GIET MABOT MABE YESUS KRISTUS HRA
LUKAS
WSROIN
Lukas wrana krek ni masayen
1:1-4
1
1-2 Man nai yfe na Sma Teofilus.Tet tsroin man nen se bo nen nnok toron kat, ni hra na yrana wale yin nen ofo yto tkoin. Ei le ma ni hra yhok wale, yibe Yesus wase wale wak fobi kom, waigi, wsidik oli.
Na marok om ysiok hewain wale giet mabe Yesus ou, ysroin wale ni hra na wat ei yhot sros wale. Ni ekei yhok ytatol yidien hra Nago Allah wrana krek fe wale. Na hra yhot sros ni eke yehin masayen om, ydihan Nago le ma yrana tar-tar giet om, de mam moso fot. 3 Mde Lukas tet tke tsaye fien giet mahin na wat hra ysroin wale ei, tlelek wain kadio. Mde tsroin rorowain oli ni eke, yehin kamuolo masayen, yin Sma Teofilus nen. 4 Tsroin kayi se bo nen nnok fot ni ekei hra yhok wale ytoron kadio kat. Hra nai ykakniet wale yin nen ei, yto tkoin yto toron kat.
Zakharia Whot Ro Kat Malaikat Wrana Krek Fe Nai Ysois Yohanes
1:5-25
5 Kamuolo, Zakharia wase wak fobi Yudea. Ou wabe imam, na hra wsikafit wanik wadien ou wsanfe wanik ni yin Nago Allah. Wsiok sisi ni wadien imam wat ei yibe safuk siok ni, safuk ou wa nai ywit yto Abia. Ysiok yfe ni yik Bol Kohok Nago Allah wfe mres mak Yerusalem, madien kamuolo raja Herodes wslonti sonat fobi Yudea. Zakharia wsmian om mkedi le Elisabet. Lak ei yehin imam wasayen Harun a ou wtakein ei. 6 La yikan lak ekei yibri yelek deri yin Nago wsifuon. Lak ei ysiwain Sma Nago wfe ni bahe ei, Ojin Taurat ei kadio kat, ysiok yidien yibri mbot. 7 Mahin ydain wet, fe hra Elisabet msa madien fot la yikan ytrar wale.
8 Mde tali wagiet mre ofo, nafle Zakharia wadien wanak satatik imam ei, nai ywit fien yibe ysiok ni yik Bol Kohok Nago Allah wfe mak Yerusalem. Zakharia wai ysiok ni ytatol yde le hra imam ei ysiok lokdi wale. 9 Mde yto ylok imam mres wabe wloit wak Nago wfe Bol Kohok hra mres om, wabe wtatik ni yrnoin yrofof kat yik Nago wbariomo. Mde ei yala lial yde hra ysiok lokdi ekei, ofo lial ou warin wse Zakharia wak.
10 Mde nai fe na ou wloit wak Bol Kohok om wabe wto wtatik ni yrnoin yrofof kat, ofo na wat kadio kat yik deri tlein ra ysikafit. 11 Mahin Zakharia wloit fo whot ro kat malaikat Nago wfe mreu, wkro wak wi matatik ni yrnoin mna tkoin. 12 Whot ro kat ni okom mde, wrioro waliek karmiak kat.
13 Mahin malaikat oko wto man ou wto: “Woi Zakharia, naliak buon amot. Nen nsikafit okom, Nago wsamenie fe wale. Nsmian Elisabet om, bo msois wet wadla mreu wan nen. Bo nen nwak kayi wabe Yohanes. 14 Ou eke, bo nen nkashok nadien nmnet, yidien fot na marok ei ykashok kadio kat fe wet hra la nan nkafe okou. 15 Fe hra basak ou wabe na wafle wak Nago Allah wsifuon. Mde bo wako dait twok om mala, wako dait ni wat hra ysiok nai ymsit. Bo ou whon kat fe Nago ou Wawua om mkororo ou wabri, wahin kayi masayen hra wemem mkmat ou. 16 Ou bo wkakniet fan mabot man na yehin na sa Israel warok om. Wkakniet se bo ysalit yse Nago Allah, ysalit yse ei yfe Nago, yse yfe Sma ou wak. 17 Ou le bo walin kein sba se bo Sma Ou wain heles wbakorwain. Ou wrana man na warok ei se bo yket, yehinti kat satian hra ysiok ei. Bo wsiok se na trar ei yket, ytrere dait oli yfe wet ha, ymro fe yfe wet ei. Na hra yibri ysgia, yoso dait man ni hra Nago wbahe ei, yket ofo ylelek ynok oli Nago, yibe kmo nai yibri yibot. Mde kayi le eke bo, Yohanes ou wsiok kein na safuk hra yleli kein Sma Ou waka. Ou bo wde kayi le nabi Elia, wkanas fe Nago ou Wawua om mkororo ou wabri.”
