Nai Ysin Yto Yska Yesus
14:1-2
(Mat. 26:1-5; Luk. 22:1-2; Yoh. 11:45-53)
14
Bo amuk lak oli sba fo, nai yeit salswin magiet hra nai yto Paskah afe Sigi, yidien yteik yeit salswin Roti Madien Dait Ragi, (Salswin lak eke nai yeit mase amuk mtalak, ynok tmol kamuolo Nago wsigi na sa Israel yhok yehinti kat fobi Mesir). Mde imam yifle yidien guru agama ei ysin yto ytik lolot Yesus wan ykami yska ou.a
Na dli Molio Has Minyak Wangi Man Yesus
14:3-9
(Mat. 26:6-13; Yoh. 12:1-8)
3 Hra oko fo, Yesus wak Betania, wak Simon wfe bol, na hra kaman wkan om mobo. Yesus wleli wat ni eit, ofo na dli mrem maka matik botol hra nai ysiok mahin amak pualam. Botol om mhon madien minyak wangi narwastu, wrnoin wrofof-fof kat, wat pitis warok kamyi kat. Mde om mbablek botol magiet om, molio has minyak ou wak Yesus wsa masa ago.b
4 Mde na mre ytrere, yto man ei yto: “Hra na dli kom mbakya buon mfe minyak ou wabe? 5 Mko, msafo se mkain pitis warok kamyi kat, yka fo, mhnak yin nai ysgia hra ykain dait hrien.” Mde ei yhowa kat na dli om. c
6 Mahin Yesus wto: “Ndiewain watam! Nan nidien sgia om mabe? Ni hra om msiok man tet om mbot karmiak kat.
7 Nai ysgia ei yidien lok sisi sawuan wale nan. Mko, nan nhnak ni fe ei. Mahin tet tke, kyamre fo tadien sisi oli dait nan.d 8 Om msiok kayi ni hra bo om msiok ei. Om molio has, mware kat krek tkan kom mabe bo tet tkak, nai ykali tet. 9 Tet trana toron krek man nan tto: Basak, Giet Mabot kom nai ysielwat mak fobi katak kom, ofo ei yrana fot ni hra om msiok man tet, mabe nai ynok fot om.”
Yudas Wbaret Lolot Yesus
14:10-11
(Mat. 26:14-16; Luk. 22:1-6)
10 Mde Yudas Iskariot whok wahin wedla yikan yahar teit lak ei, ofo wain wse imam yifle ei yik wto wbaret lolot Yesus wan ei. 11 Ei yto yoso ni okom mde, ei ykashok karmiak kat, mde ykadoin yto yhnak pitis fe ou. Ofo ou wdihar kayi de mtatol mak mayi fe, ofo wto wadien twa Yesus, whnak wan ei.
Yesus Wat Sisi Salswin Paskah Wadien Wfe Wedla Ei
14:12-21
(Mat. 26:17-25; Luk. 22:7-14, 21-23; Yoh. 13:21-30)
12 Tali magiet fe nai yeit konon fle Roti Mdain Bibit Roti, tali hra nai ykerek domba Paskah ou, ofo Yesus wfe wedla ei yto man ou yto: “Wi man sie ma nen naisi mam mein msiok krek Konon Paskah mabe nen?”
13 Mde ou wbahe wedla lak ei wto: “La nan nein nse kota, nik ana bo ntatiere fe nin na mreu hra wkafe nggisi hra mhon madien kla. Ofo la nan nba kat ou
14 nein nse bol hra ou wtrik om, ofo nefitwain man na hra wkain bol okom nto: ‘Mam mfe guru wtik wto: Sit man sie ma nai yyowain kein krek man tet tadien tfe wedla ei mam meit Konon Paskah kom?’ 15 Bo na ou wkakniet man nan, sit maflem mak mbat man ago, madien ni ylek krek wale. Ofo la nan nyo kein krek wi okom mabe faf feit sisi Konon Paskah om!”
