6
Ichichi kuma axe muusse
Mat 14:13-21; Mrq 6:30-44; Luq 9:10-17
1 Ye e geede Yesuusay Xhibiriyadoose hidi hiyutte Galila bagade semfa bade e fotto. 2 Laga axiti hargaxita loolussi e hanto micushe hanta be beedo gisha e geede u hando. 3 Esini bakka gara kessi be erusichoshitaara yaha e utto. 4 Yenniyani Ayhuda Garo Massalay uddhi e yecha.
5 Yesuusani ye wogga laga axiti beeko yoonesa keddaydi beedi Filphoosekoni "Haanxhi axe uddi elle kaxa ayafaw nu woome?" hidi e oycco. 6 Esini Filphoose yeydi oyccoshi e ohesa siyeme baaka beese hantese be hinesa erako e ericha. 7 Filphooseni "U bidzi bidzise fetto me'o me'o ellusese laga kuma miijhenaa woondakoni elluwasso" hidi e mato.
8 E erusichoshitaafa bidzi Phexhrose sunda Simoonese esindo na'i Indiraaseni 9 "Ichichi bache banga booraara lam'i gulxhiyara aytese bidzi yeleko haya yesa. Hine waa hissetewa ha booray haanxhi axe ellese e danda'e?" hidi e hido.
10 Yesuusani "Axita uttusuwayte!" hidi e hido. Yahani modhe leddoy yechoyne axitini utto. Asanxiti taafoni ichichi kuma ellesako e maaqicha. 11 Ye e geede Yesuusay boora densi Wonto galatti ye uttecha axituse e taddo. Yeydiwo gulxheni e taddob. 12 Axitini be uddina be worge makkoni muudi u missho. Yesuusay be erusichoshituko "Atta baxi laaqani attuwannike bhikkiluwayte!" hidi e hido. 13 Usini bhikkillo. Ye ichichi bache banga booraafa axiti muusune atta baxe tamma lam'i kofa u kunso.
14 Axiti Yesuusay hanto micushe hanta be beedoniya " 'Ha saha gara e yoone' yeydi hiyutticha kaayaxi aadewo ha esako" yeydi u hido. 15 Yesuusani axiti esa osana kaatexese wordesesa be erdo geede be goshewo dhaddi bakka gara assi e kesso.
Yesuusay waaxi garana qaadhosa
Mat 14:22-33; Mrq 6:45-52
16 Sahay dhaddi qamese hinne e erusichoshiti bagade nuuna dhaddi u hando. 17 Yesuusay yoodo baane sahay ceendo. E erusichoshiti zabhaa gelli dhaddi Qifirnahoome hamese u aadho. 18 Agexi iitana bagade gara yoonne jhirahoy waaxe sekke hanke hisse e gello. 19 E erusichoshiti ichiche oo'oyne izzuppi kiilo meetire ellesa bagade garana shardi u handesune Yesuusay waaxi garana tokena hanti yoodi zabha uddhi e yoosune beedi u jhassho. 20 Esini "Jhasshofita, tambako!" hidi e hido. 21 Usini maggana "Esa zabhaa nu effeese" hidi u hido. Zabhani izziyawo u hangicho godowa ello.
22 Bagade semfa attecha axiti sahay wontinne bidzi zabhawoy bagade gara yesune u beedo. Fede zabhana e erusichoshiti Yesuusay essaaka baasa beesewo u fotechonike u ericha. 23 Yenniyawo fede zabhiti Xhibiriyadoosiyafa Yesuusay Wonto galatti laga axita boora muussecho godose e da'aa u yoodo. 24 Attecha axitini Yesuusani maaqqe e erusichoshiti beera baasa be erdo wogga ye zabhitaaka gelli Yesuusa worge Qifirnahoome katamaa dhaddi u geede u fotto.
Yeso inge boora
25 Bagade semfa bade fotti Yesuusa be degesso geede usini "Laaxo! Aydena haya ne yoodo?" hidi u oycco.
26 Yesuusani "Hinuse ta ohesi fetto aadeko.Tamba hi worgesi boora muudi hi missho gisha baaka micushe hanta hi beedo gisha maaquwasso. 27 Baane kaxase hantofita! Koolo makkina yeso inge kaxase hantuwayte! Ye esani axi yele hidi hiyuttasi hinuse ingako e inge. Ade maaqe Wontoy axi yele hidi hiyuttesuna be maxo be hantenike addussiko e yese" hidi e hido.
28 Axitini "Hinne Wonto hanta hantese waa hiye nuu e worguse?" yeydi u oycco.
29 Yesuusani "Wontoy hi hantoronike worgesi Wontoy ansosa hi aadexorosako" yeydi e mato.
30 Usini "Hine nuni beedi aadexoronike aba micushe hantana ne mahe? Am ne hante? 31 'U miyorosa afaafa boora ususe e indo' yeydi fissharowa e diizuttonike olo nuwadiyaxhiti saha melaa yesine manna hidi hiyutte boora u muudo" yeydi u hido.
32 Yenniyani Yesuusay "Hinuse ta ohesi fetto aadeko. Afaafa hoddha boora hinuse indasi Muse maaquwasso nuwadeko. Esini hinuse aade boora hidi hiyutte boora afaafa ingako e inge. 33 Wontokofa ingutta aade booray afaafa hodhi ha saha gara yese axituse yeso ingesako" hidi e hido.
