12
Yesuusay shittona tishutto
Mat 26:6-13; Mrq 14:3-9; Luq 7:37-39
1 Ayhuda Garo Massalay kuxuttesuse yoodi izzuppi wontey attesune Yesuusay Biitaniya e hando. Ye katamay haybowafa e densecho Aalazarey essaaka yecho katamako e maaqicha. 2 Yahani qamete esuse u kasso. Martani borsase hantiya i yecha. Aalazarey Yesuusaara feditaara qamete miya e yecha. 3 Yenniyakani Maaramey feday essa worqutto baa e woomay orje maaqe shitto etti i yoodo. Ye shittoni modhe nardosiyafawo hantuttese bidzi xharmuse ellesako e maaqicha. Isini ye shittona Yesuusa toke i tissho, be qinonani i ucco. Zawaaka shittoy iitana e saydo.
4 E erusichoshitaafa bidzi Asqorotaxi Yuuday Yesuusa garsi ingarasi 5 "Ha shittoy kumana taafutte laga miijheshe zal'utti jhi'ituse abasuwa ingutte dheeddo?" hidi e hido. 6 Yuuday ye esa e zeerdosi jhi'ituse aade be gawwaafa higilli maaquwasso. Miijhey essaaka gadutte sigire be aykicho gisha ye sigiriya gadutte miijhiyafa etti lossese kayso be maaqicho gishako.
7 Yesuusani "Ha indo dhagguwa! Ta moogo wontesuko tamba i naddho. 8 Jhi'iti uddi wogga hinunaara wolkoko u yese. Tanimay uddi wogga hinunaara wolko yesuwasso" yeydi e hido. 9 Yenniyakani Yesuusay Biitaniya yesesa erdi iitana laga Ayhudaxiti u yoodo. Usini Yesuusa beyesewo e maaddho baane haybowafa e denso Aalazareni beyesuko e maaqicha. 10-11 Kahinituse afana maagiti Aalazarey haybowafa dendosuna laga Ayhudaxiti uso dhaddi Yesuusa aadexicho gisha Aalazareraysi wodhese u kundo.
Yesuusay kuxana Yerusaleeme gellosa
Mat 21:1-11; Mrq 11:1-11; Luq 19:28-40
12 Sahay wontine Garo Massala kuxese Yerusaleeme yooda laga axiti Yesuusay yoowiya yesesa u siido. 13 Esa mokkese be kuchiya iille washe ayti u kesso. Be kato keddaysi "Kuxay maaquwaye Wontosea, suuse esuse Laaxi sunxuna yoonesuse, Isra'eele kaatuse" hidi u uwwicha. 14 Yesuusay harre darme degessi e gara e utto. E uttosini
15 "Neno Xhiyoone katama Yerusaleeme jhasshofuna! Hay, ne kaati harre darme garako utti yoowiyaka e yese"
yeydi e diizuttechonikeko e maaddho.
16 E erusichoshituse ye maaddha abakiti buro gello badi e yecha. Geede Yesuusay kuxa fuulana dhaddi afaa kesso wogga yenniya ye esi e gisha e diizuttonikiyara esuse axiti matonikiyara u gaxxho.
17 Yesuusay Aalazare boossaafa xheydi haybowafa densoniyaka beedecha axiti uddi e gisha zeeriya u yecha. 18 Ye micushe hanta e hantosa be siidecho gisha laga axiti esa mokkese u kesso. 19 Yenniyakani Farasaxiti "Beewayte! Axiti be uddina esukoko maaddho. Am ha e geede nu hante?" yeydi wolko u hicha.
20 Ye massalaaka Wonto kuxese yoodasitaafa bidzi bidzi Grikaxiti u yecha. 21 Usini Galila wude yese Beetesayda axe maaqe Filphooseko yoodi "Nu laaxo! Odde, Yesuusako beyese nu worge" hidi u shidho. 22 Filphooseni ye esa yoodi Indiraaseko e oto. Indiraasiyara Filphoosiyaray handi Yesuusako ye esa u oto.
23 Yesuusani "Axi yele hidi hiyuttasi kuxutte woggay elliko yese. 24 Hinuse ta ohesi fetto aadeko. Gossa aafey sahaa aylutti hay'e dheeddako be goshewoko e atte. Aylutti be haydho geedema laga aafeko e kaxhe. 25 Be yeso eehesi be yesoko e bayse. Ha saha gara be yeso inxha'esimay koolo makkinako e yese. 26 Taase hantese worgesi yesa'ayko taara yoowaye. Tani yese godoko esini assi yaha e yese. Taase hantesi yesa'ayko nuwadey esa kuxako e kuxe" yeydi e hido.