16 Mde wedla yikan lak ei yein yse kota, ytatiere fe ni kadio hra Yesus wrana krek man ei, ofo ei yyowain krek wi mabe Konon Paskah.
17 Amuk fo, Yesus whok waka wadien sisi wedla yikan yahar teit lak ei. 18 Ei yleli yik oko yeit ni, ofo Yesus wrana wto: “Tet trana tahak sros kat man nan tto, bo nan nikan ke, mreu kayi le ma wbaret lolot tet. O le ma na hra wat lok sisi ni wadien tet.”e
19 Mde ei ynok ni mkahiowain kat, ofo yikan ei yefitwain skatiokot-tiokot man ou yto: “Tuhan, bo tet afe?”
20 Ofo ou wto: “Na oko wahin le nan nikan yahar teit lak ke, ou le ma wlo toit sisi roti mse finggien mres wadien tet.
21 Na Tkoin Yfe Wet tet bo tkak wata mtatol madien ni hra nai ysroin skatoin wale mabe tet tak Alkitab. Mahin kafir man na hra wbaret lolot Na Tkoin Yfe Wet tet. Mabot ma na oko wemem msois dait amo wala.”
Yesus Wlouk Ni Kadoin Waifi Om
14:22-26
(Mat. 26:26-29; Luk. 22:15-20; 1Kor. 11:23-25)
22 Yesus wadien wfe wedla ei yto yeit ni eit fo, Yesus wlouk roti mfan maka fo, whdin man Nago, ofo werek-arak, whnak man ei yeit, ofo wto: “Nwien la, tkan fokot le mkom.”
23 Ofo ou wwien fien oli met om madien twok anggur mklam, whdin Nago, ofo whnak fot man ei, mde ei yikan kadio kat yoko sisi mahin met om.
24 Mde ou wto man ei wto: “Tet tfe hen le mkom. Hen hra Nago wsiok wabe wkait kadoin maifi om wadien na tkoin, o le ma bo tet tolio kat mabe tskalofos fien na tkoin marok.f 25 Tet trana toron man nan: Tet tako oli dait anggur mkla om kayi de basak tet tako kmo oli mak Kerajaan Nago Wfem.”
26 Ei yhdin Nago, ysrar heyit sba fo, yein yse Riere Zaitun.
Yesus Wrana Krek Wto Bo Petrus Wkesi Dienen Ou
14:27-31
(Mat. 26:30-35; Luk. 22:31-34; Yoh. 13:36-38)
27 Ofo Yesus wrana man ei wto: “Bo nan nikan kadio kat ntainti kat tet. Fe hra Alkitab mrana mto:
‘Tuhan Nago tet, bo tba na hra waror domba ou,
ofo domba ei ytain siar wat-wat.’g
28 Mahin tet tsidik oli fo, tet talin kein nan tak Galilea.”h
29 Petrus wto man ou wto: “Bo tanak wa kei le ma ytain, yo tet tdain.”
30 Mde Yesus wto oli man ou wto: “Tet trana toron kat man nen tto, amuk hra ko bo klen koko wsalo kmo mao lak fe fo, nen nkesi dienen fe wale tet mao tolik.”
31 Mahin Petrus wkatrein kat wto: “Hau, wanik deri, tet tkak sisi tadien nen, tet tkesi dienen dait fe nen.” Yikan man ei yrana fot mde le eke.
Yesus Wsikafit Wak Getsemani
14:32-42
(Mat. 26:36-46; Luk. 22:39-46)
32 Ei yein yhok yik wi mre mkedi le Getsemani, ofo Yesus wto man wfe wedla ei wto: “Nleli nik le ko, se tet tain tsikafit.” 33 Ofo ou wti kein Petrus, Yakobus, Yohanes yidien ou yein. Yik kaf kat ana fo, ou wsablit om mnok saswain ni yogin kat, wkas tlouk fe ni mitian hra bo yhok ytatol yin ou. 34 Ofo ou wrana man ei wto: “Tawuam mrwe kat, tkaso mtlok, biarak wa tto tkak! Yo, nan niheit nik le ko, nsiton-ton fot.”
