Flet Fe Biele Anggur Mabe Na Tmak Ysin Fe Yska Ou
12:1-12
(Mat. 21:33-46; Luk. 20:9-19)
12
Mde Yesus wteik wrana flet mre yin ei wto: “Na mreu wago biele anggur, ofo ou wdehe wkohli kat. Ofo wkak wi mkalolik, wsiok bak maflem mabe nai ysafik tra anggur ykan ei se bo mklam mhok. Mde ou wsiok bol kalit mabe nai yese barnia biele ou. Mfot fo, ou worsfe biele oko wan na hra yeisi, ysamenie fe yiheit yogo ou, wto basak sba, biele wkanas fo, ou waka wkoriet mre yin ou. Mde ou wahinti kat wi okom, wain wat wse fobi wat.a
2 Wak ana fo, ou wleli kein kawuak mde tolo les anggur ei ykan, ofo wbahe wfe na dihan man ou wain whok wse biele ou wa, hra ou worsfe nai yiheit ysiok oko, mabe ei ykoriet wat anggur mkla mre yin ou, ei ykain wat mre. 3 Mahin ei yslon na dihan ou, waka ybau, ofo ybahe kat ou wsalit slok oli.
4 Mde na wafleu wbahe oli kdie na dihan mreu wain oli wse ei yik. Na oko ei yba wsa om mklis, ysiok sgia ou, ofo ywain kat wsalit oli. 5 Mde ou wbahe oli kdie na dihan wat man ou, mahin ei yska ou wkak. Mde le eke ei ysiok sgia ta-ta ou wfe na dihan yrok ei, yska mre, yba mre, kawuak de yfot.
6 Hra waheit ko fo, na wmres deri - ou wfe wet walolon hra ou wten wkaso man ou. Mde ou wbahe wfe wet ou wain wse ei yik, fe wto: ‘Bo ei ysaesik yoso kmiet kayi man tfe wet ou!’
7 Mahin na man ou wrana man ei wto: ‘Na hra wkain biele ou wfe wet o le ma whok waka ou. Basak ou le wdanhok wono waheit wkain kawuak. Nan nka, faf fska wata ou, ofo faf fiheit fkain kawuak wfe biele ko!’
9 Mde, na wafle hra wkain biele anggur oko, bo wsiok ni mit ma om? Bo ou waka wska kayi ei yikan kadio kat, ofo whnak man na wat yka ydanhok ei.
‘Amak man hra nai ysiok lokdi bol yklat kat mse tlein,
ou le ma Nago wwien fien oli maka, wlak mabe amak sniyiti om.b
11 Tuhan Nago le ma wsiok ni owuok okom,
ofo mam msikarioro mhot ni kom mhok kmo man mam.’ ”
12 Mde na mafle ei yswin yto yslon Yesus, mabe ynok wale ou wrana flet om mtatol man ei. Mahin ei yeliek na marok okom, ofo ei yein, yehinti kat deri ou.
Nai Yklat Kayi Pajak, Afe Mdain?
12:13-17
(Mat. 22:15-22; Luk. 20:20-26)
13 Ofo ei ybahe na mre yehin Farisi, yidien na mre yehin Raja Herodes ei yka yse Yesus wak, yibe yefitwain ywien kein ou.
14 Na eke yka yto man ou yto: “Nai fe nau Guru nen, mam mnok nen nsayirin, nabe na wabot. Nen nliokeit dait na mre ykowawo nen. Nen naliaksi dait na hra nen nrana tahak ni ytatol yin ei. Ha, nen nkakniet toron kat fan Nago wfem. Nai fe nau, nrana hatot nto, Nago wbahe wto de sie? Nai yklat kayi pajak main mse Kaisar, Raja Wafle ou wak, afe mdain? Nto bo mam mklat fot, afe mdain?” 15 Mahin Yesus wnok wale ei ywien kein ou, ofo wto man ei wto: “Hra nan nwien kein tet fe me? Nwien fien la pitis kdois dinar perak mres, notik maka man tet tsmit!” 16 Ofo ei yotik maka, yade man ou wslon. Ofo ou wefitwain man ei wto: “Nai ybatbak na sio ma hra ko? Na sio ma wsroin wkedi mak ko?”
