9
Ofo Yesus wrana oli man na marok ei wto: “Tet trana tkoin kat man nan tto, na mre yehin nan nikan hra nkro nik kei, neigi dait latiot fo, bo nhot krek wale Kerajaan Nago Wfem mhok maka madien ou wfe fle kohok om.”
Nago Wyen Krek Yesus Wfe Fle Kohok Om
9:2-13
(Mat. 17:1-13; Luk. 9:28-36)
2 Amuk mtamre oli fo, Yesus wti kein Petrus, Yakobus yidien Yohanes, ei yein sisi yhri yse sfa wakaslok wasa ago. Ei ymre deri yik sfa wasa, mde yiwua fe fo, yhot ro kat Yesus wkan om mbahlia msi wat, fe hra fle kohok om mhoborti ou wak ei ybariomo. a
3 Ou wfe not trik ei yelek ytfel yfsien kat. Yik fobi katak ko, na mre ysiok dait not trik mrei hra yelek ytfel yfsien yde ke. 4 Mde ei yhot ro kat fo, ybiti ybla Musa wadien Elia, hra yibe nabi yidien kamuolo kat, la yikan lak ei ysadir yidien Yesus.
5 Ofo Petrus wto man Yesus wto: “Guru, mabot karmiak kat mam mik ko. Nto naisi fo, mam msiok bol dik tolik yin nan - mre man nen, mre man Musa, mre oli man Elia.” 6 Ou wrana sak-sak deri ni, fe hra ei yeliek karmiak kat.
7 Mde, yik sakait om mhok maka, mhoborti ei, ofo yoso ro kat salo mhok mahin yik sakait om mto: “Wet tet tfe le wko. Tet tten tkaso man ou. Mde ke fo, nan noso kmiet man ou!” b
8 Mde ei yrioro ysmit saswain frit-frat ei, fe Musa wadien Elia ysiet wale, yik dait oli oko, ha Yesus wmres deri waheit.
9 Mde ei ysiolok oli yehin sfa wasa ago, ofo ou wkait wain tiwain man ei wto: “Ye! Ni kadio hra nan nhot yidien hra ke ei yibe khan, nan nrana wain dait yin na mre yila! Basak sba, Na Tkoin Yfe Wet tet taigi, tsidik oli, ofo nan niheit nrana wain.”
10 Mahin ei ykahiowain kat, ofo ei yrana saswain oli fe ni hra Yesus wto skatoin yin ei, yto: “Ni mit ma hra mtatol mabe ou wto waigi mahin ou wsidik oli?”
11 Mde ei yefitwain man ou yto: “Hra guru agama ei yrana yto Nabi Elia waka whok walin kein kayi, sba se Nago Wfe Wet, na wafle ou, whok waka?” c
12 Yesus wto: “Yo, Elia whok walin kein amo, wabe wkoyo nai, wkororo ei ysalit oli yse Nago wak. Mahin nan nnok dait sonat Alkitab mrana fe Na Tkoin Yfe Wet ou mto nai bo yaha kat, yidien sgia karmiak kat ou, kayi de ou whlet ni yalmias yrok. 13 Yo, trana toron man nan tto, Elia waka wale, mahin ei ysiok ni ysgia yin ou, ytatol yidien ysablit ysgia, mde le hra Alkitab mrana fe ou.”
Yesus Wwain Kat Klebet Wahinti Kat Wet Wasami
9:14-29
(Mat. 17:14-21; Luk. 9:37-43)
14 Yesus wadien Petrus, Yakobus, Yohanes, ysiolok ysalit oli yse yanak wedla man ei yik. Yhok latiot fo, yhot afat na marok kamyi kat om, yidien yfe guru agama ei, ykro safik, ykohli kat yanak man hra yiheit ei. Guru agama ei yhoyok yidien Yesus wfe wedla man ei. 15 Na marok om mto yhot afat Yesus whok kmo fo, ei yrioro fe ou, ofo ysese ylia kein ou.
16 Mde Yesus wefitwain man wfe wedla ei wto: “Ni mit ma mfe nan nheden nidien ei?”
17 Ofo na dla mre wrana wto: “Guru, tet tatik tfe wet ko waka wse nen nak, wabe klebet wfla sawuan ou, wolot fe ou wsami. 18 Klebet ou wsiok ta-ta kawuak ou, wkositi wti wtakbirin-baran wse fobi aiti, wgiet fis-fas, whek ykabrere, wkan om mdrot, wtmer kat. Tet twaini man nfe wedla ei tto ywain kat. Ei yweyen hewain, mahin wdain dait.”
19 Mde Yesus whar kat ei kadio yidien fot wfe wedla ei wto: “Hra nan nke naha ntik dait nkaso man Nago wabe! Waka ma tet taheit oli tadien nan? Waka ma tluwa oli tadien nan? Natik la wet ou waka!”
20 Ofo ei yotik wet ou waka wse Yesus wak. Klebet wto whot Yesus, ofo ou wkowirit-warat wet ou, wti basadit-sadat wlilik wak fobi aiti, wgiet fis-fas.
21 Mde Yesus wefitwain man wet ou wono wto: “Wet oko wkain ni kom mase wale waka?” Mde wono wto: “Ou wkain ni kom madien wale kamuolo wwet. 22 Klebet ko wsiok sgia ta-ta ou, wklat kat wse sala, wklat kat wse kla, wto wsiok kat wkak. Mahin nto nen nkanas sok, ofo nmro fe ou, neren mam!”
