Matoose Modhe Odo
Do'o
Ha modhe odo diizzasi buro Lewe sungicha Ilfiyose na'i Matooseko. Esini Laaxi Yesuusay erusicho tamma lam'ukafa bidzoko e maaqicha. Yesuusay esa xheydoosume buro qaraxha qaraxhe axuko e maaqicha.
Ha fissharoy diizuttosi 60 - 65 Maaro Bera aallo yese bera giddaa maaddho badi dhagguwasso hidiko e hiyutte.
Matoosey ha modhe odo e diizzosi Ayhudaxiti buro e yoone hissine u kakkicho Mesihey Yesuusa e maaqenike ato uqusenako. Ye esini 1. Yesuusa yella gerita u bidzi bidzina ohena; 2. Buro Caaqo fissharowa kaayaxiti otecho kaayoy Yesuusa yesowaka waakidi e aallonike beysena; 3. Ha modhe odo zeeruseesiti Ayhuda woga erenike mati diizenako. Yeydi e maaddhakoni ha modhe odoy e diizuttosi Ayhudaxitusewo e maaddho baane ha saha gara yese axituse uddiko.
Matoosey Yesuusa gisha diizisine Yesuusa kaate matiko e uquse. Ha modhe odowaka ye kaate mati e uqusosaara wola ayti "Wonto kaatete" yeydi hinesi ichichi tammi godoko diizuttese. Ayhudaxiti Wonto sunxe xheyge jhashicho gisha Matoosey "Wonto kaatete" hidi hiyekofa assi haydzi tammi godo "Afa kaatete" yeydiko e diizzo.
Matoosey be diizzo modhe odowaka Yesuusay Galilaafa Yerusaleeme handi be elloro makko hanto hantaara e eruso erunxaara shati shatiko e diizo. Fetto e eruso erunxe ichichi godowako aakussi e gaddese. Ye usitini Mat 5-7, Mat 10, Mat 13, Mat 18, Mat 24-25.
Ha modhe odoy shahuttesi izzuppi godoko:
1. 1:1 - 2:23 Yesuusa yella geraara e yeluttiyara
2. 3:1-17 Xhamaqicha Yohanise hanta
3. 4:1 - 18:35 Yesuusay Galila wudiya e hanto hanta
4. 19:1 - 20:34 Yesuusay Galilaafa Yerusaleemiya yoodosa
5. 21:1 - 25:46 Yesuusay Yerusaleemiya hanto hanta
6. 26:1 - 28:20 Yesuusa haybowara e denxowara