Yesus Wrana Krek Fe Tolo Fobi Mkahlia Kat
Pasal 13
Bol Kohok Nago Wfem Bo Nai Ybatdak Kat
13:1-2
(Mat. 24:1-2; Luk. 21:5-6)
13
Mde Yesus whok wahin bol kohok Nago wfem, ofo wedla mre wto man ou wto: “Guru, nhot la se, bol mafle kom mbot kamyi kat! Amak angke yfle yhron karmiak kat!”
2 Mahin Yesus wto man ou wto: “Nen nhot bol kom msamsa kat mde sie? Basak nai ybatdak kat bol kom kawuak de mdain. Amak hra angke nai ybariohok kadio kat. Yo, amak mre maheit dait mak amak man om masa.”
Kafir Masayen
13:3-13
(Mat. 24:3-14; Luk. 21:7-19)
3 Hra oko fo Yesus wleli wak Riere Zaitun wasa ago, wbariomo mtatol wse bol kohok Nago wfem, ofo Petrus, Yakobus, Yohanes yidien Andreas yefitwain hlok man ou yto,
4 “Nrana krek la man mam, waka ma ni hra nen nrana eke bo yhok, hra nai ybatdak bol kohok Nago wfem? Bo ni mit ma mhnak kakniet fe, se bo mam mnok tolo fobi mkahlia kat om mataren?”
5 Mde Yesus wrana man ei wto: “Nsiafolo, wa bo na mre ylolot nan.
6 Basak na marok ei yka, ywak dienen tet tkedi om, ofo yto: ‘Tet le ma tabe Mesias ou!’ ofo ygebra dienen na marok. 7 Bo nan noso nai ykhan afe nai yrana sas fe khan, ofo nan neliek amot, mabe ni eke bo yhok yelin, mahin ytatol latiot yik oko.
8 Na sa man ei ykhan yidien na sa man ei, kerajaan man om mfit kerajaan man om. Ofo bo frero yhok wat-wat yik fobi katak, yidien fot tolo katot fle. Ni eke kadio bo nai yhlet ykoko yalmias yde le na dlim msbiele mhok kmo mabe bo mto msois, mahin kafir maflem msamsa kat mskatiokot-tiokot yalmias, ofo bo nai yhlet ysamsa kat yde le na dli om mkedi koko mabe mto msois.
9 Mahin nan nke nsiafolo kat! Basak nai yslon nan, yotik nse majelis agama yik yibe yisarife nan, ofo ybahrabat nan nik bol sikafit yibri. Nai yidien twa nan nse gubernur yidien raja yik, fe hra nan nidien tet. Ofo nan nsamenie fe tet tkedi om, nrana man ei.a
10 Ofo mde le ke, giet mabot kom nan nsielwat kat krek man na sa marok kadio. 11 Nai yto yslon nan, yotik nse pengadilan yibe ysadir trar fe, yefitwain delek nan, ofo nan nklele dait fe ni hra bo nan nrana ei. Nrana wata ni hra Nago whnak yin nan ei yidien hra oko. Fe hra nto nan le ma nrana ni ke, ha Nago Wawua Makohok le ma mrana ni eke main fe nan.
