Na Nazaret Ynaba Kat Yesus
6:1-6a
(Mat. 13:53-58; Luk. 4:16-30)
6
Mde Yesus wadien sisi wfe wedla ei ysalit yein oli yse wi ou wa. 2 Tali Sabat ofo ou wkakniet giet Nago wfem mak bol sikafit mabri.Nai yrok yoso, ofo ykan mtaret kat yto: “Hee, bo hra ou wnok karmiak sok ni ke yehin ta man sio? Na sio wkakniet ni hra mde okom man ou? Se bo wafik ni owuok-awak heit-hat ke yehin sio? 3 Hra wet ko wabe ya na hra wahein sawuan wkoit. Hee, hra wemem ya Mariam. Waliwet ei le ma Yakobus, Yoses, Yudas, Simon. Ou wahano mai o le yidien sisi ya faf fke. Ou wnok ni warok karmiak buon fe me, yewer yehin faf?” Mde le ke ei yaha kayi ou.
4 Mde Yesus wto man ei wto: “Nabi man ou wto wak fobi wat, ofo nai yhdin ou. Yo, wto wsalit wse krotia ou wa, ofo na ou wa ei, yidien fot na hra yik bol ou wa ei, yhdin dait ou.” a
5 Wak wi okom Yesus wsiok dait ni maowuok mrem, ha, weren deri na kyamre hra ykaini, wlak deri wna man ei, ofo ei ybot oli. 6 Ou wkan mtaret kat fe na marok ei ynok tmol dait man ou, ha ei yorsfe-fa deri ou.
Yesus Wbahe Rasul Yikan Yahar Teit Lak
6:6b-13
(Mat. 10:5-15; Luk. 9:1-6)
Mde Yesus wain tar-tar wse krotia kadio kat eke, ofo wrana wkakniet ni man ei. 7 Ou wwit wfe wedla yahar teit lak ei, ofo wberiet yikan lak-lak, whnak fle kohok man ei, yibe ei ywain kat klebet.
8 Mde ou wkait wain man ei wto: “Bo nan nein, notik dait hrien mre yibe fan kedi amo mala! Ha, tiyen deri sok. Ni eit dianan mala, kya mala, pitis mak kmodikma mala! b 9 Nan nteit wata sandal ei, ha nan ntrik dait not trik fe lak yila, mres deri!” 10 Ou wkait wain oli man ei wto: “Bo nan ntrik nse bol mrem, ofo nese nik oko kawuak de nan nehinti kat kota okom. 11 Nan nhok nik kota oko, nto na eke ylia kein dait nan, yoso dait nan, ofo nhok nehinti kat wi okom, nbawas kat nteit smuot ei yibe ni kait wain skatoin yin ei.” c
12 Mde ei yhok yein, yrana ysielwat kat giet man na marok, se bo yehinti kat ei yfe ni ysgia ei, ylelek yka oli yse Nago wak. 13 Ei ywain kat klebet warok yehinti kat na ei, yolio minyak yin na marok hra ykaini, yweyen na ei ydain. d
Herodes Wska Yohanes Wasrik Kat Nai
6:14-29
(Mat. 14:1-12; Luk. 9:7-9)
14 Raja Herodese woso wale fe ni kadio hra Yesus wsiok, mabe Yesus wkedi mririn mak fobi ou wa. Na mre ynok sele, yrana fe Yesus yto: “Ou le ma eigi Yohanes Wasrik Kat Na hra kaman wkak. Mahin ou wsidik oli, ofo ou wsiok firi ni owuok eke.” f
15 Mde nai yka yrana wat-wat kdie yto: “Ou eke Elia.”
Na mre wat kdie yto: “Na ko wde le nabi hra yidien kamuolo kat.”
16 Hra oko fo Herodes woso ni eke, ofo wto: “Hau, Yohanes hra kaman tet tehir kat wdioro, o le wsidik oli ou!”
17 Hra kaman Herodes wsiok mde le oko. Ou wkesik wlouk kat Herodiana, waliwet Filipus wsmian om maka, man ou wsmian. g 18 Mahin fo, Yohanes waka whar kat ta-ta Herodes wto: “Hra nen nsiok ni ysgia, newer kat ni kohok Nago wfem, fe le nen nlouk kat naliwet Filipus wsmian om man nen nsmian.”
19 Mde Herodiana mtatrein kawuak madien Yohanes, molot fe Herodes wbahe nai yslon yhirit ou. Om mtadrot lis deri madien Yohanes, msin mto mska ou, mahin Herodes wtekti, wlolowain ou. 20 Herodes waliak wska Yohanes fe ou wnok Yohanes wabe na wabot, wakohok. Ou wkashok fe woso ni hra Yohanes wrana ei, mahin ou wkahiowain kat, wabri fe lak.
21 Mahin Herodiana mhewi-wa dait kayi de mayi fe Herodes wsiok wfe konon. Ou wsol wfe nai yfle hra ykamti fobi, na sebe ei, yidien fot na tmak hra yese yik fobi Galilea. Ofo ei yka ybalifis sisi yeit Herodes wfe konon om. 22 Hra oko fo Herodiana mfe wet madlim mrohok mtrik, msrar mkawle mak mayiye ei ybariomo ra.
Herodes wadien wfe na rin marok ei ykashok ysayo om, ofo Herodes wkadoin man wet madli om wto: “Nen nwaini wata ni mit ma om, ofo tet thnak man nen.
23 Tet tfafti kat man nen tto: Nwaini wata ni mre man tet, bo tet thnak. Yo, nto nwaini kerajaan kom, ofo thnak mtato man nen.”
24 Wet madli okom main mse meme mak mefitwain mto: “Teme, bo tet twaini ni mit ma om?”
Ofo memem mto: “Nwaini Yohanes Wasrik Kat Na ou wsafakos.”
