuttosi da'aa abakoy tofutte godoy e yecha. Yaha ooneni essaaka moogutti eruwadecho kille boossay e aykuttecha. 42 Ayhudaxiti sanbatase naqutticho wonta e maaqe gishaara ye boossay ukke maaqicho gishaara Yesuusa aha oodi boossa gelsi u woysoe.