GIET MABOT MABE YESUS KRISTUS HRA
MARKUS
WSROIN
Yohanes Wsrik Kat Kla Fe Nai
1:1-8
(Mat. 3:1-6, 11-12; Luk. 3:3-6, 15-17; Yoh. 1:19-28)
1
Giet Mabot mabe Yesus Kristus, Nago Wfe Wet ou, tet trana fe krek mahin kamuolo sayen kayi de hra ko.2 Mde le kamuolo nabi Yesaya wsroin skatoin ni Nago wfe hra wrana wto:
“Tfe wet nen, nhot la!
Tet tteye tfe wedla oko walin kein, wrana giet.
Ou le ma wsiok kein krek fan man nen.” a
3 “Ou wak wi madomri, wsalo mkayehet wto:
‘Nsat kein fan man Tuhan,
nkotrot fan mabe ou!’ ”b
4 Mde le mtatol ojin okom, Yohanes hra wsrik kat kla fe nai, ou le waka wak wi domri, wsalo mkayehet wto: “Nlelek, nehinti kat ni hra nan nsiok ysgia ei, se bo Nago wyan kat nan nfe satian ei, wbaret keben ei ydain, ofo nan nbot oli nin ou. Ofo nhnak nkan om man tet tsrik kat kla fe nan!” 5 Mde na marok yehin fobi katak Yudea yidien fot na Yerusalem kadio kat yka yse Yohanes wak, ysamenie fe satian ei yfe, ofo ou wsrik kat ei yik kla Yordan.
6 Yohanes wtrik not mahin unta ygien, wkedi brat kedi mahin wfalek. Ou wat deri saden yidien wako hok tabra mklam. c 7 Ni hra ou wrana fe, o le mkom: “Bo na mres waka wain heles, ou wfle wewer kat tet. Tet tkatawok ttli sayi dait ou wfe omos sepatu, tharfe dait oko. 8 Tet tke tsrik kat nan nidien deri kla, ha, bo na hra ou waka fo, ou wsrik kat nan nidien Nago Wawua Makohok om, ofo Nago Wawuam maheit mkororo nan nibri.”
Yohanes Wsrik Kat Yesus
1:9-11
(Mat. 3:13-17; Luk. 3:21-22; Yoh. 1:32-34)
9 Hra oko fo, Yesus waka wahin kota Nazaret hra mak fobi Galilea, ofo Yohanes wsrik kat ou wak kla Yordan. 10 Mde Yesus weren wahin kla ale, whot fo yik ou wfla wtariet. Ou wgiele mse ago, whot fo Nago Wawuam msilok mde le klen okles, mais mtatol ou. 11 Ofo salo mhok mahin yik ago mrana mto: “Ahe! Nka we! Nen nke le ma tfe wet nen! Tet tten tkaso man nen, tkashok kamyi kat fe nen!” d
Klebet Wafle Ou Wbahe Dienen Yesus
1:12-13
(Mat. 4:1-11; Luk. 4:1-13)
12 Mde Nago Wawua om mkororo kat pra Yesus whok kat, wain wse wi madomri. 13 Wak ra fo, ou wase sisi wadien erwas tabra ei kayi de amuk na lak yeigi. Mde Klebet Wafle, Na Kni Meles ou, whok waka, wrana dienen adit ni se bo wlolot Yesus wsiok ni yisgia, mahin mdain, Yesus whar kat ou. Mfot fo, Nago wfe wedla malaikat ei yka ydihan ou.
Yesus Whok Wak Galilea
1:14-15
(Mat. 4:12-17; Luk. 4:14-15)
14 Yohanes nai yihirit wale fo, Yesus wain wse fobi Galilea, wrana fe giet mabot mahin Nago wak.
15 Ou wto: “Magiet mayi fe o le hra kom! Nago wfe kerajaan mataren wale. Nlelek, nehinti kat nan nfe satian ei, ofo nsalit oli, noso kmiet giet mabot kom!” e
Yesus Wwit Wfe Wedla Yisayen Ei
1:16-20
(Mat. 4:18-22; Luk. 5:1-11)
16 Oko fo Yesus wain slili siwan sabarak Galilea wtefit, wsmit fo Simon wadien waliwet Andreas yklat swelet yse kla wabri ale, fe hra la yikan lak ei yibe nai yidihar sawuan eren.
17 Mde Yesus wwit man ei yik ale wto: “Wedla la nan nka, nidien tet faf fein! Se bo tet tkakniet nan nidihar oli dait eren, ha, nidihar deri na tkoin!”
