Yesus Wsidik Wron Oli
16:1-8
(Mat. 28:1-10; Luk. 24:1-12; Yoh. 20:1-10)
16
Tali Sabat wewer fo, Maria Magdalena, Maria Yakobus wemem yidien fot Salome, ei yein ykain krek ni hra yrnoin, yto yotik yein yse hin yibe yolio yin Yesus wkan om.
2 Uwade mlabit kat wadien tali Minggu okom, tali om msieret kmo, ofo ei yein yse hin knawato om. 3 Ei yrana sas tiwain man ei yto: “Woi, amak danti om! Bo na sie ma wkolielen wanik om mahinti kat hin knawato magiet om man faf?”
4 Mahin ei yeren ysifuon, yhot ro kat fo, amak hra mafle om mlilik wale mbries mak ei ybariomo.
5 Ofo ei ytrik yse hin knawato om mabri ra, yhot fo wedla wafori mreu hra wtrik not lis ma elek, wleli wak wna tkoin, mde ei yrioro karmiak kat fe ou.
6 Mahin na wafori ou wto man ei wto: “Nan neliek amot. Nan nke nidihar Yesus, na Nazaret hra nai yskarok. Ou wsidik oli wale! Ou wak dait ko. Nhot la, wi hra nai ylak o le ma mfalek kom. 7 Mahin nan nein wata nidien hra ko, nrana hatot man ou wfe wedla ei, man fot Petrus, nto: ‘Ou walin kein wale wse fobi Galilea. Se bo nan nein nik ana fo, nhot ou, mde kayi le hra ou wrana wale man nan om.’ ”a
8 Mahin ei yteit yrioro ykafrere, ofo ei yehinti kat hin knawato om ysese, ykahiowain kat fe ni hra mba man ei. Ei yrana tiwain dait kat ni mre yin na mre fe hra ei yeliek karmiak kat.
[Katik fari Markus hra ytrar kat yharfe le oko. Ei yidien dait ayat 16:8b-20.]
Ni Rana Skatiokot Hra Mkatben Om
[Yrana kaf kat deri ni hra kait wain yin Petrus wadien wanak wai. Mde oko fo, Yesus wolot fe wedla ei yein tar-tar yse fobi katak, yehin tali mhok kawuak de tali mti, yrana giet makohok hra mseal kat dait mabe Nago whnak nai yron lis kawuak.]
Ni Rana Skatiokot Hra Malis Om
[ 9 Yesus wahin wsidik oli wale wadien tali masayen mahin minggu okom. Ou wyen hata sayen wkan om man Maria Magdalena, hra madien kamuolo ou wwain kat klebet mtalak yehinti kat om.
10 Mde na dli om main mrana yin fot na hra yein yidien lok sawuan Yesus, hra yleli yrwe yowa fe ou. 11 Om mrana man ei mto: “Yesus wsidik wale! Hra ke tet thot firi ou!” Mahin ei yoso kmiet dait om.
12 Oko fo, Yesus wyen hata wkan om, wbahlia wsi wat man wfe na dla lak hra yein yse kota tlein. 13 Mde ei ysalit oli yrana hatot man yanak ei, mahin yanak ei yoso kmiet dait.
14 Mde Yesus wyen hata wkan om man oli wedla yahar teit mres hra yeit ni eit, mde ou whar kat ei wto: “Hyee! Hra nan noso kmiet dait ni hra tet trana wale man nan, ya! Hra nan naha kat sawuan, noso dait nai yrana fe yhot tet tsidik tron oli wale!”
15 Ofo ou wrana man ei wto: “Nan nein nse fobi katak, nrana Giet Mabot kom man na kadio.b 16 Na man sie ma ynok tmol man tet, ofo nsrik kat kla fe ei, ofo bo Nago wsigi kat ei yhok yehinti kat yfe satian ei. Yo, man hra yoso kmiet dait fo, Nago whirit kawuak ei.
17 Man na hra yto yoso kmiet tet, hra yrana fe tet tkedim, ofo tet thnak fle kohok man ei se bo ei ywain kat fot klebet ei, yrana giet kom madien salo yfi. 18 Ei ysiokti lua fo watan dait ei ykak, yidien fot ei yoko wanik smirit mahin ydain, ykak dait. Ei ylak yna mak na hra ykaini, ofo na ei ydain.”
19 Tuhan Yesus wsadir kahlia kat wadien ei, ofo wono Nago wkosia kat ou warin wse Wi Mayehet, ofo wleli wak wono wna tkoin.c
20 Mde wedla ei yein siar, yrana fe Giet Mabot om man na marok mak fobi katak, mahin tali wolo mse yik wolo. Ofo Tuhan Yesus wadien sisi ei wsiok ni, wolot fe nai ynok tmol man ou wfe giet om, fe hra whnak ei ysiok fali fot yifik ni.]
