16
1 Sekkeni Yesuusay "Haanxho uddi hinuse zeerese ta dandadhosi hi aadexo garafa undofita hidiko. 2 Axiti usaara bidzeto hi keenguwannikeko Bhikkilo Zawitaafa hinumba u kesse. Fetto hinumba wodhesi uddi hade Wonto magguse hanta hantekeysi u maxe woggako yoonesa. 3 Haanxho uddi u hantesi nuwade oo'oyne tamba be erdo baa gishako. 4 Ha esa hinuse ta zeeresi ye esi maaqoroniyaka hinuse ta zeerdosa gaxxhi kille e maaqeesume hi erorosako. Ha e buro haanxho hinuse zeere ta dheeddechoshi hinunaara wolko ta yecho gishako" yeydi e hido.
Ayaana Geeshi hanta
5 Sekkeni Yesuusay "Hattema tamba ansechaashukoko dhaddi ta hange. Hi giddaafa 'Ay ne hange?' hidi tamba oyceshi baasso. 6 Ha esa ta zeerdo gishama iitanako hi higillese. 7 Tanimay hinuse ohesi aadeko. Hame ta dheeddako hinumba minxesi hinuko yoowaa gisha ta hamey hinuse gardese modheko. Ta hando geede esani hinukoko ta anxe. 8 Ayaana Geeshi be yoodo geede cubbo u keengenike, Wonto buro gizo u maaquwannike, u gara e yaa'uttenikeni ha saha gara yese axe e eruse. 9 Cubbo gisha e erusesi tamba aadexe u dheeddosi ususe cubbo e maaqenikeko. 10 Gizete gisha e erusesi adeko ta hangesaara ha e geede sekke tamba hi beewasaarako. 11 Yaa'a gisha e erusesi ha sahase afana maaga maaqe Humbayey yaa'uttosako.
12 Yebo lagako hinuse ta zeere zeerey yecha, hattema hinuse deexhako e deexhe. 13 Aade eruse Ayaana Geeshi be yoone woggaaka uddi aadiyako hinumba e durke. Ye esini Ayaana Geeshini beekofa zeeruwasso, be siinesawoko e zeere. Buro gara maaqesako hinuko e ohe. 14 Ta maxowafa etti hinuse e zeere gisha tamba kuxako e kuxe. 15 Nuwadese maaqesi uddina taasuko. 'Taase maaqesaafako etti hinuko e zeere' hidi ta hidosi ye e gishako" yeydi e hido.
Higilsay maggaako arte
16 Sekkeni Yesuusay "Oddhe wogga geede tamba beewaytako. Yeydiwo oddhe wogga geedeni assi tamba beetako hi beene" yeydi e hido.
17 E erusichoshitaafa bidzi bidziti "Ha 'Oddhe wogga geede tamba beewaytako. Yeydiwo oddhe wogga geedeni assi tamba beetako hi beene' yeydi e hidosaara 'Nuwadekoko dhaddi ta hange' hidi ha nuuse e zeerdosaaray abani? 18 Ha 'Oddhe wogga geede' yeydi e hido zeerey abani? E zeerdosi nuuse gello baasso" yeydi wola sekke hanke u oycicha.
19 Yesuusani bemba oyceshe u hinesa erdi usuko "Sekke hanke wola ha hi oyceshi 'Oddhe wogga geede tamba beewaytako. Yeydiwo oddhe wogga geedeni assi tamba beetako hi beene' yeydi hinuse ta hidosuwani? 20 Hinuse ta ohesi fetto aadeko. Hinuni hi yeeke, hi tosshe, ha saha axitimay maggako u magge. Hinuni hi maddhunge, hi higile, hi higilsamay maggaako e arte. 21 Bidzi indoy i yele woggay elloyna zersona iitanako i maddhunge. Be yello geedema ha saha gara kille yeley bento gisha maggaafa dendasuna buro be maddha botako i bote. 22 Ye esuke hattey hinuse maddhaara higilsaarako. Maaquwaye baaka sekkeko hinunaara ta muhe, yenniyani maggako hi magge, hi magga baysese danda'esi baasso. 23 Ye wonte tamba hi shi'oronike hinumba worgusuwasso. Hinuse ta ohesi fetto aadeko. Nuwadey ta sunxuna hi shi'e abako uddiko hinuse e inge. 24 Hatte aallo ta sunxuna abani shidhobaytako. Hi maggay facete keenguwasa maaqoronike Wonto shi'uwayte, efako hi ekke.
25 Haanxhi zeere hinuse ta zeerdosi mamakonawoko e maaqicha. Ha e geede sekke nuwade gisha mamakona e maaddho baanne tiddhissi hinuse ta zeere woggako yoonesa. 26 Yenniyaka ta sunxunako hi shi'e, tanini 'Nuwadeko hi gisha ta shi'e' yeydi hiwwasso. 27 Tamba hi eehe gishaara 'Wontokofa e yoodo' hidi tamba hi aadexe gishaara nuwadey beese hinumba eehako e eehe. 28 Nuwadde da'aafa kessiko ha saha gara ta yoodese, hattema ha saha dhaddiko nuwadeko ta hange" yeydi e hido.
29 E erusichoshiti "Hay hatte mamakona e maaddho baane tiddhissiko nuuse ne zeerdo. 30 Uddi abako ne erenikiyara ooneni ne gara oyche uqusese e worgusuwanikiyara hatte erdunxhiko. Ye esini Wontokofa kessi ne yoodosi 'Aadeko' hidi nu eforosa matiko e yese" yeydi u hido.
31 Yesuusani "Hatte 'Aadeko' hidi hidiya hi yese? 32 Siwwayte! Hi bidzi bidzina hi godowaanna godowaanna hi budutte woggaara tamba ta goshuna hi dhagge woggaarako yesa, hay elliko e yese. Nuwademay taara yese gisha ta goshewo maaquwasso ta yesesi. 33 Ha esa hinuse ta zeerdosi taara yesine modhete hi degexorosako. Ha saha gara yesine maddha giddaako hi yese. Bidzoni hooddofita, ha saha iisshiko ta yese" yeydi e hido.