8
Laggetowafa aykutta indo
1 Ye e geede Yesuusay Zayte Bakka hando. 2 Guta ketiya sho'e assi Wonto Hayla zawaa e yoodo. Axitini uddina esuko u yoodine uttisine eruse e ayto. 3 Muse woga eruseesitaara Farasaxitaaray bidzi indo i laggetichoyne ayti oodi laga axiti buro u esso. 4 Usini "Laaxo! Ha indoy laggetowafako i aykuttese. 5 Ha esa bissheshe indoy shuchuna icutti i hay'oronike Muse wogaaka nuuse ohuttiko e yese. Nenichi? Ha isuse am ne ohe?" hidi u oycco.
6 Yeydi esume u hidosi e garafa zeere degessi esuna esa luufese oge worgiya be yecho gishako. Yesuusani yekke sahaa ullaydi be gil'ana saha gara diize e ayto. 7 Mati mati esa oyce u gello geede wokke kedda hidi "Ha hi giddaafa cubbo keenguwasi burona shuche etti iso icuwaye" yeydi e hido. 8 Assi yekke sahaa ullaydi saha gara diize e gello.
9 Usini ye esa be siido wogga cimaafa ayti be uddina bidzo bidzoydi yaafa dhaddi kessi u hando. Hinne Yesuusaara ye indowarawoy yaha be goshe u atto. 10 Ye e geede Yesuusay wokke keddaydi "Nuunde! Niya luukichashiti ay yese? Ne gara yaadhay ooneni baye?" hidi e oycco.
11 Isini "Laaxo! Ooneni baasso" hidi i mato. Yesuusani "Tanini ne gara yaa'uwasso. Hanguwa, hanzowafa sekke cubbo hantofuna!" hidi e hido.]
Yesuusay ha sahase fo'eko
12 Sekkeni Yesuusay "Tani ha sahase fo'eko. Taara yesesi uddi yesowa aange fo'eko e degexesa baaka cencha gidda sekke hanke hantuwasso" yeydi e hido.
13 Farasaxiti "Neni neese ne gisha ato maaddhako aadeko hidi efuttesa maaquwasso" hidi u hido.
14 Yesuusani "Tani ta gisha zeerdako ayafa ta yoodonike aya ta hangenike ta ere gisha ta zeerey aadeko hidi efuttesako. Hinunimay ayafa ta yoodonikiyara aya ta hangenikiyara eruwaytako. 15 Axi yaa'enikeko hi yaa'e, tani oone garani yaa'uwasso. 16 Tani yaadhakoni ta yaa'e yaa'ay aadeko. Ye esini tani ta goshewo yaa'uwasso. Tamba ansa afaase adey taara wolkoko e yese. 17 Lam'i axi bidzi nuunawo zeerdako ye zeerey "Aadeko" hidi efuttoronike hi woga fissharowa diizuttiko e yese. 18 Hay, tani taasuko zeere, tamba ansa nuwadeni ta gishako zeere" yeydi e mato.
19 Usini "Niyadey ay yese?" hidi u oycco.
Yesuusani "Tambani maaqqe nuwadeni eruwaytako. Tamba erdesesa maaddhako nuwadeni erako hi eraane" hidi e hido. 20 Ye esa e zeerdosi Wonto Hayla Zawa karaa miijhe essa dakkicho saaxhine da'aa axita erusisineko e maaqicha. E woggay ello badecho gisha esa ooneni ayto baasso.
Yesuusay afaafa yoodasuko
21 Yesuusani assi zeerisine "Dhaddiko tani hange. Hinuni tamba worgoko hi worge, maaquwaye baaka hi cubbowara yesineko hi hay'e. Tani hange godo hinuni hamese danda'uwaytako" yeydi e hido.
22 Ayhuda afana maagitini " 'Tani hange godo hinuni hamese danda'uwaytako' yeydi e hinesi bemba wodhesuwa e hineni?" yeydi u hido.
23 Esini "Hinuni yekke oomofako, tani wokke afaafako. Hinuni ha saha garafako, tani ha saha garafa maaquwasso. 24 Ye e gishako 'Hi cubbowara yesineko hi hay'e' yeydi ta hidosi. 'Yesesako' hidi hiyuttesa ta maaqenike 'Aadeko' hidi efe hi dheeba'ayko ta otonike hi cubbowara yesineko hi hay'e" yeydi e hido.
25 Yenniya usini "Hinne neni oonewa?" yeydi u oycco.
Esini "Oone ta maaqenike hinuse burowafa ayti otiko ta yese. 26 Hi gisha ta zeeresaara ta yaa'esaara laga zeereko ta keenge. Ye esini yaha yesune, tamba ansasi beese aadaxuko. Tani esukofa ta siidosako ye esawo ha saha gara yese axuse ta ohe" yeydi e hido.
27 Ade maaqe Wonto gisha e zeerdosi ususe gele e dheeddo. 28 Ye e gisha Yesuusani "Axi yele hidi hiyuttesa keddaysi hi suxhoro woggaako 'Yesesako' hidi hiyuttesa ta maaqenike hi ere. Yeydiwo adey tamba erusosa ta zeerenikiyara taakofa abani ta hantuwanikiyara ye woggaako hi ere. 29 Tamba ansasi taara wolkoko e yese. Tanini esa maggusese uddi wogga ta hante gisha esi ta goshe tamba dhagguwasso" yeydi e hido. 30 Yeydi e zeerdoniyaka lagiti esa aadesso.