Yesuusa gara yoone maddha gisha
27 Yesuusani "Hatte ta muxhuroy iitanako e hooddese. 'Nuwadde, ha essaafa tamba kessuwa!' hidiya ta hiyeni? Yeydi ta hiyoroome esume ta yoodosi ha maddha woggasuko. 28 Nuwadde! Yebo, ne sunxi kuxuttoronike mahuwa" yeydi e hido. Ye e geede afaafa "Ta sunxi kuxa fuula keengenike beysiko ta yese, hatteni assi beysako ta beyse" yeydi hine katoy sinto. 29 Ye woggaakani yaha yecha axiti ye esa siidi badey "Googunxuko" hidi hido, fediti "Wonto woosaxuko esuko zeerda" hidi u hido.
30 Yesuusani "Ha katoy e sintosi hinume baaka taame maaquwasso. 31 Ha sahay yaa'uttesi hatteko, ha sahase afana maaga maaqe Humbayey wude kessi e dafuttesi hatteko. 32 Tani keddaydi ta suxhutte woggaako uddi axe hanke taako ta gooche" yeydi e hido. 33 Yesuusay yeydi e zeerdosi waakeydi be hay'enike oheko e maaqicha.
34 Axitini "Nu woga fissharowa diizuttesesa nu siidechoshi 'Mesihey koolo makkinako e yese' yeydi hinesako e maaqicha. Hinne neni abasuwa 'Axi yele hidi hiyuttasi wokke afaa keddaydi suxhutteko esa e worguse' hidi ne hinesi? Ha axi yele hidi ne hinesi oonewa?" hidi u oycco.
35 Yesuusani "Hatte hinunaara wolko fo'ey e yesesi oddhe woggasewoko. Cenchay hi gara yoonesume buro fo'e e yesune sekke hanke hantuwayte. Cenchaanna sekke hanke hantesi aya be hangesa eruwasso. 36 Fo'e nayshe hi maaqoronike fo'ey hinunaara yesune esa aadexuwayte" yeydi e hido. Yesuusay yeydi ususe be zeerdo geede yahafa handi axiti da'aafa e arto.
Ayhudaxiti Yesuusa aadexe dheeddo gisha
37 Ayhudaxiti Yesuusay ha e gede micushe hanta u buro e hantakoni esa aadexe u inxhadho. 38 Yeydini maaqese e dandadhosi kaayaxi Isayasey
"Laaxo! Ne gisha nu otosa oonena 'Aadeko' hidi hida?
Wonto osay oonesuna addeydo?"
yeydi ohuttecha katoy aaloronikeko.
39-40 Isayasey assi
"U aafey beewanike e mato,
u muxhuro washey siwwanike e mato.
Ha e gisha u aafey beewasso,
be muxhuronani gaxhuttuwasso,
ta loolusorosume hanke maaquttuwasse"
yeydi e hidonike aadexese danda'utto baasso.
41 Isayasey esume yeydi hiyese e dandadhosi Mesihe kuxa fuula be beedo gishako. Mesihesuko e zeerdo. 42 Yeydi maaquwaye baaka laga Ayhudaxiti afana maagiti Yesuusa u aadesso. Farasaxiti Bhikkilo Zawaafa bemba u kesseesume jhasshi be aadessonike addaa zeere u inxhadho. 43 U inxhadhosini Wontokofa maaqe kuxame axukofa maaqe kuxa be eeto gishako.
44 Yesuusani be kato keddaysi "Tamba aadexesi tambawo e maaddho baanne tamba ansaseni aadexako e aadexe. 45 Taa beya yesesi tamba ansaseni beyako e yese. 46 Tamba aadexesi cenchaa e attuwannike tani fo'e maaddhi ha saha gara yoodiko ta yese. 47 Ha saha gara yese axita loolusese ta yoodosa baaka yaa'ese tani yoodo baasso. Ta ohesa siidi esuna hantuwasi yesa'ayko ye e gara yaa'esi tamba maaquwasso. 48 Tamba inxha'esi garaara ta otosa ekkuwasi garaara yaa'esako yesa. Ta oto katoko esa aallicira wonte yaa'esa. 49 Tani taase ta adetona ta zeerdoy baasso. 'Yeydi ohuwa, yeydi zeeruwa!' hidi tamba woossasi tamba ansa nuwadeko. 50 E woose woossoni koolo makkina yesowa aandi ellusenike erako ta ere. Ha e gisha ha ta zeeresa afaase adey taako otonikeko ta zeere" yeydi e hido.