9
Bal'a maaddhi yeluttecha adey beedosa
1 Yesuusay oge garichine bal'a maaddhi yeluttecha bidzi ade e beedo. 2 E erusichoshiti "Laaxo! Ha adey bal'a maaddhi yeluttoronike cubbo hantasi oonena? Esa yella adiyara indowarani esuwara?" yeydi u oycco. 3 Yesuusani "Wonto hantay esuna addaa bentorosa baaka esa yella geritani maaqqe esi hanto cubbona maaquwasso. 4 Wonta e yesune tamba ansasi woosso hanteko taa e worguse.a Ooneni essaanna hantese danda'uwa qamako yoonesa. 5 Ha saha gara yesine tani ha sahase fo'eko" yeydi e hido.
6 Ye e geede cuche yekke sahaa cutti cuchuna saha timussi ye urqana ye ade aafe e tissho. 7 Ye bal'a "Handi Selihoome eelaa shohuttuwa!" yeydi e hido. Siloome hidi hiyoy anxuttase yeydi hiyoko e maaqicha. Hinne ye adey handi shohutti beesine yoodo.
8 Dooditani maaqqe buro abako e shi'usune beedechaashitini "Ha axi hade utti e shi'usune nu beecho axe maaquwaye?" yeydi u hido. 9 Bidzi bidziti "Eewa esako" hidi u hido. Feditini assi "Esa e bishesha baaka esa maaquwasso!" hidi u hido. Esimay "Tambako" hidi e hido.
10 Axitini "Hinne ne aafey waanidi beyese dandadho?" hidi u oycco.
11 Ye adeni "Yesuusa sunge adeko saha timussi ye urqana ta aafe tisshi 'Handi Siloome eelaa shohuttuwa' hidi e hineko handi shohutti ta beedo" yeydi e hido. 12 Usini "Hinne ay ye axi yese?" hidi u oycco. Esini "Aya e yesesa tani eruwasso" hidi e hido.
13 Ye e geede axiti ye bal'a maaqichine loolla ade Farasaxiti buro u aando. 14 Yesuusay saha urqa mati ye ade aafe e loolusso wontay sanbatako e maaqicha. 15 Hinne Farasaxiti ye ade "Waakidini beyese ne dandadho?" hidi u oycco.
Ye adeni "Ta aafe urqana e tisshineko shoti hay ta beedo" hidi e hido.
16 Yenniyani Farasaxitaafa bidzi bidziti "Ha axi sanbatase wogay otesesa be kakkuwa gisha Wontokofa maaquwasso" hidi u hido. Feditini assi "Hine cubbache maaqe axi ha e bisha micushe hantita waydi hantese e danda'e?" yeydi u hido. Ye esuna u giddaaka shahoy gello.
17 Ye e gisha ye bal'a maaqicha ade "Ha ne aafey beyorosa mata ade gisha am neni ohe?" hidi assi u oycco. Esini "Kaayaxuko" hidi e hido. 18 Ayhuda afana maagiti esa yella gerita xheydi waydi bal'a e maaqichonikiyara e beedonikiyara be oycoro makko bal'a e maaqichosha "Aadeko" hidi hiye u inxhadho. 19 Usini "Ha esi hi yeliya? Aafe bal'a maaddhiko e yelutto yeydiya hiine? Hinne hatte waydi beyese e dandadho?" hidi u oycco.
20 E geritini "Ha esi nu yele e maaqenikiyara bal'a maaddhi e yeluttonikiyara erako nu ere. 21 Hatte waysi e beedosaara ooney esa loolusosaara eruwanxhiko. Esi beese uuxhako, beese be qinose zeerako e zeere. Esa hinuse oycuwayte" yeydi u hido. 22 Esa yella geriti esume yeydi u hidosi Ayhuda afana maagita be jhassho gishako e maaqicha. U jhasshichoshini " 'Yesuusay Mesiheko' yeydi hinesi yesa'ayko nu Bhikkilo Zawaafa goodako nu goode" hidi u hidecho gishako. 23 Hinne yella geriti "Esi beese uuxhako, esa oycuwayte" hidi u hidosi.
24 Ye e gisha ye bal'a maaqicha axe assi hanke beeko xheydi "Neni neese 'Meddha Wontoppa' hidi caadhi aade zeeruwab. Ha axi cubbache maaqenike nuni erako nu ere" hidi u hido.
25 Ye adey "Cubbache esi maaqe esi maaqe dheebe tani eruwasso. Ta eresi bidzi basuko. Ye esini bal'a ta maaqicha, hatte hay beyaka ta yese" hidi e hido.
26 Usini "Am neese e hanto? Waakisiwu ne aafey beyoronike e mato?" hidi u oycco. 27 Esini "Burochi ta otinne siye hi dheeddechoshi. Hinne assi abasuwa sekke siyese hi worge? E bade maaqesuwa hiineni?" hidi e hido.
28 Usini "Nenko neese e badey, nuni nuuse Muse badeko. 29 Wontoy Muse zeerusonikeko nuni ere. Ha Yesuusa hissoosi ayafa e maaqesa eruwanxhiko" hidi hissine e gara u huullo.
30 Ye adeni " 'Ha axi ayafa e maaqenike eruwanxhiko nuni' yeydi hiidosi micushako e micushe. Hinuni yeydi hiwayte baaka ta aafema loolusasi esako. 31 Wontoy cubbachituse e siwwasa erako nu ere. Wontoy biya kuxesusaara be maxoke hantesusaarako e siine. 32 Ha sahay meddhuttowafa ayti bal'a maaddhi yeluttecha axe loolusa axuko yesa yeydi hiyutti eruwasso. 33 Ha axi Wontokofa maaqe dheeddako aban hantese danda'uwadiko e yecha" yeydi e hido.
34 Usini "Neni cubbache maaddhi yeluttese axi numba erusesuwa neyneni?" yeydi hissine Bhikkilo Zawafa wude esa u kesso.
Wonto ogese bal'a maaqeesiti gisha
35 Ye bal'a maaqicha ade be Bhikkilo Zawafa u kessosa Yesuusay e siido. Esani degessi "Axi yele hidi hiyuttase aadexa ne aadexe?" yeydi e oycco. 36 Ye adeni "Laaxo! Esa ta aadexoronike esi oonewa?" hidi sekke e mato. 37 Yesuusani "Hade buro ne beedechoshako ha niya zeerusesini esako" yeydi e hido. 38 Ye adeni "Laaxo! Niya aadexako ta aadexe" yeydi hissine e disso. 39 Yesuusani "Beewadechashiti beyoronike beya yechashiti bal'a u maaqoronike yaa'esuko ha saha gara ta yoodo" yeydi e hido.