KAMUS
Beelzebul - ou le ma Si Iblis, Na Hra Wadon Sawuan Nai, Na Wien Kein / Wgebra Nai, Klebet Wafleu hra wslonti klebet, koli, lait, yidien ni yiwua yisgia kadio yibe wedla yin ou. Ou wkhan wadien Nago, wlolot dienen na tkoin ysiok sgia ni yrok yin Nago.
Bol Kohok Nago Wfem - ou le ma bol maflem mres madien kamuolo mak Yerusalem hra na sa Israel, o le ma na Yahudi ei kadio kat, ybalifis ysaesik yin Nago. Der man der man fo, na sa Israel yka yse Nago wfe bol kohok okom, ykafe yfe pitis, erwas yka ysanfe man Nago. Imam ei ykerek erwas yka ytatik yseli kat yik sala batalok kohok Nago wfem, se bo ou wbaret keben kaf kat ei yfe satian ei, ofo wbot-bot oli wadien ei. Ni okom mkyat fe basak Nago wbaret keben kawuak ei yfe satian kadio kat, main fe Tuhan Yesus. Madien der 70, na sae kahat Roma yfe yka yrit bol kohok Nago wfem, ofo ybatdak mdain. Na mre ysiok oli dait. Mahin bol kohok Maifi hra Yesus wsiok sonat okom, ou le ma gereja, na Kristen kadio.
Bol Sikafit - o le ma bol hra na sa Yahudi ybalifis yife mres yik desa wat-wat yidien tali Sabat yibe ysaesik yin Nago, yoso nai yrana Giet Nago wfem. Nai ysanfe dait erwas yik bol sikafit ei, ha yik deri bol kohok Nago wfem.
Daud - o le ma wabe Raja Wafle wabot wadien kamuolo hra Nago wlouk helwain ou wabe wslonti na sa Israel kadio kat. Daud wabe Yesus wbiti. (1Sam. 16 - 1Taw. 2)
Daud Wfe Wet - o le ma wsadir ala-ala fe Yesus, Mesias ou. Nago wkadoin man Daud wto basak wet kafe kein mreu wahin Daud wak, waka fo, wabe Raja Wafle Wakohok hra wron lis kawuak, wslonti fobi katak kadio kat.
Dekapolis - o le ma propinsi hra mbiyalok madien propinsi Galilea hra mse tali mhok. Dekapolis mahin salo Yunani, o le ma nai yto kota yahar, fe hra propinsi okom madien kota yahar madien na sa marok hra ysalo Yunani.
Elia - ou wabe nabi wadien kamuolo kat hra wkedi ririn. Ou whar kat na hra ylak heya man klebet mde le na wuon hra yikan 450 ysaesik yse Baal. Ou wsiok ni wtrein man Nago, ofo Nago whnak ou waigi dait, yo warin saron deri wse Nago wak. Alkitab mrana wto Elia waka oli, wsat kein fan man Mesias (Mal. 4:5-6). Mde ke fo, nabi Yohanes Wasrik Kat Kla Fe Nai ou waka wsiok ni ytatol sadiak wain fot le Elia ou, wkafe na sa Israel marok ei ysalit oli yse Nago wak.
Farisi - ei le ma yibe na agama Yahudi yikan satrio wat hra ysae, ykakniet, ysiwain tiktol ykanas kat yidien ojin Nago wfem, tiktol kat ojin mde le hra Musa wrana om. Mahin ei ysiwain ykanas yidien fot ojin hra yate kokos yfem mewer kat ojin Nago wfem. Na kayi mtato kat mahin guru agama ei yrok ytrik yse fot na Farisi.
Galilea - o le ma mabe propinsi hra fobi Yudea mtato wse utara. Yesus wsiok ni yisayen wak Propinsi Galilea, fobi ou wa. Na hra yese yik eke yskafsiak na sa Yahudi mre, na wat mre yehin na sa wat. Propinsi okom madien siwan sabarak ou wmres deri, mahin wkedi hat - ou le ma Siwan Sabarak Galilea, wabe fot Siwan Sabarak Tiberias, wabe fot Siwan Genesaret hra wkedi mahmat madien kamuolo kat o le ma nai yto Kineret.
Getsemani - ou le ma biele wkoit zaitun mak Riere Zaitun wolo, mataren deri mse kota Yerusalem, wse tali whok. Yesus wsikafit wak Getsemani, whlet ni yalmias, fe wnok bo wkafe na tkoin yfe satian kadio kat wak wkoit skarok.
