Yesus Wsidik Wron Oli
24:1-12
(Mat. 28:1-10; Mrk. 16:1-8; Yoh. 20:1-10)
24
Yesus Kristus waigi wale wase tali tolik. Madien tali Minggu uwade kat fo, na dli ei yein yse hin knawato, yotik minyak yrnoin yrofof-fof kat hra ei ysiok krek wale. 2 Yhok yik oko, yhot fo amak madanti hin knawato magiet om mkathok, mlilik mahinti kat magiet om. 3 Ofo ei ytrik yse hin knawato mabri ra, mahin ytatiere fe dait Tuhan Yesus wkan eigi mak oko. 4 Ei ykro deri yik oko ykahiowain kat fe ni okom. Mde ei yiwua fe ro kat na dla yikan lak hra ytrik not yelek ytfel kat, ykro sisi yidien ei. 5 Ei yeliek karmiak kat mde ysaesik, ysifuon yse fobi. Mde na lak ei yrana man ei yto: “Hra nan nidihar na waron ou wak wi maegi ko fe me? 6 Ou wak dait ko, ou wsidik wale! Nan nnok tmol sadik ni hra kwan wa ko ou wrana man nan nik Galilea? 7 Ou wrana skatoin man nan wto: ‘Basak nai ynaba kat Na Tkoin Yfe Wet tet, yhnak tet tain kayi tse nai ysiok ni ysgia yik, ofo ei yskarok tet. Tali tolik wagiet fo, tet tsidik oli.’ ” 8 Mde na dli eke ynok tmol oli ni hra Yesus wrana wale.9 Mde ei ysalit oli yehin hin knawato om mde yrana hatot fe ni eke kadio yin wedla yikan yahar teit mres yidien yanak wat man ei kadio kat. 10 Na dli eke le ma Maria mahin Magdala, madien Yohana, madien fot Maria Yakobus wemem, yidien fot na dli wat mre hra yidien yein sisi, ei le ma yrana fe ni eke yin rasul ei. 11 Mahin wedla eke yoso kmiet dait ni hra na dli yrana ei, yto ygebra deri.
12 Mahin Petrus wsidik wsese tamli wse hin knawato om, wak ale wkatawok wamak kdie wain wse hin mabri ra, whot deri not yta-ta yiheit ybries. Mde ou wain, wnok sas oli mak wabri wto: “Hra ni mit ma mhok mde ke om?”
Yesus Wyen Hata Wkan Wak Fan Mse Emaus
24:13-35
13 Tali hra oko fo Yesus wfe wedla yikan lak yein sisi yse krotia mre mkedi le ma Emaus, hra mlis mahin Yerusalem bo mal kayi kilo yahar teit mre. 14 Yik fan kedi fo, ei yrana tiwain ni kadio hra yhok wale. 15 Yrana samne wata ni eke, ofo Yesus waka wataren wain sisi wadien ei. 16 Mahin Nago wolot fe ei yhana dait ou, ynok deri yto na wat.
17 Yesus wrana man ei wto: “La nan nrana tiwain ni mit ma yik fan kedi ke?”
Mde la ykro satna kat, yibri msgia ybakoko fe yfe na fle Yesus ou. 18 Yanak mre, wkedi mabe Kleopas, wada wto: “Hra nen nhok kmo nak Yerusalem, nnok dait ni hra yhok wale yidien amuk man yikei, afe?”
19 Wefitwain man ei wto: “Ni mit ma ei?”
Ei yto: “Mam mrana wain fe ni hra yhok yitatol yin Yesus na Nazaret ou. Ou eke wabe na tmak wafle hra wsiok ni owuok heit-hat ysamsa kat. Ou wkatrein wrana wkakniet ni Nago wfe wan na kadio kat. 20 Mahin imam yifle yidien mam mfe na yifle hra yslonti mam ei yhnak wan na yhirit ykerek sadir fe wkak, ofo na yskarok ou. 21 Mahin mam morsfe samhak mto bosi ou wabe raja wan mam, wkothok kat na sa Israel mam mkro wat. Hra oko fo waigi wase amuk tolik le mke. 22 Mahin na dli yehin mam mik ei yrana ni yhnak teit rioro fe mam. Hra ke uwade mlabit kat ei yein yse hin ale, 23 mahin yhot dait eigi ou. Ei yka yse mam mik yrana yto malaikat mrei yyen hata ykan man ei yrana yto Yesus ou wsidik wron oli wale. 24 Mde mam manak mrei yein yse hin, yihenek, ytatiere fe hin om mfalek, mtatol mde kayi le na dli ei yrana fe om, mahin yhot dait ou.”
