13
Wonto Hayla Zaway woddenike ohuttase
Mat 24:1-2; Luq 21:5-6
1 Yesuusay Wonto Hayla Zawaafa kesusune e erusichoshitaafa bidzi "Laaxo, ha shuchi zawa miimete beyashuna? Waydese malla shuchuna e keexhuttosa" yeydi e hido. 2 Esini "Ha shuchi zawa mallete beeduwa? Shuchi shuchi gara naqutti be yesenike yesuwasso. Ha shuchi uddinawoko e wodde" hidi e mato.
Yesuusay lakko yoonesume buro maaqesa
Mat 24:3-31; Luq 21:7-28
3 Yesuusay Wonto Hayla Zawa semfa yese Zayte Bakka gara uttusune Phexhrosey, Yayqoobey, Yohanisiyara Indiraasiyaray be goshe esuko yoodi 4 "Hatte ne zeerdosi maaqesi aydena? Ha esi uddi maaqese uqusune yeragoy amuna? Odde, nuuse ohasshuna?" hidi hissine u oycco.
5 Yesuusani "Ooneni hinumba qaarusoppe hinumba kakkuwayte! 6 'Tani Kristosako' hidi hissine lagiti ta sunxuna u yoone, lagitani u qaaruse. 7 Hi ukke tooray dendusune fakkiyani toora odo siisine jhasshi du'eydofita. Yeenxhi maaqese fettonako e worguse. Yeydi e maaddhakoni aalliciray yenniya maaquwasso.
8 Bidzi wudey fede wude gara kaatini kaati gara toora e denxe. Seya haya sahay en'e. Yeydiwo naayeni e maaqe. Haanxhi maddhay hade haga ayke zersoke yesesako. 9 Hinunini hinumba naddhi kakkuwayte. Axiti hinumba yaa'asuko garsi u inge, Ayhuda Bhikkilo Zawaakani hinumba u dure. Taanna hi yese gisha afana maagitusaara kaataxhe buruwakaara yaa'uttese hi uqe. Yenniyakani ta gisha ato maaddhi uso hi siise. 10 Yeenxhi uddi maaqorosume buro modhe odoy be wude wude yese axuse uddi elleko e worguse. 11 Axiti hi gara yaa'ese ayti hinumba u uqususune 'Am nu zeerre?' hissine burona maddhundofita. Yenniyakani Wonto garafa hi siinenike zeeruwayte. Ye esani zeeresi hinumba e maaddhobaane Ayaana Geeshuko.
12 Indo na'i beyndo na'e, adeni be yele e hay'orosa garsi e inge. Nayshiti biya yellasiti gara dendi iilli u wodhuse. 13 Ta gisha axi uddina hinumba iitana u inxha'e. Maaqe baa danda'ona aallicira aallo miingesa Wontoy esa maarako e maare.
14 Ha esani zeerusesi eruwaye! [Kaayaxi Dan'eelena e zeeruttonike] maaqese bishuwa godo dhohusesa darrise abako hi beeneniya yenniya Yuuda wude yeseesiti bakkita achuntuwaye.
15 Shuchi keexi qinowa yese godo yeseesiti zawa hodhi zawaafa abako efese zawa gelloppe. 16 Woota yesesini maa'o efese be zawa maaddhoppe. 17 Ye woggaa gawwaara yeseesitusaara dhanxe dhamuseesitusaara uso baduffu!
18 Ha esini bargo e maaqeeme shi'uwayte. 19 Esume hi shi'esini ye woggaaka Wontoy afani sahani meddhossaafa ayti hatte makko benti eruwa maddhaara waayyaarako maaqesa. Buro garani ye esa bishe maddhaara waayyaaray yoowasso.
20 Wontoy ye wontita hatuse e dheeddesesakoma ooneni maaruttese danda'uwadiko yecha. Xharutta geritume hissineko ye wontita e hatuse. 21 Assi ooneni 'Wiy, Mesihey hay hayako e yese' yeydiwo 'Beewwa! Sey seyako e yese' yeydi e hidako 'Aadeko' hidi hidofita. 22 Mesihe maaquwasiti 'Tani Mesiheko' kaayaxe maaquwasitini 'Tani kaayaxuko' hidi hissineko zaadaxiti yoodi Wontoy xhardechoshita danda'a'ayko haluxese micushe abakowara du'use abakowara u hante. 23 Hay, ha maaqara zeereme burussi uddi zeerdiko ta yese. Hinumba naddhi kakkuwayte.
24 Yenniyaka maddhay ello geede qoossi e ceenge, agunnani be fo'e beysuwasso. 25 Xhoolintitini afaafa u gukke, afaa yese ositini iitana u en'e. 26 Ye e geede axi yele hidi hiyuttasi orje adeto ayti orje kuxa fuulana dhumaanna e yoosune axiti u beene. 27 Esini Wonto woosaxita anxe, oyddi badena handi saha wosulaafa afa wosula aallo benteesita esuse xharuttese axitani u bhikkile.
Yesuusa yoowe miindi kafe gisha
Mat 24:32-44; Luq 21:29-33
28 Belese sunge mixi garafa bidzi abako eruwayte. Be hange gara e cultusune e washey dice ayti e jhiletto geede atoy uddhosako hi ere. 29 Yeenkewo ha esi maaqesa hi beesune axi yele hidi hiyuttasi yoowey e uddhonike eruwayte, fetto sumaa elliko e yese yeydi hiyoko. 30 Aadeko hinuse ta ohe, ha yeluttey gareesume buro haanxhi uddiko e aale. 31 Afani sahani baattako u baane. Ta katomay miindi koolo makkinako e yese.
32 Ye wontaara ye saatiyara ayde e maaqenike adewo baaka ooneni eresi baasso. Wonto woosaxitani maaqqe e yeleni eruwasso. 33 Hinuni ye wontay ayde maaqesa eruwaytako, hinumba naddhi kakkuwayte. Oseywayte.
34 Ye esini bisheshi zara wude soofa handa adeko. Esini be zawa maalita e bidzi bidzina shahuttese hanta gara gaddi kakkesani miindi e kaforonike oti e hando. 35 Ha e gisha hinumba naddhi kakkuwayte. Ye zawaadey yoone wonte eruwaytako. Yoowese e danda'esi hanno qamana, ekke wodhakka, lukkali oollusune oo'oyne ketiya sho'e yoowesuko e danda'e. 36 Hi masso baane yoodi geti hi yesune hinumba degessoffe! 37 Hinuse ta zeerdonike fedeesituseni uddi oseydi kakkuwayte hidiko ta hine" yeydi e hido.