Giet Mabot - ou le ma giet mabe Nago wmro fe na tkoin faf, yibe satian faf fi ei yhirit kat faf fik kerajaan mamian om, ofo Si Iblis, Na Adon ou, wsiokti faf sgia. Mde ke fo, Nago whnak wfe wet Yesus wan wskalofos fien faf fehin satian faf fi ei kadio. Na man sie ma ynok tmol man Yesus, ofo Nago wyan kat, wbaret keben ei yfe satian ei, wkosia ei yloit yse kerajaan ou wam. Nago wabe ei yfe raja, na wafle hra wslonti ei, wkororo ei yik yibri.
Guru Agama - ei le ma yibe na hra ykakniet giet Nago wfem tiktol kat ojin Musa wfe. Ei ykakniet fot yto nai ysiwain sisi ni toji yrok-rak yehin ojin trar hra yate kokos yfe. Ei yto nai ysiwain dait, ofo Nago wsigi dait ei.
Haleluya - o le ma salo Ibrani mto: “Faf fhdin Nago! Ahe, Nakau, mam mfe Nago we!”
Hosana - o le ma salo Ibrani mto: “Ahe, mam mfe Nago waka wsigi mam!”
Imam - ei le ma na kro wat hra wsikafit, wkerek sanfe man Nago, se bo Nago wbaret keben kaf kat na tkoin ei yfe satian. Ei yrana twa ni Nago wfe yin na tkoin, yidien fot yrana twa ni na tkoin yfe ni yin oli Nago wak. Nago wlouk helwain imam ei yehin tiktol Harun wak, wet kafe kein wahin na sa Lewi.
Kerajaan Mamian - Wadien kamuolo, Si Iblis, Na Adon ou, malaikat wafle ou whokti kat wahin Kerajaan Nago Wfem, waha kat Nago wslonti ou. Ou wadien twa wanak na malaikat yisgia mre yhokti kat fot. Ofo ou wsiokti ei yibe ou wfe wedla ei, ou wfe klebet afe ni yiwua yisgia. Na Adon ou what Nago, wkhan wadien ou, wlolot dienen na tkoin ysiok ni ysgia yin Nago, ykafe satian maflem. Mde ke fo, ou whirit na tkoin kadio yik ou wfe Kerajaan Mamian yibe kawor yin ou, wto wska kat ei.
Kerajaan Nago Wfem - Nago wabe Raja Wafle, Na Wafle Wakohok hra wslonti kat na kadio yik Wi Mayehet, yik fot fobi katak. Na mre dait wfle wewer oli ou. Na kadio yik Wi Mayehet ysaesik yin ou, yoso kmiet ou, ysiok tiktol ni hra ou wbahe. Nago wteye wfe wet Yesus wabe wskalofos fien na tkoin yhokti kat yehin klebet wafleu, yibe oli dait kawor yin ou ha, yloit yse Nago wak, yse Kerajaan Nago Wfem. Yesus waka fo, ou wrana wto Kerajaan Nago wfe om mataren wale, mak wale nai ybariomo. Mde le ke ou wwit fien nai yka yse Nago wak. Na man sie ma ylelek, yehinti kat yfe satian ei, ynok tmol mse Yesus wak, ofo ou wsigi kat ei, wkosia kat ei yloit yse Kerajaan wono wfem. Ei ysaesik man Nago, yoso kmiet ni kadio hra ou wrana, yibe ei ynok ou wabe ei yfe Raja. Ei yhnak ei yibri mowuo kat yse Nago, ofo ou wslonti, wkororo ei yik ysablit yibri ra. Basak Yesus waka oli fo, ou wsiok Kerajaan Nago Wfem, wsiokti na tkoin kadio kat. Na hra yaha kat Nago fo, ou wklat ei yse neraka, yhlet kawuak yik sala mdhen. Na hra yidien Nago ofo yron kawuak yik Wi Maron om.
Klebet - ei le ma Klebet Wafle wfe wedla ei hra yfla na tkoin, ysiok sgia ni kadio hra Nago wsiok. Ei ygebra yto ei yibe deri eigi yiwua ha, ei yibe kayi matoron kat malaikat ysgia, yiwua ysgia, hra yaha kat wale Nago yidien kamuolo masayen kat. Basak tolo kahlia kat fo, Nago whirit wklat kat ei kadio yse neraka, yhok oli dait.
