14
Wontoko aange oge gisha
1 Yesuusani sekke "Hi muxhuroy hooddofe! Wonto aadexuwayte tambani aadexuwayte. 2 Nuwade zawaaka essa yesuso laga godoko yesa. Yeydi maaqe e dheeddakoma 'Essa hi yese godoko naqiya ta hange' hidi hiwwadiko ta yecha. 3 Handi godo hinuse ta naddho geede ta yese godo taara hi yesoronike assi yoodiko hinumba ta aange. 4 Essa ta hange godo aandi elluse oge erako hi ere" yeydi e hido.
5 Toomaaseni "Laaxo! Aya ne hangesa eruwanxhiko. Waanisiwu ogeni erese nu danda'e?" yeydi e oycco. 6 Yesuusani "Ogey, aadey, yesoy tambako. Ta badena baaka nuwadeko yoonesi baasso. 7 Tamba erdesesa maaddhako nuwadeni erako hi eraane. Hattiyafa ayti esa erako hi ere, beediniko hi yese" yeydi e hido.
8 Filphooseni "Laaxo! Afaase ade numba beysuwa, nuuse ellako e elle" hidi e hido. 9 Yesuusani "Doo Filphoose! Haanxhi aallo taara wolko ne yeso makko tamba erdo baannuwa? Tamba beedasi nuwadeni beediko e yese. Hinne way neni 'Ade numba beysuwa!' hidi ne hine? 10 Tani nuwadiyaka nuwadey taakaaka yesesa 'Aadeko' hidi ame ne hiwaane? Hinuse ohiya ta yesesa taakofa ohiya baasso. Ta ohoronike mahiya yesesi taakaa yesine hantiya yese nuwadeko. 11 Tani nuwadiyaka nuwadey taakaaka yesesa 'Aadeko' hidi hiyeko hinumba e worguse. Feday atto'aykoni ta hantana 'Aadeko' hidi hiwayte.
12 Hinuse ta ohesi fetto aadeko. Tamba aadexesi tani hante hanta esini assi hantako e hante. Tani dhaddi nuwadeko hange gisha fetto ha esume garesani hantako e hante. 13 Nuwade kuxa fuulay yelena bentoronike ta sunxuna hi shi'esa e uddina mahoko ta mahe. 14 Aba e maaqo'aykoni ta sunxuna hi shi'esa tani mahoko ta mahe" yeydi e hido.
Ayaana Geeshi gisha gobbusutta gobbo
15 Sekke Yesuusani "Tamba eeha'aykoko ta woosso hi kakke. 16 Tani nuwade shi'oko ta shi'e, esini hinunaara wolko koolo makkina yese hinumba minxarase fedako hinuse e inge. 17 Ye esini aade eruse Ayaana Geeshuko. Ha saha axiti esa be beewwa gishaara be eruwa gishaara esa efese danda'uwasso. Hinunimay hinunaara wolko e yese gishaara hinukaaka yeso e mahe gishaara esa erako hi ere. 18 Hinumba hade baalokeysi mikke dhagguwasso, hinuko yootako ta yoone. 19 Oddhe wogga geede ha saha gara yese axiti sekke tamba beewasso. Hinunimay beetako hi beene, Tani en'a maaqe gisha hinunini en'ako hi maaqe. 20 Tani nuwadiyaka hinunini taakaaka tanini hinukaaka yesenike ye wonteko hi ere. 21 Ta woosso etti hanta gara feyssheshi ye esi tamba eehesako. Tamba eehesa nuwadeni eehako e eehe. Tanini ye esa eehako eehe. Esuse tambani beysako ta beyse" yeydi e hido.
22 Bidzi Asqorotaxe maaquwa fede Yuuday "Laaxo! Ha saha gara yese axituse e maaddho baane nuusewo nemba ne beysesi abasuwa?" hidi e oycco. 23 Yesuusani "Tamba eehesi ta ohesako e kakke, nuwadeni esa eehako eehe. Nunini esuko yoodiko esaara wolko nu yese. 24 Tamba eehuwasi ta ohesa kakkuwasso. Ha ta ohusune siya hi yesesi taakofa maaquwasso tamba ansa nuwadekofako. 25 Hatteni hinunaara yesine ha esa hinuse otiko ta yese. 26 Nuwadey ta sunxuna hinuse anxe hinumba minxe Ayaana Geeshuko hinumba uddi erusesa. Hinuse ta zeerdosa e uddina hinumba maxusako e maxuse.
27 Modhetey hinukaaka yesoronikeko hinuse ta dhagge. Taakofa kese modheteko hinuse ta inge. Tani hinuse inge modhetey ha sahay hinuse inge modhete bisha maaquwasso. Hi muxhuroy hooddofe, yeydiwoni jhasshofita! 28 'Dhaddiko ta hange, maaddhiko hinuko ta yoone' yeydi hinuko ta otechosha siidiko hi yese. Tamba eehesa maaddhako nuwadeko ta hangesuna maggako hi maggaane. Ye esini nuwadeko taame garesa. 29 Ha esi maaqoro woggaa 'Aadeko' hidi hiyoro gishako hay e maaqeesume buronako hinuko ta zeerdo.