34 Ye e gisha axiti "Laaxo! Ye esuke yese boora uddi wogga nuuse inguwa!" hidi u hido.
35 Yesuusani "Yeso inge booray tambako. Taako yoonesi koolona naayuttuwasso, tamba aadexesi koolona sazzuwasso. 36 Hinuse ta otonike hinunimay tamba beedi taa aadesso baytako. 37 Adey taase indosi taako yootako e yoone, taako yoonesa tani wude gooduwasso. 38 Ye esini esume afaafa ta hoddhosi tamba ansasi maxo hantese baaka ta maxo hantese maaquwasso. 39 Tamba ansasuse e maxoy taase e indosaafa uddi bidzini bayorosume katti aallicira wonte haybowafa ta denxorosako. 40 Nuwade maxoy yele beedi esa aadexesi uddi koolo makkina yeso e degexorosako. Tanini aallicira wonte haybowafa ye esa denxako ta denxe" hidi e hido.
41 Ayhudaxitini "Afaafa hoddha booray tambako" hidi e hido gisha umbu umbu hiye u ayto. 42 Assiwo "Ha esi esade esindo nu eresa maaquwaye? Ha Yoosefe na'i Yesuusa maaquwaye? Hine waydiwu 'Afaafako ta hodho' hidi e hine?" hidi u hido.
43 Yesuusani ususe mahisine "Sekke hanke wolko umbu umbu hidofita. 44 Tamba ansa adey taako gooshosha baaka taako yoowese ooneni danda'uwasso. Taako yoonesa tani aallicira wonteko haybowafa esa ta denxe. 45 Kaayaxiti fissharowaka 'Axiti uddi Wontokofa erdesesako u maaqe' yeydiko e diizuttese. Ye e gisha adekofa siidi erdeseesiti uddinako taako u yoone. 46 Yeydi ta hisune "Ade beedese axuko yesa" hidi hiye maaquwasso. Ade beedesesi e da'aafa yoodasewoko. 47 Hinuse ta ohesi aadeko. Taa aadexesi koolo makkina yesoko e keenge. 48 Tani yeso inge boorako. 49 Hinadiyaxhiti olo saha mela manna hidi hiyutte boora u muudo. Maaqe baaka u haydho. 50 Afaafa hoddha booray axi muudi hay'uwannike mahe boorako. 51 Afaafa hoddha en'a booray tambako. Ha booraafa muunesi ooneni koolo makkinako e yese. Ha saha gara yese axi yeso u keemoronike ta inge booray ta achoko" yeydi e hido.
52 Yenniyakani Ayhudaxiti "Ha axi e acho nu miyoronike waakisini mahese e danda'e?" yeydi sekke hanke wolko u zeericha.
53 Ye e gisha Yesuusay ususe "Hinuse ta ohesi fetto aadeko. Axi yele hidi hiyuttesi acho hi muudo baasaara e suuxe hi ussho baasaara koolo makkina yesoy hinuse baasso. 54-55 Ta achoy aade kaxaydi hiyutte kaxako ta suuxini aade ussheydi hiyutte usshuko. Ye e gisha ta acho muunesaara ta suuxe usheshaaray be uddina koolo makkinako e yese. Tanini aallicira wonte haybowafa esa denxako ta denxe.
56 Ta acho muunesi ta suuxe usheshi esini taara bidzo maaddhiko e yese, tanini esaara bidzo maaddhiko yese hidiko. 57 En'a maaqe adey tamba ansonikiyara tanini esuna en'a maaddhonikiyara yeydiwo tamba muunesi ooneni taanna en'ako e maaqe. 58 Yoonase, afaafa hoddha booray ye esako. Esini hinadiyaxhiti muudonike yesesa maaquwasso. Ye boora muudasiti haydhiko u yese. Ha boora muunesimay koolo makkinako u yese" yeydi e hido. 59 Yesuusay ha esa e zeerdosi Qifirnahoome katamaaka Ayhyda Bhikkilo Zawaa be erusicho woggako.
Laga axiti Yesuusa dhaddosa
60 Yesuusaara hangichashitaafa lagay yeydi e zeerdosa be siido wogga "Ha zeerey deexhako e deexhe, ooni efese danda'esa?" yeydi u hido.
61 Yesuusani umbu umbu uynesa beese erdi ususe "Ha zeerey hinumba dhumusesuwa? 62 Axi yele hidi hiyuttesi be yecho godo maaddhi dhaddi e kesusune beeta'ayko waa hiyese hiine? 63 Yeso ingesi Wonto Ayaanako. Axi osamay abani go'ese danda'uwasso. Tani hinuse zeerdo katoy Ayaana ingesako, yesoni ingesako. 64 Maaquwaye baaka hi giddaaka bidzi bidzi aadexuwa geritako yesa" yeydi e hido.
Yesuusay ye esa zeerese e dandadhosi burowafa ayti aadexuwasiti oone u maaqenikiyara bemba garsi ingesi oone e maaqenikiyara be ericho gishako.
65 Sekkeni Yesuusay " 'Nuwadey "Yoowwa!" hidi hidosa baaka taako yoonesi baasso' hidi hinuko ta otosi hi giddaaka aadexuwasiti yese gishako" yeydi e hido.
66 Ye esuna esaara hangichashitaafa lagay dhaddi be geede u maaddho. Ye woggaafa ayti Yesuusaara hame u dhaddo. 67 Hinne Yesuusay be erusicho tamma lam'use "Hinunini dhaddi hamesuwa hi worge?" yeydi e oycco.
68 Yenniyakani Phexhrose sunda Simooney "Laaxo, oonekoni nu hamme? Neni koolo makkina yeso inge katoko ne zeere. 69 Nunimay nemba Wonto hayla ne maaqenike 'Aadeko' hidi ettiko nu yese, erdiko nu yese" yeydi e hido.