2
Yesuusay yeluttosa
Mat 1:18-25
1 Yenniyaka Rooma kaatea maaqe Awgusxhoosey be kaateto aallo yese axe e uddina taafese u sunxi diizuttoronike woosso e anso. 2 Axi taafuttorosuse ye esi buronako e maaqicha. Yenniyaka Sooriya wude ahichashi Qorenewoseko e maaqicha. 3 Hinne axi be bidzi bidzina be geri essaafa yoodo wudiya be sunxe diizusiya u hangicha. 4-5 Yoosefeni Dawite fira fiixha be maaqicho gisha Galila wudiya yese Nazrate katamaafa beese aykutti gawwaara yecha Maaramiyara wolko be sunxe diizusiya Yuuda wudiya yese Dawite katamaa Beeteleeme u hando. 6 Usini be lam'una Beeteleeme katamaa yesune i yele woggay ello. 7 Angussi yeleni i yello. Yele ayke maa'ona fasshi i ayto. Borsay essa aqicho zawaa godo be dheeddo gisha moonaaka keemoy essa muucho zellowaa i woyso.
Wonto woosaxi keemo yeengichashituse addeydosa
8 Ye wudiya gubbaa dorita kakkisine aqicha yeemaxiti u yecha. 9 Bidzi Wonto woosaxi masso badi u yesune usuko yoodine Wonto kuxa fuulay u googe laci lacidi faddho. Iitana u jhassho. 10 Ye Wonto woosaxini "Aadekoydi jhasshofita! Axuse uddi magga odo maaqesako etti hinuse ta yoodese. 11 Loolusesako hinuse hanzo Dawite katamaa yelutti yesa. Ye esini Laaxe maaqe Mesiheko. 12 Esuna hi eresini yele ayke maa'ona fasshi aykutti moonaaka keemoy essa muucho zellowaaka e woy'usuneko hi degexe" hidi e hido. 13 U masso baanne Wonto woosaxiti lagay Wonto woosaxaara wolko u bento. Wontoni galatisine 14
"Kuxay Wontose wona afaaka maaquwaye! Modheteni axuse sahaaka maaquwaye Wontoy eeheesuse" yeydi u hicha.
15 Wonto woosaxitini dhaddi afaa kesso geede dorita yeengichashiti sekke hanke "Yoowayte, yoonase Beeteleeme aallo nu hammeese, hatte maaddhasaara Wontoy nuuse adduso abakuwara handi nu beyyeese" hidi uydo. 16 Ukkenawo handi Maaramiyara Yoosefiyara u degesso. Xhaheni keemoy essa muucho zellaaka woy'iya e yesune u beedo. 17 Beedini Wonto woosaxi ye xhahe gisha ususe otechosha zeere u gello. 18 Siidaasiti uddina u zeerdo zeerena u micco. 19 Maaramey haanxhi zeere uddi be muxhurowa gaddi gaxhiya i yecha. 20 Dorita yeengichashiti uddi Wonto woosaxi otonike be beedosunaara be siidosunaara uddi Wonto kedda keddaysisiniyara galatisiniyara dhaddi be godowa u maaddho.
Yesuusay suuzutto
21 Ye xhahey be yelutto hazzunxo wonte gada e utto. Haga e xhiiqusutto baane Wonto woosaxi otechonike ye wonte e sunxe "Yesuusa" hidi u sunso. 22-24 Muse wogaaka "Burona yelutte na'i yeley uddina Wontose hayla maaqeko e worguse" yeydi hinesi diizutti e yecho gisha e geejhe agunnay elline yele Wonto wogana ohuttisine "Kaashashe lam'i woyya booltiyo maako lam'i woyya yele maako uqusuwayte" yeydi hinesi yecho gisha Wonto buro uqusese yele etti Yerusaleeme u hando.