Klebet Wafleu - o le ma Si Iblis, Na Kni Meles, Na Wa Adon Na, malaikat wasgia wafleu hra wslonti klebet yidien ni yiwua ysgia kadio. Kamuolo masayen fo, ou wabe malaikat wafle hra wdihan Nago. Mahin ou wlelek wabe wsgia, what Nago, wkhan kawuak wadien ou. Ou wlolot dienen na tkoin ysiok sgia ni marok yin Nago. Klebet Wafle ou wkedi salo Ibrani wabe Satan, hra nai yto Na Kni Meles. Ou wkedi salo Yunani wabe Diabolos, hra nai yto Na Wa Adon Na. Ou wkedi wat fot Beelzebul wadien Belial.
Kristus - ou le ma Yesus. Kristus hra salo Yunani msadiak wain Mesias hra salo Ibrani - ou le ma Raja Wafle hra Nago wlouk helwain. Wadien kamuolo Nago wkadoin krek man Daud wto basak wet kafe kein mre ou wkosia, webet wabe Mesias, Raja Wafle hra wslonti na sa kadio yik fobi katak. Ofo ou webet Yesus wabe Mesias ou. Na sa Yahudi kadio kat yleli kein Mesias, mahin na marok ei ynok dait, yhana dait Yesus wabe ou.
Malaikat - ei le ma Nago wfe wedla ei, yiwua ybot-bot hra ydihan ou. Nago wtik giet man malaikat man ou, ofo wain wrana man tiktol deri na tkoin man ou. Nago wbahe malaikat man ou wsiok ni, ofo ou wsiok.
Mesias - ou le ma Yesus. Mesias hra salo Ibrani msadiak wain Kristus hra salo Yunani - ou le ma Raja Wafle hra Nago wlouk helwain. Wadien kamuolo Nago wkadoin krek man Daud wto basak wet kafe kein mre ou wkosia, webet wabe Mesias, Raja Wafle hra wslonti na sa kadio yik fobi katak. Ofo ou webet Yesus wabe Mesias ou. Na sa Yahudi kadio kat yleli kein Mesias, mahin na marok ei ynok dait, yhana dait Yesus wabe ou.
Na Tkoin Yfe Wet - o le ma kedi hra Yesus wsidier man na mna ou, se bo nai ynok ou wabe Mesias, Daud wfe wet ou. Yesus wrana wto ou wabe Na Tkoin Yfe Wet, fe hra wnok bo whlet ni yalmias wsamsa kat, wkafe na tkoin yfe satian kadio kat.
Nabi - ou le ma na hra Nago wlouk helwain wabe wrana krek ni Nago wfem man na tkoin ei, mde hra Nago whar kat ei afe, whnak hron fe ei afe, wsewet fe ni hra basak afe badian ei yhok.
Nago Wfe Wet - ou le ma Yesus hra Nago whnak fle fe wabe Kristus, o le ma Mesias. Nago wfat kedi okom man Yesus, mkakniet fe ou wabe Mesias, Raja Wafleu wahin Nago wak, hra wslonti na kadio hra yhnak ykan, yibri, yiwua mowuo kat yin Nago.
Neraka - Basak nai ysidik oli fo, na kadio hra yaha kat Nago wfe Wet Yesus, Nago wklat kat ei yse neraka, wi siwan sala hra mdhen, ofo ei yiheit, yhlet kawuak yik sala mdhen.
Paskah - ou le ma salo Ibrani mto Wewer kat. Kamuolo Nago wsigi kat na sa Israel yhok yehinti kat fobi Mesir, fobi hra ei yibe kawor om. Nago wbahe ei ykerek domba wamor, yyan when mak wkoit bakredi hra mak bol hrede. Na kadio hra ysiok mde le ke fo, Nago wfe Malaikat Kafir ou wewer kat ei yfe bol. Yo, na sa Mesir hra yto ysiok dait mde ke fo, Malaikat Kafir ou wloit bol ei yi, walmias kat wet flesa ei ykak. Nago wbahe na sa Israel yeit konon Paskah ynok tmol ni kom yidien der man der man. Mabe ei ysaeti Nago wsigi kat ei yehin kafir mafle kom, wbahe wfe Malaikat Kafir ou wewer kat ei. Mde ke fo, Nago wwit konon om mabe Paskah, ytatol yidien Wewer Kat Faf.
Riere Zaitun - ou le ma riere hra wataren wse kota Yerusalem wse tali whok.
Saduki - ei le ma yibe na agama Yahudi yikan satrio wat hra ynok sele yto ni owuok hra yehin Nago wfe giet yibe deri ni rana wain. Ei ynok sele yto malaikat dait, na eigi ysidik oli dait, yidien adit ni warok mde le oko. Imam na Yahudi yrok ei yloit yse na satrio man Saduki okom.
Srik Kat Kla Fe Nai - ou le ma mabe kyat fe nai ylelek, yehinti kat ei yfe satian ei, yka yhnak yibri, yiwua, yhalie, ykan om mowuo kat mse Nago wak.