Nai Yaha Kat Dait Ysmian Ei Yila
10:1-12
(Mat. 19:1-9)
10
Mde Yesus wahinti kat wi okom, wain wse fobi Yudea, ofo wfoto wse wi kla Yordan wtato ana. Yik wanik oko, nai yrok yka ykohli ou. Ofo ou wrana giet man ei, mde kayi le hra wrana lokdi sawuan om.
2 Na Farisi mre yka yto ywien kein Yesus. Ofo ei yefitwain man ou yto: “Bo na smian mre waha kat sadik wsmian om, afe Alkitab mrana mto de sie?”
3 Ofo Yesus wto: “Faf fbiti Musa wbahe man nan mde le sie?”
4 Ofo ei yto: “Kamuolo Musa wto na man ou, wto waha kat wsmian om, ofo wsroin katik fari man om mabe ou waha kat om, wbahe om mhok kat.” a
5 Mde Yesus wrana man ei wto: “Musa wsroin ni bahe kom man nan, fe deri nan nibri mdrot karmiak kat eke. 6 Mahin kamuolo kat, yidien masayen om, Nago wsiok fobi kom, ofo wsiok na tkoin lak ei: ‘man ou wabe na dla, man om mabe na dli.’ b 7 ‘Mde hra eke fo, na dla ou wahinti kat wono wemem, wbalifis wadien wsmian om, la yife mres, 8 se bo la yikan lak ei yibe deri ykan mres.’ c Ofo ei yibe oli dait na lak, ei yife mres deri. 9 Mde ke fo, ni hra Nago wkaitti-ti wale yife mres, ofo na mre ykohriak kat dait yila.”
10 Ei yto yhok ytrik yse bol, ofo ou wfe wedla ei yefitwain oli ni ke yin Yesus. 11 Ofo ou wrana man ei wto: “Na dla man hra waha kat wsmian om, ofo wsmian wat na dli mrem, ou eke wamir kat wsmian hra masayen om. d 12 Mde fot le, na dli man hra maha kat msmian ou, ofo msmian wat na dla mreu, mto msiok mde ke fo, om mamir kat msmian wasayen ou.”
Yesus Whnak Fle Fe Wet
10:13-16
(Mat. 19:13-15; Luk. 18:15-17)
13 Mde nai yidien twa wet sdeik ei yka yse Yesus wak, se bo wlak wna man ei. Mahin Yesus wfe wedla ei ytrere, yhar kat na eke.
14 Yesus wsmit ni ke, mde ou wtrere ei karmiak kat wto: “Ndiewain deri wet eke yka yse tet tak. Nhar kat amo ei yila! Fe na hra yde ke le ma ykain Kerajaan Nago Wfem. 15 Tet trana tkoin man nan tto, na man sie ma watik kein dait Kerajaan Nago Wfem mde hra wet sdeik ei, ofo ou wtrik dait.” e 16 Mde ou wkamti wet ei, wlak wna yin ei, whnak fle fe ei.
Na Kohok Ykahiowain Kat Yloit Yse Wi Maron Om
10:17-27
(Mat. 19:16-26; Luk. 18:18-27)
17 Yesus wto wain kein kdie oli fo, na dla mre wsese korwain, whok waka, wti wbatoko teit wak Yesus wbariomo. Ofo wto: “Tfe guru wabot nen, ni mit ma tet tsiok se bo basak Nago whnak mabe tet tron lis kawuak?”
18 Ofo Yesus wto: “Hra nen nto tet tbot fe me? Na mres deri hra wabot, o le ma Nago. 19 Nen nnok wale ni hra Nago wtoji, mde hra nska amot na, namir sgia amot na, nasliak amot ni, nadon na amot, nlolot na amot, nhdin, nbakoko, nmro fe nono neme!” f
20 Mde na hra oko wto man ou wto: “Guru, ni hra eke tet tsiok kadio kat wale yidien kamuolo twedla latiot kawuak de hra ko.”