Abrahaame nayshiti oone maaqesa
31 Yesuusani bemba aadessa Ayhudaxituse "Hinuni ta erusenike yesa'ayko aadewo taara wolko yeseesitako. 32 Aadeni erako hi ere, ye aadeko hinumba maaketowafa shawo kesesa" yeydi e hido.
33 Usini "Numba yella adey Abrahaameko. Fetto ooneseni maala maaddhi eruwanxhiko. 'Maaketowafako shawo hi kese' yeydi waydini numba ne hine?" yeydi u hido.
34 Esini "Hinuse ta ohesi fetto aadeko. Cubbo hantesi be uddina ye cubbose e maalako. 35 Maalay bidzi zawa yessakoni koolo makkina ye zawaxe maaquwasso. Yelemay koolo makkina ye zawaxuko. 36 Wonto yeley hinumba maaketowafa kessa'ayko aadewo kessesesako hi maaqe. 37 Abrahaame nayshe hi maaqenikema erako ta ere. Maaquwayte baaka hinuse ta otosa siidi efe hi dheeddo gishako tamba wodhese hi dendo. 38 Tani nuwadiyara yesine ta beedosako ta zeere, hinuni hinadekofa hi siidosako hi hante" yeydi e hido.
39 Usini "Numba yella adey Abrahaameko" hidi u hido.
Esini "Abrahaame nayshe hi maaddhako Abrahaamey hantosako hi hantaane. 40 Hattema Wontokofa ta siido aade hinuse zeerda tambako wodhese hi dendese. Abrahaamey yeysi hanto baasso. 41 Hinuni hinadey hanticho hantako hi hante" yeydi e hido.
Usini "Nuni laggetona yelutta woyleysa maaquwanxhiko. Bidzi adeko nu keenge, esini Wontoko" yeydi u hido.
42 Yesuusani "Wontoy hinade maaddhako tani Wonto da'aafa kessi ta yoodo gisha tamba eehako hi eehaane. Esako tamba ansosa baaka taase yoodo baasso. 43 Abasuwa ta zeeresi hinuse e geluwaane? Ta zeeresa efese hi danda'uwa gishako.
44 Hinuni hinade maaqe Humbaye nayshuko. Hi worgesi hinade maxo hanteko. Esini achaafa densi axe woddhesesako. Aade be keenguwa gisha aadiyara wolko muhuwasso. Zaade be zeereniya beekofako e zaade. Esi beese zaadaxuko, zaadeseni e xhabhoko. 45 Tanimay aadewo ta zeere gisha 'Aadeko e zeere' hidi hiwaytako. 46 Hinukaafa tamba 'Neni cubbaxuko' yeydi hinesi oonena? Hinne aade zeeresa ta maaddho geede abasuwa ta zeere 'Aadeko' hidi hi ekkuwaane? 47 Wontokofa maaqesi Wontoy ohesako e siine. Hinunimay Wontokofa hi maaquwa gisha siwwaytako" yeydi e hido.
Yesuusay Abrahaamemeni buro yechashuko
48 Sekkeni mati Ayhudaxiti " 'Neni iita Samaraxuko, xhoozuko ne gara yesa' yeydi nu hidosi aade maaquwaye?" hidi u hido. 49 Yesuusani "Ta gara xhoozi baasso, tanimay nuwadeko kuxe. Hinuni tambako hi eerse. 50 Tani taa kuxorosa worguwasso. Tani kuxuttorosa worgesaara taase yaa'esaaray feday yesako yese. 51 Hinuse ta ohesi fetto aadeko. Ta ohenike yesesi yesa'ayko koolo makkina hay'uwasso" yeydi e hido.
52 Ayhudaxitini "Hattema xhoozi ne gara yesesa erdiko nu yese. Fetto Abrahaameni haydhiko yese, kaayaxitini haydhiko yese. Hinne neni waydiwu 'Ta ohenike yesesi yesa'ayko koolo makkina hay'uwasso' yeydi ne hine? 53 Fetto neni nuu yelli haydha ade Abrahaameme garuwa ne gare? Esi haydhiko yese, kaayaxitini haydhiko yese. Hine 'Tani ooneko' hidini niya ne hine?" yeydi u hido.
54 Yesuusani "Tani taanna taa kuxa'ayko ta kuxay wooma keenguwasso. Tamba kuxesi 'Nu Wontoko' hidi hiine nuwadeko. 55 Ye nuwade hinuni eruwaytako baaka tanimay erako ere. Tani 'Esa eruwasso' hidi hinesa maaddhako hade hinuke tani zaadaxuko maaqe. Maaquwaye baaka tani erdiko e katoni ta kakke. 56 Hinumba yella ade Abrahaamey ta wonta beyesuko e col'o. Beedini e maddo" yeydi e hido.
57 Ayhudaxiti yenniya "Ichichi tammi berani kundo baa neni waakidiwu 'Abrahaame ta beedo' hidi ne hine?" yeydi u hido.
58 Yesuusani "Hinuse ta ohesi aadeko. Abrahaamey yelutto baaneni tani yesesawoko" hidi e hido.
59 Hinne usini shuchuna esa iceshe shuche u etto. Yesuusay u da'aafa biya aasshi Wonto Hayla Zawa karaafa kessi dhaddi e hando.