OJIN RASUL YFE
Yesus Wto Skatoin Ni, Wkadoin Mabe Nago Whnak Wawua Makohok Om
1:1-5
1
Nai fe na, Teofilus,a Lukas tet tsroin skatiokot ojin man nen mak buku mao lak fe le mkom - [o le ma ojin mabe Yesus wkedi maririn om main siar mse fobi katak]. Mak buku masayen om tet tsroin wale fe ni adit warok kadio kat hra Yesus wsiok, wkakniet ei,b 2 mahin kamuolo masayen kawuak de wono Nago wkosia kat ou warin wsalit oli wse ou wak wi mayehet ago.c Wkdia wataren wabe ou wain, ofo Yesus wto skatoin ni, main fe Nago Wawua Makohok om, yin tiktol wfe rasul ei – ou le ma ou wfe wedla bahe hra ou wlouk helwain wale yibe yein siar, yrana tar-tar Giet Mabot mabe Ou. 3 Fe hra nai ysiok sgia wale ou, whlet ni yalmias ysamsa kat kayi de waigi wak wkoit skarok. Mahin ou wsidik oli, ofo wyen hata wkan om man wfe wedla ekei. Ou wsiok adit ni yrok se bo ei ynok toron kat mabe ou wron oli. Ou wyen hata ta-ta wkan om man ei kawuak de amuk na lak yeigi (40), wrana fe Nago wfe kerajaan om, [o le ma Nago whnak man na tkoin wto: “Na man sie ma yten ykaso yse tfe wet Yesus wak, ofo Nago tet tskalofos fien kayi ei yihokti kat yehin klebet wafle ou wak, ofo tet twien fien ei yiheit yibe tfe nai, ofo tslonti kawuak ei.”]4 Tali mre fo, Yesus wat sisi ni wadien wfe wedla rasul ei, ofo wto skatoin man ei wto: “Nan nke nehinti kat dait Yerusalem kom mala. Nan niheit, nleli kein deri ni hra Tono wkadoin krek wale man nan om, mde hra kaman nan noso tet trana fe wale man nan.d 5 Yibe kaman Yohanes ou wsrik kat nai wsiok deri kla, mahin amuk kyamre kdie oli fo, Nago wsrik kat nan nidien kayi Ou Wawua Makohok om.”e
Nago Wkosia Yesus Warin Wse Wi Mayehet Ago
1:6-11
6 Tali wat kdie fo, rasul ekei ybalifis oli yidien Yesus, ofo yefitwain man Ou yto: “Tuhan, waka ma nen nsin nto kerajaan om mkro wat, msalit oli mse na sa Israel faf fik? Bo madien hra ko, afe?”
7 Mde ou wada wto: “Ni okom nan nnok sayi dait. Ha, Tono wadien wfe fle kohok om, na mna ou wmres deri sok. Ou le ma wnok hene magiet hra ou wkait walem. 8 Mahin Nago Wawua Makohok om bo mhok maka, msisik mse nan nibri ra, mhnak fle fe nan, se bo nan niheit nkanas, nrana kein-kein tet tkedi kom, nteik nehin Yerusalem ko, nein nse fobi katak Yudea, Samaria yo, kawuak de yik wolo tali wolo, fobi katak kadio kat.”f
9 Yesus wrana kahlia kat ni eke, ofo ei yhot ro kat fo, ou wkasia warin wse ago, kawuak de yik sakait mhoborti, ofo yhot oli dait ou.g
10 Ei ygiele ysmit korwain sonat ou warin wse yik ago fo, yiwua fe ro kat na dla lak hra ytrik not yelek, ykro lolowain ei. 11 Mde la yto man ei yto: “Woi, wedla Galilea nan, hra nan nkro nsmit torot mse yik ago fe me? Yesus oko Nago wkosia warin wse wi mayehet ago wahinti kat nan. Ou le ma basak waka oli wsadiak wain wde le nan nhot ou warin wse yik ago.”
