Pilatus Wsadir Trar Fe Yesus
15:1-15
(Mat. 27:1-2, 11-26; Luk. 23:1-5, 13-25; Yoh. 18:28–19:6)
15
Uwade mlabit kat fo, imam yifle yidien sisi na trar ei, guru agama ei ybalifis ysadir trar. Na kadio kat yik Mahkamah Agama ykerek sadir yto yhirit Yesus. Yhirit ykaitti wde, yotik yhnak wain wse Gubernur Pilatus wak, yto Gubernur wsadir trar fe ou.
2 Pilatus wefitwain skadelek man ou wto: “Nen nke nabe Raja na sa Yahudi yfe, afe?”
Ofo Yesus wsamenie wto: “Esre, mde le hra nen nrana okom.”
3 Mde imam yifle ei yrana siorok, yadon yto Yesus wsiok ni ysgia yrok. 4 Ofo Pilatus wefitwain oli man ou wto: “Hra nen nrana dait ni fe me? Nhot la, na marok karmiak kat yadon bantias ni yin nen nke!”
5 Mahin Yesus wrana oli dait ni mrem, mde Pilatus wteit rioro fe ou.
6 Der man der man fo, mayi fe Konon Paskah, ofo Pilatus wbahe lokdi sawuan na mres whokti kat bui. Wbahe na ou whokti kat bui mtatol madien na marok ei ywaini. 7 Hra oko fo, na mre wkedi Barabas nai yhirit wale wak bui wadien sisi na hra ysadir wekya, wabe ou wadien wanak wai yska wale nai, yibe yto fobi Israel mhokti kat mahin Roma, mkro wat. 8 Mde na marok ei yka ywaini man Pilatus, yto ou wsiok ni hra ou wsiok lokdi wadien Konon Paskah man hra ei.
9 Pilatus wsamenie fe ei, ofo wefitwain oli man ei wto: “Nto de sie? Nan neisi tet tnahla kat Raja na Yahudi yfe kou, afe?” 10 Mabe Pilatus wnok wale imam yifle ei yhnak wale Yesus wan ou, fe deri yibri ysgia yidien ou.
11 Mahin imam yifle ei ybahe kayit-yit na marok ei yto: “Nrana nto Barabas nai yna bhait kat!”
12 Mde Pilatus wto sba oli man ei wto: “Se nhe, tet tsiok ni mit ma man na hra nan nwit wabe Raja Na Sa Yahudi yfe kou?”
13 Mde ei ysalo fle karmiak kat yto: “Nskarok kat wata ou!”
14 Mahin Pilatus wto man ei wto: “Fe hra ou wsiok buon ni mit ma masgia man nan om?”
Mahin ei ysalo mfle karmiak kat sba oli yto: “Nskarok kat wata ou!”
15 Fe hra Pilatus wto wsiok ei yibri mbot, ofo ou wna bhait kat Barabas wata, ha wbahe nai ybahrabat kat Yesus. Wdain fo, Pilatus whnak wan na sae kahat, ei yotik wan yskarok.
Na Sae Kahat Ytbekein Yesus
15:16-20a
(Mat. 27:27-31; Yoh. 19:2-3)
16 Mde na sae kahat ei yotik Yesus wse istana om mabri, hra bol sarife ni om, ofo ywit fien kadio kat kaisin om mhok msatatik kat. 17 Ei ytli kat not hra ou wtrik, ofo ylouk oli not lis mahbua mde le hra na raja yfem, maka fo, ysiok wanik man ou wtrik. Mde ei ytalo omos hra ysla ei yibe kyathain, ofo ylak man wsam.
18 Ofo ei ysaesik dienen yin ou yto: “Nai fe nau smau, Raja na Yahudi yfeu!” 19 Ei ysiok tiyen buolo, yba wak wsa masa ago, ofo ykatfie kat ou, yti ybatoko teit dienen yik wbariomo aiti. 20 Ytbekein ou wfot fo, ei ytli kat not mahbua om, ofo yhnak oli ou wfe not ei yka, wtrik oli.
Ei Yskarok Yesus
15:20b-32
(Mat. 27:32-44; Luk. 23:26, 33-43; Yoh. 19:17-27)
Mde ei yotik ou whok wabe yein yskarok. 21 Yik fan kedi, ei ytatiere fe Simon, na fobi Kirene ou, hra Aleksander wadien Rufus la yono. Ou waka kmo wahin fobi tlein, wto wain wse kota. Mde na sae kahat ei yslon kerek na oko, ybahe skadanyit ou wkafe wanik Yesus wfe wkoit skarok okom.a 22 Ei yotik Yesus yein fali wse wi hra na Yahudi yto Golgota, hra nai yto Wi Safakos.
