6
Yesuusay inxha'utto gisha
Mat 13:53-58; Luq 4:16-30
1 Yesuusay yahafa kessi be diccecho Nazrate katamaa e yoodo. E erusichoshitini esaara yoodo. 2 Sanbata wonte Ayhuda Bhikkilo Zawaa gelli eruse e ayto. Yaha yecha axi lagay e ohesa siidi u micco. Usini "Haha'e, ha axi ha e bisha zeere uddi ayafawa e degesso? Waakeydi keddaydese eraxuna? Ha micushe hanta e hantesi waakeysina? 3 Ha esi Maarame yele mixe massichashe maaquwaye? Esindo na'axhey Yayqoobe, Yoosa, Yuuda, Simoone maaquttuwaye? Esindo bunaycey nuura yesiya baye?" yeydi esa haassisine etto badi u dhaddo. 4 Yesuusay "Kaayaxi fede wudiyako e kuxutte, e wude axitaara, e iginitaara yeydiwo e zawa axitaaramay esa kuxuttuwasso" yeydi e mato. 5 Yaha oddhe hargaxiti gara be kuche gaddi e loolusosa baaka fede micushe hanta hantese dandadho baasso. 6 Esa efe u dheeddo gisha orjena e micco. Ye e geede fede godo seya haya hanti e erusicha.
Tamma lam'i anxutto gisha
Mat 10:5-15; Luq 9:1-6
7 Be erusicho tamma lam'ita beeko xheydi lam'e lam'eysi anxisine xhoozi gara adeto ususe e indo. 8-9 Be ogese kallowara be tokese kobhaara baakani abani galla sigire miijhe yeydiwo lakko maa'oni u ekkuwannike minsi e oto. 10 Esini "Aya godoni bidzi zawa hi gello geede ye wudiyafa hi kesoro aallo yaha decuwayte. 11 Ayani axiti 'Hinumba ekkuwanxhiko. Fetto ha hi ohesa siwwanxhiko' yeydi u hitta'ayko dhaddi yahafa hangisine hi toke xhuure yaha fitti gussi kessi hanguwayte. Ususe ye atoni kashoko e maaqe" yeydi e hido. 12 Usini yahafa dhaddi kessi axiti be cubbo dhaddi maaqoronike u oto. 13 Laga xhooze u gooddo. Laga hargaxita zaytena tisshi u loolusso.
Xhamaqicha Yohanise haybo
Mat 14:1-12; Luq 9:7-9
14 Yesuusa sunxi uddi godowa ello gisha kaati Herodiseni siido. Bidzi bidzi axiti "Xhamaqicha Yohaniseko haybowafa denda, ha esunako ha micushe hanta e hante" yeydi u hido. 15 Feditini "Elaaseko" hidi u hicha. Feditini assi "Esini beese kaayaxuko. Olo kaayaxitukaafa bidzuke yesesako" hidi u hicha. 16 Herodisey e hantosa uddi siidi "Ye e baala ta bursusecho Yohaniseko haybowafa denda" hidi e hido.
17-18 Herodisey beyndo na'i Filphoose macho maaqichanniyo Herodiyada ettine Yohanisey "Wogay oossechosha neyndo na'i macho ne ettosi modhe maaquwasso" hidi hinne Herodisey Herodiyada magguseeme hissine be tooraxita ansi esa aykussi tufe zawa e gelsusecha.
19 Herodiyaday Yohanise iilli wodhusese i maxicha. Maaqe baaka isuse bissho badi e yecha. 20 Isuse bishe e dheeddosi Herodisey Yohanise gizowara hayla matiyara be beecho gisha esa jhasshishine iita abakoy elluwannike e kakkicha. Yohanisiyara wolko be zeereniyaka e zeeresa siidi e maddhungicha. Maaqe baaka e erusichosha siye e eehicha.
21 Bidzi wonte Herodisey be yelutto wonta kuxase orje massala naddhi kaati hantaxita, toora darguse maagita, ye Galila wudiya eruttese hayyaxheni beeso e xheydo. Ye wontay Herodiyaday massechonike bissheshe wonta isuse e maaddho. 22 Hinne Herodiyada bushoy massala zawa gelli ose modhussi dholli kaati Herodiseni maaqqe e xheydecho borsita orjena i maggusso. Kaati Herodiseni ye busshiyo "Ne worgesa abani e maaqo'ayko taa oycuwa! Neese ingawoko ta inge. 23 Ta kaatetowafa e bade e maaqo'aykoni ne maxesa abani ingawoko ta inge" hidi lagussi e caadho. 24 Busshini yahafa kessi be oycesha indowara i kundo. Isindoy " 'Xhamaqicha Yohanise qinoko ta worge' hidi hiwwa!" yeydi i hido. 25 Ye busshi kaatuko ukkenawo maaddhi "Xhamaqicha Yohanise qino sanqiya gaddi hattewo taase ne ingorosako ta worge" hidi i hido. 26 Kaati ye i oto zeerese orjena e higillo. Maaqe baa be xheydecho borsiti buro be caadhecho caaqome hissine ooxese wordo baasso. 27 Yenniyawo kaati be tooraxitaafa bidzo Yohanise baala bursi qino e ooworonike e anso. Ye e bishja hanta hante tooraxi handi tufe zawafa Yohanise baala bursi 28 e qino sanqiya gaddi oodi busshishe e indo. Ye busshini beyndose i indo. 29 Xhamaqicha Yohanisey erusichoshiti maaddha odo siidi yoodi aha etti u mooddo.