25 Bidzi adey Simoone sungesi yenniya Yerusaleeme e yecha. Esini be yeso Wontose aassi indese gizo axe maaqisine Isra'eeley loolesa gobbena kakke Ayaana Geeshi e gara yese axe e maaqicha. 26 Esuseni Ayaana Geeshi Wontokofa anxutte Mesihe beedo badi e hay'uwannike e otecha. 27 Ye wonteni Ayaana Geeshi densine Wonto Hayla Zawaa e hando. Maaramiyara Yoosefiyaray Yesuusa etti Wonto Hayla Zawa Muse wogay ohesa alseeme hissine yenniya u yoodo. 28 Simooneni yele udundi Wonto galatisine 29-30 "Laaxo, taako ne otecho katoy aallosso. Ne loolusesa ta aafena beediko ta yese. Ha e gisha ta hooddesi baasso, yoonase taa ne maala xheyguwa. 31 Ne loolusesa ha saha gara yese axi uddi beyoronike ne naddhesesako. 32 Esini Ayhuda maaquwasituse aade adduse fo'eko e maaqe. Ne axiti Isra'eeleseni kuxako" yeydi e hido.
33 Maarameni Yoosefeni xhahe gisha e zeerdo zeerena u micco. 34 Simooney uso be suuzzo geede Maaramekoni "Ha xhahe Wontoy ansosi laga Isra'eelaxituse loolose lagase baysoseydiko e maaqe. Esini lagiti inxha'e yeragoko e maaqe. 35 Ye esuna laga axiti muxhurowa aachuttecha maxo tiddhiya e kese. Neeseni higilsanako ne zahey bureb" yeydi e hido.
36 Yenniyani bidzi Haanna sunge indo kaayaxhi i yecha. I ommay Aasere maaqusune Faanu'eele busho i maaqicha. Orjena i cindecha. Be adiyara laappi bera i utto geede i adey baado. 37 Ye e geede i beray hatte hazzuppi tamma oydde maaddho aallo Wonto Hayla Zawafa arto badi xhoomenaara Wonto shi'enaara wonta qama Wonto kuxiya i yecha. 38 Isini yenniyawo yoodi Wonto galate i gello. Ye yele xhahe gisha Yerusaleemey maaketowafa kesesa gobbena kakkeesituse uddi odusiya i yecha.
39 Usini Wontoy Musese indo wogay otechosha uddina be also geede sekke Galila wudiya yese be Nazrate katamaa u maaddho. 40 Ye yeleni orjena era keengesa maaddhi diciyara boheyyaara e gello. Wonto aafeni e gara yecha.
Yesuusay Wonto Hayla Zawa eraxitaara wolko
41 Maaramiyara Yoosefiyaray uddi bera aallo Garo Massalase Yerusaleemiyaka u hangicha. 42 Yesuusa beray tamma lam'e maaqusune hade be lossoke garo massala kuxese u hando. 43 Massalay gardo geede Maaramiyara Yoosefiyaray be zawa dhaddi maaqusune Yesuusay Yerusaleeme atto. Usini yena e attosa erdo badi 44 ogaxaara yoonesa e bisshinne bidzi wonte oge hangisine u feyssho. Ye e geede be laggiti feeqaakaara iginiti gawwakaara worge u ayto.
45 Ye ganda be dheeddo geede worgisine sekke Yerusaleeme u maaddho. 46 Haysso wonte geede Wonto Hayla Zawaaka u degesso. Yesuusani erusicha eraxiti feeqa utti u zeere haysi siidi oyche ususe e uqusicha. 47 Siineesiti be uddina e gaxusaara sekke e mahicho uttanaara u micicha.
48 Adiyara indowaray esa beedi u micco. Yenniyaka esindoy "Ta yelle, ame yeysi numba ne hisso? Taara niyadiyaray nemba worgisine orjeko nu maddhundo" hidi i hido. 49 Yesuusani "Ame tamba worgese hi dandadho? Nuwade zawaa yese tamba e worgusenike waani ere hi dheeddo?" hidi e hido. 50 Ususe ye e zeerdo zeerey gele e dheeddo.