18 Ofo Zakharia wto man malaikat okou wto: “Tet tkahiowain fe ni hra nen nrana ei. Bo ysres afe, mdain? Fe hra tet tke ttrar wale tadien tsmian kom mkan tnas msaswe wale.”
19 Mde malaikat okou wada wto: “Tet tke Gabriel hra tdhian sawuan Nago Allah. Ou le wbahe wale tet trana fe ni yibot yin nen. 20 Mahin tet tto toron kat, nen nsamenie fe dait wale ni hra tet trana yin nen ei, mde bot ke nen nsami, nsadir nrana dait kat ni mrem. Bo mayi fe ni hra tet trana fe ekei yhok kadio kat, ofo bo nen nsadir nrana tnes oli ni.”
21 Na marok yik tlein yleli tinin kein wale Zakharia. Ei ykahiowain kat fe ou whenen karmiak kat wak Bol Kohok Nago Wfem mabri ra. 22 Mde Zakharia whok wde, ou wrana dait ni mrem, wsami. Ofo ou wkakniet-knat deri ni yidien wna yin ei. Mde ei ynok afat wale, bo ou whot Nago wyen hata ni mrem mak Bol Kohok mabri ra.
23 Mde Zakharia wsiok sba ni imam ei yfe ni yfot fo, wain oli wse bol.
24 Mde wsmian Elisabet mkmat. Mde mase mok mahot maheit mak deri bol mabri, mnok sas deri ni ekei yik deri mabri. 25 Mde Elisabet mrana mto: “Ni kom Nago le wsiok wale man tet. Ou whares man tet, wlok kat tfe hes tak nai ybariomo, bo tkafe wet mreu.”
Na dli Mor Mrem Mkafe Yesus Kristus.
Lukas 1:26-38 [26-35 SGM]
26 Elisabet mkmat wale mok mtamre ofo, Nago wbahe ou wfe malaikat Gabriel wain wse Nazaret, kota mrem mak fobi Galilea, 27 wse na dli mor mrem hra mkedi le ma Mariam. Om eke nai ysarfain sadik wale man na dla mre wkedi le Yusuf, mahin la ykowahe sonat. Yusuf wbla le Raja Daud wadien kamuolo kat.
28 Malaikat oko waka whok wse Maria mak, ofo wto: “Woi, tali wabot! Sma Nago wkashok wten wkaso karmiak kat fe nen, Ou wadien sisi nen!”
29 Maria moso ro kat ni hra ou wrana eke, mde om mkahiowain kat, mnok sas mak mabri ra mto: “Hra na ko wrana ni kei yin tet tabe?”
30 Mahin malaikat ou wrana oli wto: “Maria, naliak amot! Nago wkashok fe nen, whnak wale hares om man nen! 31 Bo nen nkmat, mde nsois, nkafe wet wadla mreu. Nwak ou wkedi le ma Yesus. 32 Basak ou wabe na wafleu, wkedi mririn, ofo nai ywit ou wabe Na Wafle Wewer Kat Wfe Wet. Bo Sma Nago wto whnak ou wabe kayi Raja Wafleu, wde le wbiti Daud. 33 Basak ou wslonti na sa Israel, ei le ma Yakub wate kokos ei, kayi de dian-dian kat. Wfe fle kohok mkahlia dait, main kawuak.”