Ichichi kuma axe muusse
Mat 14:13-21; Luq 9:10-17; Yoh 6:1-13
30 Anxutta tamma lam'i hanke maaddhi Yesuusa da'aa yoodi be hanto hantaara be erusositaara uddina u oto. 31 Usuko yoone axaara hange axi taafowaray laga maaqicho gisha kaxa miyese fetto godowara woggaara u dheeddo. Ha e gisha Yesuusay "Axi baa godo aadhuwayte. Oddhe woggase nu goshewo kaxe nu effeese" hidi e hido.
32 Hinne be goshewo axi baa godo zabhaa gelli bagade garana u hando. 33 Maaqe baaka laga axiti u hangusune beedi uso erdi se katamaafa ha katamaafa kessi be tokena u buro woxxhi gardi u katto. 34 Yesuusay zabhaafa be kessoniyaka yaha yoodi laga axita beedi hade biya yeengesa keenguwa dorituke maddhumiya u yecho gisha e higillo. Laga abakitani eruse e gello.
35 Sahay dhaddi qamese hisune e erusichoshiti esuko uddhi "Hay essaa ni yese godoy abakoy baa godoko, sahani qamesuko hine, 36 axe dakkuwa, u muune kaxay haya baa gisha katamitikaara axiti yese godowara handi woondi miyuttoose" hidi uydo.
37 Yesuusani "Hinuni u muunesa inguwayte!" hidi e hido. Usini sekke "Hinne laga kuma miijhekoa e worgusicha. Haanxhi miijhe yessako handi woondiko nu ingaane/" hidi uydo. 38 Esini "Aanxhi boorawa hinuse yesa? Mee, handi beewayte!" hidi e hido. Usini handi oycci degessi "Ichichi booraara lam'i gulxhiyarako yesa" hidi u hido. 39 U uddina modhe maata gara shati shati u uttusoronike e oto. 40 Axitini xhiixe xhiixeydiyara ichichi tamme ichichi tammeydiyara shahutti shahutti u utto. 41 Yesuusay ichichi booraara lam'i gulxhiyara etti wokke afaa beedi Wonto galatti boora meyssi meyssi axuse u ingoronike be erusichoshituko e indo. Yeysiwo ye lam'i gulxheni u uddise u shahoronike e indo.
42 Be uddina muudi u missho. 43 Baxe atta booraara gulxhiyara e erusichoshiti tamma lam'i kofa kume u bhikkillo. 44 Ye boora muuda asanxuwoy ichichi kumako u maaqicha.
Yesuusay bagade garana handosa
Mat 14:22-33; Yoh 6:15-21
45 Yesuusay yenniyawo be erusichoshita "Zabhaa gelli taame burona semfa Beetesayda fottuwayte!" hidi allusi ye axita e zawa zawa e buddo. 46 Ye e geede uso buddi Wonto shi'ese kedda gara e kesso. 47 E qando geede e erusichoshiti zabhaaka bagade gidda yesune esi be goshe hana sahaa e yecha. 48 Osaxi agexi bagade gara u burona hanke oxhicho gisha e erusichoshiti sharisine u maddhungesa beedi wontaso odduppi saate e elle woggaaka usuko e yoodo. E yoodosini bagade garana hantisineko e maaqicha. Garese e hisune 49 waaxi garana e hangesa beedi ususe gomaxe e bisshine iitana u uydo. 50 Be uddinawo beedi orjena jhasshi leemo u kesso. Esini yenniyawo "Aadekoydofita, tambako, jhasshofita!" hidi e hido.
51 Yesuusay zabhaa usuko gelline agexi dhimmi hido. E erusichoshiti maaddhase beedi du'eydi u micco. 52 U miccoshini boora e lagussechosha gaxhe dheeddi u muxhuroy maxuwasa maaddho gishako.
Yesuusay Genserexhe wudiya
Mat 14:34-36
53 Ye bagade garana Genserexheydi hisso godo fotti zabha bagade nuuna aandi u tutto. 54 Zabhaafa u kessonike axiti Yesuusa yenniyawo erdi 55 be yecho wude seya haya uddina woxuna handi hargaxita e gara iddichoshuna etti Yesuusay yese godo siidi u aangicha. 56 Yesuusay hando wude uddina giddha katamaakani maaqqe malla katamaakani katamitume wude e maaddhakoni hargaxita gadhesaaka e buro u uqusicha. Hargaxiti fetto e maa'o bira doloronike u shi'icha. E maa'o bira dolla hargaxiti be uddina loolicha.