11
Yesuusay kuxana Yerusaleeme gellosa
Mat 21:1-11; Luq 19:28-40; Yoh 12:12-19
1 Yesuusay be erusichoshitaara Yerusaleeme yoodi e uddho. Zayte Bakka da'aa yese Beetefaagiyaara Biitaniyaara be ello geede be erusichoshitaafa lam'e 2 "Hi buro yese katamaa hanguwayte! Handi hi elloyna bhanqutti e hine axi e gara utto baa harre darmeko tufuttesesa yaha hi beene. Ye esa birshi oowayte! 3 Ooneni 'Ame hiise?' hidi hitta'ayko 'Laaxuse e worgusineko, ukkenawoko hanke e anxe' hidi hiwayte" yeydi hissine e woosso.
4 Usini handi ye harre darme zawa sumaanna garxe ogiyaka tufutti e yesune degessi u birsho. 5 Yaha yecha axitaafa bidzi bidziti "Abasun hiise? Harre darme ame hi birche?" yeydi u oycco. 6 Usini Yesuusay beeko otechonike u oto, axitini dhaddine etti u hando.
7 Ye harre darme Yesuusako u oodo. E shashaa be maa'o u gaddine Yesuusay e gara utto. 8 Laga axiti be maa'o ogiya u ollicha. Fedeesitini be googefa mixi washe bursi oodi u dakkicha. 9 E buro e geede hamiya yechashiti uddina "Kuxay maaquwayea Wontose! Laaxi sunxuna yoonesi suuzuttesesako. 10 Yoone nuu yella nu ade Dawite kaatetey suuzuttesesako. Afase e wosula aallo kuxay Wontose maaquwaye" yeydi maggana doomiya u yecha.
11 Yesuusani Yerusaleeme be ello woggaaka Wonto Hayla Zawa qeyshi giddaa e gello. Sekke hanke artini uddina beedi sahay qandecho gisha be erusicho tamma lam'aara yahafa kessi Biitaniya e hando.
Bidzi belesey aacuttosa
Mat 21:18-19
12 Geede wonte Biitaniyafa maaddhi u yoosune Yesuusay e naayutto. 13 Culti washe laddese Belese sunge mixe zara beedi "Hanno aafey e gara yeso" hidi hissine esuko e hando. E uddhine Belesey kaxhicho agunna e maaquwadecho gisha washewo baaka abani aafe degexe e dheeddo. 14 Hinne Yesuusani ye belese mixe "Hattiyafa sekke koolo makkina ooneni ne garafa aafe kaxha muudoppe!" hidi e hido. Yeydi e hidosani e erusichoshiti u siido.
Wonto Hayla Zawaaka yecha gadhesay buduttosa
Mat 21:12-17; Luq 19:45-48; Yoh 2:13-22
15 Yerusaleeme u yoodo. Yesuusay Wonto Hayla Zawa qeyshi giddaa gelli yaha e gawwaa zal'ichashitaara woongichashitaara goodde e ayto. Miijhe e gara gaddi u arxicho xharabheeza assi woyya zal'ichashiti e gara utticho wombariyaraysi e gufunso. 16 Ooneni abani iddi Wonto Hayla Zawa karaannab garuwannike e oosso. 17 Usoni erusisine " 'Ta zaway uddi wude axuse shi'e zawako hidiko e xheygutte' yeydi diizutto baye? Hinunimay kaysiti googgoko hi mato" yeydi e hido.
18 Wonto Hayla Zawa kahinituse afana maagitaara Muse woga eruseesitaaray ha zeere siidi Yesuusay erusosuna axi uddi du'eydine u jhassho. Ye e gisha waysi esa be baysenike oge u worgicha. 19 Sahay qameseyne Yesuusaara e erusichoshitaaray katamaafa dhaddi kessi u hando.
Cooco badi shi'e gisha
Mat 21:20-22
20 Usini ketiya oge dhaddi u garusune ye Belese mixi be xhabhowarawo melli e yesune u beedo. 21 Phexhroseni zinese gaxxhi Yesuusa "Beewwa, Laaxo! Ye ne aacecho mixi melliko e yese" yeydi e hido. 22 Yesuusani be erusichoshituse "Wonto gobbe mahuwayte. 23 Aadewoko hinuse ta ohe, ooneni axi be muxhurowa eezzo badi be worge zeere 'Maaqoko e maaqe' hidi hissine ha bakkase 'Dendi bagadiyaaka unguwa' yeydi e hidako maaqoko e maaqe. 24 Ha e gisha hinuse ta ohesi Wonto hi zeeruse woggaa abani hi ga'eniya hi muxhurowa 'Ettiko ta yese' hidi hiwayte, hi shi'esa efako hi ekke. 25 Afaa yese hinadey hi bayso 'Attuwaye' hidi hinuse e hiyorosa hinuni Wonto shi'ese hi naqutte woggaaka axi gara hi keenge zeere dhagguwayte. 26 [Yeydi e maaqusune hinuni fedeesituse 'Attuwaye' hidi hiye hi dheeddako afaa yese hinadey hi bayso 'Attuwaye' hidi hiwasso]" yeydi e hido.
Yesuusa adeto gisha
Mat 21:23-27; Luq 20:1-8
27 Sekkeni Yerusaleeme u yoodo. Yesuusani Wonto Hayla Zawa karaaka sekke hanke hantiya e yesune kahinituse afana maagitini Muse woga eruseesitaara gate cimitaaray esuko uddhi 28 "Ha zeerita ne hantesi an adetonana? Yeydi ne hantoronike ha adeto neese inday oonewa?" hidi hissine u oycco. 29 Yesuusani "Hine tanini hinumba bidzi oyche oycceere. Hanke taase hi matoyna tanini ha zeerita an adetona ta hantesa hinuse ta ohheere. 30 Yohanisey Wontoy ansiniya e xhamaqichani axi ansinena? Haaya mee, taase ohuwayte" yeydi uso e oycco.
31 Usini "Hine am nu ohe?" yeydi be bidzi bidzina wolla u zeerdo. " 'Wontokofako' hidi nu hikkete 'Hine ame "Aadeko" hidi esa efe hi dheeddo?' yeydiko e hine. 32 'Axukofako' hidiya nu hiye?" hidi uydo. Yeydi u hiyoroome axi uddi "Yohanisey kaayaxuko" yeydi hicho gisha axeni u jhassho. 33 Ha e gisha "Nuni eruwanxhiko" hidi hissine esuse u mato. Yesuusani "Yey, tanini an adetona ha esa ta hantesa hinuse ohuwasso" hidi e hido.