21 Mahin Yesus wlelek wsmit ou, wmro fe ou, ofo wto man ou wto: “Ni mre latiot hra nen nsiok dait sonat. Nsalit nak bol, nsafo nfe hrien kadio kat ei, pitis yka fo, nhnak man na hra ydain hrien, ofo naka, nadien tet faf fein. Nto nsiok mde ke fo, nen nkohok kayi nak Wi Maron om.”
22 Ou wto woso ni ke fo, wabri om msgia kat, ofo wsalit oli, wkan om mrwe kat fe hrien ou wa hra warok ou.
23 Ofo Yesus wsmit sas-sas wkohli-hla ei, de wto: “Mkahiowain kat fe na wakohok wloit wse Kerajaan Nago Wfem!”
24 Ou wfe wedla ei ykan tmayes kat fe ni hra Yesus wrana ei. Mahin Yesus wrana sba oli wto: “Nai yloit yse Nago Wfe Kerajaan om, ofo mkahiowain kat kayi! 25 Tto unta ou wloit sros wse egien wtayi, mseme mewer kat na hra ykain hrien warok yloit yse Kerajaan Nago Wfem.”
26 Yoso mde ke fo, wedla ei yrioro karmiak kat. Mde man ou wto man ei wto: “Eh! Mto mde ke fo, bo na sio ma Nago wsigi wloit wse Wi Maron?”
27 Yesus wsmit ei, de wto: “Man na tkoin fo, ni kom mkahiowain karmiak kat, ha man Nago fo, ni mre mkahiowain dait. Ou sok wsiok kadio kat ni yibot.”
Ni Tasa Mabe Yidien Yesus
10:28-31
(Mat. 19:27-30; Luk. 18:28-30)
28 Mahin Petrus wrana man ou wto: “Mam mehinti kat wale ni kadio kat fe hra mam midien nen!”
29 Mahin Yesus wrana hatot oli man ei wto: “Tet trana toron man nan tto, na man hra wahinti kat bol ou wa, waliwet wai, wahano mai, weme wono wai, wfe wet wai, afe biele ei, fe hra wadien tet wrana fe giet mabot kom, 30 ofo Nago wadien hra ko wto wdan fali ni eke mao na mahot yeigi fe oli yin na ou: bol ei, waliwet ei, wahano ei, weme ei, wfe wet ei, biele ei, yidien fot na marok hra yidien sgia ou. O le ma basak dian kat, Nago whnak ou wron lis kawuak, wloit wse Wi Maron om. 31 Ha, na marok hra yelin eke, bo yibe oli na hra yein heles. Yo, na hra yein heles eke, le bo yibe na hra yelin.” g
Yesus Wrana Krek Mau Tolik Fe Mabe Bo Wkak Ofo Wsidik Oli
10:32-34
(Mat. 20:17-19; Luk. 18:31-34)
32 Yesus wadien wfe na dla yein kein kdie fan yse Yerusalem. Yesus o le ma walin, ofo wfe wedla ei yrioro fe ou. [Yto: “Hmpai! Ou wti kein mam mein sros mse kaisin yik!”] Na wat hra yidien yein ei yeliek kat. Yik fan kedi fo, ou wrana krek yin wedla yikan yahar teit lak ei yibe ni hra bo yka yhok fe ou wak.
33 Ou wto: “Hra ko, faf fhri fein fse Yerusalem. Fik ra fo, Na Tkoin Yfe Wet tet, bo nai ybaret lolot, yhnak tse imam yifle yidien guru agama ei yik. Ofo ei ykait hene yto nai yska tet tkak, ofo yhnak tet tse na sa wat hra ynok dait Nago.
