12
Weyne hantaxiti mamako
Mat 21:33-46; Luq 20:9-19
1 Sekkeni Yesuusay mamakona zeere e ayto. "Bidzi axi e yecha. Weyne zuuse totti qeysheni e googe e qeyjjho. Ye weyne zuusi aafey essa cicutte godo shuche wocci bootti e naddho. Essa yesine kafese shuchi shakka e keexxho. Ye e geedeni ye tofuttecha weyne godo miijhe efese hanteesituse u hantorosa indi zara wude dhaddi e hando. 2 Weyney kaxxho woggaaka ye e kaxhaafa e ooworosa be maala hantaxiti gara e anso. 3 Usini ye e maala ayti durdi kuche mela u gooddo. 4 Ye weyne zuusaadey sekke fede be maala e anso. Hantaxitini ye e qino zaydi borsusi hanke u gooddo. 5 Sekke assiwo fedani e anso. Ye esani u woddho. Lagitani e ansine bidzi bidzitani u durdo, feditani u woddho. 6 Anxese attasi e eehicho e yelewoko e maaqicha. 'Ha ta yelema kuxako u kuxe' hidi massi geede alsuwa be yele e anso. 7 Maaqe baa hantaxiti be bidzi bidzina 'Ha esimay e dhaalaxuko. Yoowayte, nu woddheese. E sahani nuusuko maaqe' hidi 8 ye yeleni ayti woddhi weyne giddaafani wude kessi u datto.
9 Hinne ye weyne tottecha adey waani e hiye? Beesewo yoodiko ye hantaxitani e wodhe. Ye weyneni fede hantaxituse e inge. 10 Hine Hayla Fissharowa yeydi diizuttesesa zeerusobaytuwa? 'Shuchuna keexhichashiti haassi dattecho shuchi hade boorey keexe aykenike zawa ayke shuche e maaddho. 11 Ha esini Wonto hantako, nu aafeseni du'usesako' yeydiko e diizutto" yeydi e hido.
12 Ayhuda afana maagiti Yesuusay zeerdo mamakoy ususe maaqesa erdi esa aykese wordechine laga axita jhasshi dhaddi u hando.
Gaalose uddha oyche
Mat 22:15-22; Luq 20:20-26
13 Farasaxitafaara Herodise baditafaara bidzi bidzi geriti Yesuusa e zeerena qaxhese e gara u anxutto. 14 Esuko yoodini "Nu Laaxo, neni aadaxe maaqesa erako nu ere. 'Axi am taa ohe?' hidi hissine hooddi hantuwannako. Axi aafusha beedo badiwoko fetto Wonto ogeni aadenawo ne eruse. Hine Rooma kaatusea gaale worgusuwa e worguseni? Worgusuwanikeni e hido? 15 Gaala nu gaaleni dhabaara nu dhabe?" yeydi u oycco. Yesuusani u awsha erdi "Ame taa qaxhese hi worge? Mee, miijhiyafa bidzo oodi taa beysuwayte!" yeydi e hido. 16 Miijheni u oodo. Esini ususe "Ha miijhe gara yese bishaara diizuttese sunxaaray oonesuni?" yeydi e oycine "Rooma kaatusuko" hidi uydo. 17 Yesuusani "Hine Rooma kaatuse maaqesa Rooma kaatuse, Wontose maaqesa Wontose inguwayte" yeydi e hinne hanke e matosuna u micco.
Axi be haydho geede aba e maaqesa
Mat 22:23-33; Luq 20:27-40
18 Ye e geedeni "Haydhasiti denduwasso" yeydi hicha Sodoqaxiti Yesuusako uddhi bidzi zeere oyce u gello. 19 "Laaxo! Musey nuuse diizzi indo wogaafa bidzi wogako yecha. Ye esini 'Bidzi axi macho etti yello badi e hay'o'ayketese esindo na'i ye indo dhaalli i gara yelli haydhasuse dhaalaxe garxeko e worguse' yeydi hinesako e maaqicha. 20 Hine bidzi indo na'axhiti laappi yecha. U angusse maaqichashini macho etti yello badi e haydho. 21 Lakkunxo esindo na'ini ye indowo dhaalli yello badi baado. Hayssoni yeydiwo maaddho. 22 Ye e bishana laappi na'axhey iso dhaalli yello badesinewo baado. Ye u geedeni ye indoy baado. 23 Ye laappini be uddina yeysiwo iso ettecho gisha haydhasiti dende woggaaka a'esusuna macho i maaqe?" hidi u oycco.