34 Maria mrana oli man malaikat ou mto: “Mahin, tet tke tmor latiot. Bo ni eke yhok yde sie?”
35 Malaikat ou wto: “Nago ou Wawua hra Makohok om bo maka mse nen nak, ofo Na Wafle Wewer Kat wfe fle kohok om bo mlowinti nen. Mde ke fo, wet hra bo nen nkafe oko nai ywit wabe ‘Nago Wfe Wet.’ Bo ou wkohok wlais kat, wkafe dait satian mrem. 36 Tto tkoin kat, nen nafo Elisabet, ntat kat om, mkmat sitrar. Nai yto om msa, mkafe dait wet, mahin mkmat ou wase wale mok mtamre, fe le hra kou. 37 Fe hra ni Nago wfe om mre mkahiowain dait kat.”
38 Maria mto: “Ni hra nen nrana ekei, tet taisi Nago wsiok yhok yitatol yin tet. Tet le ma tabe Sma Nago wfe na dihan.” Mde malaikat okou wsiet wahinti kat om.
Maria Mtfoi Mafo Elisabet
1:39-45
39 Man bri-bri kat kdie ofo Maria main mhot mafo Elisabet. Main tamli mse kota mrem mak sawo fobi Yehuda. 40 Mhok mak ra fo, om mtrik mse bol Zakharia wfem, mde mkan tali man mafo Elisabet.
41 Elisabet moso ro kat fo Maria mkan tali oko mde, wet hra wak mkmat ra ou wkahri. Elisabet om mhon karmiak kat fe Nago Ou Wawua hra Makohok om. 42 Ofo msalo katrein kat mto: “Nai fe na taliwet Mariam. Nago Allah watsiofo wale nen, newer kat nahin na dli marok om. Ou watsiofo fot wale nfe wet hra basak nen nsois ou. 43 Na buon man sio ma Nago whdin tet tde le ke? Fe Sma weme nen naka ntfoi tet tak ko? 44 Tet toso ro kat nkan tali okou wloit wak ttefit ofo, wet hra wak tkmat ko, wkashok wkahri. 45 Mabot karmiak kat man nen, fe hra nen nnok kdo-kdo mse Nago wak, yibe ni hra Sma Allah wkadoin yin nen eke, bo yhok kadio kat!”
Maria Mtiksi Nago Allah
1:46-56
46 Ofo Maria mto:
“Thalie kom mhdin Sma Allah,
47 tabri kom mkashok man Nago,
tfe Na Waeren Kaka tet,
48 fe hra Ou wsitodo wale wfe na dihan tet,
Ou wfe karen kya masgia tet.
Madien hra ko kayi de basak,
na marok om bo yrana yto
Nago watsiofo wale tet.
49 Fe hra Na Wakanas Kat
wsiok wale ni yibot yin tet.
Ou wkedi om mkohok mlais.
50 Madien hra ko kayi de basak,
man na hra ydihar wain Ou,
hra yeliek ynok yse Ou wak,
Ou wbakoko fe kawuak ei.
51 Nago wsiok wale ni yisamsa
yidien wnai ykanas kat;
na hra ysablit ykashok-shak,
hra ynok yto ei ymres deri sok ma ywamo,
Nago wwain kat wale ei.
52 Na yifle raja ei Ou wbasie kat wale
yeis yehinti kat ei yfe ni maleli yikohok ha,
na hra yluwa lafis Ou wkosia wale ei,
whnak fle fe ei.
53 Man hra ykatot, Ou wriak wale
ni eit yibot yin yeit kayi de ykesit.
Ha, man hra ykohok, Ou wbahe kat
yhok yein slok deri.
54 Nago Allah wkaka wale wfe na dihan Israel ekei.
Ou wnok tmol lis kawuak
ni hra wkadoin wrana krek fe wale om,
le ma whares wbakoko man Abraham ou wtakein eib.
55 Nago wmro fe man faf fbiti Abraham
wadien wtakein kadio kat kayi de dian-dian kat,
mde kayi le hra Ou wrana krek fe wale
man faf fate kokos ei.”
[Mkerek fe le ko.]
56 Mde Maria mtiksi wale Nago mfot mde, maheit madien Elisabet la yese kawuak de bo mal kayi mok tolik, ofo om msalit oli mse Nazaret.
Ysois Yohanes Wasrik Kat Kla Fe Nai
1:57-66
57 Mayi fe mtatol mabe Elisabet msois ofo, mkafe wet wadla mreu. 58 Hra oko manak mable mai yoso ro kat hares bot hra Nago wfe man om, ei ykashok sisi yidien om.
