Flet Mabe Na Wklat Har Gandum Yfuon
4:1-20
(Mat. 13:1-23; Luk. 8:4-15)
4
Tali mre fo Yesus wkakniet ni wak siwan sabarak wtefit. Na marok-rak ei yhok yka skayit-yit kawuak de nai yaher dait kat. Ei ykro yskalalok kat ou, mde ou warin wse kma, wska kat wkadin kaf kat wse siwan wabri ale, ofo wleli wrana ni, ha na marok om ykro yik tlein ra, yik deri siwan sabarak wtefit. a 2 Ofo ou wflet, wkakniet ni warok yin ei. Ou wrana mde le ke man ei wto, 3 “Noso la! Na mre wain wse sala yfi wabe wklat har gandum yfuon.
5 Yfuon mre yti yse bet heter hra maisti amak ysa, ofo ni yfuon eke yrohok kat yfori, yibe bet om mlede.
6 Mahin tali ou mhok mba ei ylas ykolio kawuak de yslo, yibe yteit ysik roro wain dait, fe bet om mlede.
7 Mre kdie fo yti yse wiya yibri, mde wiya yforiti yfle, ysiokti rat kat, kawuak de gandum ei ysa rhoin-han, ykan dait.
8 Yidien man kdie oli yti yse bet mahlio, yfori ybot kawuak de ykan yhada yrok. Nai ybadiak yhada ei, yhot fo mre yfuon na mre waigi wtlok foko yahar. Man kdie hra yfuon na tolik yeigi. Oli fo man hra yfuon na mahot yeigi. Mde le oko.”
9 Ou wrana wto: “Nan nto ntefit, ofo noso roro wain tet!”
10 Hra oko fo ou wmres deri, ofo wfe wedla yahar teit lak ei yidien fot na hra yitaren ou ei yka yefitwain man ou wabe flet oko.
11 Ou wrana man ei wto: “Man deri nan nke tet trana khan mabe Kerajaan Nago wfem. Ha, man na hra yik tlein, o le ma na hra yoso kmiet dait tet, ofo tet trana ni yrok yin ei yidien deri flet. 12 Tet tsiok mde le oko se bo:
‘Na eke yhot ta-ta sawuan deri,
mahin ei yhana dait.
Ei yoso ta-ta,
mahin ei ynok dait sros kat.
Ha, yto ei yoso sros kat,
ofo ei ylelek oli, ynok tmol mse Nago wak,
Ofo ou wbaret keben ei yfe satian ei,
mahin mdain, mabe ei yoso kmiet dait tet.’ ”b
13 Ofo ou wefitwain man ei wto: “Nan nnok dait flet ko, afe? Nto mde ke fo, bo nan nnok wat flet oli kdie nde le sie? 14 Ni hra na ou wklat har o le ma giet Nago wfem.
15 Ni yfuon hra yti yik fan tefit, wi hra ou wklat har giet om, ei le ma na hra yoso giet, ofo Klebet Wafleu wrohok waka, wlouk kat oli giet om mahinti kat ei yibri ra.
16 Mde fot le ni yfuon hra yti yik bet heter hra yik amak ysa-sa ei, mde le na hra yoso giet om, ykashok fem, 17 mahin ei yteit ysik dait, ei ynok tmol roro wain dait man Nago, ofo giet om mase semfe dait mak ei yibri ra. Bo kafir mhok afe, nai yhat ei yibe giet om, ofo ei yrohok yehinti kat giet om, ysiok oli ni sgia.
18 Mde yfuon hra na ou wklat har yse wiya yibri, ei le ma na man hra yoso giet om, 19 mahin ei ynok saswain kat man ni warok hra yik fobi ke, ofo ykesik yibe na kohok afe, ybahoin ykain hrien warok. Ni hra eke le ma yflie ei, ygebra ei ymres deri, ofo giet om mkan dait kat.
20 Yfuon mkahlia kat hra na ou wklat har yse bet mahlio, ei yde le na hra yoso, yslonti kawuak giet om mak yibri ra, mde mkan yfuon wrok-rak – na mre waigi wtlok foko yahar, man kdie yfuon na tolik yeigi, yidien man hra yfuon na mahot yeigi.”