34 Mde, na eke ytbekein tet, ykatfie kat, ybahrabat, ofo nai yska tet tkak. Amuk tolik oli fo, tsidik tahin oli.”
Yakobus Wadien Yohanes La Ywaini Yibe Na Yfle
10:35-45
(Mat. 20:20-28)
35 Mde Yakobus wadien Yohanes, Zebedeus wfe wet ei, yka yto man ou yto: “Guru, la mam meisi nen nto kein ni hra mam mwaini yin nen!”
36 Ou wto man ei wto: “Nan neisi tet thnak ni mit ma yin la nan om?”
37 Mde lai yto: “Basak sba, nen nabe Raja nadien fle kohok, ofo nhnak fle fe fot la mam se bo la mleli mlolowain nen, mre wse nna tkoin, mre wse nna wait.”
38 Mde Yesus wto oli man ei wto: “La nan nnok dait ni hra la nan nwaini om. Nto de sie - la nan nto noko fot sadik met hra bo tet tako om? La nan nto nloit fot sadik baptisan hra bo tet tloit om?” h
39 Ofo ei yto: “Yo, la mam mkanas kahet!” Yesus wto oli man ei wto: “Met hra bo tet tako om mhon madien ni malais kat. Yo, basak la nan noko kayi fot mahin met okom, la nan nloit fot amo nse baptisan kafir fle hra bo tet tloit om. 40 Mahin ni hra mabe nleli nse tna tkoin, nleli nse tna wait, tet thnak sayi dait man la nan, ha Nago deri sok. Basak fo, ou whnak wi okom man tiktol deri na hra ou wlouk helwain wale.”
41 Wedla yahar ei yoso fe ni okom, ofo ei ytrere man Yakobus wadien Yohanes. 42 Mahin Yesus wwit fien ei wto: “Nan nka! Nan nnok wale na hra yfle yik fobi katak kom ysiokti ei yfe na marok yidien yna madrot. Ei yfe na lolowain ysiokti fot mde le ke. i 43 Mahin ni kom man dait nan! Na hra wto wabe na wafle, bo wabe la na dihan wan nan. j 44 Bo na man sie ma wto wabe walin wan nan, bo ou wabe la kawor wan nan nikan kadio kat. 45 Fe hra Na Tkoin Yfe Wet tet taka dait tabe nai ydihan tet, ha tet taka tabe deri tdihan nai, thnak thalie okom, tskalofos fien na marok.”
Yesus Weren Bartimeus Whot Sros Kat Ni
10:46-52
(Mat. 20:29-34; Luk. 18:35-43)
46 Mde Yesus wadien wfe wedla ei yhok yik Yerikho. Ei yto yein kein kdie oli, yhokti kat kota, ofo na marok ei yein sisi yidien ei, ykafreyit-yat. Na sibra mreu wleli wak fan mtefit, wwaini sawuan pitis. Wkedi le Bartimeus, Timeus wfe wet ou.
47 Wto woso ro kat fo, Yesus na Nazaret le waka ou, ofo ou wkader kohok wto: “Yesus, Daud Wfe Wet nen, nmro fe tet!”
48 Na marok yhowa kat yto: “Hai! Nsatmor kat!” Yto yde ke fo, se wsalo mfle karmiak kat wkar kohok oli wto: “Yesus, Daud Wfe Wet nen, nbakoko fe tet!”
49 Mde Yesus wkro satna wak fan kedi, wbahe wto: “Nwit la ou!” Mde ei ywit na sibra ou yto: “Nahin nkro! Nkashok fe ou wwit nen!” 50 Mde ou wklat kat wfe not kabor om, wsidik wkaprsat, wain wse Yesus wak.
51 Yesus wefitwain man ou wto: “Nen naisi tet tsiok ni mit ma man nen om?”
Mde na sibra ou wto: “Nai fe nau Guru, tet taisi thot ni!”
52 Mde Yesus wto: “Nain, nen ndain wale fe hra nen nnok tmol mse tet tak. Nfe iman om meren wale nen.” Madien hra oko, ou whot sros kat ni, ofo wadien Yesus wai yein.
