Yesus Weren Na Wna Maigi
3:1-6
(Mat. 12:9-14; Luk. 6:6-11)
3
Tali Sabat man kdie oli fo, Yesus wtrik wse bol sikafit. Na mre hra wna mtato maigi, mwet mloyok, wak fot wi oko. 2 Ei ysmit torot Yesus yto bo ou weren na oko wadien tali Sabat, ofo ei yto ou wsiok sero ni, wewer kat tali Sabat, wsiok ni sgia, (fe hra ei ytoji wale yto: “Na mre ysiok dait ni mre yidien tali Sabat om mala!”) 3 Mahin Yesus wbahe na hra wna mtato maigi wto: “Nkro wata nak na marok eke ybariomo ana!”
4 Mde ou wefitwain man ei wto: “Ni mit ma faf fsiok toron madien tali Sabat kom, fsiok ni yibot, afe fsiok ni yisgia? Faf feren nai yron, afe faf fska ei ykak?” Mahin ei ysatmor deri.
5 Yesus wtrere, wsmit sas-sas man ei wkohli kat, ofo ou wtrere mti mse wabri fe nai yibri yi mdrot kat. Mde ou wbahe man na ou wto: “Nkotguos la nna kom!” Na ou wkotguos wna om mde wna om mbot tnes oli.
Yesus Weren Na Marok
3:7-12
7 Ofo Yesus wadien wfe wedla ei ykadin kat yehin kota, yein yse siwan sabarak wtefit ale yidien fot na marok mahin fobi Galilea. 8 Nai yoso kadio kat ni hra ou wsiok ei, ofo nai yrok yehin Yudea, Yerusalem, Idumea, kla Yordan mtato ana, yehin fot wi Tirus, Sidon, ei yikan yrok yka yse ou wak.
9 Fe hra na marok okom mde, ou wbahe wfe wedla ei ykein fien kma mre man ou, walbat na marok ei yka ykro, ykodok lili ou. a 10 Fe ou weren wale na marok, kayi de nai yrok hra ykaini latiot ykafreyit yein yse ou wak, yto yokot deri ou. 11 Bo klebet yiwua ei yto yhot ou, ofo ei yti yik wbariomo aiti, ofo ei ywak yto: “Nen le ma Nago Wfe Wet nen!” 12 Mahin ou whar kat wkanas wto: “Nrana fe tet tala!”
Yesus Wlouk Yikan Na Yahar Teit Lak Ei Ykomot Ou
3:13-19
(Mat. 10:1-4; Luk. 6:12-16)
13 Mde Yesus wain whri wse riere wasa ra, wwit helwain na hra ou waisi, mde ei yka yhok yse ou wak. 14 Ou webet wedla yahar teit lak ei yibe rasul se bo ei ylok-lok ydif-dif kat yidien ou, yibe fot ou wteye ei yein yrana giet mabot om. 15 Ou whnak fot fle kohok om man ei se bo ywain kat fot klebet. 16 Wedla yikan yahar teit lak hra ou wlouk ei le ma: Simon (hra Yesus wwak wabe Petrus); 17 ofo Yakobus wadien waliwet Yohanes, Zebedeus wfe wet ei, (la yikan lak ei Yesus wwak yibe Boanerges, hra nai yto Rgi Wfe Wet); 18 ofo Andreas, Filipus, Bartolomeus, Matius, Tomas, Yakobus hra Alfeus wfe wet, Tadeus, Simon na Zelot, na hra wto fobi Israel mkro wat, 19 yidien fot Yudas Iskariot hra basak wabe kni meles wan Yesus, wbaret lolot ou.
Guru Agama Yadon Yto Klebet Wafleu Wfla Yesus
3:20-30
(Mat. 12:22-32; Luk. 11:14-23)
20 Oko fo Yesus wtrik wat kdie wse bol mrem. Ofo na marok ei yka ysatatik yadrat kat yse ou wak, kawuak de nai yleliti ou wadien wfe wedla ei yeit dait ni eit. 21 Yesus wemem waliwet wai yoso ni oko fo, ei yto: “Walbat ou wkoli, fe hra ou wnok dait wale wyowain wkan ou wa om!” Ofo ei ysin yein ywiehla fien kat ou.
22 Na guru agama hra yka yehin Yerusalem yto: “Beelzebul, Klebet Wafleu hra wslonti klebet, koli, lait, yiwua yisgia kadio kat ei - ou le ma wfla na ko. Beelzebul le wfla Yesus, wolot fe ou wkanas wwain kat klebet!” b
23 Mahin Yesus wwit ei, wrana man ei wto: “Hra nan nto de sie? Klebet Wafleu bo wwain kat kayi ou wfe klebet ywet ei? Mdain!
24 Noso la flet ko: kerajaan man om mto mfla-fla, ofo kerajaan okom mkro mkanas oli dait. 25 Na smian man ei yto yfla-fla, yheden mawain, ofo ei ybot oli dait, ofo yhriak. 26 Mde ke fo, Klebet Wafleu, wto whar kat, wwain kat ou wfe klebet, koli, lait, ni yiwua yisgia kadio hra ou wslonti ei, kayi de ei yfla-fla ysiar-sar, ofo ou waheit wkanas oli dait, wharfe le oko. [Ou wsiok dait wde ke, ha, tet le ma tsiok sgia deri ou!] 27 Na sie ma wbren kat he wtrik sros wse na wakanas ou wfe bol mabri, wabe wasliak ou wfe hrien? Mdain! Mahin na oko wto wkaitti sba na wakanas ou wtodo, ofo ou waheit wasliak samne ou wfe ni kadio. [Mde le ko, tet thirit wale Klebet Wafle ou wtodo, ofo tet taheit, twain kat samne ni yiwua yisgia kadio hra ou wslonti ei le mke.] 28 Tet trana tkoin man nan, na tkoin yfe satian ei yidien fot ni yisgia hra ei yrana yife ygiet ei, bo Nago wbaret keben kadio kat ni eke, wnok ni sgia oli dait man ei. 29 Mahin, na man sio ma wgiet sgia Nago Wawua Makohok om, ofo Nago waha kat kawuak, wbaret keben oli dait ou. Na oko wkafe kawuak wfe satian om.” c
30 Ou wrana mde le ke fe hra ei yadon yto: “Klebet le wfla ou.”
Yesus Woso Dait Weme Waliwet Wai
3:31-35
(Mat. 12:46-50; Luk. 8:19-21)
31 Mde Yesus wemem madien waliwet wai yhok. Ei ykro kaf kat yik tlein, ybahe nai ywit ou waka. 32 Ofo na marok yleli ykohli ou yto man ou yto: “Nhot la, neme madien naliwet wai nahano mai ei le ma ykro tlein ra, yto ysadir yidien nen.”
33 Mahin Yesus wto man ei wto: “Na sie ma teme om? Na sie ma taliwet ei, tahano ei?”
