Yesus Wwain Kat Koli Yhokti Kat Na Gerasa Ou
5:1-20
(Mat. 8:28-34; Luk. 8:26-39)
5
Ei yfoto yse siwan sabarak wtato ana, wi hra nai yto Gerasa. 2 Yesus wais kmo wahin kma mabri, ofo na wakoli mreu whok wahin sawlo kaka, waka wse Yesus wak.
3 Na oko wase sawuan wak sawlo kaka. Na mre ykanas oli dait ykaitti ou wadien rantai. 4 Nai yhirit ta-ta wanik deri wna wteit yidien rantai, mahin ou wkein kerek kat yroktok. Na mre ykanas ykaitti dait ou se wluwa.
5 Tali man, amuk man, ou wsikol-kal sawuan wak sawlo kaka, wriere-rara deri fe riere wasa ana. Ou wwak lo-la, wkodrit-drat amak ysla fe wkan om.
6 Na ou whot afat Yesus wahin ana waka, mde wsese wayen ou. Whok fo, wbatoko wti, worik wteit sia wak Yesus wbariomo. 7 Na ou wsalo wkahradan karmiak kat wto: “Yesus, Nago Wafle wfe wet nen, bo nsiok ni mit ma man tet om? Nen nfafti kat man Nago nabe nsiok sgia dait tet tala!” 8 Ou wrana wde le ko fe hra Yesus wbahe kat lalie wto: “Hei koli nen, nhokti kat na ko!”
9 Mde Yesus wefitwain wto: “Nkedi mabe sio?”
Ofo wto: “Tet tkedi le ma Legion Kaisin Sfa Dla, yibe mam mikan koli warok.”
11 Mak wi okom korik bol kda fle ynek yidihar ni eit yik den wkedi ana. 12 Mde koli ywaini man ou yto: “Nbahe kat mam mhokti kat na ko mtrik msisik mse korik hra ra yibri ana!” 13 Mde Yesus wto: “Nsiok wata ei!” ofo koli yyaka ei yhok kat, ytrik ysisik yse korik ei yibri. Mde korik kda eke yrok-rak, bo mal sadik le ribu lak (2.000), ei ysese yti kdier ysio yse siwan sabarak wabri ale.
14 Mde na hra yror korik ei ytain ysese yrana ni ke yin na hra yese yik kota madien krotia hra yitaren. Na marok yoso, ofo yein yhot ni mit ma hra mde okom. 15 Ei yka yse Yesus wak ofo yhot na hra kaman koli yba, ou wleli, wdain wale. Wtrik wale not, wleli wnok saswain oli ni. Nai yhot na ou wbot-bot deri wabe koli yehinti kat wale ou. Mde ei yeliek kat. 16 Na hra yhot wale ni eke yidien ysifuon yrana man na marok hra yka kmo. Ei yrana fe ni kadio hra Yesus wsiok man na koli ou wadien fot korik ei. 17 Mde ei ywaini kayit-yit mabe ou wahinti kat wi ei yi.
18 Hra oko fo Yesus warin oli wse kma mabri, ofo na hra hrake wakoli ou wwaini wlon-lon wto: “Nen naisi fo, tet tadien faf fein.” 19 Mahin Yesus wsamenie fe dait, wto deri man na ou wto: “Nsalit oli nse nfe nai yik, nrana fe man ei ni kadio hra Tuhan wsiok yin nen yibe ou wmro fe nen.”
20 Mde na oko wain wkohli kat fe distrik Dekapolis, wrana fe ni kadio kat hra Yesus wsiok yin ou. Na kadio kat hra yoso ou, ei ykan mtaret kat. a
Yesus Weren Na dlim Mkak Hen Lis Om Mdain, Wkosia Yairus Wfe Wet Om Mron Oli
5:21-43
(Mat. 9:18-26; Luk. 8:40-56)
21 Oko fo Yesus warin kma, wfoto oli wse siwan sabarak wtato ana. Ou wais kmo wahin kma wse siwan wtefit, ofo na marok yka skayit-yit ykro ykohli ou.
22 Na mre wkedi nai yto Yairus waka wse Yesus wak. Ou wabe na wafle hra wslonti bol sikafit mak kota oko. Hra oko fo ou whot Yesus, ofo wti baloyok wak Yesus wteit olo aiti, 23 wwaini wlon-lon kat man ou wto: “Nai fe nau, tfe wet madli om mkaini msamsa kat, maigi bhait. Naka nbakoko la fein, nlak nnai yin om mkan se bo mdain, maigi dait.”
25 Mak fot oko, na dli mrem mkain kak-hen lis msamsa kat, mkoko mase wale der 12 (yahar teit lak). 26 Dokter yrok yweyen ta-ta wanik deri om, kawuak mde om mathois mfe hrien ei ydain wale, mahin mkaini kak-hen mitian msamsa kat. 27 Om moso wale nai yrana tar-tar fe Yesus, mde mak flasak na marok okom, om mataren mse Yesus wsbiele, mna okot hlok ou wfe not trik om. 28 Om msiok mde le ke mabe mnok deri mak mabri ra mto: “Tet tna okot deri wfe not trik om, ofo bo tet tfe ni kaini kom mdain!” 29 Om mna okot ou wfe not trik ofo, mbasan mkak hen ou wdain ro kat, ni mre mkoko oli dait.
30 Madien hra oko fo, Yesus wnok afat wale ou wkan makohok mhok ro kat mahin ou wak, ofo ou wlelek wsmit sas-sas mse na marok ei, wefitwain wto: “Na sio ma wna okot tet tfe not trik kom?”
31 Ou wfe wedla ei yrana man ou yto: “Nen nhot mde le sie? Na marok kom ykdio yit-yat nen! Hra nen nefitwain nto: ‘Na sio ma wna okot tet tfe not trik kom?’ ”
32 Mahin Yesus wkro wsidihar wkohli na ei se bo whot na ou. 33 Na dli okom maliak, mrioro mkafrere fe hra om mnok ni okom mtatol man om. Om mayek maka, mti baloyok mse Yesus wbariomo ofo mrana tahak kat ni hra om msiok ei yin ou.
34 Mde Yesus wrana man om wto: “Tfe wet, nen nkaini om mdain wale mabe nen nnok tmol man tet. Nain samne wata, ni kaini kom mdain wale, malmias oli dait nen.”
35 Yesus wrana sonat ni wadien na dli om, ofo na mre yehin Yairus wfe bol yka yto: “Yairus, nsadir tenek oli dait guru oko, nfe wet om maigi wale.”
36 Mahin Yesus wsamne deri, wkahiowain dait fe ni hra ei yrana eke. Ou wrana wata man Yairus wto: “Nen naliak amot, nnok man tet, norsfe deri wet okom man tet.”
37 Mde Yesus waisi dait na mre yidien ou yein, ha Petrus deri, Yakobus wadien waliwet Yohanes. 38 Ei yhok yik Yairus wfe bol, yhot fo nai yrewer kat, yowa ytiri eigi om madien ysalo fle. 39 Ou wtrik ofo wrana man na ei wto: “Nan nowa nrewer fe me? Wet om maigi dait, mase deri.” 40 Mahin ei yasak fe ou.
Mde ou wbahe kat ei yhok, ofo mono, memem, Yesus wadien wfe wedla tolik ei, ytrik sisi yse sit hra madien eigi om.
42 Mde wet om mron oli, msidik ro kat mkro, ofo main sas-sas mak sit mabri om. Hra oko fo wet om mfori kmo, mase deri der yahar teit lak (12). Mde na hra yik eke ei ykan mtaret, ytmayes kat.
