Ojin Nago Wfe Mkohok Mewer Kat Ojin Na Yahudi Yfe
7:1-23
(Mat. 15:1-20)
7
Tali mre fo, na Farisi yroro yidien guru agama mre hra ysiolok yehin Yerusalem, ofo ei yhok fe Yesus wak.
2 Ei yhot Yesus wfe wedla mre yeit ni, ofo man ei yrana man ei yto: “Nhot la, ei yeit fali ni eit yidien ynai ysgia ydahan sonat, yware krek dait ynai!” 3 Na Farisi yrana yde le oko yibe ei, yde fot le na sa Yahudi kadio kat ei, yeit hewi dait ni eit, fe hra ei yware latiot ynai. Ei yikan kadio ysiwain kat ojin trar hra yate kokos yfe om. 4 Ei yto yein yse pasar, ysalit oli yse bol, ofo ei yeit hewi dait ni eit, fe hra ei ysrik dait latiot. Ojin trar hra yrok eke ei ysiokti sonat, mde le yware met, ysgir kat nggisi, yware kat ni ftit hra nai yoyo ni eit fe.
5 Hra oko fo na Farisi yidien guru agama ei yefitwain man Yesus yto: “Nen nfe wedla ke ysiwain dait ojin trar hra fate kokos ei yfe mabe? Fe hra ei yeit ni eit yidien yna ydahan!”
6 Ofo Yesus wrana man ei wto: “Nto tkoin na sanet nan nsiok hriok Giet Nago wfem. Madien kamuolo Yesaya wrana krek wale ni mtatol fe nan wto:
‘Na sa ke yihdin tet yidien deri ygiet falek,
mahin ysablit om mak dait tet tak.
Ei yoso oli dait tet.’ a
7 ‘Ei ysaesik, ysikafit yhdin wanik man tet, mahin mdain.
Ojin kadio kat hra ei ykakniet eke yehin dait tet tak,
ha, yehin na tkoin ei ymres deri.’
8 Nan nke nnahla kat wale ojin Nago wfe, ha nna todo deri ojin hra na tkoin yfe.”
9 Yesus whar kat man ei wto: “Nan nke nto tkoin nsablit lis mewer kat de sie? Mabe nan nnaber kat wale ni bahe hra Nago wfe, se bo nna todo deri ojin trar hra nate kokos wai yfe. 10 Hra yidien kamuolo Musa wskatoin ojin Nago wfe man nan wto: ‘Nhdin nono nemem.’ Ou wrana oli wto: ‘Na mre wto wfruo kat wono afe, wemem afe, ofo bo nai yska ou wkak omuok.’ b 11 Mahin nan nke nkakniet lokdi man nai yrok nto: ‘Nrana wain man nfe na trar nto: “Tono, teme, ni kadio kat hra tet tyo lokdi man la nan, tet tsanfe wale mse Nago wak, mde ni ei ydain wale.” ’ 12 Mde le ke fo, nan nke nkaboti na oko wsiok wanik dait ni mre yin wono wemem. 13 Mde ke fo nan newer kat Nago wfe giet om. Nan nbahe nai ysiwain ojin trar hra nate kokos wai yfe om. Mahin ojin okom molot fe nai yewer kat ojin Nago wfem. Nan nke nsiok ni sgia yrok nde le ko.”
14 Ofo Yesus wwit oli na marok ei yka, ofo wrana man ei wto: “Nan nke kadio kat, noso la tet!
15 Ni kadio yehin deri tlein, yto ytrik yse na tkoin ou wabri om, ofo yhnak sgia dait fe ou. Ha, ni hra yhok yehin ou wabri okom – ekei le ma yhnak sgia fe ou. 16 Na man sio ma yto ytefit, ofo noso la tet!”
17 Mde Yesus wahinti kat na marok om, wtrik wse bol mre mabri ra. Ofo wfe wedla ei yka yefitwain man ou yto: “Ni mit ma nen nflet om?”
