4
Mor'e mamako
Mat 13:1-9; Luq 8:4-8
1 Yesuusay bagade da'aa sekke assiwo eruse e ayto. Danda'uttuwa axi lagay esuko yoodo gisha zabhay bagade gara yechoyne essaa gelli e utto. Axi be uddina ye bagade da'aa sahaa u yecha. 2 Mamakona laga zeere e erusicha. Usoni erusisine 3 "Siwwayte! Bidzi adey e yecha. Ayla ayleseni be mor'e etti e kesso. 4 Ayliya e yesune bidzi bidzi mor'ey oge da'aa undechoyne kafoy yoodi maxxhi muudo. 5 Fede mor'ey saha be oomo keenguwa qaaqa gara e undo. Yaha sahay laga badecho gisha izziya e mudho. 6 Mu'ese baaka awway undine shulli xhabho be datto badecho gisha e mello. 7 Feday haga cultiya yese anke gidda undo. Ye ankey be kesso geede esa be oomo gitti e ayto gisha aafe kaxxho badi e dhaddo. 8 Fede mor'ey saha modhiya aylutti e mudho. Ye mu'ay dicci modhe aafe e kaxxho, badey haydzi tamme, badey izzuppi tamme, badey xhiixe yeysi e kaxxho. 9 E siyorosa washey yesesi naddhi siwwaye" yeydi e hido.
Ye mor'e mamako birche
Mat 13:10-23; Luq 8:9-15
10 Yesuusay be goshewo yesune tamma lam'itaara esaara yechashitaaray ye mamakiti birche esa u oycco. 11-12 Esini "Hinuse Wonto kaatete aasshi be gaddechosha hi eroronike matiko e yese. Wude yeseesitusema
'Usini hanke Wontoko maaddhi u cubboy ucutti ooxuttoroome, beesine naddhi u beewanike, siisine u gaxhuwannikeko'
uddi zeerey mamakonawo e zeerutte" hidi e hido.
13 Yesuusay ususe "Ha mamakoy hinuse geliya baye? Hine fede fede mamakita uddi waydiwu erese hi danda'e? 14 Aylesa hidi hiyuttasi Wonto kato ohesako. 15 Oge da'aa unda mor'ey ha esa bishe axitako. Kato u siido geede Humbayey yenniyawo yoodi u muxhurowafa u siidecho kato e ekke. 16 Yeydiwo qaaqaa ayluttasi ha esa bishe axitako. Usini kato siisine yenniyawo maggana u ekke. 17 Maaqe baa usi ye woggasewo baaka xhabho keemuttuwasso. Ye kato gisha maddhay oo'oyne goodoy elloynase yenniyawo dhumutti u unge. 18 Anke dhusha giddaa unda mor'ey ha esa bishe axitako. Usini kato siido geede 19 ha saha maxoy wodunte eehaara fede yaho col'aaray u muxhurowa gelli kato gite gisha aafe kaxxho badi u dhagge. 20 Feday assi modhe sahaa aylutta mor'ey ha esa bishe axitako. Usini kato siidi gaxxhi etti aafe kaxheesitako. Ye esa bisheeshiti badey haydzi tamme, badey izzuppi tamme, badey xhiixi aafe yeysiko u kaxhe" hidi e hido.
Kofa oomo gadutta faqe
Mat 5:14-16; Luq 8:6-18
21 Ye e geede Yesuusay ususe "Axi faqe faddhi gufunxuttese kofa oomo oo'oyne ijheydese godo gadaa e gade? Faqey beysorosa abako gara addaaka maaquwaye e gadesi? 22 Aachuttesi esume aachuttesi buro gara addaa bentesuko, ijheynesi esume ijheynesi tiddhiya kesesuko. 23 E siyorosa washey yesesi naddhi siwwaye" yeydi e hido.
24 Sekkeni assi "Hi siine zeere waysi hi siinenike modhussi hinumba kakkuwayte! Siidi hi gaxhenikeko mati hinuse sekke e ingutte. Garsiwoni fetto e kose. 25 Ye esini keengeesituse assi e ingutte, keenguwasi garafa ye e keengicho oddheni fettonawoko e efutte" yeydi e hido.
Wonto kaatete gisha mamakuttasita
Mat 13:31-32; Luq 13:18-19
26 Ye e geede Yesuusay ususe "Wonto kaatetoy ha esako e bishe. Bidzi adey be wootaaka ayla ayliya e hando. 27 Be ayllo geede ye axi qama aqa wonta feysho e hisune ye aylay waa waydi e hidosa e erdo baanne ye mor'ey mudhi e diche. 28 Ye sahay beesewo burona ulke e kesse aallo e diche, sekke geesha ye e geede ye geeshaaka aafe yeysi e kaxe. 29 Ye kaxay kaxxhi ello woggaaka ace woggay ello gisha kaxaadey ukkenawo be baacana ace e ayke" yeydi e hido.
30 Yesuusani "Wonto kaateto abaarana wol da'aa gaddi ni beyye? Aba mamakonawa ni adduse? 31 Hade saamo aafe bisheshe bidzi sanafice mor'eko e bishe. Ye mor'eni ayluttisine ha saha gara yese mor'iyafa fettona laaqi isowoko. 32 Aylutti be mudho geede dicci ha saha gara aylutta lagaafa uddi e gara, afa kafiti e gara keexxhi yesoro aallo malla hangita e dakke" hidi e hido.
33 Yesuusani axiti modhussi siyese danda'e makko ha esuke laga mamakona kato ususe e ohicha. 34 Mamako keenguwasa erusuwadiko e yecha. E erusichoshiti be goshewo yeseniyaka ususe uddi zeere birshi e ohicha.
Jhirahoy eedho gisha
Mat 8:23-27; Luq 8:22-25
35 Ye wonte qamese e hisune Yesuusay be erusichoshituko "Bagade geede nu fotteere" yeydi e hido. 36 Laga axita datti Yesuusay essa utticho zabhana dhaddi u fotto. Fede zabhitini usaara wolko hamese u dendo. 37 Iita agexi waaxi gara dendi waaxi zabhaa laddi kumese hiyoro aallo jhirahoy zabha oxhe gello. 38 Ye woggaaka Yesuusay ye zabhaaka geede badena be qinixo keddaysi gehunsa e yecha. E erusichoshitini esa birkussi "Nu Laaxo! Nu baasuniya mikku neyne?" yeydi u hido. 39 Esini dendi agexe e kassho, jhirahoni "Mikki hiwwa! Dhimmi hiwwa!" yeydi e hido. Agexini yenniyawo dhaddo, waaxi orjenawo sammi hido. 40 Yesuusani "Ame yeydi hi jhashe? Fetto abasuna Wonto hi gobbuwaane?" yeydi e hido. 41 Usini orjena jhasshi "Haha'e! Agexaara bagadiyaaray fetto e ohenike hinesi ha esi aba bisha axuwa?" yeydi sekke hanke wolko u zeerdo.