10
Modhe yeemaxi gisha
1 Sekkeni Yesuusay "Hinuse ta ohesi fetto aadeko. Doriti anxa sumaanna maaquwasa fede ogena gelesi kaysowara fuulowarako. 2 Sumaanna gelesimay dorita yeengesako. 3 Sumaa kakkesi esuse gasa do'ako e do'e, doritini e katoko u siine. Esini be dorita u sunxuna sunxunako xheydi usoni isshi wude e kesse. 4 Be dorita uddi wude be kesso geede u buro gardikoa e hange. Usini e kato shati be ere gisha e geedeko u hange. 5 Fedase e kato be eruwa gisha esukofa dhaddi u ba'esa baaka e geede hamuttuwasso" yeydi e hido.
6 Yesuusay ha zeere yeydi ususe e zeerdinne ye e birchey ususe gele e dheeddo. 7 Hinne Yesuusay sekke "Hinuse ta ohesi afetto adeko. Doriti essaanna gele sumay tanko. 8 Taame buro yoodasiti uddi kaysitaara fuulitaarako. Maaquwaye baaka doriti ususe siyutto baasso. 9 Sumay tambako, taakona gelesi loolako e loole. E gele e kese, essaaka be yeemutte modhe godoni e degexe. 10 Kaysoy esume e yoonesi kaysese, shufesaara baysesaarako. Tanimay yoodosi yeso u degexoronikiyara uddi ogena bidzoni facete keenguwa yeso u keemoronikiyarako.
11 Modhe yeemaxi tambako. Modhe yeemaxi be yesoko be doritume hissine garsi e inge. 12 Dorita anbaxhena yeengesi sudhami yoosune be beene woggaaka "Ha esi taasuko" hidi yeengesa be maaquwa gisha dattiko dhaddi e woxhe. Sudhamini dorita shoddi e ekke, ye doritini u budutte. 13 Ye esi esume datti e woxhesi anbaxhena be yeengicho gishaara dorita be higiluwa gishaarako. 14 Modhe yeemaxi tambako. Tani ta dorita ere, ta doritini taa ereydiko. 15 Nuwadey tamba erenikiyara tani nuwade erenikiyarako tani uso ere. Tani ta doriti gishako tamba haybose garsi inge. 16 Ha doritaara wolla aquwassako fede dorita ta keenge. Uso hanke ooweko tamba e worguse, usini ta kato u siine, ha doritaara bidzo u maaqe, uso yeengesini bidzo e maaqe hidiko.
17 Sekke ta yesoronike tamba garsi ta inge gisha nuwadey tamba eehako e eehe. 18 Tamba ta eehana garsi ta ingesa baaka tamba ta ingoronike osana mahesi baasso. Tamba garsi ingesaara sekke ta yesoronike taa mahesaara adeto keemako ta keenge. Ha woosso ta ettosi nuwadekofako" yeydi e hido.
19 Yeydi e hidosuna sekke Ayhudaxiti gidda shahoy gello. 20 U giddaafa lagiti "Ha e gara xhoozuko yesa, goojhiko e yese, abasuwa esuse hi siine?" yeydi u hido. 21 Fediti assi "Xhooze keenge axi zeerenike zeeriya baasso. Xhoozi bal'ay beyoronike mahese danda'aa e danda'e?" yeydi u hido.
Wonto yele gisha
22 Yerusaleeme Wonto Hayla Zawa Killooma Massalab kuxicho wontey ello. Ye woggani bargo maaqicha. 23 Yesuusay Wonto Hayla Zawaa "Salamone kara" hidi hiyutte godona sekke hanke e hanticha. 24 Yenniyani Ayhudaxiti hanke e googiya bhikkilutti "An wonte aallona numba lam'i maxo gawwa ne gade? Neni Mesihe maako tiddhissi nuuse ohuwa!" hidi u oycco.
25 Yesuusani "Hinuko otiko ta yese, hinunimay 'Aadeko e zeerdo' hidi hiwaytako. Nuwade sunxuna ta hante hantako taase ato maaqesa. 26 Hinunimay ta doritukafa hi maaquwa gisha tamba 'Aadeko e zeerdo' hidi hiwaytako. 27 Ta doriti ta kato u siine, tanini uso erako ere. Usini ta geedeko taara wolko u hange. 28 Koolo makkina u yesoronike ta mahe, koolo makkina bayese danda'uttuwasso. Uso ooneni ta kuchiyafa shoddi ekkuwasso. 29 Uso taase inda nuwadey uddime garoko e gare. E kuchiyafa ooneni uso shoddi efese danda'uwasso. 30 Taara nuwadiyaray bidziko" yeydi e hido.
31 Yenniyani assi Ayhudaxiti esa shuchuna iceshe shuche u etto. 32 Yesuusani "Adey taako 'Hantuwa' hidi hidosa laga modhe hantako hinuse ta hanto. Hinne tamba esume hi iceshi an hantamewu?" yeydi e hido.
33 Usini "Nemba esume shuchuna nu iceshi Wonto ne cassho gishako baaka ne hanto modhete hanta gisha maaquwasso. Ye esini neni axe maaqichine 'Wontoko tani' hidi ne hido gishako" hidi u hido.
34 Yesuusani "Hi woga fissharowa Wontoy zeerisine 'Hinuni hi bidzi bidzina wontitawoko hidiko ta hido' yeydi hinesi diizutto baye? 35 Axi Hayla Fissharowa diizuttesesa baysese danda'uwasso. Yebo, Wonto katoy usuko yoodosita uddi u bidzi bidzo wontitako yeydi hidiko e yese. 36 Hine nuwadey tamba hantesa mati suuzzi ha saha gara e ansine 'Wonto yeleko tani' hidi ta hido gisha 'Wontoko e cassho' hidi abasuna tamba hiine? 37 Tani nuwadey 'Hantuwa' hidi hidosa hantuwasa ta maaqo'ayko tamba aadesofita. 38 Nuwadey tamba 'Hantuwa' hidi hidosa hantesa ta maaddho geede tamba aadexuwasa maaqo'ayketeni ta hante hanta 'Ha esi Wontokofako' hidi ekkuwayte. Ha esunako nuwadey taara bidzo maaddhi tani nuwadiyara bidzo maaddhesesa tiddhissi hi ere" hidi e hido.
39 Assi esa aykese u wordechoyne u kuchiyafa dhaddi tulxhi kessi e hando. 40 Yordanose waaxi semfa bade buro Yohanisey xhamaqicho godo dhaddi e hando. Yahani e decco. 41 Laga axiti esuko yoodi "Yohanisey fetto bidzi micushe hanta hanto badiko e yecha. Beese hante dheeddakoni ha axi gisha e zeerdo zeerey uddi aadeko" hidi u hido. 42 Yahani laga axi esa aadesso.