25 Mde om main tamli mse raja wak mto: “Tet taisi nen nhnak madien hra ko man tet Yohanes Hra Wsrik Kat Nai ou wsa om, nlak man tifal!”
26 Raja wto woso fo, wnok ni mkahiowain kat. Ou wto waha, mahin na omuok yrok yoso samhak wale ou wfafti ni. 27 Ofo raja wbahe wfe na sebe wain tamli watik fien Yohanes wsafakos om. Na sebe ou wain wse bui, wehir kat Yohanes wsafakos om, 28 wlak man tifal, ofo wsalit oli whnak man wet madlim okom, ofo om mhnak kein kdie man memem. 29 Man bri deri fo, Yohanes wfe wedla ei yoso ni okom fo, ei yka ylouk kat ykafe fien Yohanes wkan tkoin om maka, yotik ykali mse hin knawato om mabri. Ni rana wain fe Yohanes wkak mharfe le oko.
Yesus Whnak Ni Eit Fe Na Mahot Ribu Mewer Kat
6:30-44
(Mat. 14:13-21; Luk. 9:10-17; Yoh. 6:1-13)
30 Mde Yesus wfe rasul yikan yahar teit lak ei ysalit oli ybalifis yse ou wak. Ei yrana hatot man ou ni kadio kat hra ei ysiok ykakniet yin na ei.
31 Na marok mre yka, mre ysalit oli, yhnak kowisi-wasa fe ei, mde yeit dait kat ni eit. Hra oko fo Yesus wrana man wfe wedla ei wto: “Nan nka faf fmres fein fse wi mahlok mrem se bo faf fleli fskaros firi kyamre.”
32 Mde ei ymres yorin kat kma, yein ytatol yse wi mahlok mrem. 33 Mahin nai yrok yhot, mde ynok wale wi hra ei yein om. Ofo nai yrok yehin kota kadio yslili tamli yein fe tlein kawuak mde yhok lalie yik wi okom. 34 Ei ytik kmo kmam, ofo Yesus whot na marok-rak mak wale tlein ra. Mde ou wbakoko fe ei, yibe ei yde le domba hra yein sak-sak, yidien dait na hra wkororo ei. Ofo ou wteik wrana wkakniet ni marok man ei. h
35 Hra oko fo mataren wale mabe amuk le me, mde ou wfe wedla ei yka yto: “Wi kom mdomri, 36 ofo nen nbahe na ke yein yse krotia hra yitaren ke, ykain wat-wat ni eit se bo yin ei yeit, wa amuk le mke.”
37 Mde ou wto man ei wto: “Nan le ma nhnak ni eit fe na kei!”
Ei yto oli man ou yto: “Hee, se nen nto mam mein mkain ni eit hra mat pitis kdois warok karmiak kat, bo mal sadik dinar perak nai yahar yeigi (200), man na marok ei yeit?” i
38 Mahin ou wefitwain wto: “Nan notik roti waka? Oma, nihenek la!”
Ei yto yihenek fo, yrana man ou yto: “Roti mahot yidien eren lak deri le mke.”
39 Mde ou wbahe na marok kom yleli ylak tatik-tatak yik klawleis aiti. 40 Ofo ei yleli ysatatik wrok-rak. Mre yik na mahot yeigi (100), mre yik na lak yeigi whri na wna yahar (50).
41 Mde ou wwien fien roti mahot yidien eren lak ei yka, wafan, wgiele mse yik ago, ofo whdin Nago. Mde werek-arak roti eke whnak yin wfe wedla ei, se bo yberiet-rat yin nai ysatatik marok ei. Ou wberiet fot eren lak ei yse na marok kadio kat.
43 Mde Yesus wfe wedla ei ylouk tatik roti yidien eren yta hra nai ykesitti kat, yka yhlik yin kya kayi de kya yahar teit lak ei yhon.
Yesus Wain Fe Kla Wasa
6:45-52
(Mat. 14:22-33; Yoh. 6:16-21)
45 Mde Yesus wbahe kat wfe wedla eke yelin kein yorin kma yfoto yse siwan sabarak wtato ana, yse kota Betsaida. Ou waheit wbahe kat nai ysalit wat-wat yse wi ei yi.
47 Amuk whok fo, Yesus wmres waheit sonat wak tlein ra, ha wfe wedla ei ysalen wale yik siwan wabri ale. 48 Yesus whot ei ykliowo kat fe hra foron wkanas wahin ykmuon wfrio ei, mde ysalen kmam mtek kat. Ou waheit kayi de mkdia tali, dlele ysalo, ofo wbakorwain ei, wain fe kla wasa ago, kawuak de whok wahin kma mata koit wtatol ei, ofo wain wslili kma om.
Mahin ou wrana tamli man ei wto: “Neliek amot! Nhron wata, wa Yesus tet le mke!” 51 Mde ou warin wse kma mabri wadien sisi ei, ofo foron ou wluwa wdain. Mde ei yiwua yein kat. 52 Yibe ei ynok saswain oli dait ni owuok roti hra Yesus wsiok wale. Ha, samodor mkait kat ei ysablit om, mabe ei ynok saswain oli dait ni.
Yesus Weren Nai Ykaini Yik Genesaret
6:53-56
(Mat. 14:34-36)
53 Yesus wadien wfe wedla ei yhok yik Genesaret, ofo yklia yik kma sfie oko. 54 Yto yeis yehin kma fo, na marok yhana yto: “Yesus le waka ou!” 55 Mde nai ysese wat-wat yse wi kadio kat hra ei yese yik eke, ykafe fien na kaini hra yik eke, ylak yin tikar, ofo ykafe yidihar wain Yesus wleli wak wi man sio, ofo ei yhok fe ou wak.
