Paulus Warin Kapal Wain Wse Roma
27:1-13
27
Hra oko fo gubernur wkerek kat falek wabe wteye Paulus warin kapal, wadien sisi mam, wain wse raja wafle Kaisar ou wak fobi Italia. Tali magiet mayi fe mam mein, ofo nai ykohriak Paulus wadien fot na hirit wat kdie mre oli yehinti kat bol hirit mabri. Yka fo, yhnak yin na sae kahat wafle mreu hra wkedi le ma Yulius wadien ou wfe na sae kahat hra nai yto Kaisin Kaisar Wfe [se bo ysmit lien yidien twa homo rorwain yik fan kedi kayi de yhok yse raja wafle Kaisar wak]. 2 Mam morin kapal rar mafle mahin kota Adramitium hra kyamre oli fo mto mein kat fe sfie warok yik propinsi Asia. Mam manak Aristarkhus, na fobi Makedonia mreu wahin kota Tesalonika, ou warin fot kapal wto wlolowain mam, ofo wadien sisi mam mska kat mein.
3 Mam mslili ompit wtefit mese amuk mres kayi de uwade fo, mam mhok mtik kapal mak sfie Sidon. Na sae kahat wafle Yulius okou wluwa wbot, wliokeit Paulus wais wata, wtfoi hewain wanak mre hra yese yik oko, se bo yhnak bat ni eit mrei afe not trik mre, afe pitis yin ou yik fan kedi. 4 Mehin ana fo, mam mska kat mto mfoto sros kat mse rowe wafle Siprus wtato wse tali mti, mahin foron wfrio wkanas kat wahin tali mti, wba kat mam, molot fe mslili kat deri rowe Siprus wtato wse tali mhok. 5 Mde mam mehinti kat rowe oko, mfoto siwan oko mtatol mse fobi Kilikia kayi de mhok mitaren mse tlein, ofo mam mampi mse tali mti, mslili kawuak propinsi Kilikia madien Pamfilia, kayi de mhok mik sfie Mira mak propinsi Likia.
6 Mik oko fo mam mfe na sae kahat wafle ou wtiere fe kapal rar mafle wat mrem mahin Aleksandria hra mto main mse fobi Italia, mde ou wbahe mam morin mse kma rar man okom. 7 Amuk warok kat kapal okom mslili mse tali wti, main tmo-tmo karmiak kat fe hra foron wkanas wahin mbariomo, wfe he mam mein tmo-tmo kat, kayi de mitaren mse kota Knidus. Foron wsgia kat wahin tali mti wfrio kawuak mam, kayi de mam mein dait mse mbariomo. Mde ke fo mam mampi deri mse selatan, mfoto siwan katak kayi de mhok mse rowe wafle Kreta, ofo mayek fe tiwit tasla Salmone hra wak rowe Kreta wtato wse tali mhok. 8 Tali yrok mam mkliowo kat msis homo-homo fe rowe Kreta mse tali mti, kayi ti-ti mam mhok tnes mik wi mre mkedi le ma Sfie Ble Bot hra wataren wse kota Lasea.
9 Fe hra mam mein tmo-tmo karmiak kat, molot fe mam mbakya kat tali warok wale mik fan kedi, ofo tali wagiet wabe na Yahudi yleli ni eit om mewer wale, mdain.a Hra oko fo mam mloit wale mse tolo safar fle [hra wase mok Oktober kayi de mok Februari, o le ma tolo kafir man hra safar fle yhok ro kat, yba kapal yrok ysi yse kla siwan wabri aiti.] Oko fo Paulus wkait saswain ni fe na hra ysiokti kapal okom wto,
10 “Table wa nan, mhakta wale man tet yibe faf fke, fto fein sros kdie, ofo kafir fle mreu bo whok wba kat kma rar madien hrien, wba kat fot faf fikan rok ke ftinik kat.” 11 Mahin na sae kahat wafle Yulius wkan bren kat deri Paulus ha, worsfe tiktol deri ojin mahin na wafle man hra wak sain wadien fot wanak na wafle hra wkain kma rar okom. 12 Wadien tolo foron fle wde hra ko, kma sfie hra ko wsgia, wtatol dait wabe nai ytik kma, fe hra alwkafe wba lis sawuan sfie okou. O le ma na marok okom ykerek sadir yto yein sros kawuak kayi de yhok yik kota Feniks mak rowe Kreta, se bo yese yik ana kayi de tolo safar ou wluwa. Sfie wak kota Feniks oko wbot karmiak. Ou wgiet rothak wtatol wse tali mti, wtato wse tasik blen (selatan), wtato wse tasik amak (utara).