59 Wet ou wase wale amuk mtadolik fo, yto ybrein. Mde Zakharia wadien Elisabet lai ytik giet man yanak yible wai yka ybalifis yibe nai ybrein c wet ou. Yto ywak wet ou wkedi mlolowain wono wkedi ou wam, yto wkedi Zakharia. 60 Mahin weme om mto: “Mdain! Ou wkedi mabe kayi Yohanes.” 61 Mahin yto oli man om yto: “Hau, wtot wai wamon wable wai ykedi dait sonat kedi Yohanes okom.” 62 Ofo ynato mse wono wak, yto wono ou wwak wkedi mabe sio. 63 Ou wwaini amak masroin, ofo ou wsroin ni yik oko: “Wkedi o le ma Yohanes.” Mde ei ykan mtaret kadio kat. 64 Mde madien ro kat hra oko, Zakharia wgiet om mhak wrana oli ni wadien wadel hra marat okom mtadet, ofo wrana ni wadien wkashok man Nago.
65 Mde na marok kadio kat hra yik ekei yeliek, fe ni hra yhok kmo yde ke yibe ni rana wain tar-tar fe yik sawo Yudea. 66 Mde na kadio kat, hra yoso ni ekei, yde ynok tmol lis kawuak, mde yto: “Wet kou bo basak wabe mit ma ei?” Fe hra Nago wsiok siowo ou.
Zakharia Wkadie Heyit man Nago Allah
1:67-80
67 Zakharia hra Yohanes wono ou whon kat fe Nago Wawua hra Makohok om, mde wrana krek ni hra basak yhok ei, wto:
68 “Ahe Sma Nago, Allah na sa Israel yfe,
tet thdin tkashok man Ou,
fe hra Ou waka wale, wabe wskalofos fien
wfe nai yehin kaisin ei.
69 Nago bo wlouk na mreu hra wakanas,
ou bo waka wkaka faf le wkou.
Na oko, bo wahin Raja Daud wtakein ei,
wahin Nago wfe na dihan raja Daud wtakein ou.
70 Na oko Sma Allah wrana krek fe wale wadien kamuolo,
main fe wfe nabi ykohok hra wlouk helwain wale ei.
71 Allah wrana krek fe wale wto,
basak na oko waka wkotadet faf fehin kaisin hra yto yfit faf,
wkokaka faf fehin na hra ysiok sgia faf.
72 Ni hra Nago Allah wsiok ei, wsiok fe hra wmro fe wale faf fate kokos ei. Wsiok fe wnok tmol lis ni hra wkadoin wrana krek fe wale ei.
73 Nago wkadoin wrana krek fe wale man faf fate kokos Abraham ou,
74 wto weren kaka faf
fehinti kat kaisin ei yna tofo ei,
se bo faf feliek dait, fsikafit kawuak man Ou.
75 Faf fsikafit kawuak fsiswain Ou,
se bo fibe na hra ylais,
bo faf fibe na hra yibri ybot,
fehin hra ke kawuak de dian kat.
76 Mahin tfe wet Yohanes nen,
bo nen nalin kein sba se
Na Wafle Wewer Kat ou waka.
Nen le nalin kein se bo nen nsiok kein fan man Ou.
Mde bo nai ywit nen nabe Nago wfe wedla bahe,
wedla bahe nabi nan Nago hra Wafle Wewer Kat.
77 Bo nen nrana siar man na marok,
Nago wfe na marok ei,
mabe Ou wto weren kaka ei,
wto ware kat yehin satian hra yfe ei.
78 Nago faf fi ou le ma whares
wadien wabri om mbakoko fe na tkoin faf.
Mde bo Sma ou waka wde le tali hra mhok om,
wahin wi mayehet wde le tali uwade mhak.
79 Bo Ou wnarak fe na hra yese yik wi mamian,
yidien fot na hra yeliek kafir eigi mba ei,
se wkororo faf fteit ei yein fe fan mabot
se faf fble-bla fidien Nago.”
[Mkerek fe le ko.]
80 Wde wet oko wfle wkanas wsablit om mroro. Mde wfle ofo, wain wase wak wi domri mak samdi ra, kayi de mtatol madien tali mayi fe hra okou fo, whok wyen hata wkan om man na sa Israel.