7
Yesuusaara esindo na'axhitaara
1 Yeenxhi uddi maaddho geede Yesuusa Ayhuda afana maagiti wodhese wordo gisha Yuuda wude sekke hanke hante inxhadhi Galila giddaa e hanticha. 2 Yenniyani Ayhudaxiti kuxicho Asha Massalay uddho. 3 Ye e gisha Yesuusayndo na'axhey esuko "Neera yeseesiti ne hante hanta beyoronike hayafa dendi Yuuda wude hanguwa! 4 Tiddhiya bentese worge axi aachiyaanna be hante hanta hantuwasso. Neni haanxhi abako hantesa maaqo'ayko nemba uddi axuse addusuwa!" yeydi u hido. 5 Yeydi hiyeseni u dandadhosi fetto esindo na'axhitaaraydi esa aadesso badecho gishako.
6 Yesuusani "Ta woggay ello badiko e yese. Hi woggamay uddi wogga bishesheshako. 7 Ha saha axiti hinumba inxha'ese danda'uwasso. U hantay iita maaqesa addaa ta kesse gisha tambama inxha'ako u inxha'e. 8 Hinuni massalaaka dhaddi hanguwayte, tanimay ta woggay ello badi yese gisha massalaaka hanguwasso" 9 yeydi hidi esi Galila atto.
Yesuusay Asha Massalaaka axe erussosa
10 Yesuusayndo na'axhey Asha Massalaa handesune esi tiddhiyanna maaddho badi e yesune aachiyaanna ye massalaaka e hando. 11 Ayhuda afana maagiti massalaaka "Ye axi ay e yese?" hidi Yesuusa worgiya u yecha. 12 Yaha yecha axi lagay e gisha tiddhiyanna maaquwasa sekke hanke wolko gugun'iya u yecha. Bidzi bidziti "Esi modheko" yeydi hiya yesune fediti "Oo'o, axuko e haluxe" yeydi u hicha. 13 Maaquwaye baaka Ayhuda afana maagita be jhashoshuna e gisha ooneni tiddhissi zeeruwadiko yecha.
14 Massala kuxisine e gidda yoodi axi ellusune Yesuusay Wonto Hayla Zawa qeyshi giddaa handi eruse e ayto. 15 Ayhuda afana maagiti "Esa erussay baanne ayafana ha axi ha e gede era e degesso?" yeydi u micco.
16 Ye e gisha Yesuusay "Tani eruse eray tamba ansa ade garafa bentasuko baaka ta garafa maaquwasso. 17 Tamba ansasi maxo hantese worgesi yesa'ayko ha eray Wontokofa bentase oo'oyne taakofa ta zeerdosa e maaqenike erako e ere. 18 Beese be qinese zeeresi be qino kuxako e worge. Ansasi kuxa worgesimay aadaxuko zaadeni keenguwasso. 19 Musey hinuse woga gaddo badiya e yecha? Maaquwaye baaka hi giddaaka ooneni woga kakkesi baasso. Hinuni ame tamba wodhese hi worge?" yeydi e hido.
20 Axitini "Xhoozuko ne gara yesa. Ooni niya wodhese worgesa?" yeydi u hido.
21 Yesuusani "Tani bidzi hantako hanto, hinuni uddi ye bidzi hantanako huulana hi mice? 22 Musey hinuse gada utte woga diizziko e gaddese. Ye wogani e bentosi Museme buro yecha hinadiyaxhi garafa baaka Muse garafa maaquwasso. Hinne sanbata wonteko gada hi uttuse. 23 Yebo, Muse woga kafeme sanbata wonte gada hi uttusso geede hinne tani sanbata wonte axe e tokiyafa e qino makko ta loolusosuna ame hi huule? 24 Hi yaa'esa essaa gelli beedi gizo yaa'uwayte baaka afaafa yaadhofita!" yeydi e hido.
Yesuusa garana denda bersa
25 Yerusaleeme katamaafa bidzi bidzi axiti "Ha axe maaquwaye wodhese u worgichoshi? 26 Hay, esi addussiko erusiya yese, usini abakoydi e gara hiyutto baasso. Ha axi aadewo Mesihe maaqenike afana maagiti erdiya u hineni? 27 Fetto ha axi an bade axe e maaqenike erako nu ere. Mesihey yooneniyaka an badefa e yoodonike erese danda'esi baasso" yeydi u hido.