13 Hra oko fo komin ou wblien-wblien kat whok waka wahin siwan wtato man tasik blen (selatan). Mde wedla kma rar eke ynok yto komin oko wtatol wabe mam mein kein kdie, ofo ei ykein kat nit marin, mde yein ysis asaklis rowe Kreta wtefit yse tali mti.
Kapal Mfafa Marin Nggrisa
27:14-44
14 Mahin mwoi dait kat fo, foron wafle hidi mreu hra nai ywit yto Hidi Timur Laut oko whok ro kat [wahin flalie tasik amak wadien tali mhok (utara timur)], ofo wais wahin rowe okou wfrio wkanas kat wse siwan katak wabri ale. 15 Hidi ou wba tamli kma rar mam mi okom [biarak wa mbafelek]. Mam mto mampi kma rar masla om mtatol hidi okou, mahin mam mkanas dait, biarak wa mam moko. Mde mam mbaroro oli kma okom, mliokeit wata hidi okou wba kma rar msbiele okom msese rowes kat mse siwan wabri ale. 16 Mam mklia kawuak de mewer kat rowe wawet mreu wkedi le ma Kauda wse mna wait. Mik oko fo mam mkliowo kat mkein kma wawet sekoci okou warin wse kma rar masa ago, ofo mkaitti kat wtodo.
17 Kma sekoci wtodo kat sba fo, na kma rar ei ykein omos, ykaitti kohli kat kma rar mafle okom kayi de mtodo-tada kat, fe hra ei yelieksi yto bo kma rar om mfafa mak mme mafle Sirtis. Mde oko fo ei ykein kat rar om mais mse aiti, ofo yliokeit wata kma okom alwkafe wba mklia.
18 Hidi wadien alwkafe yifle karmiak kat ykowiri-wara ta-ta kawuak mam kayi de uwade, mde wedla kma ei ylouk hrien warok yka, yklat kadio kat yse siwan wabri ale.
19 Kayi de madien tali tolik fe, mam mrioro mhot fo fe na mna wedla kma eke, ylouk ni yrok hra kma mfe, yti kat fot yse kla.
20 Tali warok kat mam mhot dait kat tali mteit mrem, amuk fo mam mhot dait mok wadien twon mrem, fe hra hidi wadien kyen arit wsamsa kat wba mam kawuak de mam mnok ni yogin kat mto bo mkak.
21 Fe hra tali amuk warok oko ei yeit dait kat ni mrem, mde Paulus wkro flalie wak bri wto: “Table wa nan, ojin hra tet trana kom, nan noso me! Hra faf fka dait fehin Kreta, ofo faf fbot deri fehin ni hra yisgia kei, fbakya dait ni mrei. 22 Mahin madien hra ko tet trana tkoin kat man nan, nkein nkan om mhron homo, nteit rioro amot. Faf fikan rok ke, na mreu wkak dait ha, bo kma kom le ma mfla fali faf. 23 Fe hra madien amuk wa ko, Nago hra wkain tet, hra tet tsaesik sawuan man ou, wteye wfe malaikat mreu waka wkro wak tet tklik,
24 mde ou wto: ‘Paulus, nen naliak amot! Bo nen nain kayi nse Kaisar wak se bo wkerek sadir fe nen. Yo, Nago whnak fot hares man na kadio hra yidien sisi nen nik kma kei, wto wkaka nan nron kadio kat. Bo kafir mba dait kat na mreu, ei ysifi kadio kat, yeigi dait.’ 25 Mde Paulus wrana skatiokot man ei wto: “O le ma tet tto, nan neliek amot. Nkein nkaso homo, fe hra tet tnok mse Nago wak, bo ni ekei yhok kadio kat yde kayi hra wrana krek wale yin tet ei.
