3
Kuche doccecha axi loollosa
Mat 12:9-14; Luq 6:6-11
1 Yesuusay assi sekke Ayhuda Bhikkilo Zawa gello. Yahani kuchey esuse docceshe bidzi axi e yecha. 2 Esa luufese worda geriti "Mee, ha sanbata wonte e loolusesa maaqo'ayko nu beyyeese" hidi esa u kakkicha. 3 Yesuusani ye e kuchey docceshe axe "Dendi axi buruwa ee'uwa!" hidi e hido. 4 Ye e geede luufese worgicha geruse "Hagako mee, sanbata wonte nu hantoronike wogay otesesi modhe hantiyani iita hantena? Axe haybowafa maariyani oo'oyne axe wodhewa?" hidi e oycco. Usini yenniyaka mikku uydo. 5 Yesuusani ye u muxhuro miimete gisha iitana higilli be googe yeseesitani huulana beedi ye ade "Ne kuche zee'uwa!" hidi e hido. Esini be kuche zeedhi e loollo. 6 Farasaxiti yenniyawo kessi Yesuusa waysi be wodhenike kaati Herodise badiyara wolko u kundo.
Laga axi Yesuusako yoodo
7 Yesuusani yahafa dhaddi be erusichoshitaara Galila bagadiya e hando. Galila wudefa saha lilimissi fassheshe axiti u geede aadho. 8 Assiwo, Yuudafa Yerusaleemefa, Edomiyasiyafa yeydiwo Yordanose semfa yese wudittafaara fetto Xhirose katamaafani Siidoona katamaafani yoodasiti u yecha. E hantosa uddina siidi taafutti danda'uttuwa axiti ye woggaawo esuko u yoodo. 9 Axi lagetiyafa dendasuna godoy dhibo'ayketese hissine zabha esuse u ooworosa be erusichoshituko e oto. 10 Laga axita u hargiyafa e loolusicho gisha be hargena hargena maddhungeesiti uddi esa dolese wordi karduttiya u yecha. 11 Xhoozitini esa be beedoniyaka e toke buro undi "Nenko Wonto yeley" hidi iitanawo u uwwicha. 12 Biya oone e maaqesa u oheesume minsi uso e kassho.
Tamma lam'i maagete gisha
Mat 10:1-4; Luq 6:12-16
13 Yesuusay ye e geede Galilaaka bidzi bakka gara kessi be eeheesita beeko e xheydo. Usini e xheydonike esuko hando. 14 Esume e xheydosini wolko yesese, u erusorosa anxese tamma lam'e "Anxuttaasita" hidi uso e maagesso. 15 Xhoozeni u goodoronike ususe adeto e indo.
16 Xharutta tamma lam'ini: Simoone "Phexhrose" hidi sundase, 17 Zabdoose nayshe Yayqoobiyara Yohanisiyara osaxaara allaxaara u maaqicho gisha "Bo'anergese" hiyoni googunxi nayshe hidi dhaado sunxe e sunsoosita, 18 Indiraase, Filphoose, Bartelemoose, Matoose, Toomaase, Ilfiyose na'i Yayqoobe, Taadoose, biyade wudese eedhecha Simoone, 19 geede Yesuusa garsi inda Asqorotaxi Yuuda ye usita xheydi e maagesso.
Yesuusa osa gisha
Mat 12:22-32; Luq 11:14-23; 12:10
20 Ye e geede Yesuusaara e erusichoshitaaray zawa u yoodo. Usini fetto kaxa miye dheeboro aallo sekke assi laga axiti bhikkilutto. 21 Yesuusako zawa geriti "Goojhoko e goojho" yeydi hiyutta odo siidi esa efese u yoodo. 22 Yerusaleemefa yooda Muse woga eruseesiti "Esa Bi'eelzebuleko aytta, xhooze e goodesi ye xhoozuse afana maaganako" yeydi odusiya u yecha. 23 Yesuusani uso beeko xheydi ususe mamakona e zeerdo. Ye esini "Humbayey waysi Humbaye goodese e danda'e? 24 Bidzi kaatetowa yese axiti sekke hanke wola shaha'ayko ye kaatetoy miinguwasso. 25 Yeydiwo bidzi zawa axiti sekke hanke shahutto'ayko miindi yesese danda'uttuwasso. 26 Yeenkewo Humbayey sekke hanke be gera shaha'ayko e buduttesa baaka miindi yesese danda'uwasso. 27 Zeerey maaqusune ooneni osaxi zawaaka gelli burussi ye osaxe tutto badi e miijhe bonqese danda'esi baasso. Esa be tutto geedema bonqako e bonqe. 28 Aadewoko hinuse ta ohe. Aba bisha cubbo axi hanti Wonto e casshakoni uddi 'Attuwaye' yeydiko e hiyutte. 29 Zeerey maaqusune Ayaana Geeshe casheshi koolo makkina ye be cubbose oyche e keengesa baaka esuse 'Attuwaye' hidi hinesi baasso" yeydi e hido. 30 Yesuusani esume yeydi e zeerdosi "Xhoozuko e keenge" hidi u hidecho gishako.
Yesuusaara zawa axitaara
Mat 12:46-50; Luq 8:19-21
31 Yesuusa yella indowara esindo na'axhiyaray esuko u yoodo. Karaa ee'isine "Nembako nu worge" hidi hissine axe u anso. 32 Axi lagay e da'aa uttichine "Wiy! Neyndoy, neyndo na'axhey [neyndo bunaycey] hidiko yoodi wudena yesine nemba worgesa" hidi u oto. 33 Esini "Nuundoy oonena? Nuundo na'axhey oonitawa?" hidi e hido. 34 Be googe uttiya yechashituko arti beesine "Fetto nuundoy nuundo na'axhey hay ha usitako. 35 Wontoy otosa uddina hantesako nuundo na'i, nuundo bushoy, nuundoy ye usitako" hidi e hido.