Rasul Ei Ywade Kein
1:12-14
12 Mde rasul ei ysalit oli yse kota Yerusalem yehin riere hra nai yto Riere Zaitun, bo mlis wain kilometer mres deri mahin kota om.h 13 Ysalit oli yse kota, ofo yorin bol hra ei yese om, yse mbat man agom, sit man hra ei yese om. Yikan ekei le ma Petrus wadien Yohanes, Yakobus wadien Andreas, Filipus wadien Tomas, Bartolomeus wadien Matius, Yakobus hra Alfeus wfe wet wadien Simon na Zelot ou,i yidien fot Yudas hra Yakobus wfe wet.j 14 Yikan yahar teit mres ekei ybalifis ysikafit ta-ta kawuak yidien fot na dli ei, yidien fot Yesus wemem Maria, madien Yesus waliwet wai.
Matias Wdanhok Wan Yudas Iskariot
1:15-26
15 Tali man kdie oli fo, Yesus wfe wedla wedli ei ybalifis oli, yleli yife mres - nai yikan kadio bo mal kayi le ma na mtamre yeigi (120) hra yten ykaso yse Yesus wak - ofo Petrus ou wsidik wkro flalie wak bri, wrana man ei wto, 16 “Woi, table wa nan, trana ni fe nan. Nnok mabe Yudas ou. Madien kamuolo kat Daud wsroin wale mak katik fari makohok om ni hra Nago Wawua Makohok mrana fe krek, mais fe Daud wgiet om, mabe tiktol Yudas okou. Ou wrana krek fe wale wto Yudas oko wabe na kni meles hra wadien twa kaisin yka yslon fien Yesus. Ofo ni eke Nago wbatirik kadio kat ytatol kayi yde le hra Ou wrana wale. 17 Kwan firi wa ko, Yudas okou nai yaher wloit fot wse mam mikan rasul yahar teit lak, fe hra ou wsiok sisi ni wadien mam wrana fot giet mabot kom, mahin Yudas wbaret lolot faf fi Tuhan Yesus, wsafo ou.”
18 (Yudas okou wsiok pitis hra nai ytwa kahat hen fe om maka fo, wkain bet sanwat mrem [man ou wain wlidfois]. Wak ana fo ou wti wsilit wsa malin mse fobi aiti, wba wkmat om msiat, mde wkmat ei ylit yhok yse fobi. 19 Na marok kadio hra yese yik Yerusalem yoso fe kafir okom, mde bet okom ei ywit madien salo ei yi yto Hakal Dama, hra nai yto Sanwat Bet Hen Kbon.)k
20 Mde Petrus wrana skatiokot oli wto: “Fe hra Daud wsroin wale mak katik fari Mazmur wto:
‘Nliokeit bol ou wa maheit mdomri,
na mre yese oli dait.’
Mazmur mre kdie oli mrana mto:
‘Nhnak wat fle ou wa om man na wat ysae, ydanhok ou.’l
21 Mto mde ke fo, faf ftrie helwain na mreu waka wdanhok wan Yudas ou. Mahin, na wadanhok ou wahin kayi faf fik, whot kayi wale ni kadio kat hra Tuhan Yesus wsiok ei, 22 yidien kaman Yohanes wsrik kat Yesus, kayi de Nago wkosia kat Ou wahinti kat faf. Na wadanhok Yudas okou whot kayi wale ni kadio kat eke, se bo wloit wse rasul mam mik, ofo wadien sisi mam wrana hatot fe Yesus wsidik wron oli.”m
23 Mde ei ytrie na dla lak, Yusuf hra nai ywit wabe Barsabas, wabe fot Yustus, ou eke wadien fot na wat man ou hra wkedi wabe Matias.
24 Ei ysikafit ywaini yto: “Nai fe nau Tuhan, nen le ma nnok na marok yibri kadio kat. Nkakniet na man sio ma nen nlouk helwain wahin la yikan lak kei, 25 se bo mam mnok mto na hra okou le ma rasul waifi, wdanhok wan Yudas hra wahinti kat mam, wain wse Sala Maron, wi hra mtatol man ou.” 26 Mde ei yala lial ou wan la yikan lak ekei, mde lial okou warin wtatol wan Matias, ofo ou wloit wdanhok wan Yudas ou, wbalili wrat fe yikan rasul yahar teit lak.