27 Amuk hra yahar teit hat fe le wkou, mam mke hidi wadien alwkafa ykowiri-wara sonat mam mik siwan Adria.b Mahin bo mal kayi amri wklat yirio, weka kma ekei ybasan ynok yto bo mam mitaren wale mse tlein.
28 Mde ei ylouk amak hra ysofot man omos kniet ni om maka, yti kat mse kla wabri aiti, mahin kla mwain sonat mhlos na mre waigi (40 meter) mse fobi. Mde kapal mskatdin kaf kat kyamre oli, ofo ei yti kat oli amak madien omos kniet okom, mde ytatiere fe kla mwain mtatol madien hlos yahar teit mahot deri, ou le ma 30 meter. 29 Mde yelieksi yto bo yfafa yik nggrisa amak sakro mre masa, mde ykaprsat yti kat tamli nit jangkar hat yse kla bri yehin kma rar okom mkaka sain, ofo ysikafit yto habi-habi se tali mhak pra-pra kat. 30 Mahin weka kma ekei ysin yto ytainti kat hlok-hlok kma okom. Mde ei ynadrit kma sekoci okou wais wse kla mde ysiok lolot yde hra bo yti kat sba jangkar mrei yehin kapal mata sla.
31 Hra oko de Paulus warin fali ni fe na sae kahat wafle ou wadien wfe wedla na sae kahat ekei wto: “Nhot la, wedla kma hra koit yto ytainti kat kma kom! Mde hra ei yehinti kat kapal ko, ofo nan nron dait kat!” 32 Mde na sae kahat ei ykaprsat yfolo kat omos slen hra ysofotti kma sekoci ekei, ofo yliokeit kma sekoci om mti kat mse kla, mklia main.
33 Kayi de mkdia wale mabe sies mkerek fo Paulus wbahe na kadio kat yeit ni eit, wto: “Amuk yahar teit hat wale nan nke neit dait kat ni eit mre fe hra nan nnok ni yogin nibe nila le mke. Hra oko fo nan nkatot ntiblie karmiak kat. 34 O le ma tet tbahe man nan: ‘Neit firi ni mrei se bo yhnak kanas fe nan, yeren nan nron. Nan neliek amot, fe faf fke na mre bo wasak dait, oo nsagien mrei masak dait.”
35 Wrana kayi mde ke ofo wwien fien ou wa roti mre yka, wsikafit whdin man Nago wak ei ybariomo kadio kat, mde werek-arak roti ofo wat mrei. 36 Mde na kadio kat yibri om mhron, mde ei yeit kadio kat ni eit ei yi.
37 Mam kadio kat hra mik kma rar ekei na mikan 276. 38 Nai yeit kayi ni ykesit, ofo ei ylouk kat karong gandum man hra yiheit sonat yik kapal mabri yka, ofo yklat kat yse siwan wabri ale se bo kapal okom mlan.
39 Mde tali mto mhak-hak kmo fo ei yhot afat tlein mreu yik ana, mahin yhana rorwain dait yto: “Wi man om mak sio?” Mahin ei yhot siokor mreu hra wtefit kinti elek, mde ysin yto ytik kapal mata mtatol mse kla wtefit kinti elek ou. 40 Ei ytli kat omos jangkar ei yehinti kat yiheit yik siwan wabri ale. Mde ei ytli kat omos salen kamti hra yik kapal masain ekei, ofo ysofot rar hra mafle mrem mkotrot se bo yein yse tlein.
41 Ei ykadin samhak kyamre yse bariomo mde, kma mtasla om marin ro kat nggrisa kinti mrem, mfafa mtek kat, main oli dait. Alwkafe ysamsa ei yba kma masain okom kayi de mfla mtahak kat.
42 Mde na sae kahat ei ysin yto yska kat na kait ekei, yibe yelieksi na kait mreu wtain wkni wain.
43 Mahin na sae kahat wafle okou whar kat ei, wabe wto weren ta Paulus. Fe hra oko ou wbahe nai yinok kni ekei, ykahri ytlok yse kla, ykni yse tlein. 44 Se bo na mre kdie ysiok wat-wat fafan hra yfan-fan yehin kma ekei yka, yafan ykni yse tlein. Mde kayi le eke yhok yeren kadio kat yse tlein.