19 Yesus wain kaf kat deri kyamre fo, whot kdie oli Yakobus wadien waliwet Yohanes, Zebedeus wfe wet ei. Ei yleli yik kma mabri ysiok wain yfe swelet. 20 Mde Yesus wwit sros ei, ofo la yisidikti kat yono Zebedeus wadien wfe na dihan ei yiheit yik kma mabri ale, ofo la yidien Yesus yein.
Yesus Wwain Kat Klebet
1:21-28
(Luk. 4:31-37)
21 Ei yhok yik Kapernaum. Tali Sabat sba fo, Yesus wtrik wse bol sikafit wrana wkakniet ni.
22 Nai yoso fo, ykan mtaret kat fe ou, wabe wrana ni wkanas, wbren kat, wkait flie kat guru agama ei. f
23 Mayi fe oko fo, na man hra klebet wfla wale ou, wak fot bol sikafit mabri ra. Ou wwak wsalo fle wto,
24 “Woi, Yesus, na Nazaret nen, nen nsiok ni mit ma yin mam mke? Nen nto naka nsiok mam mdiris kat, afe? Tet tnok wale nen nfe khan oko – nen nabe Nago Wfe Wedla Wakohok nen!”
25 Mahin Yesus whar kat wto: “Nsatmor! Nen nhok nahinti kat na oko!” 26 Klebet ou wkowirit-warat kat na oko, wwak wsalo fle, ofo whok wahinti kat ou.
27 Na marok ei yteit yrioro kayi de yrana sas-sas fe yto: “Wa, ni mit ma kom? Ni kakniet maifim! Ou wrana ni wkanas kat. Ou wbahe man klebet ofo ei yoso man ou!”
Yesus Wweyen Petrus Waris Om Madien Na Marok
1:29-34
(Mat. 8:14-17; Luk. 4:38-41)
29 Ei yhok yehin bol sikafit mabri, ofo Yesus wadien Yakobus, Yohanes, yein soro yse bol Simon wadien waliwet Andreas la yfem.
30 Oko fo Simon waris madli om mase mak komo, mkaini mkan tbat, ofo ei yrana ni fe Yesus. 31 Mde ou wain wse om mak, wi hra om mase, ofo wslonti mnam, wkosia mahin msidik mkro. Mde mkaini om mdain sros kat, ofo om main mdihan ei.
32 Tali msrik wale, wi mbasoin-san, ofo nai yotik na marok hra ykaini, yidien fot man hra klebet yfla, ei yka yse Yesus wak. g
33 Mde na marok mak kota okom yka ykro ysatatik yadrat kat yik bol magiet okom. 34 Ou weren kadio kat yikan marok hra ykaini heit-hat, yidien wwain kat klebet yrok. Ou wtoji klebet yrana dait ni, yibe ei ynok wale ou.
Yesus Wrana Giet Mabot Wak Krotia Wat
1:35-39
(Luk. 4:41-44)
35 Uwade mlabit kat, Yesus wsidik whok wahin bol, wain sabiya kat wse wi madomri, ofo wsikafit wak ana.
36 Ofo Simon wadien wanak ei yein ybakorwain yidihar ou. 37 Ei yrat ou mde ei yto: “Woi, na marok kadio kat yidihar nen!”
38 Mahin ou wto: “Yik la-la yko! Nan nka, faf fein fse wi wat mre, krotia hra yitaren, se bo tet trana giet mabot man fot ei. Fe hra eke le ma tet taka.”
39 Mde ou wain wkohli fobi katak Galilea, wrana giet mabot mak ei yfe bol sikafit yibri madien fot wwain kat klebet yehinti kat ei. h
Yesus Weren Na Wkan Obo
1:40-45
(Mat. 8:1-4; Luk. 5:12-16)
40 Na mre wkaini wkan mobo waka wse Yesus wak, mde wbatoko wteit wak ou wteit olo, ofo wto: “Nai fe nau, nen nto naisi fo, nweyen tet se tet tbot oli!”
41 Mde Yesus wmro fe kamyi kat na oko, ofo ou wkosia wna mguos, wslonti ou, mde wto: “Yo tet taisi! Tweyen nen ndain wale!” 42 Mayi fe hra oko fo, ni kaini obo wdain, wahinti kat ou, wfalek ei ybot oli.
43 Mde Yesus wrohok wkaboti na ou wto, 44 “Noso la, nrana amot ni ke yila! Nain nyen hata nkan kom mse imam wak, ofo nhnak sanfe hra ytatol yidien ni hra Musa wbahe fe yin na hra ykan obo ei ydain.” i
45 Mahin na oko wain wrana siar sak-sak kat kayi de Yesus waha wtrik, wyen hata dait wkan om mse kota, mahin waheit deri wak tlein, wi hra mahlok. Wanik deri, na mhok katak mahin wi yrok yka, yhok yse ou wak.