Luqaase Modhe Odo
1
Tawofilosese diizuttase
1 Orjena kuxuttese Tawofilose! Ha esume buro laga axiti nu feeqaaka maaddha zeerita arsi beedi bhikkilli addussi ohesa diizziko u yese. 2 Ha maaddha zeerita garsaasiti burowafa ayti be aafena beedi ato maaddhasitaara Wonto kato ohichashitaarako. 3 Yeydiwo taaseni bisheshi burowafa ayti zeere e uddina hossi kessi ta beedo geede e maaddhonikewo e bidzi bidzina neese ta diizoronikeko. 4 Ha e buro axiti nemba erusecho zeerey aade maaqenike modhussi ne erorosako tanini neese yeysi diizesi.
Xhamaqicha Yohanisey yeluttenike ohuttase
5 Yuuda wudiya kaati Herodisey kaattecho woggaa bidzi adey Zakaraase sungesi Wonto Hayla Zawa kahiney e yecha. Esini be bade bade maaqe kahinitaafa Abiya bade e maaqicha. E machini Elsabeexhe sungenni be yeluttena Aarone nayshaafa i maaqicha. 6 Usini be lam'una Wontoy axuse otosaara e wogaara uddi modhussi haasse keenguwasa katti Wonto buro gizo u maaqicha. 7 Elsabeexhey menxe maaqicho gisha yele keenguwasa be lam'una cindi u yecha.
8 Bidzi wonte Wonto Hayla Zawaa hantese Zakaraase badese tagoy ello. Zakaraasey yaha kahiniti hantichosha Wonto buro hantiya e yesune 9 Wonto Hayla Zawaa moddhi sawwe ixhaane essa cuwwusicho godowa gelli e cuwwushoronike kahiniti wogake hixha u olline hixhay esa ello. 10 Ye esa e cuwwushushune ye woggaaka axi lagay be uddina wudena eedhi Wonto u shi'icha.
11 Yenniyani Wonto woosaxi ixhaane e gara cuwwushushooshushe e oshichi badena ee'isine Zakaraasese e addeydinne 12 ye esa be beedo wogga e buro e baane, iitanawo e jhassho. 13 Ye woosaxini esuse "Zakaraase, jhasshofuna! Wontoy ne shidhosa siidiko e yese. Neeso indo Elsabeexhey asanxi yeleko i yele. E sunxeni Yohaniseydiko ne sunxe. 14 Keddaysiko orjena ne magge. Yeydiwo e yeluttosuna lagitako maggesa. 15 Esume hi maggesini ye yeleni Wonto buro keddaydese mallako e maaqe. Weyne daanaara fede gooshe usshaara fettona ushuwassho. Haga beyndo gawwaa e yesune Ayaana Geeshi esuka kunge. 16 Isra'eele axitaafa lagaadita u Laaxuko u Wontoko hanke e mahe. 17 Hade Elaase gara yecha ayaanaara osaaray e gara yesete Laaxi buro yoodi laga axita esuse e naqe. Adiyaxhi muxhuro nayshi gara woosuttuwadi yecha axiti muxhuro gizo axiti era garako hanke e mahe" yeydi e hido.
18 Zakaraaseni ye Wonto woosaxuko "Cindiko ta yese, yeydiwo ta machini cimako. Hinne ha esi maaqesa abanawa erese ta danda'e?" hidi e oycco.
19 Ye woosaxini "Tani Gabra'eeleko. Uddi woggaa Wonto buro yesineko esuse ta woosutte. Ha modhe odo neeko ta ohoronike Wontoy woossineko ta yoodo. 20 Neni ta otosa abasuna 'Aadeko' hidi hiye ne dheeddo? Zeerey beese be wontanako e ite. Ha e gisha ye ta otosi itoro aallo muumoko ne maaqe, zeerese danda'uwannako" hidi e hido.
21 Yenniyaka axitini Zakaraase u kakkicha. Wonto Hayla Zawaaka e dooddinne "Am e dooddo?" hidi u micco. 22 Zakaraaseni yahafa be kesso geede usaara zeerey esa iissho. Axitini Haylame Hayla Zawaa Wontokofa bidzi abako e beedesenike u erdo. Esini be kuchena sekke hankeysi uso beysi e ohicha. Yeydiwo muumo maaddhi e dooddo.