Flet Fe Pelita, Flet Fe Kniet
4:21-25
(Luk. 8:16-18)
21 Ofo Yesus wefitwain man ei wto: “Na sio ma wbet pelita ofo wlak diaman wse komo malale aiti afe, wlak diaman wak montik mabri? Mdain! Nai ysiok dait pelita wde eke, ha, nai ylak deri wak wi mayiye se bo wi mhak. c
22 Oko fo, ni kadio hra ydiaman ei, basak sba fo, yyen hata kat. Ni kadio kat hra yibe khan ei, basak fo ei ytahak kat. d 23 Nan nto ntefit, ofo noso roro wain tet!”
24 Ofo ou wrana oli wto: “Nnok saswain homo-homo ni hra nan noso ei! Kniet hra nan nsiok man nkniet na wat man ei, ou le ma bo Nago wsalit wsiok mabe wkniet oli kdie man nen mewer kat. e 25 Nan nto noso roro wain ni hra tet trana ei, ofo Nago whnak kdie oli man nan nnok ni warok. Yo nto nan noso dait, ofo ni kyamre hra nan nnok wale, bo ou wkosia kat yehinti kat nan.” f
Flet Fe Ni Yfuon Hra Yfori
4:26-29
26 Ofo Yesus wflet oli wto: “Nago wfe kerajaan om mde le nau wklat har gandum yfuon yti yse salfi.
27 Amuk man amuk man ou wase, tali man tali man ou wahin, mahin na oko wnok dait ni mit ma hra molot fe gandum yfuon ei yfori. Ei ymres deri ykamin yifi, yfori kawuak de yfle. 28 Bet mmres msiok deri ni yfori kawuak de ykan ei yhok, yehin sayen yhada ei, ofo yfuon, kawuak de yfuon ei yfle karmiak kat. 29 Kawuak de yto yrefe, ofo na ou whok waka wsat kat yibe yrefe wale, ytatol mabe nai ylos.” g
Flet Wabe Wkoit Rempah Sesawi Yfuon
4:30-34
(Mat. 13:31-35; Luk. 13:18-19)
30 Ou wrana oli wto: “Faf flouk flet mit ma ei, mabe fnok ni kerajaan hra Nago wfem? Faf flet fto Nago wfe kerajaan om mde le sie? 31 Ni kerajaan om mde le wkoit rempah sesawi yfuon hra nai yklat har yik biele. Oko fo wkoit rempah sesawi yfuon ei ywet waiti yewer yehin ni kadio hra nan norik wat-wat ei yse nan nfe biele.
32 Ou wfuon ywet amo, mahin wfori wfle wewer kat ni kadio hra yfori yik biele wabri. Ou wfori wkrit wgatan yfle, yidien wmai, ofo klen yhri ysiok ykaye yik wkoit ou, wmai ylowinti ei.”
33 Wadien wlouk flet warok, ou wrana giet Nago wfe yin ei, mtatol madien ni hra ei ynok eke. 34 Wto wrana man ei, ofo ou wsiok sawuan flet, ha, man ou wfe wedla ei ymres deri ou wrana tahak kadio kat yin ei ynok.
Yesus Wkaboti Safar Fle Wtono Kat
4:35-41
(Mat. 8:23-27; Luk. 8:22-25)
35 Tali hra oko mkdia siwit fo, Yesus wak sonat kma mabri, mde ou wrana man wfe wedla ei wto: “Nan nka, faf fska kat fse siwan sabarak wtato ana.”
36 Ofo ei yehinti kat na marok om, ylak ou wak kma mabri, yska kat, ofo ysalen yein. Kma man ei yidien ysalen yein sisi. 37 Mde safar wafleu whok ro kat wadien fot alwkafe wba kma om wklat wse kma mabri kawuak de kma mhon bhait fe kla.
38 Hra oko fo Yesus wak kma sain mabri, wase wak katik. Ou wfe wedla ei yka ytabe ou yto: “Guru! Nen nahin la! Nase samne buon fe me? Faf fila le mke!”
39 Yesus wsidik wkaboti safar wadien alwkafe wto: “Nluwa la! Ntono kat!” Ofo safar wadien alwkafe ou wluwa wtono kat.
40 Mde ou wrana man ei wto: “Hra nan neliek karmiak kat fe me? Hra nan nnok tmol dait tet tabe?”
41 Ofo ei yeliek karmiak kat oli, ofo yrana saswain man ei yto: “Na man sio ma hra ko? Safar wadien alwkafe yoso kmiet ou!”
