10
Wontoy zuddhosa axi birshoffe
Mat 19:1-12; Luq 16:18
1 Yesuusay yahafa dendi Yuuda wude yoodi Yordanose semfa e fotto. Laga axiti e da'aa assi u bhikkiluttecha. Ye usitani buro be lossoke e erusicha. 2 Bidzi bidzi Farasaxiti Yesuusako yoodi esa qaxhese wordi "Axi be macho daforosa wogana ohuttiya e yese?" hidi u oycco. 3 Yesuusani "Musey hinuse am e otecha?" yeydi e hido. 4 Usini "Musemay axi esuna be macho be dakke diizuttese ato isuse indi daforonikeko e matecha" hidi uydo. 5 Esini "Musey ye woga e kessosi hi muxhuro miimete beediko. 6 Maaqe baa burona meddhowafa ayti 'Wontoy asanxaara maachiyarako e meddho. 7 Ye esunako axi biyadiyara beyndowara dhaddi be machiyara wolla e zuqutte. 8 Ye u lam'ini bidzi axe u maaqe' yeydi hiyoni lam'e u maaqesi atti bidzi axuko u maaqe. 9 Ha e gisha Wontoy wol gara zuddhosa ooneni birshoffe" yeydi e hido. 10 Zawa u yoodo geede e erusichoshiti ye zeerese sekke Yesuusa u oycco. 11 Yesuusani "Ooneni be macho datti fede indo ekkesi be machi gara laggetako e laggete. 12 Yeydiwo be adesofa kessi fede ade gela'ayko ye indoni laggetako i laggetto" yeydi e hido.
Yesuusay nayshe suuzzo
Mat 19:13-15; Luq 18:15-17
13 Axiti nayshi giddhita Yesuusay be kuche u gara gaddi e suuzorosa esuko u oodo. Maaqe baa e erusichoshiti ye nayshe ooda gerita u gayllo. 14 Yesuusani ye esa beedi huulli be erusichoshituse "Wonto kaatetoy ha usuke yeseesituse e maaqe gisha nayshi giddhiti taako yoowuttuwaye, oossofita. 15 Aadewoko hinuse ta ohe. Wonto kaatete hade yele oddheke maaddhi ekkuwasi fetto geluwasso" yeydi e hido. 16 Ye e geedeni nayshita udundi be kuche u gara gaddi e suuzzo.
Wodunte gisha
Mat 19:16-30; Luq 18:18-30
17 Yesuusay yahafa kessi hame e ayto. Yenniyawo bidzi axi esuko woxxhi yoodi e buro bocunti "Modhe ta Laaxo, koolo makkina yeso degexese am hante taa e worguse?" hidi e oycco. 18 Yesuusani "Abasuna taa modheydi neyne? Bidzi Wontowo baaka ooneni modhey baasso. 19 Wonto woossita erako ne ere. Ye usini 'Woddhofuna, laggettofuna, kayssofuna, zaade ateydofuna, qaarusofuna, niyadiyara neyndowara kuxuwa' yeydi hineesitako" yeydi esuse e mato.
20 Ye adeni "Ta Laaxo! Ha usita uddina ta yeletiyafa ayti kattiko ta yese" hidi e e hido. 21 Yesuusani e aafiya caddi beedi e eeto. "Bidzi basuwoko ne shatese. Hanguwa, ne keengesa uddi zal'i ye ne miijhe jhi'ituse inguwa! Afaaka ellese wodunteko ne degexe. Ye e geedenia yoowwa taara yesuwa!" yeydi e hido. 22 Ye adeni ye zeere be siidosuse higilli be deemo e iisso. Laga wodunte be keengicho gisha fettona higilsine e hando. 23 Yesuusay arti beedi be erusichoshituse "Wodumituse Wonto kaatetiya geley waydi maddhunxesani" yeydi e hido. 24 E erusichoshitini e zeerdo katona u micco. Yesuusay ususe sekke mati "Naysho!b Wonto kaatetiya geley waydi maddhunxesani. 25 Wodumay Wonto kaatetiya geleesume gaaloy marfe wulaanna garesako shawukesa" hidi e hido. 26 E erusichoshitini orjenawo du'eydi "Hinne ooni loolese danda'esa?" hidi be bidzi bidzina sekke hanke wolla uydo. 27 Yesuusani usuko beedi "Ha zeerey Wontosewo baaka axuse danda'uttuwasso. Wontosema uddi basuko danda'uttesa" yeydi e hido.