35 Ou wskatdin kaf kat kdie, ofo wti wba wkmuon mse fobi aiti, ofo wsikafit se bo wto kafir hra mhok madien oko mewer kat ou. 36 Ou wto: “Abba,i hra nai yto ‘Tono,’ ni mre mkahiowain dait man nen. Nwien fien kat la met kafir kom mahinti kat tet. Mahin dait tet tak, yo mahin deri nen nak.”
37 Mde ou wsalit oli wse ei yik, wsmit fo yikan tolik ei yese wale. Ofo wto man Petrus wto: “Wee, Simon, bo nen nase wata le mke? Nen nkanas dait nsiton-ton fot dait tali wkedi mres? 38 Nsiton-ton, nsikafit se bo na mre ywien kein dait nen, ofo nsirobo nia nase oli dait. Nen nfe nawuam maisi mhron kein, mahin nkan tkoin om mkaluwa.”
39 Mde ou wain oli wak koit wsikafit, wrana oli deri ni okom.
40 Wto wsalit oli fo, whot ei yese dis fe hra ysifuon ei yrobo ytian kat. Ei ynok oli dait ni mre yrana man ou.
41 Mde ou wain mao tolik fe. Wsalit oli fo, wtabe ei wto: “Nan nese wata! Mtol fe le oko, wa mayi fe le kom. Nhot la, kaisin le yka kei. Bo ei yhnak Na Tkoin Yfe Wet tet tain tse nai ysiok satian ei yik. 42 Nan nehin la, faf fein! Na kni meles hra wbaret lolot tet ou le waka!”
Kaisin Yslon Yesus
14:43-52
(Mat. 26:47-56; Luk. 22:47-53; Yoh. 18:1-11)
43 Yesus wrana wata ni, ofo Yudas hra wahin wedla yikan yahar teit lak ou whok ro kat wadien kaisin marok. Kaisin ei mre yotik mnian lis, mre yotik kbat, fe hra na imam yifle ei yidien guru agama ei yidien fot nai yfle hra yslonti na sa Yahudi le ma ybahe kaisin ei ykami fien Yesus.
44 Na hra wbaret lolot ou wrana krek man ei wto: “Na hra tet tbon tkmois, ofo nan nlalo nslonti ou, ofo notik nsitodo roro wain ou.” 45 Ofo Yudas wain soro wse Yesus wak, ofo wto: “Ee, Tet tfe Guru!” ofo wkamti wkmois ou.
46 Mde kaisin ei yslon Yesus wan ykami. 47 Ofo na hra wkro wataren wak oko wkrit kat wfe mnian lis om, ofo wsat kat na dihan hra Imam Wafle wfe ou, mde wtefit om mroktok.
48 Yesus wto man ei wto: “Hra nan nnok nto nan nfe yomon le tet, se nan nret fali kbat, mnian lis nto nan nka nkami tet?
49 Tet tadien nan faf fik ta-ta deri Nago wfe bol kohok, tkakniet ni man nan, ofo nan nslon dait krek tet tabe? Mahin mde kayi le ke mtatol nai ysroin wale mak Alkitab.”j 50 Mde wedla ei kadio ytain siar, yehinti kat ou.
51 Mahin na dla wafori mreu wti korwain Yesus wain heles. Ou wsiwit deri not kseren lenan. Nai yto yslon ou, 52 mahin ou wtli kat not sis om, ofo wtain sabloit deri.
