Yesus Whnak Ni Eit Fe Na Hat Ribu Mewer Kat
8:1-10
(Mat. 15:32-39)
8
Tali man tali man oli fo, na marok om yka skayit-yit yse Yesus wak, kayi de ei yfe ni eit ei ydain kadio kat, ofo ei ykatot. Mde Yesus wwit fien wfe wedla ei wto,
2 “Tet tbakoko fe nai yrok kei ykatot, yibe yfe ni eit ei ydain wale. Ei yese wale amuk tolik. 3 Tet tto tbahe kat ysalit oli, ofo bo mre ytiblie yti yik fan kedi, yibe fan om mlis.”
4 Mde ou wfe wedla ei yto: “Wi kom mdomri, bo faf fkain ni eit yehin sio ma ytatol na marok kom se bo yeit kawuak de ykesit?”
5 Ofo Yesus wefitwain man ei wto: “Nan nlak roti ysa waka?”
Ei yrana hatot man ou yto: “Roti mtalak deri le mkei.”
6 Mde ou wbahe na marok om yleli yse fobi aiti, ofo wlouk roti ei, whdin man Nago, werek-arak roti ei, whnak yin wedla ei ykolao ylak tatik wat-wat yik nai ybariomo. 7 Ei yotik fot eren ywet-wat kyamre, ofo Yesus whdin oli man Nago hra watsiofo eren ei, ofo wbahe wfe wedla ei yhnak yin na marok ei yeit.
8 Nai yeit kawuak de ykesit kat, mde nai ykoyo oli ni eit yita-ta eke, mde kya mtalak yhon oli. 9 Nai yaher helwain deri na dla hra yeit ni eit eke le ma bo na hat ribu (4.000). Mde Yesus wbahe kat ei ysalit oli.
10 Ou warin tamli wse kma ale, ei yska kat kma om ysalen yein yse siwan sabarak wtato ana, wi hra nai yto Dalmanuta.
Na Farisi Ybahe Yesus Wsiok Tifi Ya Ni Owuok Mrem
8:11-13
(Mat. 16:1-4)
11 Ou wak ana fo, na Farisi yhok yka, yteik yefitwain wat-wat ni. Ei ywaini skayit-yit man ou yto: “Yo oma, nafik ni makohok mrem mabe kyat mahin yik mayehet ago man mam mhot! Nkakniet man mam se mam mnok nen nfe fle kohok om mahin Nago wak!” a
12 Mde Yesus whlein tla fle kat wto: “Hyee? Hra nan nke nwaini sawuan ni kyat makohok fe me! Mdain kat, tet trana toron tto tsiok dait kat kyat mre man nan!”
13 Ofo ou wahinti kat ei, warin oli wse kma ale, wadien wfe wedla ei yska kat oli yse kla wtato ana.
Mabe Bibit Roti Hra Na Farisi Yidien Herodes Yfem
8:14-21
(Mat. 16:5-12)
14 Mahin wedla ei ynok dait yotik roti, ha ei yotik deri mres man ei ylak mak kma mabri aiti.
15 Mde Yesus wkait wain man ei wto: “Ye! Nan nsiafolo wa bibit roti hra na Farisi yidien Herodes yfe ei bo ybet yse nan nik.” b
16 Mde ei yrana sas-sas yto: “Ou wrana fe bibit roti yibe faf fke fdain roti. Ofo faf fsiok de sie?”
17 Mahin Yesus wnok wale ni hra ei yrana ei, ofo ou wefitwain wto: “Hra nan nrana saswain yibe nan ndain roti fe me? Bo hra nan nnok dait deri ni yik nibri aiti? Afe nan nayi sros deri ma nan nnok sele-sala ni. Samodor mkaitti wale nan nsablit afe?
18 Hra nan nsifuon deri, mahin nhot dait ni? Ntefit deri, mahin noso dait ni? Hra nan nnok dait oli, c 19 kwan firi, tet terek roti yin na mahot ribu (5.000) yeit, ofo nan nhlik oli yta-yta ei yin kya waka?”
Ofo ei yto: “Kya yahar teit lak.”
20 “Yo, hra kramuk tet terek oli kdie roti mtalak ei yin na hat ribu (4.000) yeit, ofo nan nhlik oli kya waka?”
Ei yto: “Kya mtalak.”