18 Mde ou wto: “Nan nmorait sonat fe me? Hra nan nnok dait latiot ni eit hra mahin tlein, mto maka mtrik mse nan nibri, ofo msiok sgia fe dait nan? 19 Fe hra ni eit om maheit dait mak nsablit, yo mtrik sros mti mse ngguofo, nkmat molo aiti, mhok fe nkaka, ofo main deri mse tlan.” Mde le ko, Yesus wrana wto ni eit yskaheit-hat kadio kat ei ykohok dait, ywas deri. Nai yleli oli dait.
20 Mde Yesus wrana skatiokot oli wto: “Ni hra mhok mahin na tkoin yibri ra, o le ma mhnak sgia fe na mna ei, molot fe ei ykafe satian. 21 Mabe, mahin ei yibri ra, ei ynok ni ysgia yrok-rak yhok yde le ymdo, yisliak, yska na, 22 yemir kat na, ybahoin yto ykohok, ykrek mawain na, ylolot dienen na, ymdo mak deri mayiye, ybahoin ni, yasak klo, ytbekein na, ykashok-shak, ysa foron. 23 Ni ysgia eke yhok kadio kat yehin nai yibri ra, yhnak sgia fe na mna ei.”
Na dli Siro-Fenisia Mnok Tmol Man Nago
7:24-30
(Mat. 15:21-28)
24 Mde Yesus wahinti kat wi okom, wain wse fobi Tirus. Waka kmo, ofo wtrik hlok wse bol mre mabri, wabe waha nai ynok ou waka, mahin nai yhana wale ou.
25 Mde na dli mrem moso nai yrana fe wale Yesus, ofo om maka tamli, mhok mti baloyok mse Yesus wteit olo aiti.
26 Na dli okom na sa Yunani mahin fobi Siro-Fenisia. Mfe wet om, klebet wflam. Ofo om mwaini lon-lon man Yesus mto ou wwain kat klebet wahinti kat mfe wet om.
27 Mahin Yesus wrana man om wto: “Hra nen nwaini tet tlouk kat ni eit wet na sa Israel yfe, yka fo, tklat kat bakya yin yfe mkan, na sa wat nan neit yibe? Okom mbot dait! Nliokeit wata wet, o le ma na sa Israel ei, yeit yelin kawuak de ykesit!”
28 Mahin na dli okom msalit mrana mto: “Ya Tuhan, mahin mkan man hra mik meja malale aiti, mam meit fot amo ni ysmuot-smat hra yti yehin wet ygiet ei!”
29 Mde ou wrana wto: “Yo, tet toso wale nen, mabe tsamenie fe ni hra nen nrana firi om. Nsalit oli nse bol nen na, wa klebet wahinti kat wale nfe wet om.”
30 Na dli okom msalit oli mse bol om ma, mhot fo mfe wet om mase bhas deri mak wi ma ese om, fe hra klebet ou whok wahinti kat wale om.
Yesus Weren Na Wtefit Dik
7:31-37
31 Mde Yesus wahinti kat wi Tirus, wain fe Sidon, wslili siwan sabarak Galilea kawuak wde whok wak fobi Dekapolis. c
32 Wak ana fo, nai yidien twa na mre hra wtefit dik, wromet, whok fe ou wak. Ofo ei ywaini ylon-lon man ou yto: “Nlak nna man na ko!”
33 Mde Yesus watik kat na oko wahinti kat na marok, ofo wfalik wna tofo ei yin wtefit lak ei. Mde wkatfie mak wna tofo, ofo wna mokot wadel om.
34 Ofo Yesus wgiele mse yik ago, wkein whalie om mlis kat, ofo wrana man ou wto: “Efata!” hra nai yto: “Nhak la!”
36 Yesus wojin fe man na hra yik eke wto: “Nrana amot ni ke yin na marok ei yila!” Ou wtoji wata mahin, nai yrana lis kawuak, yta kerek dait. 37 Nai yiwua main kat, yteit yrioro kat fe ni hra ei yhot. Ei yto: “Hmpai! Faf feliek fe na ou wsiok kadio kat ni ybot. Ou wsiok nai ytefit dik yoso oli ni! Ou wsiok fot nai ysami yrana oli ni!”