Ofo ei yto: “Kaisar le wko!”
17 Ofo Yesus wrana man ei wto: “Nhnak man Kaisar ni hra Kaisar wfem. Nhnak fot man Nago ni hra Nago wfem.”
Mde ei yteit rioro, yiwua main kat fe ou.
Na Saduki Ykaf Kesik Yto Na Yeigi Ysidik Oli Dait
12:18-27
(Mat. 22:23-33; Luk. 20:27-40)
18 Mde na Saduki yka yse Yesus wak. (Na Saduki yrana deri yto na hra yeigi ei ysidik oli dait.) Ofo ei yefitwain wien kein man ou yto,c
19 “Nai fe na Guru nen, yidien kamuolo Musa wsroin ojin man na sa Israel mam wto: ‘Na dla mreu hra wkafe dait latiot wet, wto waigi fo, wamon man ou afe, waliwet man ou afe, waheit wlouk oli wkobon semit om man wsmian, se bo wkafe wet ou waka, wtrik wabe eigi wfe wet, ofo na sa man ou wkedi om main kawuak.’ Yo, Musa wsroin wde le ke, mahin noso la ni hra mam mrana kom.d 20 Mde le ke, na mre hra waliwet mtamre, ou wsmian, mde waigi omuok, mahin wkafe dait wet. 21 Ofo waliwet ou wlouk wkobon man wsmian, mahin ou waigi fot, wkafe dait wet. Waliwet man kdie oli fo wlouk oli wkobon om, mahin waigi wkafe dait fot wet. 22 Mde fot yikan mtamre ei ysmian kein-kein ykobon om, mahin yeigi kadio kat, ykafe dait wet. Mde na dli okom maigi kahlia kat. 23 Mto mde ke fo, basak nai yeigi ysidik oli fo, bo na sie ma ysmian oli om? Fe le hra ei yikan mtalak ei ysmian kadio kat wale om!”
24 Mde Yesus whlein wto: “Hyee, hra na sanet nan nnok sele kat buon ni nde ke fe me? Nan nnok dait Alkitab, nan nnok dait fot Nago wfe fle kohok om! 25 Hra basak nai yeigi ysidik oli fo, ei ysmian oli dait, ha ei yron yde le malaikat Nago wfe hra yik Wi Mayehet. 26 Mde le hra nai yeigi ysidik oli fo, hra nan nbaca latiot mahin katik fari Musa wfem, mabe ni rana wain fe sala mdhen mhok mahin wi masari, mahin wi om mat dait, ofo Nago wrana man Musa fe ou wbiti wbla hra yeigi yelin wto: ‘Tet le tabe Nago Abraham wfeu, tabe Nago Ishak wfeu, tabe fot Nago Yakub wfeu.’e 27 Mto mde ke fo, Nago wabe dait Nago hra nai yeigi yfe, ha ou wabe deri Nago nai yiron yfeu. Nan nke nrana nto nai yeigi ysidik oli dait, ofo nan nmorait sonat. Nan nrana ni ysgia, ytatol dait!”
Ni Bahe Hra Mrnin Kat
12:28-34
(Mat. 22:34-40; Luk. 10:25-28)
28 Ofo na guru agama man ou woso kein na Saduki ysadir fe ni kom yidien Yesus. Woso fo Yesus wrana ni mtatol man ei, ofo wefitwain man Yesus wto: “Nai fe na Guru nen, nto de sie? Mahin Nago wfe ni bahe warok ei, ni bahe mit ma hra mrnin kat man faf foso kmiet?”