24 Ususe Yesuusay "Hinuni yeydi hi halesi Hayla Fissharoy ohesaara Wonto osaara ere dheebena maaquwaye? 25 Haydhechashiti dendisine afaa yese Wonto woosaxituke u maaqesa baaka efuttuwasso geluttuwasso. 26 Haydhasiti dendese e maaddhako Wontoy Musese eexhiya yecha mixi dhushaaka ye tamaanna e zeerdonike Muse fissharowafa zeerusobaytuwa? Wontoy esuse 'Tani Abrahaame Wonto, Yissaaqe Wonto, Yayqoobe Wontoko' yeydiko e hido. 27 Wontoy yeso keengeesiti Wontoko baaka yeso keenguwasiti Wonto maaquwasso. Hinuni iitana halako hi hale" yeydi hissine e mato.
Uddime gare woosso gisha
Mat 22:34-40; Luq 10:25-28
28 Muse woga eruseesitaafa bidzi yoodi wolla zeere u bersesa siidi Yesuusay modhussi hanke matosa e gaxxho. Yesuusako uddhini "Uddi basume angussi woossoy a'esana?" yeydi e oycco.
29 Yesuusani "Uddime gare woossoy 'Isra'eele gerito, siwwayte! Nu Laaxi nu Wontoy e goshewoko Wontoy. 30 Ne Laaxe ne Wonto fetto ne muxhurona, fetto ne lubbona, fetto ne maxona, fetto ne osanani eehuwa!' yeydi hinesako. 31 Lakkunxo woossoni 'Fede axe uddina niya ne eehenikeysi eehuwa!' yeydi hinesako. Ye u lam'e gare fede woossoy baasso" yeydi e hido.
32 Ye Muse woga erusesini "Laaxo, modheko ne zeerdo. 'Wontoy bidziko, esa baaka fede Wontoy baasso' yeydi ne zeerdoy aadeko. 33 Axi fetto be muxhurona, fetto be maxona, fetto be osanani Wonto eeheko e worguse. Yeydiwo fede axeni uddina beenkeysi eeheko e worguse. Meggutte kaashaara fede kaashaara uddi Wontose uquseme ha lam'i woosso kafeko garesa" yeydi e hido.
34 Ye Muse woga erusesini eranaara gaxunaara hanke zeere matosa Yesuusay haysi "Neni Wonto kaatetiyafa zardesesa maaquwannako" yeydi e hido. Sekke ye e geede Yesuusa gara oyche uqusese naassay baasso.
Yesuusay Wonto Hayla Zawaaka erusso
Mat 22:41-46; 23:1-36; Luq 20:41-47
35 Yesuusay Wonto Hayla Zawaa erusisine "Muse woga eruseesiti 'Mesihey Dawite yeleko' hidi ame uyne? 36 Dawitey beese Ayaana Geeshuna durkutti
'Wontoy ta Laaxuse "Ne iilaxita iisshi ne adeto oomo ta mahoro aallo ta oshishaa uttuwa!" hidiko e hido' yeydiko Dawitey hido.
37 Dawitey beese Laaxo yeydi xheygusune hine esi Dawitese waydini e yele e maaqe?" yeydi e oycco. Yenniyakani axiti orje maggana u siicha.
38 Yesuusay erusisine "Galala maa'o maadhi sekke hanke arti gadhesani axi ususe kuxa sawo ingorosa eehe Muse woga eruseesiti garafa hinumba kakkuwayte. 39 Usini Bhikkilo Zawaani hayyaxhey utticho godowa uttesuko u worge, massalaaka kuxa godowoko u eehe. 40 Bentese hissine galalsi u shi'e. Ye esa goyndi u adey baadese indowaxhiti zawa u bonqe. Ha e gisha gardese yaa'ako u gara yaa'uttesa" yeydi e hido.
Bidzi indoy Wontose indosa
Luq 21:1-4
41 Yesuusay Wontose ingutticha miijhey essa dafutticho saaxhine burowa handi e utto. Laga axitini ye saaxhiniya miijhe u dakkusune beya e yecha. Laga wodumitini laga miijhe dafiya u yecha. 42 Bidzi i adey baadese indo jhi'oy bidzi saante ellesa lam'i laakaafa hantuttese miijhe i ollo. 43 Yesuusani be erusichoshita beeko xheydi "Aadewoko hinuse ta ohe. Ha saaxhiniya miijhe olleesitume uddime garsi indanni ha i adey baadese jhi'o maaqe indoko. 44 Ye esini fedeesiti uddi u indosi be keengicho woduntiyafa gardasuko. Isimay jhi'o maaqisine beese shato badi be keengichosha uddiko i ollo" yeydi e hido.