12 Basak na man ou wbaret lolot wamon waliwet wan nai yska ou. Wde fot le na trar whnak wfe wet wan nai yska ou. Yde fot le wet ei ysidik ykhan oli yidien yfe na trar ei, yhnak yin nai yskai. 13 Bo na marok kadio ei ykrek yidien nan, fe hra nan nsamenie fe tet tkedi om, mahin fo na hra whron kein kawuak wadien tet kayi de mkahlia, ofo tet tsigi kat ou, thnak wron lis kawuak.”b
Kafir Fle Wsamsa Kat; Nai Ylolot Yibe Mesias
13:14-23
(Mat. 24:15-28; Luk. 21:20-24)
14 “Basak nan nikan ke nto nhot ‘ni masgiam hra molot fe na marok om mdiris kat,’ nto nhot om mkro sayi mak wi makohok, mak Nago wfe Bol om – Yo oma, na hra ybaca fo, ysmit lien ni mit ma hra okom – nto nhot ni okom mhok, ofo na hra yik fobi Yudea ytain kayi deri yse sfa bri ra.c
15 Na man hra yik wale bol masa age, yeis oli dait, ytrik kat oli yse bol ei yi yibri ra mabe ywien dait ni mrem, ha ytain kawuak deri!d 16 Na man hra yik wale biele, ysalit oli dait, ywien fien not trik ei yfem mala, wa kafir mhok wale mat ei! 17 Nakai! Tbakoko fe na dli hra ykmat ei, man fot na dli hra ysio yfe wet ei yidien hra oko fo! 18 Nsikafit man Nago se bo kafir om mhok dait yidien tolo kyen omik, nai ykomin ytain sasrio. 19 Nsikafit man Nago wabe wbakoko fe nan, fe hra kafir kom mfle msamsa kat. Kafir mre mhok latiot madien kamuolo masayen Nago wafik fobi katak kom, kawuak de hra ko, kayi de fot le basak, ni mrem mhok mewer oli dait.e 20 Bo Tuhan wkerek kat tamli kafir om, amloi fo, na tkoin om mdiris kat. Ou wto wkerek kat kafir wabe wbakoko fe na hra ou wlouk helwain wale. 21 Hra basak oko fo, na mre wrana man nan wto: ‘Nan nhot la, Kristusf wafe le hra angko!’ afe ‘Nhot la, ou le hra koit!’ ofo noso kmiet amo wala. 22 Mabe nai yhok yka, ylolot yto yibe Kristus, afe yibe nabi, ofo yifik ni, ysiok ni owuok heit-hat, se bo ei ygebra hewain na hra Nago wlouk helwain wale. 23 Nan nke nsiafolo! Tet trana krek kadio kat wale ni eke yin nan.”
Na Tkoin Yfe Wet Waka Oli
13:24-27
(Mat. 24:29-31; Luk. 21:25-28)
24 “Mahin basak kafir fle oko wdain fo:
‘tali om mkamian,
mok ou whanak oli dait,g
25 twon yti sak-sak kat yehin yik ago,
ofo ni kadio hra yehin yik age ysgir yrohok kat yehin wi ei yi.’h
26 Madien hra oko fo, nai yhot Na Tkoin Yfe Wet tet taka tafan yik sakait tadien tfe fle kohok mewer karmiak kat.i
27 Ofo tet tbahe tfe malaikat yhok yse fobi katak yka, ykohliowo kat na hra tlouk helwain wale yehin fobi lolok, yik wolo tali wolo.
Flet Mahin Wkoit Ara
13:28-31
(Mat. 24:32-35; Luk. 21:29-33)
28 Nsae la flet ko wahin wkoit ara: Nto nhot fo, mamai ylelen, ykamin yifi, ylas yhok, ofo nai ynok yto tolo les wkan wataren wale. 29 Mde le ke, nan nto nhot ni eke yhok fo, nan nnok tet tataren wale, tak hrede. 30 Tet trana toron krek man nan: Na sa Israel man ke ytinik dait latiot kawuak de ni eke yhok kadio kat.j 31 Basak yik wadien fobi yseal kat ydain, mahin giet hra tet tfe kom maheit lis kawuak.”
Ojin Mabe Nsiton-ton
13:32-37
32 “Tono wkadoin mabe tet taka oli, mahin na mre ynok dait kat amuk wagiet ou, afe tali wkedi om. Malaikat ei ynok dait, Wet tet tnok dait fot, ha Tono ou wmres deri le wnok.k 33 Nsiafolo! Nsiton-ton! Fe nan nnok dait waka ma tet taka.
34 Mde kayi le na hra wain wse wi wat, ou wahinti kat bol ou wam, wberiet wfe na dihan ysiok wat-wat ni, ofo man hra wkro wak hrede om wbahe wto: ‘Naheit, nsiton-ton fan!’l
35 Mde fot le nan nsiton-ton, fe hra nan nnok dait waka ma na hra wkain bol oko waka oli – bo wadien siwit kaka afe, amri afe, dlele afe, afe sies mkerek. 36 Se bo na ou wto whok ro kat, nnok deri wtatol wan nan nese! 37 Ni hra tet trana yin nan nke, tet trana fot yin na marok kadio kat, tto: ‘Nsiton-ton deri!’ ”