29 Mde Yesus wrana man ou wto: “Ni bahe hra mrnin mewer kat o le hra kom: ‘Na sa Israel nan, noso kmiet. Tuhan Nago faf fi ou wmres deri.f 30 Nmro fe nen nfe Tuhan Nago nadien nabri om mowuo kat, nadien nhalie mowuo kat, nadien nsablit mowuo kat, nadien fot nkan om mowuo kat, ntrein nsiok ni man ou.’ 31 Ni bahe hra mao lak fe kdie le mkom: ‘Nmro fe nable man ei mde fot le nen nmro fe na mna nen.’ Ni bahe lak ei yfle yewer kat yehin ni bahe warok kadio.”g
32 Mde guru agama ou wrana wto: “Nai fe na Guru, nen nrana ni mtatol kamyi kat mabe Nago wmres deri. Nago mre wat oli dait.h
33 Nai yto ymro fe Nago yidien yibri, yhalie, ysablit, ykan ei yowuo kat, ytrein ysiok ni kadio, yidien fot ei ymro fe yible na marok ei mde fot le ei ymro fe na mna ei – ni bahe lak eke ykaslok yewer kat yehin nai ysanfe erwas yidien adit ni yrok yein yse Nago wak.”i
34 Yesus woso fo na ou wsablit lis, wkafsia ni mtatol, ofo wrana man ou wto: “Nen nke nataren wale nse Kerajaan Nago Wfem.” Hra oko fo, na mre yefitwain oli dait ni mre man Yesus, yibe ei yelieksi ou.
Yesus Wfle Wewer Wahin Daud
12:35-37
(Mat. 22:41-46; Luk. 20:41-44)
35 Hra oko fo, Yesus wkakniet ni wak Nago wfe bol kohok mklik om. Ou wrana wto: “Hra guru agama ei ykakniet yto Mesias wabe Daud wfe wet, afe de sie?
‘Tuhan Nago wrana man tet tfe Tuhan Mesias wto:
“Naka, nleli nak tna tkoin
kawuak de tet tlak tatik nfe kaisin
yik nteit olo aiti, ysaesik yin nen.” ’j
37 Yo, na mna Daud wsamenie fe Mesias wfle wewer ou, ofo wwit ou wabe wfe ‘Tuhan.’ Mto mde le ke fo, hra Daud wwit Mesias wabe kdie oli ou wfe wet fe me?”
Na marok ei ykashok fe ou, yibe yoso wain ni hra ou wrana eke.
Yesus Wkait wain Fe Guru Agama Ei
12:38-40
(Mat. 23:5-7; Luk. 20:45-47)
38 Yesus wkakniet ni man ei wto: “Nhlok-hlok man guru agama ei, yibe ei yeisi ytrik not lis, se bo nai yhdin ei. Yto yein yik fan kedi afe, yik pasar afe, se bo nai ysaesik man ei.k 39 Ei yeisi yleli yik deri wi mabot mak bol sikafit mabri, hra nai ybariomo. Mde fot le wi hra nai ybalifis, yeit sisi konon. 40 Ei ygebra, ykaf kesik semit ei yfe bol ei. Ei ysikafit lis-las se bo nai ynok deri yto ei ybot. Mde ke fo, basak ei yotik kayi satian maflem mewer kat.”
Semit Masgia Om Msanfe Ni Mewer Kat Na Kadio
12:41-44
(Luk. 21:1-4)
41 Mde Yesus wleli wtatol wak peti sanfe pitis hra mak Nago Wfe Bol mabri, wto wsmit lien na marok ei yka ytik pitis yloit yse peti sanfe okom. Na kohok marok om yka yklat kat pitis warok ei yti yse peti mabri aiti.
42 Mde semit masgia om maka, mtik mfe pitis kdois tembaga lak hra ywet kat, msalolo, mharfe dait 50 rupiah.
43 Mde Yesus wwit wedla ei yka, ofo wrana man ei wto: “Tet trana tkoin kat man nan, semit masgia kom mtik mse peti sanfe kom pitis warok mewer kat mahin na kadio.