23 Zakaraasey Wonto Hayla Zawaa e hanticho wontiti itto geede be zawaa dhaddi e hando. 24 Oddhe wogga geede Elsabeexhey i xhiiqusso. Be zawaa aachunti ichichi agunna aallo i dooddo. 25 Isini "Wontoy be maaro aafena taa beedi ha modhe abako taase e hanto. Axiti tamba haassecho haasse ta garafa e denso" hidi i hido.
Yesuusay yeluttenike ohuttase
26-27 Bidzi Maarame sungenni asanxaara muti eruwa woduroy i yecha. Isini Dawite fira fiixhaafa maaqe Yoosefese i aykuttecha. Elsabeexhe gara yeley atto izzunxo agunna Wonto woosaxi Gabra'eeley Galila wudiya yese Nazrate katamaaka isuko e anxutto. 28 Ye woosaxini yoodi "Sawwa ne yese! Wontoy niya kussesenne! Wontoy neera wolkoko yese. [Neni maachiti feeqaafa suuzuttesenniyoko.]" hidi e hido.
29 Isini Wonto woosaxi isuse otosuna zeerey i buro e baane "Ha esi aba bisha sawoni?" hidi i masso. 30 Ye woosaxini "Maarame! Wontoy niya kussiko yese. Jhasshofuna. 31 Hay xhiiqusoko ne xhiiquse, asanxi yeleni ne yele. E sunxeni 'Yesuusa' hidi ne sunxe. 32 Esini malla e maaqe, uddime afana maaqe Wonto yele hidi e hiyutte. Laaxi Wontoy esade kaati Dawite kaatete esuse e inge. 33 Isra'eelaxiti gara koolo makkina e kaate, e kaatetese aalliciray baasso" yeydi e hido.
34 Maarameni "Tani asanxaara muti eruwa woduroko, hinne ha esi waydi maaqese e danda'e?" hidi ye woosaxeni i oycco.
35 Ye woosaxini isuse "Ayaana Geeshi neeko yootako e yoone. Uddime afana maaqe Wonto osay nemba fashoko e fashe. Ha e gisha ne yelesi haylako. 'Wonto yeleko' hidiko e hiyutte. 36 Hay ne iginniyo maaqe Elsabeexhey menxeydi hiyuttichani hanzo cimuntiya na'uko i xhiiqusese i xhiiqusowafa ha esi izzunxo agunnako. 37 Wontoy hantese hisune esa ooxesi baasso" yeydi e hido.
38 Maarameni "Yebo, tani Wonto maakiyoko, taase ne otonikewo maaquwaye" hidi i hido. Ye e geede Wonto woosaxi dhaddi i da'aafa hando.
Maaramey Elsabeexheso sootto
39 Maaramey ye woggawo Yuuda wude ale Elsabeexhe beyese ukkenawo i sootto. 40 Isini yaha Zakaraaseso gelli Elsabeexhe i sawusso. 41 Maaramey haga iso sawusonikewo Elsabeexhe gawwaa yecha yeley kaadho. Isini Ayaana Geeshuna kundi 42 be kato keddaysi "Maarame! Neenkeydi maachikaafa suuzuttesenni baasso. Ne gawwaafa ne yele yeleni suuzuttesesako. 43 Ta Laaxindoy tamba beyese taako yootaa mee yoowaane? Waakeydi keddaydese kuxawa. 44 Ne sawo ta siidonikewo ta gawwaaka yese yeley maggana e kaadho. 45 Wontoy neese be otosa alsenike 'Aadeko' hidi ne hidosuna waydi suuzuttesesani neni" yeydi i hido.