28 Ye zeeriyafa dendasuna Yesuusay Wonto Hayla Zawa karaa erusisine be kato keddaysi "Taa erako hi ere. Ayafa ta yoodosa erako hi ere. Hi erdakoni tani taase ta adetona yoodo baasso. Tamba ansasi beese aadaxuko. Esa eruwaytako. 29 Tanimay esukofa ta yoodo gishaara esi tamba anso gishaara esa erako ta ere" yeydi e hido. 30 Ye woggaaka esa aykese wordi u yecha. Worguttuwaye baaka e woggay ello badecho gisha ooneni esa aykese dandadho baasso.
31 Axitaafa lagay esa aadesso. Usini "Mesihey be yoone woggaaka ha axi hantoosume gare micushe hantaa e hante?" yeydi u hido.
32 Axiti Yesuusa gisha yeydi gugun'usune Farasaxiti u siido. Ye e gisha kahinituse afana maagitaara Farasaxitaaray Yesuusa aykese wordi be yebita esuko u anso. 33 Yesuusani yenniyaka "Hinunaara wolko oddhe woggako ta dece. Ye e geede tamba ansasukoko ta hange. 34 Tamba worgoko hi worge, worguwayte baaka degexuwaytako. Tani yese godo hamese danda'uwaytako" yeydi e hido.
35 Hinne Ayhuda afana maagiti wolko sekke hanke "Nuni esa degexeesume ha axi ayni hamese e hine? Hanno Ayhuda maaquwasiti giddaaka Ayhudaxiti budutti yese godo handiya Ayhuda maaquwasita erusese e hine? 36 'Tamba hi worge, worguwayte baaka degexuwaytako. Tani yese godo hamese danda'uwaytako' yeydi e hisune abaydi hiyona?" yeydi u hido.
Yesuusay yeso waaxi gisha e zeerdo
37 Wontay massalase aallicira wonte maaqisine keddaydese wonte e maaqicha. Yesuusani axiti giddaa dendi eedhi be kato keddaysi "Waaxe sazzay yesa'ayko taako yoodi ushuwaye! 38 Tamba aadexeesuse Hayla Fissharoy ohenike yeso waaxi tultoy e gawwaafako e fol'e" yeydi e hido. 39 Ye esani e zeerdosi esa aadexesi ekke Ayaana Geeshi gishako e maaqicha. Yenniya Yesuusay be wontunte kuxa fuulaaka arto badi yecho gisha Ayaana Geeshi hodho badiko e yecha.
Yesuusa garana axiti wola shatosa
40 Axitukaafa bidzi bidziti ye esa be siidoniya " 'Yootako e yoone' hidi hiyutticha kaayaxi ha esako" hidi u hido. 41 Feditini "Ha esi Mesiheko" hidi u hido. Feditini assi "Mesihey yoonesi hinne Galilaafa? 42 Mesihey Dawite fira fiixhaafa e yeluttenikiyara Dawite katamaafa Beeteleemiyafa e yoonenikiyara Hayla Fissharowaka diizutti baye?" yeydi u hido. 43 Ha e gisha Yesuusa garana axiti wola u shato. 44 Bidzi bidziti aykese wordiko u yecha. Maaquwaye baaka ooneni esa ayto baasso.
45 Ye e geede yebiti kahinituse afana maagitukowara Farasaxitukowara maaddhi u yoodo. Woossechashitini "Ame Yesuusa ayti oowe hi dheeddo?" hidi u oycco. 46 Yebitini "Esukewo zeere axi hatte aallo ha saha gara benti eruwasso" hidi u hido.
47 Farasaxitini "Hinumbani assi halussi? 48 Yebo, afana maagitaafa oo'oyne Farasaxitaafa esa aadesase beediya hi yese? 49 Ha e geede hamiya yese axiti Muse woga gisha am u ere? U bisha axiti aacutteseesitako" yeydi u hido.
50 Buro Yesuusako handecha usaafa bidzo maaqe Niqodomosey 51 "Ni wogaaka bidzi axi be luufutto luufo burussi siido baanniyara aba e hantosi erutto baanniyara e gara e yaa'uttoronike yesa e yese?" hidi e hido.