11
Aalazarey haybowafa dendosa
1 Bidzi axi Aalazare sungesi Biitaniya sunge katama hardi e yecha. Ye Biitaniyay Maaramiyara isindo busho Martaaray essaaka yecho katama e maaqicha. 2 Ye Maaramey Laaxi toke shittona tisshi be qinona ucechanniyoko i maaqicha. Harda Aalazarey isindo na'uko e maaqicha. 3 Ye Aalazareyndo bunaycey "Laaxo, ne eehicho Aalazarey hardiko yese" hidi hissine Yesuusako woosso u anso.
4 Esini ye woosso siidi "Ha hargey Wonto yeley esuna kuxuttorosa Wonto kuxa gisha baaka haybose ellusesa maaquwasso" hidi e hido. 5 Yesuusay Martaaraysi isindo busho Maaramiyaraysi usindo na'i Aalazariyaraysi modhussi e eehicha. 6 Eehuwaye baaka Aalazarey hardosa siidesine be yecho godo lam'i wonte e feyssho. 7 Ye e geede be erusichoshituko "Dhaddi Yuuda wude sekke nu hammeese" hidi e hido.
8 E erusichoshiti "Nu Laaxo! Oddhe wontame e buro Ayhudaxiti nemba shuchuna iceshe hiwadiya u yecha? Hinne assiya sekke yaha ne hange?" hidi u hido.
9 Yesuusani ususe "Bidzi wontaafa fo'ey yesesi tamma lam'i saate maaquwaye? Wontana hantesi yesa'ayko ha saha fo'e be beene gisha dhumuttuwasso. 10 Qama hantesimay fo'ey baa gisha dhumuttoko e dhumutte" yeydi e mato. 11 Ye e esa be zeerdosi geede assi "Ni lagge Aalazarey geti e yese gisha birkusiyako ta hange" hidi e hido.
12 E erusichoshiti "Laaxo, geti yesso hargiyafa loolako e loole" yeydi u hido.
13 Yesuusay zeerdechoshi Aalazare haybo gishako e maaqicha, ususema gehunxi gisha e zeerdosako e bishicha.
14 Hinneko Yesuusay tiddhissi "Aalazarey haydhiko yese. 15 Tamba hi aadexorosa yaha ta dheeddosuna maggako ta magge. Hattema esuko nu hammeese" yeydi e hido.
16 Yenniyani Didimose sunge Toomaasenia beera yecha e erusichoshita "Nuni esaara hay'ese nu hammeese" hidi e hido.
17 Yesuusay yaha handi ello wogga Aalazarey mooguttowafay oyddi wonte maaddhi e yecha. 18 Biitaniya katamay Yerusaleemefa haydzi kiilo meetire aallowoko e zaricha. 19 Martaara Maaramiyara usindo na'i haybose maamusese laga Ayhudaxiti yahafa yoodi u yecha. 20 Martani Yesuusay yoodo odo siidi mokkese i kesso. Maaramey yenniyaka zawa i yecha. 21 Martani Yesuusako "Laaxo! Haya ne yessako nuundo na'i hay'uwadiko e yecha. 22 Maaquwaye baaka hatteni Wontoy abani e maaqo'aykoni ne shi'esa e siinenike erako ta ere" hidi i hido.
23 Yesuusani "Neyndo na'i haybowafa dendako e dende" hidi e hido.
24 Martani "Aallicira wonte uddi axi haybowafa dende wogga e dendenike erako ta ere" hidi i hido.
25 Yesuusani "Haybowafa denxesaara yeso ingesaaray tambako. Tamba aadexesi hay'o'aykoni en'ako e maaqe. 26 Taanna yesesaara tamba aadexesaaray be uddina fetto hay'uwasso. 'Ha esa aadeko e zeerdo' hidi hitta ne hine?" hidi e oycco.
27 Isini "Eewa, Laaxo! 'Ha saha gara e yoone' hidi hicho Wonto yele Mesihey nemba maaqenike 'Aadeko' hidiko ta hine" hidi i hido. 28 Martay ye esa be zeerdo geede handi beyndo busho Maarame beeko xhinqissi xheydi "Laaxi yoodiko nemba worgiya yese" hidi i oto. 29 Maaramey ye esa siidi ukkenawo dendi Yesuusako i hando.
30 Yesuusay Martay esa motto godowoko haga katamaa gello badi e yecha. 31 Iso maamusese zawa yecha Ayhudaxiti Maaramey alleydi kessosa be beedo wogga "Aalazare boossa gara handi yeefesuko iinne" hidi hissine i geede u kesso. 32 Maaramey Yesuusay yecho godo yoodi esa be beedoniyaka e toke gara undi "Laaxo, haya ne yessako nuundo na'i hay'uwadiko yecha" hidi i hido.