Maaramey galata zingale zingallo
46 Maarameni "Ta muxhuroy Wonto kedda keddaysiko e kuxe. 47 Tani ta Wontona taa loolusasuna maggako ta magge. 48-49 Uddime osaxi Wontoy ullaydese be maakiyo taa e beedo gisha maggako ta magge. Yeletani uddina hanzowafa densi 'Neni suuzuttesenniyoko' hidiko taa uyne. E sunxini haylako. 50 Wontoy bemba jhashe axita uddina yeluttena yeluttena maarawoko e maare. 51 Bemba jhashe axuse Wontoy yeluttena yeluttena keddaydese be kurmayle osa beysiko e yese. Bemba nasheeshita u maxowara wolko buddiko e yese 52 Keddaydese afana maaga osaxita ullaysi u adetowafa e hosso. Ullaydechashita kedda kedda e hisso. 53 Dheeddechashituse modhe abako e indo. Wodumitani kuche mela e datto. 54-55 Abrahaamesaara e nayshi nayshushaara koolo makkina be beysecho maaro gaxxhi be maraxi Isra'eele mardiko e yese. E mardosini numba yellecha geruse be otechosha alsesuko" yeydi i hido.
56 Maaramey Elsabeexhe da'aa haydzi agunna ellesa dooddi ye e geede be zawa dhaddi i hando.
Xhamaqicha Yohanisey yeluttosa
57 Elsabeexhey i yele woggay elline na'e i yello. 58 I dooditini maaqqe i iginiti Wontoy iso keddaysi massosa siidi isaara wolko u maddo.
59 Ye yeley yelutto hazzunxo wonte ye xhahey gada utte wonta kuxese u bhikkilutto. E sunxeni ade gara Zakaraase sunxese u wordo. 60 Indoni "Oo'o, e gara sunsofita, Yohaniseko e summe" yeydi i hido. 61 Usini "Yeydi sundofe, ne iginitaafa Yohanise sungesi bidzini baasso" hidi u hido.
62 Hinne Zakaraaseko "Ha yeley oonewa summe?" hidi kuchena beysi u oycco. 63 Esini essa be diizesa oycci etti "Yohaniseko e summe" hidi hissine e diizzo. Axiti be uddina u micco. 64 Yenniyakani e unxhurey birchuttine zeere gelli Wonto e galatto. 65 Ye esuna u dooditi be uddina u jhassho. Ye odoy be uddina Yuuda wude ale e sinto. 66 Ye yele gara Wonto aafey yecho gisha "Ha yeley am maaqese e hine?" hidi be muxhurowa gaddi u maxicha.
Zakaraasey zeerdo kaayo
67 Ye yelutta yeliyade Zakaraasey Ayaana Geeshuna kundi kaayo zeerisine 68 "Isra'eele Laaxi Wontose galatay elluwaye. Be axe be maarona yoodi beedi shawo e kesso. 69 Be maraxi Dawite zawaafa looluse malla densiko e yese. 70 Olo hayla kaayaxiti nuunaanna be zeerdonike 71 nu iilaxi garafaara numba inxha'esi kuchiyafaara uddi maardiko e yese. 72 Ha esa e matosi nuwadiyaxhuse be maarenikiyara be hayla caaqoy aalenikiyara massiko. 73 Ha caaqo e caadhechoshi numba yella Abrahaamiyarako e maaqicha. 74-75 Ye caadhi e indecho gobboy nu iilaxi kuchiyafa shawo kessi Wonto buro jhashe baaka ha saha gara nu yesoro aallo uddi haylaara gizo maaddhi yesenaara esa nu maroronikeko. 76 Neno ha yelle, 'Uddime afana maaqe Wonto kaayaxe' yeydiko ne xheygutte. Laaxi oge naqese e buro buroko ne hange. 77 Neni axi be cubbose maaro degexena loole ogeko ne eruse. 78 Ha esini yeydi e maaddhosi Wonto shenonaara e maaronaarako. Ye esuna modhete qoossi afaafa kesesuko e hine. 79 Esini cenchakaara haybo dooshaakaara yeseesitusuko e faqe, nu hamoni modhe ogeko e durke" yeydi hissine e zeerdo.
80 Yeley e dicco, be gaxunania e oseydo. Isra'eele gerita tiddhiyanna marese be kesoro aallo saha melaa e yesso.