25 Mde ou wrana man ei wto: “Hei na ymorait nan, hra nan nibri ykahiowain buon fe me? Hra nan nkahiowain, nten nkaso dait fe ni hra na tmak yrana krek fe wale! 26 Ei ysroin kayi yto Mesias okou whlet ni yalmias ysamsa kat yin ou, sba fo wloit tnes wse ou wfe fle kohok om!” 27 Mde ou wkakniet man ei mabe ni hra na ysroin yibe ou yik katik fari ykohok kadio kat, mteik mahin ni sroin Musa wfe kayi de mak katik fari na tmak ysroin ykahlia kat.
28 Ou wrana wkakniet tiwain ni eke kayi de yitaren fan ta krotia hra ei yein yitatol om, mahin ou wsiok dienen wto wain sros. 29 Mahin ei ytoji yto: “Naheit nadien mam faf fese, wa tali wsrik wale, amuk le wko.” Mde wloit sisi wadien ei, yiheit yik oko.
30 Amuk oko wleli wadien sisi yto yeit ni eit. Ou wsia fien roti maka, wsikafit whdin man Nago, mde werek-arak roti okom, ofo whnak yin ei yeit. 31 Hra oko fo ysifuon yhak, yhana sros ou yto Yesus le wko, mahin ou wsiet wahin ei yik. 32 Mde la yrana sros yto: “Woi, faf fik sonat fan kedi, ofo faf fibri om mhriak, msiaba fe foso ou wkakniet ni yehin Nago wfe katik fari makohok yin faf!”
33 Mde la yrohok ysalit oli yse Yerusalem. Yik oko fo la ytatiere fe wedla yikan yahar teit mre yidien fot yanak man ei kadio kat. 34 La yhok yka fo, wedla yahar teit mre yrana ni fe la yikan lak ei yto: “La nan nka, wa Tuhan wsidik toron kat wale. Ou wyen hata wale wkan man Simon.” 35 Mde wedla yikan lak ei yrana hatot fe ni kadio hra yhok yik fan kedi yin ei, kayi de yik sba bol, ou wkerek roti, ofo yhana tnes Yesus le wko.
Yesus Wyen Hata Wkan Om Man Wfe Wedla Ei
24:36-49
(Yoh. 20:19-23)
36 Amuk wasayen hra oko fo Yesus wfe wedla ei ybalifis yik bol mre mak Yerusalem, yrana samne ni. Ofo Yesus whok wkro rioro fak ro kat wak ei ybariomo, ofo wrana wto: “Amuk wabot wan nan!” 37 Ei yeliek, yteit rioro, yto yhot klebet. 38 Mahin Yesus wto: “Nan neliek amot! Hra nan nibri mkahiowain fe me? Nhot la tna kei, tteit kei. 39 Nhot la, tet le mkei. Nsiokti, nsmit lien tet! Fe hra klebet ou wkan fokot dait, wkdois dait, mde le nan nhot tet tke.” 40 Oko fo wrana wto, ou wyen wna yidien wteit hra nai ybadan yidien paku eke yin wedla yhot. 41 Hra oko fo wedla ei ytmayes kat yto: “Yesus dait, ou le woko.” Ou wrana man ei wto: “Nan nlak ni eit mre yik oko?” 42 Mde ei yhnak eren goreng mfan mrem man ou wat. 43 Ou wlouk fien eren oko maka, wat mak ei ybariomo.
44 Mde ou wrana man ei wto: “Kamuolo tet tadien sonat nan kadio, ofo tet trana krek wale man nan tto: ‘Ni kadio hra nai ysroin yibe tet yik ojin Musa, buku Nabi ei, yidien fot Mazmur – ni eke kadio kat basak yhok kayi ytatol yin tet.
45 Mde Yesus wtli hriak ei ysablit mroro, ofo ynok tnes ni hra Alkitab mrana ei. 46 Ou wrana man ei wto: “O le ma nai ysroin mak Alkitab, fe hra Raja Waeren kaka Na whlet ni yoko, wkak kayi, tali tolik fo, wsidik oli, wahinti kat wi maegi om. 47 Ofo nai yrana siar giet mabe Raja Waeren kaka Na tet tan na sa kadio, yibe nai yehinti kat ei yfe ni ysgia ei, ylelek oli yse Nago wak, ofo ou wbaret keben ei yfe satian ei. Giet okom nai yrana siar mahin sayen Yerusalem kawuak de fobi katak kom. 48 Nan nke nhot wale ni kadio eke. Mde ke fo, tet tbahe nan nibe na hra yein siar, yrana tahak fe tet. 49 ???”
Nago Wkosia Yesus Warin Wse Wi Maron
24:50-53
50 Mde Yesus wkri kein ei yhok kat kota Yerusalem, yein yse Betania. Wak oko fo, ou wkosia wna ei, whnak fle fe ei. 51 Wsiok wata ni oko fo, Nago wkosia ou wsidik wahinti kat ei, warin wse Wi Sahin Mayehet. 52 Mde ei yiheit, ysaesik yhdin ou. Mfot fo ei ykashok karmiak kat, ysalit oli yse Yerusalem. 53 Ei yik kawuak bol kohok Nago wfem, ysrar heyit man Nago.