23 Mahin Yesus wto: “Hra nen nto tet tkanas dait de sie? Ni ysres kadio kat man na hra ynok yten ykaso mse Nago wak!”
24 De, wono wto ro kat wto: “Tet tnok nen nkanas mewer kat nsiok ni kom, mahin tet tsalolo latiot, tharfe dait oko. Nkororo tet, se bo tet tnok tmol mowuo mse nen nak!”
25 Yesus wsmit fo, na marok ei ysese ykro ykohli safik kat, ofo ou wsalo mkanas whar kat klebet ou wto: “Hee, klebet man hra nsiok nai ysanet ytefit dik nen, tet tbahe nen nhok kat, nahinti kat wet kou! Nain kawuak, naka nsiok oli dait ou!”
26 Mde klebet ou wkader karmiak, wkowirit-warat wet oko, ofo whokti kat. Ha, wet ou wbries wtono kat wde le na waigi. Na marok ysmit fo yto: “Hyee, wet ou waigi wale!”
28 Yesus wtrik oli wak bol mabri ofo, wfe wedla ei yefitwain hlok man ou yto: “Hra mam mwain kat dait klebet ou wabe?”
29 Ofo Yesus wto: “Klebet wat man kou, nai ywain kat tkoin dait, ha nai ysikafit sok.”
Yesus Wrana Krek Oli Mabe Nai Yska Wkak
9:30-32
(Mat. 17:22-23; Luk. 9:43-45)
30 Mde Yesus wadien wedla ei yehinti kat wi okom, yein sros yewer kat fobi Galilea. Yesus waha nai ynok yto ou wak oko,
31 wabe ou wkakniet tiwain deri ni man wfe wedla ei. Ou wrana wto: “Na Tkoin Yfe Wet tet, basak nai ybaret lolot tet, yhnak tse kaisin yik, yibe yska tet. Mahin amuk tolik oli fo, tet tahin tsidik, tron oli.” 32 Ei ynok dait ni hra ou wrana ekei, mahin ei yeliek yefitwain oli dait ni eke yin ou.
Na Sio Ma Wabe Na Wafle Ou?
9:33-37
(Mat. 18:1-5; Luk. 9:46-48)
33 Ei yhok yik Kapernaum, ytrik yse bol mabri fo, Yesus wefitwain man ei wto: “Hra ke nan nik fan kedi ale, nheden mawain-wan fe ni mit ma ei?”
35 Oko fo, Yesus wleli, wwit yikan yahar teit lak ei yka, wto man ei wto: “Hra nan nkesik yaka nibe na wafle buon fe me? Yo, nen nto nkesik yaka nabe nalin, bo nain heles, nabe deri na dihan nan na marok!” e
36 Mde Yesus wna fien wet sdeik mre ou waka wkro wak ei ybariomo bri aiti. Ou wkamti wet ou, wde wto man wfe wedla ei wto,
37 “Na man hra watik kein wet ysdeik hra yde ke ei, fe tet tkedim, na ou watik kein fot tet. Ofo na hra watik kein tet, ou watik kein tet tmres dait - yo, ou watik kein fot na hra wbahe tet ou.” f
Na Man Hra Whar Kat Dait Faf, Ofo Wadien Sisi Amo Faf
9:38-41
(Luk. 9:49-50)
38 Mde Yohanes wrana man Yesus wto: “Guru, mam mhot na mre wwain kat klebet, wwain kat ei yidien nen nkedi om. Ofo mam mhar kat ou wabe faf fikan fi sisi dait.”
39 Mahin Yesus wto: “Nan nhar kat wabe? Wak wata! Na man hra wafik ni maowuok, mais fe wwit tet tkedim, bo na oko wrana sgia dait tet tkedim. 40 Na man hra oko whar kat dait faf, ofo na oko watik kein kayi faf, wti wse faf fik, faf fikan fi. g 41 Tet trana tkoin man nan, na man hra wto wdihan nai yibe tet tkedim, whnak kla farok mres man nan nokom, fe hra nan nidien Kristus, ofo ou wfe ni tasa yisak dait, basak ou wwien fien.” h
Na Hra Wkakniet Nai Ysiok Satian
9:42-50
(Mat. 18:6-9; Luk. 17:1-2)
42 “Na mre wto wkakniet satian yin wet ysdeik hra ynok mse tet tak, mto mde ke fo, mabot ma nai ykait amak sakro mak wdioro, yklat kat wsi wse siwan wabri ale. 43 Nto nna mrem molot fe nen natik satian, ofo nehir kat! Mabot ma nen nadien nna sabris nloit nse Wi Maron. Yo mto mdain fo, bo nen nadien nkan mowuo nain deri nse neraka. i 44 (‘Mak wi okom friwe ykak dait, madien fot sala om maigi dait.’) 45 Nto nteit mrem molot fe nen natik satian, ofo nehir kat! Mabot ma nen nadien nteit sadmik nloit nse Wi Maron. Yo mdain fo, Nago wklat kat nen nadien nkan mowuo nti nse neraka. 46 (‘Mak wi okom friwe ykak dait. Salam maigi dait.’) 47 Nto nsifuon mtatom molot fe satian man nen, ofo nska kalak kat! Mabot ma nen nadien nsi tato kawuak ntrik nse Kerajaan Nago Wfe. Yo, mdain fo, Nago wklat kat nen nadien nsifuon yowuo nti nse neraka. j
48 ‘Mak wi okom friwe ykak dait
madien salam maigi dait.’ k
49 Basak Nago wto wbatweit sala fe na kadio kat, mde le nai ybariot sira yin ni eit.
50 Sira om mbot, mahin nto mwas sgia wale, ofo bo nai ysiok oli mwas misin mde sie? Okom msgia kawuak wale! Mto mde ke fo, nan nibe kayi nde le sira nik nibri, se bo nan nble nbot, man ei yidien man ei.” l