23 Yhok yik ra fo, ei yhnak twok anggur hra nai yskafaek wale yidien komik murb man ou wakom, mahin ou waha deri.c 24 Mde ei yskarok ou, ybadan wlo wan wkoit skarok om. Mfot fo, ei yala lial fe ou wfe not trik ei, se bo ysan yin ykain wat-wat.d
25 Tali wkedi mtanhat ofo nai yskarok ou wlo wak wkoit badan om masa. 26 Ni adon hra yin ou eke, nai ysroin yto: RAJA NA SA YAHUDI YFE OU LE WKOU.
27 Na sae kahat ei yskarok sisi ou wadien na dla yikan lak hra yisliak ni, man ou wse wna tkoin, man ou wse wna wait. 28 (Mde le eke, se bo mtatol madien ojin Nago wfem hra mto: “Nai yaher ou, yto wloit wse nai yisgia yik.”)e 29 Na hra yein fe eke ei ysawirit ytbekein yasak fe ou yto: “Hyee! Hra nen nto sok nto nbatdak bol kohok Nago wfem, ofo nen nsiok oli mase amuk tolik deri!f
31 Mde fot le imam yifle yidien guru agama ei ytbekein, yto man ei yto: “Woi! Hra na wat sok ma ou wsigi ei, yo, na mna ou fo wsigi dait ou! 32 Mabot ma Kristus,g Raja Israel kou, wais kat wahin wkoit skarok om, se bo mam mhot mnok ou.” Mde fot le na lak hra nai yskarok sisi yidien ou, la ytbekein karmiak kat ou.
Yesus Waigi
15:33-41
(Mat. 27:45-56; Luk. 23:44-49; Yoh. 19:28-30)
33 Mde tali fle, wkedi yahar teit lak fo, amri kya whok waka waisti fobi kadio kat kawuak de tali wkedi tolik siwit. 34 Tali wkedi tolik fo, Yesus wkader kohok man wono wto: “Eloi, Eloi, lama sabakhtani?”, hra nai yto: “Tfe Nago, tfe Nago, nen nahinti kat tet tabe?”h
35 Na mre hra ykro yitaren ou yoso wrana mde le eke, ofo ei yto man ei yto: “Noso la, ou wwit Eliau!”
36 Ofo na mre wsese, wwien kormok amak maka fo, wlo toit mse anggur mkla mafi om, mde wskasok man buolo magiet, wyit main mse Yesus wgiet se bo wto wakom.i Mde wto: “Nan nka, faf fkadin kat, se fhot fto Elia waka wkosia kat ou wais, afe.”
37 Mde Yesus wkader kahlia kat, ofo wkaso wti wkak.
38 Mayi fe hra oko fo, not kda whi mak Nago wfe bol kohok mabri om mdihak mahin ago kawuak mde mse aiti, mfan lak.j
39 Oko fo na sae kahat wafleu hra wkro wtatol wadien Yesus, wto woso ou wkader, whot kayi ou wkak hra mde okom, ofo wto: “Nto tkoin, na hra ko wabe Wet Nago wfeu!”
40 Oko fo na dli mre ykro afat yik koit, yhot fot Yesus wkak, yikan adit le ma Maria Magdalena, Maria hra Yakobus Waifi wadien waliwet Yoses la yemem, yidien fot Salome.k 41 Ei le ma hra yein yidien Yesus, ydihan ou wak Galilea. Yidien fot na dli yrok hra yka yidien Yesus yse Yerusalem.
Yusuf Wkali Eigi Ou
15:42-47
(Mat. 27:57-61; Luk. 23:50-56; Yoh. 19:38-42)
42 Hra oko fo tali Adir Krek Ni mkdia siwit mabe amuk Sabat. 43 Fe hra oko fo Yusuf, na Arimatea, na tmak wafle wak Majelis Permusyarawatan Rakyat hra na mna ou wmres wwade kein Kerajaan Nago wfem, ou wkein wkan om mhron kat, whok wse Pilatus wak, wwaini fien Yesus wkan eigi om.
44 Pilatus wtmayes fe hra woso kmo Yesus wkak wale, mde ou wwit fien na sae kahat wafle ou. Waka de, ou wefitwain wto: “Yesus ou wkak wale?” 45 Woso firi na sae kahat wafle ou wrana hatot fe kak ou, ofo Pilatus wrana man Yusuf wto: “Tet thnak kak ou wkan om man nen nain nkali.” 46 Mde Yusuf wkain krek not kefin hra nai ysiok mahin lenan om, ofo wtefek kat Yesus wkan mahin wkoit ma skarok ago, maka fo whobor wadien not lenan om, ofo wlak wkali wain wse hin knawato maifi hra ou wkak mak amak mak kdier olo. Mahin fo, ou wkolilik amak maflem maka, wdanti hin magiet om.
47 Maria Magdalena, Maria Yoses wemem, la yikan lak ei yik fot wi okom, yhot wi hra Yusuf wkali Yesus ou.
