15
Weynesaara e hangitusaara
1 Sekkeni Yesuusay "Aade weyne zuuse hidi hiyutte weyne zuusi tambako, ye zuusaadey nuwadeko. 2 Ta gara yesine aafe kaxhuwa hangita kirdiko wora e dakke. Aafe kaxheesitama lagussi e kaxhoronikeko bursi hatussi e naqe. 3 Ha ta zeerdo zeeriyafa dendasuna hatte hinuni naquttese geeshitako. 4 Ta garafa shahuttofita, tanini hi garafa shahuttuwasso. Hangey weyne gara dheeddako be goshe aafe kaxhese danda'uwasso. Yeydiwo hinuni ta gara dheeba'ayko aafe kaxhese danda'uwaytako.
5 Tani weyne zuusuko, hinuni hangitako. Ooneni taaka yesa'ayko tanini esukaaka yesa'ayko ye esi laga aafeko e kaxhe. Ye esini taara baaka abani mahese danda'uwaytako. 6 Taaka yesuwasi ooneni hade hangey wude dafuttenike dafuttiko e mele. Ye e bisha hangiti hanke bidzi godo bhikkiluttiko tamaa dafutti e meggutte. 7 Taaka hi yesa'ayko ta ohesa hinuka gadesa hi maaqo'ayko hi worge abako abani e maaqo'ayko shi'uwayte. Hi worgenike maaqoko e maaqe. 8 Laga aafe hi kaxhakowara taara yeseesita hi maaddhakowara ye esunako nuwadey e kuxutte.
9 Nuwadey tamba eetonikewoko tanini hinumba eeto. Ta eeha garafa shahuttofita. 10 Tani nuwade woosso kattonike e eehana ta yesenike hinuni ta woosso kafa'ayko ta eeha garafa shahuttuwaytako. 11 Ha esa hinuse ta otosi hinuse ta indo maggana hi maggoronikiyara hi maggay facete keenguwasa maaqoronikiyarako. 12 Hinuse ta ohe woossoy tani hinumba eetonike sekke hanke wola hi eehoronikeko. 13 Be eehe axitume hissine bemba garsi haybose ingeeme gare eeha keengesi ooneni baasso. 14 Tani hinumba woossosa uddi hanta'ayko hinumba 'Ta eehe axitako' hidiko ta hine. 15 Maaliti laaxi aba e hantesa eruwa gisha ha e geede sekke 'Maalita' hidi hinumba hiwasso. Nuwade garafa ta siidosa e uddina hinumba erussi ta yese gisha hinumba 'Ta axita' hidi hidiko ta yese. 16 Tani hinumba xhardosa baaka hinuni tamba xhardo baytako. Handi aafe hi kaxhoronikiyara ye hi kaxhe aafey yesesa maaqoronikiyarako hinumba ta maagesso. Ye e gisha ta sunxuna nuwadey hi shi'e abako aba e maaqo'aykoni hinuse ingako e inge. 17 Hinumba ta woosesi sekke hanke wola hi eehoronikeko" yeydi e hido.
Aadexeesiti inxha'utte gisha
18 Sekkeni Yesuusay "Ha saha axiti hinumba inxha'ayko hinume buro tamba u inxhadhechonike eruwayte. 19 Ha sahaafa hi maaddhako sahay beesukeko hinumba e eehaane. Ha sahaafa hi maaquwa gishaara tani hinumba ha saha garafa shati xhardo gishaarako ha saha axiti hinumba u inxha'e. 20 'Maalay laaxume garuwasso' hidi ta zeerdechosha gaxhuwayte. Tamba waayye beysesso hinumbani waayye beysako u beyse. Ta kato kattesso hi katoni kafako u kakke. 21 Tamba ansase be eruwa gishako tamba hi aadexesuna haanxho uddi hi gara u hante. 22 Tani ususe yoodi zeere dheeddako cubbo ususe maaquwadiko e yecha. Hattema be cubbose oti be attesa keemuttuwasso. 23 Tamba inxha'esi nuwadeni inxha'ako e inxha'e. 24 Fede axi hanto baa hanta u giddaa hante ta dheeddako cubbo ususe maaquwadiko e yecha. Hattema haanxhi micushe hanta beedi gaddi nuwadeni tambani inxhadhiko u yese. 25 Ha esini yeydi maaddhosi u woga fissharowa 'Ta hantoy baane mikkewo tamba u inxhadho' yeydi diizutta katoy ittorosako.