33 Yesuusani Maaramey yeekusuniyara isaara yooda Ayhudaxiti yeekusuniyara beedi be gawwaana iitana higilli e maddhundo. 34 "Ay hi mooddo?" hidi e oycco. Usini "Laaxo, yoodi beewwa!" hidi u hido. 35 Yesuusani yeetti aafunxe e gusso. 36 Hinne Ayhudaxiti "Beewayte! Waanidi esa e eehichosha" hidi u hido. 37 Usukaafa bidzi bidziti "Ye bal'a maaqichashe loolusechashi ha axi hay'uwannike mahese danda'uwadiya e yecha?" hidi u hido. 38 Yesuusay sekke assi be gawwaana iitana higilli boossaaka e hando. Boossay malla shuchuna tucuttese googgo e maaqichab. 39 Yesuusay "Ye shuche ooxuwayte" hidi e hido.
Ye haydhechashindo busho Martay "Laaxo! E haydhowafay oyddi wonte maaddhiko e yese, hatte xhinqako e xhinqe" hidi i hido.
40 Yesuusani " 'Aadexa'ayko Wonto kuxa fuulako ne beene' hidi hido badiya ta yecha?" hidi e hido. 41 Axitini shuche u oosso. Ye e geede Yesuusay wokke afaa beedi "Nuwadde! Taase ne siido gisha nemba galatako ta galate. 42 Uddi wogga taase ne siinesa erako ta ere. Tamba ne ansonike 'Aadeko' hidi u hiyorosa ha ta googe ee'e axitume hissineko yeydi nemba ta shidho" yeydi e hido. 43 Ye esa be shidho geede be kato keddaysi "Aalazare! Kesuwa!" hidi e hido. 44 Haydhecha Aalazarey e garani maa'oy xhaaxhutti yesenike e aafushani fede maa'ona be aykuttesenike boossaafa e kesso. Yesuusani "Birchuwayte dhaddi hammeese" hidi e hido.
Yesuusa gara kumutta kume
Mat 26:1-5; Mrq 14:1-2; Luq 22:1-2
45 Maarame maamusese yoodecha Ayhudaxitaafa lagay e matosa beedi esa u aadesso. 46 Usukaafa bidzi bidziti dhaddi handi Yesuusay hanto hanta Farasaxituko u oto. 47 Kahinituse afana maagitaara Farasaxitaaray Ayhuda gate aheesita bhikkilli "Ha axi laga micushe hanta e hante gisha am nu hanto? 48 Mikke ni dhaba'ayko uddi axuko esa 'Mesiheko' hidi aadexesa. Hikketeko Rooma tooraxiti yoodi ni Hayla Zawani ni axitani u bayse" yeydi u hido. 49 U giddaafa Qayaafa sunge ye berani kahinituse afana ade maaqesi zeerisineni "Hinuni hi ere basi baasso. 50 Ni axi uddi baaneesume bidzi axi laga gisha hay'esi bishesha e maaqenike gaxxho baytuwa?" hidi e hido.
51 Ha esa yeydi e zeerdosi beekofa maaquwadiko e yecha. Ye bera kahinituse afana ade e maaqusune Yesuusay Ayhudaxiti gisha hay'ese buro gara hinesako kaayo e zeerdo. 52 E hay'esi Ayhudasewo e maaddho baane be godowa godowa yese Wonto nayshita bhikkilli bidzi omma mahesuko e maaqicha. 53 Ye wontiyafa ayti Yesuusa wodhese u kundo. 54 Yenniyafa ayti Yesuusay Ayhudaxiti gidda tiddhiyanna hante inxhadhi yaafa saha mela da'aa yese Efreeme katama handi yaha be erusichoshitaara e decco.
55 Ayhudaxiti Garo Massalay uddhi e yecha. Laga axiti Garo Massalame buro Muse wogake bemba geeshe wogac alsese Yerusaleeme be wudefa wudefa u hando. 56 Usini Wonto Hayla Zawa Yesuusay yoonesa eedhi kakkisine "Am hinuse e bishe? Haliya Yesuusay ha massala yoota e yoone?" yeydi wola u oycicha. 57 Buro kahinituse afana maagitaara Farasaxitaaray Yesuusa aykese e yese godo eresi yesa'ayko usuko ohorosa axituko uddi woosso u garsecha.