Yesus Weren Na Wakarat
2:1-12
(Mat. 9:1-8; Luk. 5:17-26)
2
Amuk man kdie oli fo, Yesus wsalit whok wak Kapernaum. Ofo nai yrana fe yto: “Yesus le waka whok wse bol ou wam!”
2 Mde na marok om yka ykro satatik kayi de bol mhon kat, kayi ti-ti bol magiet fot, wi mre oli dait. Oko fo ou wrana wata Nago wfe giet man ei. 3 Ou wrana samne wata ni fo, na hat ykafe na wakarat ou wak ater, yka yse Yesus wak bol okom. 4 Mahin ei ytrik fali dait wain wse Yesus wak, fe hra na marok karmiak kat eke ykro yisti kat fan. Mde ei yorin fali ou wse bol masa ago, ytdak kate om mtatol mse Yesus wak. Ytdak kate fo, ei yti kat fali ou wadien ater om, yna yidien twa ou wse aiti.
5 Mde Yesus whot ei ynok tmol man ou, ofo ou wrana man na wakarat ou wto: “He tfe wet nen, nfe satian ei ydain, fe hra tet tbaret keben wale nen.”
6 Mahin oko fo na guru agama mre yleli fot yik oko, mde ei ynok tmol mak yibri yto,
7 “Hra na ko wrana ni wde ke fe me? Ou wrana ni masgia man Nago. Hra na sio ma ou wto wyan kat sadik satian ei, ha Nago wmres deri sok!”
8 Mahin Yesus wnok wale ei ysablit aiti, fe ei ynok tmol mde le eke, ofo ou wto man ei wto: “Nan nnok mde ke mak nibri aiti fe me?
9 Nto man sio ma mseme kat? Tto man na wakarat ou tto: ‘Tet tbaret keben wale nen nfe satian om,’ afe tto: ‘Nsidik, nlouk nfe tikar om man nkafem, ofo nain!’ 10 Mahin tet tsiok waiti mde le ke, se bo nan nnok sros nto Na Tkoin Yfe Wet tet sok le ma tslonti fle kohok mak fobi katak ko mabe tbaret keben kayi na tkoin yfe satian ei,” – ofo ou wrana man na wakarat ou wto – 11 “Wet, nsidik, nkosia nfe tikar om, ofo nsalit oli nse bol nen na!” 12 Mde na oko wsidik, wkosia kat tamli wfe tikar om, ofo whok wain fe na marok ei ysifuon. Mde ei ykan om mtmayes kat, ofo ykashok yhdin man Nago yto: “Ahe, mam mhot dait latiot ni hra mde ke om!”
Lewi Na Pajak Ou Wain Wadien Yesus
2:13-17
(Mat. 9:9-13; Luk. 5:27-32)
13 Mahin oko fo Yesus wain oli wse siwan sabarak wtefit. Na marok ei yka yse ou wak, ofo ou wrana wkakniet ni man ei. 14 Yesus wain kat fe oko de, wsmit fo Lewi, Alfeus wfe wet, wleli wak bol pajak, ofo ou wwit man ou wto: “Naka, nadien tet la fein!” Mde Lewi wsidik wadien yein.
15 Na marok yidien ou yein yse Lewi wfe bol. Yhok yik oko fo, Yesus wadien wfe wedla ei yeit sisi ni eit yidien na marok hra ysiokti pajak ei, yidien fot na hra ysiok ni sgia, yibe na marok om yidien kadio kat Yesus. 16 Na guru agama hra yloit yse Farisi, ei yhot fo Yesus wat sisi ni eit wadien na hra ysiokti pajak yidien fot nai ysiok ni ysgia ei, mde ei yefitwain yin ou wfe wedla ei yto: “Hra ou wat lok ni eit wadien sisi na pajak yidien fot na hra ysiok satian ei yibe?”
17 Yesus woso ofo wrana man ei wto: “Na hra ykaini dait ynok saswain dait dokter, ha na hra ykaini sok, ei yein yidihar ou. Tet taka dait fe twit na hra yto ei yibot, ha tet taka deri fe na hra ysamenie fe ysiok satian.”
Yleli Ni Eit
2:18-22
(Mat. 9:14-17; Luk. 5:33-39)
18 Tali mre oli fo, Yohanes wfe wedla ei yidien fot na Farisi yleli ni eit kadio kat, yibe yto ysaesik man Nago yidien yeit oli dait ni mrem. Mde na mre yka yefitwain man Yesus yto: “Hra Yohanes wfe wedla ei yidien fot na Farisi yfe wedla ei yleli ni eit kadio kat, mahin nen nfe wedla ei yeit sok wata ni eit fe me?”
19 Mde Yesus wrana man ei wto: “Ei yeit wata ni eit fe hra tet tadien sisi sonat ei. Mde hra wedla man ou wto wsmian, wleli kein nai ytwayit wfe dli om, maka fo, nai yala kwat, ofo ei yeit sisi ni eit. Hra nan ntoji na dla ou wadien wanak wai, na rin ei, yeit dait ni eit fe me? Mdain! Ei ykashok sisi yidien ou wabe wsmian kmo, ofo ei yeit sisi deri ni yidien ou.
20 Mahin basak mre oli fo, nai ywien kat na dla ou wahinti kat ou wfe wedla ei, ofo ei ymres yiheit yleli tnes ni eit.
21 Nto de sie? Na mre wafak sadik not maifi hra mkodiot latiot, main mse not mahmat hra mdihak wale? Hau! Mdain! Mto mde ke fo, bo not maifi hra mkodiot latiot mkein tahak not hra mahmat om, ofo not om msadak kamyi kat.
22 Mde fot le hra na mre wolio dait twok anggur maifi mse botol yihmat hra nai ysor yehin erwas yfalek ei. Bo nto nsiok mde le oko fo, twok anggur okom mala botol yihmat ei ytahak, ofo nai ybir kat sisi deri anggur om madien fali botol falek ei. Hau, anggur maifim nai yolio deri mse botol yiifi.”
Yesus Wfe Wedla ei Ylos Gandum Yidien Tali Sabat
2:23-28
(Mat. 12:1-8; Luk. 6:1-5)
23 Tali Sabat mre oli fo, Yesus wadien ou wfe wedla ei yein fe biele gandum yibri. Yein wata fo, wedla ei ylos gandum yifuon yibe yeit. a
24 Mde na Farisi yto man ou yto: “Nhot la, nfe wedla eke ysiok sak-sak ni, yewer kat tali Sabat ko fe me?”
25 Ou wrana man ei wto: “Hra nan nke nbaca dait latiot ni hra kamuolo Daud wsiok ei. Ou wadien wanak wai ydain ni eit, ykatot. 26 Mde ou wloit wse Nago wfe bol mabri ra. Oko fo Abyatar wabe imam wafleu. Mde Daud wat hriok roti hra yikohok ei, hra nai yeit sak-sak dait ei, ha na imam deri le ma yeit. Ou wat, whnak fot mre yin wanak wai yeit.” b