21 Ou wto: “Ofo bo nan nke nnok dait sonat ni?”
Yesus Weren Na Wasibra Wak Betsaida
8:22-26
22 Mde Yesus wadien wfe wedla ei yhok yik Betsaida. Wak oko fo na mre yotik na wasibra ou waka wse Yesus wak, ofo ywaini se bo ou wna okot man na oko. 23 Yesus wsiokti na wasibra ou wnam, watik la yhok yse tlein, yehinti kat krotia om. Mde ou wkatfie kat na ou wsifuon ei, wlak wna man na ou wsa wto: “Nen nhot wale ni mre, afe?”
24 Na oko wsmit main mse wbariomo koit, ofo wto: “Tet thot nai yein-an, mahin ymialas-malas yde le wkoit.”
25 Yesus wlak oli wnam mak na ou wsifuon, ofo na oko wsifuon yhak, whot tkoin sros kat ni.
Petrus Wsamenie Fe Yesus Wabe Mesias
8:27-30
(Mat. 16:13-20; Luk. 9:18-21)
27 Hra oko fo Yesus wadien sisi wfe wedla ei yein yse krotia hra yitaren yse kota Kaisarea Filipi. Yik fan kedi fo, ou wefitwain man wedla ei wto: “Nai yrana yto na sio ma tet tke?”
28 Mde ei yto: “Na mre yrana yto nen nabe Yohanes Hra Wsrik Kat Nai, mre yto Elia, man kdie oli yto: ‘Hau, nabi man ou wat.’ ” d
29 Ou wefitwain oli man ei wto: “Ofo nan nke, nto de sie? Tet tabe na man sio?” Ofo Petrus wto: “Nen nke Kristus, Nago wfe Wet nen.” e f
30 Mde Yesus wtoji wkanas wto: “Nan nrana dait ni ke yin na mre kdie yila!”
Yesus Wrana Krek Mabe Nai Yska Wkak, Mahin Ou Wsidik Wron Oli
8:31 - 9:1
(Mat. 16:21-28; Luk. 9:22-27)
31 Hra oko fo, Yesus wkakniet masayen kat ni man wfe wedla ei wto: “Alkitab mrana krek kayi mto Na Tkoin Yfe Wet tet bo nai yidien sgia karmiak kat, kayi de tet tabri om mtra kamyi kat, thlet ni yalmias yrok. Basak sba nai yifle hra yslonti na sa man faf, yidien imam yifle, yidien fot guru agama ei yka ynaber kat kayi tet, ofo nai yska tet tkak. Taigi tase amuk lak, tali tolik fe fo tet tahin tsidik oli.”
32 Ni eke Yesus wrana tahak kat krek yin ei, mde Petrus wkein fien Yesus whok kat wse tlein, ofo whar kat ou wto: “Guru, nen nrana ni yde ke amot!”
33 Mahin Yesus wlelek wsmit wfe wedla ei, ofo whar kat Petrus wto: “Hei Klebet Wafleu, Na Hra Wadon Sawuan Nai, nse kat tsbiele! Nen nnok sas dait ni Nago wfe, ha nnok fe deri ni na tkoin yfe!”
34 Mde Yesus wwit na marok ei yidien wfe wedla ei yka, ofo wrana man ei wto: “Na man sio ma wto wadien tet, ofo bo wnaber kat kayi ni hra ou wbahoin ei, whlet whron kein ni yalmias mabe tet tkedim, ofo bo wkosia wkafe ou wfe wkoit skarok, ofo wadien tet la mein. g 35 Na man hra wto wkrek fe wkan whalie ou wam, basak wkan whalie om masak. Ha, na man hra wnahla kat wkan whalie om masak mabe tet tadien giet mabot kom, ou le wsifi kat wkan whalie om mron kawuak. h
36 Se na man ou wto wkain fobi katak om, mahin wkan whalie om masak, waigi, ofo wde le sie? 37 Se ni mit ma na ou wskalet mabe whalie om? Mdain! 38 Na man sio ma wto whes fe tet, wsamenie fe dait tet tkedi om man na marok hra ysiok satian, yaha kat Nago, afe whes fe tet tfe giet kom mak ei ybariomo, ofo basak Na Tkoin Yfe Wet tet le taka oli tadien fle kohok mlais kat hra tono wfe, tadien malaikat yikohok kadio, ofo tet thes fe fot kayi na oko wak tet tbariomo.”
