5
Xhoozi gooshecho adey loollosa
Mat 8:28-34; Luq 8:26-39
1 Galila bagade zabhana fotti Gerasenoone wude u ello. 2 Yesuusay zabhaafa kessonike bidzi axi xhoozi aytesesi boossiti giddaafa kessi esaara e muto. 3 E yeso godoni boossaakawo maaqusune ooneni esa feday yaha yesune fetto sansalatanani tutti gadese danda'uwadiko u yecha. 4 Laga wogga aallo toke tukke qanganaara sansalatanaarako e tufutticha. Tufuttose baaka ye sansalata bursi shittiyara toke tukke qanga meyssi kinci dattiyarako e yecha. Ye e gisha esa ayti essesi ooneni badiko yecha. 5 Uddi wogga qamani wontani burso badi boossaakaara bakka garaara seya haya hanti e uwwicha. Shuchuna be gara zaydi e madusicha.
6 Esini Yesuusa zara beedi esuko woxxhi yoodi baagisine e buro bocunti 7 be kato keddaysi uwwisine "Uddime afana maaddhese Wonto yele Yesuusa, niya am taassa gelsesa? Wonto sunxunako nemba ta shi'e, odde, taa maddhunsofuna!" yeydi e hido. 8 Xhoozi esume yeydi hidosi esini "Neno xhoozo, ha axi garafa kesuwa!" yeydi e hidecho gishako. 9 Yesuusani "Ne sunxi oonewa?" hidi oycco. Esini "Laga nu maaqe gisha ta sunxi Shaweko" yeydi e mato. 10 Ye wudiyafa e gooduwannike minsi e shidho. 11 Yaha bochiti gara girme lagay yeemuttiya yecha. 12 Usini "Hine odde, se girmituka handi nu gelleese" hidi esa u shidho. 13 Yesuusani "Geluwayte" hidi hido. Xhoozitini ye axe datti girmitukaaka handi u gello. Lam'i kuma elle girmey gaagaanna leemo kessi woxxhi bagadiya gutti u baado.
14 Ye girmita yeengichashiti badhi woxxhi katamaakani katamase wudeni uwwa u ellusso. Axitini maaddha abako beyese be zawafa zawafa kessi 15 Yesuusakoni yoodi hade laga xhoozuna aykuttecha axi uttiya be maa'o maadhi bembani erdi e yesune beedi u du'eydo. 16 Ye buro maaddhase beeda axiti xhoozi e gara yecho axusaara girmiti gara maaddhasaara uddina u odusso. 17 Hinneko ye wude axiti Yesuusay u wudiyafa kessi dhaddi hamorosa shi'e u ayto.
18 Yesuusay zabhaa geliya yesune xhooze e garafa e gooddecho axi uddhi "Odde, neera handi ta yesseese" hidi e shidho. 19 Yesuusay beera e hamorosa oossi "Dhaddi ne zawa handi ne Laaxi neese waysi keddaydese hanta e hantonikiyara aba makki aallo nemba e maardonikiyara ne iginituse odusuwa!" yeydi e hido. 20 Ye axini handi "Tammi Katama" hidi hiyutte wude Yesuusay waysi keddaydese hanta beese e hantonike e odusicha. Siidasitini uddina u micco.
Ya'irose busho gishaara bidzi indo gishaara
Mat 9:18-26; Luq 8:40-56
21 Yesuusay sekke zabhana bagade fottine axi lagay assiwo esuko bagade da'aa u bhikkilutto.
22 Ayhuda Bhikkilo Zawa afana maagitaafa maaqe Ya'irose sunge adey e yecha. Yesuusay yecho godo yoodi esani be beedoniyaka e toke gara undi 23 "Ta busho barriyoko lubbosewo yesa. Odde, aadhuwa! Ne kuche i gara gaddena hikkete loolli hantonni!" hidi orjena maddhundi e shidho. 24 Yesuusay siidi Ya'irosiyara hame e ayto. Axiti lagay usaara hangisine esa u ur'icha.
25 Tamma lam'i bera aallo suuxi yoodi iitanawo iso maddhunxicho bidzi indoy i yecha. 26 Dhaliyade gara seya haya hangi hangi iinne be miijhewo uddi i alsichosha baaka abani looloy isuse dheeddecha. Fettonawo i gara sekke e miindecha. 27-28 Yesuusase odusuttase siidi "Fetto e maa'o bira dollako loolako ta loole" yeydi be muxhurowanna massi axiti feeqaanna ur'i gelli geedena yoodi e maa'o bira loddissi i dollo. 29 Ye suuxi yenniyawo eedhine i loollosi isuse erutto. 30 Yesuusani yenniyawo harge loolusese danda'e osay beekofa kessosa erdi axituko maaddhi "Ta maa'o dollasi oonewa?" hidi e oycco. 31 E erusichoshitini "Haanxhi laga axiti ur'iya yesesa beesine 'Ooni taa dolla?' hidi ame neyne?" hidi uydo. 32 Esini yenniya be maa'o dollase erese be googe e beecha. 33 Ye indoni aba makki aallo be loollosa erdi jhasshi kobursine yoodi e buro undi be hantosa e bidzi bidzina i oto. 34 Esini "Nuunde, tamba ne goddosuna loolliko ne yese. Ne hargiyafa geejhuwa! Yoonase, modhena hanguwa!" hidi e hido.
35 Yeydi haga Yesuusay zeeriya yesune ye maaga maaqe Ya'irosesofa axiti woosutti "Bushoy neese baadiko yese. Yoonase dhagguwa! Laaxe maddhunsofuna!" yeydi u hido. 36 Yesuusay ye u ohesa siidi Iya'irosese "Du'eydofuna, 'Loolusako e looluse' hidi hiwwa neese!" yeydi e hido.
37 Yesuusay beera handecha axiti laga oossi Phexhrose, Yayqoobe, ye Yayqoobeyndo na'i Yohanisiyarawo etti Iya'iroseso e aadho.
38 Ye maagaso handi u ellusune Yesuusay axiti iitanawo yeekesa uwwesa "Ay! Uy!" uynesa e beedo. 39 Esini ye zawaa gelli yeefiya yechashituse "Abasuwa hi yeeke? Hi uwwe? Ha busshi gehiya i yesesa baaka baado banniko" yeydi e hido.
40 Axiti orjena qozoozzi miicco. Yesuusay axe u uddina zawaafa wude e kesso. Ye busshiyade ye bushindo beera yecha geraaraysi etti ye busshi woy'icho godowa e gello.
41 Ye busshi kuche ayti "Taliita kumi!" yeydi e hido. E birchey "Busshe, denduwa!" yeydi hiyoko. 42 Isini yenniyawo dendi sekke hanke hante i gello. Tamma lam'i bera bushoko i maaqicha. Beedaasiti fettonawo u micco. 43 Esini oonekoni u odusuwanike minsi e kassho. Ye e geedeni "Kaxa isuse inguwayte" hidi e hido.