Nai Ylia Kein Yesus Whok Wse Yerusalem
11:1-11
(Mat. 21:1-9; Luk. 19:28-38; Yoh. 12:12-15)
11
Yesus wadien wfe wedla ei yik fan kedi, yhok dait latiot yse kota Yerusalem. Ei yhri latiot yik Riere Zaitun wkedi, yitaren wale yse Betfage wadien Betania, krotia lak hra yik riere wkedi. Mde Yesus wbahe wfe wedla lak ei wto,
2 “La nein firi nse krotia wawet hra nan nbariomo koit. Ntrik kmo nse ana, ofo la nan nhok ntatol nin keledai wamor hra nai ysofotti wak oko. Keledai oko na mre yorin dait latiot. Ntli kat keledai oko, ofo nwien fien waka wse tet tak. 3 Yo, nto noso na mre yefitwain yin nan yto: ‘Hra nan nsiok ni nde ke fe me?’ ofo nto: ‘Tuhan wto warin la ou. Wdain fo, waka wsalit oli wse nan nik.’ ”
4 Ofo la yikan lak ei yein ytatiere fe keledai wamor wak fan mtefit, hra nai ysofotti wak bol magiet, ofo la ytli kat.
5 Mde na mrei hra ykro yik le oko yto man ei yto: “He! La nan nsiok ni mit ma eke? Hra la nan ntli kat keledai oko wabe?” 6 Ofo la yrana hatot ni mde le Yesus wrana om, ofo nai eke ysamenie fe ei ysiok wata. 7 Mde ei ysalit oli, ywien fien keledai oko, yein yse Yesus wak. Ei ykohla kat yfe not lis jubah hra ei yimbombal yka, ofo ylak yuwas yin keledai wsbiele ago, ofo Yesus warin wleli wak ago. 8 Na marok om ysni barere yfe not jubah yik fan mabri om, ylia kein ou. Na mre ysni fot wkoit yma ylas hra ei ysat yehin biele hra yik fan tefit.
“Ahe! Hosana we! Mam mfe na ou we!”
“Mam msrar kein nen, na hra waka fe Tuhan wkedi nen! b a
10 Mam mlia kein kerajaan hra nen natik le mkom
– kerajaan hra Nago wkadoin krek yidien kamuolo kat man faf fbiti Daud! c
Ahe! Hosana wak Wi Mayehet!”
11 Yesus whok wak Yerusalem, ofo wtrik wse Nago wfe bol kohok mklik om, wahenek deri ni, mahin ou whok kat oli, ofo wadien wfe wedla yikan yahar teit lak ei yein sisi ysalit oli yse Betania, wa mkdia amuk.
Yesus Wfruo Kat Wkoit Ara
11:12-14
(Mat. 21:18-19)
12 Yehin uwade fo, Yesus wadien wfe wedla yikan yahar teit lak ei yehinti kat Betania, ysalit oli yse Yerusalem. Yik fan mkedi fo, Yesus wkaso mtoro.
13 Wak afat ana, whana fo wkoit ara mdiamri kat, mde ou wain wtatol wse wkoit om molo, yibe whot walbat mkan mre. Mahin mdain, mlas sawuan deri, yibe tolo les wkan dait latiot. 14 Mde ou wto man wkoit molo om wto: “Foo! Bo na mre yeit oli dait nkan mrem!” Mde ou wfe wedla ei yoso ni okom.
Yesus Wwain Kat Na Ysafo Ni Yehinti Kat Bol Kohok Nago Wfem
11:15-19
(Mat. 21:12-13; Luk. 19:45-48; Yoh. 2:13-16)
15 Ofo Yesus wadien wfe wedla ei ytrik oli yse Yerusalem. Ou wto whok wak Nago wfe bol kohok, ofo wwain kat na kadio kat hra ysafo ykain ni yik bol kohok mklik okom. Ou wbafelek kat meja hra nai yskaleis pitis, yidien fot bangku hra nai ysafo klen okles.