28 Phexhroseni beese Yesuusako "Beewwa! Uddi base dhaddiko neera nu yoodo" hidi e hido. 29 Yesuusani "Aadewoko ta ohe. Taamiyara modhe odomiyara be zawa, beyndo na'axhita beyndo bunaycita, beyndoni, biyadeni, be nayshitani, be wootani dhagge axi uddime garesako e degexe. 30 Fetto ha beraaka zawitani, indo na'axheni, indo bunayceni, yella indoni, nayshitani wootani xhiixi dakkenako e degexe. Goodowara maddhaarani efako e ekke. Yoone kille sahaaka koolo makkina yesoko e degexe. 31 Maaqe baa burosi lagiti geedese u maaqe, geedesi burose u maaqe" yeydi e mato.
Yesuusay be gara elle maddhase haysso e zeerdo
Mat 20:17-19; Luq 18:31-34
32 Yerusaleeme aange ogiyaanna kessiya u yesune Yesuusay u buro e hangicha. E erusichoshitini dhonxhidi miccine e geede hangichashitini jhassho. Assi be tamma lam'e beeko uqussi biya ellese hinesa zeere e gello. 33 "Siwwayte! Yerusaleemeko nu hange. Yahani axi yele hidi hiyuttasi Wonto Hayla Zawa kahinituse afana maagitusaara Muse woga eruseesitusaara gardi e ingutte. E hay'oronikeni e gara u yaa'e. Yaadhi Ayhuda maaquwasituseni garsi u inge. 34 Usini esa dhaaddi e gara u cute, u dure, u wodhe. Maaqe baa haydzi wonte geedeko e dende" yeydi e hido.
Zabdoose nayshi oyche
Mat 20:20-28
35 Zabdoose nayshi Yayqoobiyara Yohanisiyaray Yesuusako uddhi "Nu Laaxo! Nemba nu shi'esa aba e maaqo'aykoni nuuse ne mahorosako nu worge" yeydi u hido. 36 Yesuusani "Am hinuse ta hantorosa hi worge?" yeydi e hido. 37 Usini "Nu worgesi ne kaatetowa ne kuxutteniya numba bidzo ne oshishaa bidzo ne hadursaa ne uttussoronikeko" hidi u hido. 38 Yesuusani ususe "Aba hi shi'esani eruwaytako. Tani ekke maddha usshec usheshe danda'aa hi danda'e? Tani xhamaqutte maddha xhinqate xhamaquttese danda'aa hi danda'e?" yeydi e hido. 39 Usini "Eewwa! Danda'ako nu danda'e" hidi uydo. Yesuusani "Tani ushe maddha usshe ushoko hi ushe, tani xhamaqutte xhinqateni xhamaquttoko hi xhamaqutte. 40 Maaqe baa ta oshishaara ta hadursaara utteesiti ususe e naqutteseesitako. Ye esa ingesi taa maaquwasso" hidi e hido.
41 Fede tammi e erusichoshiti ye u zeere siidi Yayqoobe garaara Yohanise garaara u huullo. 42 Yesuusani be erusichoshita uddina beeko xheydi "Ha saha gara yese axituse u afana maagako hidi hi maxeesiti axita osana u durkenikiyara anguzaxheni uso be eehenike ahenikiyara erako hi ere. 43 Maaqe baa hi giddaani yeydi maaddhoppe. Hinukaafa ooneni afana maaqese worgesi hinuse maraxe maaquwaye. 44 Hinukaafani ooneni angusse maaqese worgesi uddise e maala maaquwaye. 45 Beese axi yele hidi hiyuttasini e yoodosi axe maresaara be yeso garsi indi laga axe beenna wozesaarako baaka axi esa marorosa yoodo baasso" yeydi e hido.
Barxhemoose aafey loollosa
Mat 20:29-34; Luq 18:35-43
46 Ye e geedeni Yariko katamaaka u yoodo. Yesuusani be erusichoshitaara laga axitaara wolla Yariko katamaafa dhaddi e kesusune Xhemoose na'i Barxhemoosey aafe bal'ay miijhe shi'isine oge da'aa uttiya e yecha. 47 Yeyna garesi Nazrataxi Yesuusa e maaqesa be siido woggaaka "Dawite yele Yesuusa! Odde, taa beyashuna!" yeydi uwwe e ayto. 48 Laga axitini "Mikki hiwwa!" hidi u gayllo. Esini "Dawite yele, odde, taa beyashuna!" hidi hissine fettonawo garsi uwwa e lagusso. 49 Yesuusani eedhi "Xheyguwayte!" hidi e hido. Usini ye bal'a "Denduwa, oseywa. Niya xheygiyako e yese!" hidi uydo. 50 Esini be maa'o datti afaa doondi dendi Yesuusako e hando. 51 Yesuusani "Aba neese ta hantorosani ne worge?" hidi e oycco. Ye bal'ani "Laaxo, ta aafey beyorosako ta worge" hidi e hido. 52 Yesuusani "Yey hanguwa! Tamba ne goddosuna loolliko ne yese" hidi e oto. Ye bal'ani yenniyawo beyese e dandadho. Yesuusaara oge hame e gello.