Mahkamah Agama Yefitwain Skadelek Yesus
14:53-65
(Mat. 26:57-68; Luk. 22:54-55, 63-71; Yoh. 18:12-14, 19-24)
53 Hra oko fo ei yotik Yesus wain wse Imam Wafle ou wak, ofo imam yifle kadio, yidien guru agama yidien fot na trar yifle hra yslonti na sa Yahudi, ei ybalifis yik oko. 54 Petrus wain kaliowain kaka wahin Yesus wsbiele kayi de whok wak Imam Wafle ou wfe bol mklik om. Ou wak ana wleli hlok wadien sisi na sae kahat, ofo wkayek wak sala mtefit.
55 Imam yifle ei yidien fot na kadio yehin Mahkamah Agama ei yidihar na hra yadon yto Yesus wadien sgia Nago se bo yska wkak, mahin ei ytiere fe dait ni mrem.
56 Na marok ei mre yadon dienen fot deri ou, mahin ni hra yadon sawuan ei, mre ytatol dait yidien mre.
57 Mde na mre ykro yadon dienen, yhar kat ou yto, 58 “Mam moso wale na oko wto: ‘Tet tbatdak bol kohok Nago wfem hra na tkoin ysiok yna fe kom, ofo tet tsiok wat olim man om mase amuk tolik man, hra na tkoin ysiok dait.’ ”k
60 Mde Imam Wafle ou wsidik wkro wak ei ybariomo, ofo wefitwain man Yesus wto: “Hra nen nrana dait ni mre yibe ni hra nai yrana wale ytatol yin nen nke fe me?”
Imam Wafle ou wefitwain sba oli man ou wto: “Nrana la, nen nabe Kristus,l Nago hra nai yhdin ou Wfe Wet nen?”
62 Mde Yesus wto: “Ee, tet le mke. Basak nan nhot Na Tkoin Yfe Wet tet tleli tak Na Wakohok wna tkoin, taka oli tafan yik sakait.”m
63 Ofo Imam Wafle ou wtrere, wkodihak ou wfe not trik, ofo wrana wto: “Mam midihar wain oli kdie ni fe me? 64 Mam mke moso sorhoi wale ou wtbekein Nago. Se nan nto de sie?”
Mde ei kadio kat ysalo yife mres yto bo nai yska ou wkak kayi.n 65 Mde yikan mre ykatfie kat ou, ylakti wsifuon ei, de ytewa ou ofo yto: “Woi nabi, nrana krek na sie ma yba nen?” Mde na sae kahat ei ykein fien waka, yba ou.
Petrus Wkesi Dienen Yesus
14:66-72
(Mat. 26:69-75; Luk. 22:56-62; Yoh. 18:15-18, 25-27)
66 Hra oko fo Petrus wak fot oko, wak bol mklik aiti. Mde Imam Wafle wfe na dihan madli mre om maka, 67 ofo mhot ro kat Petrus wkayek samne. Msmit torot ou mde mnok saswain mto:
“Nen fot le ma nadien sawuan Yesus na Nazaret ou.”
68 Mahin ou wkesi dienen wto: “Hau, tet tnok dait na ou, tnok dait fot ni hra nen nrana eke.” Ofo ou wkadin kat wse bol magiet tlein ale, ofo koko wsalo.
69 Mde wedli om mhot oli Petrus wak kdie ana, mde mrana man na hra yik eke, mto: “Thana kayi na hra ko wahin yikan ei!”
Na hra yik eke ywoi dait fot, yto man Petrus yto: “Nen nke kayi nadien fot ei, hra nen nke na Galilea nen!”
71 Mahin Petrus wfruo kat oli na mna ou, wfafti ni wto: “Tet tnok dait na hra nan nrana oko.”
72 Mayi fe oko fo, koko wsalo ro kat mao lak fem, ofo Petrus wsablit mkasrere, wnok tmol oli ni hra Yesus wrana wale man ou wto: “Koko wto wsalo latiot mao lak fe, ofo nen nkesi dienen wale fe tet mao tolik.” Mde ou wsiat, wawo kafriehe ro kat.