16 Ou wtoji kat na mre ykafe ni safo yein fe dait bol kohok mklik. 17 Mde ou wojin man ei wto: “Noso wain! Alkitab mrana mto:
‘Tet tfe bol kom nai ywit mabe
Bol Sikafit Man Na Sa kadio.’
Mahin nan nke nhar kat kohok, nsiok sgia bol kom mabe deri wi nai yabin kerek ni!”d
18 Imam yifle yidien guru agama ei, yto yoso ni hra oko fo, ysin ytik lolot, yto yska kat ou, fe hra ei yelieksi ou wabe na marok om ysikarioro fe ni hra ou wkakniet man ei.
19 Wi mbasoin-san fo, Yesus wadien wfe wedla ei yhok yehinti kat oli kota okom.
Wkoit Ara Mslo - Ojin Mabe Nai Ysikafit
11:20-26
(Mat. 21:20-22)
20 Uwade kat fo, Yesus wadien wedla ei yto ysalit oli yse kota, yein yslili kat fe wkoit ara molo om, ysmit fo wkoit om mslo kayi de mteit aiti.
21 Mde Petrus wnok tmol oli fo, wrana man Yesus wto: “Guru, nhot la! Wkoit ara hra nen nfruo kat o le mslo wale angkom!”
22 Ofo Yesus wrana hatot man ei wto: “Nnok tmol mse Nago wak! 23 Tet trana tkoin man nan tto, na man sio ma wbahe man sfa ko wto: ‘Nkatrie! Nklat kat nse siwan wabri ale!’ Na man ou wto wabri mkahiowain dait, worsfe ni hra ou wwaini ei bo yhok ytatol, ofo Nago wsiok ni eke ysres yin ou. e
24 Hra oko le ma tet trana man nan tto, ni kadio hra nan nwaini yidien nsikafit, ofo norsfe wa nwien fien wale, ofo Nago whnak ni ke yin nan. 25 Nan nto nehin nkro nsikafit, mahin nen ntadrot sonat nan na man ou, ofo nbakoko fe na ou, nbaret keben wata ou wfe satian ei, se bo nan nbot-bot oli. Oko fo, Nono wak wi mayehet ago wbaret keben fot nen nfe satian ei.” f 26 (“Mahin nto ntadrot kawuak, nbaret keben dait na ou, ofo bo Nono wak wi mayehet wbaret keben fot dait nen nfe satian ei.”)
Yesus Wfe Fle Kohok Om Mahin Sio?
11:27-33
(Mat. 21:23-27; Luk. 20:1-8)
27 Mde Yesus wadien wfe wedla ei yhok oli yik Yerusalem. Hra oko fo, Yesus wain fe bol kohok om mklik, ofo imam yifle yidien guru agama yidien fot nai yifle hra yslonti na sa Yahudi ei, yka yhok yse Yesus wak.
28 Ofo ei yefitwain man ou yto: “Nen nadien buon fle kohok mit ma hra nsiok ni mde ke? Na sio ma whnak fle kohok kom man nen nwain kat nai yehin wi kom?”
29 Ofo Yesus wto man ei wto: “Tet tefitwain skadelek lalie man nan. Nan nrana hatot man tet, se bo tet trana hatot fot man nan mabe tfe fle kohok om tkain mahin sio. 30 Yohanes wsrik kat na - ou wsiok ni kom wadien fle kohok Nago wfem afe, wadien deri fle kohok na tkoin yfem? Nrana la man tet!”
31 Mde ei yikan ei ysadir saswain yto: “Bo faf fto: ‘Mahin Nago,’ ofo bo wefitwain oli wto: ‘Hra nan noso kmiet dait ou wabe?’
32 Mahin, bo faf fto: ‘Mahin na tkoin’... ofo faf de sie? Faf fibri madrat!” (Ei yelieksi na marok ei ytrere yidien ei, fe hra na marok ei ynok kadio kat Yohanes wabe nabi watoron kat.)
33 Mde ei yto man Yesus yto: “Mam mnok dait.”
Ofo Yesus wrana fot man ei wto: “Mto mde ke fo, tet trana tahak dait fot man nan tet tfe fle kohok om.”
