Gubernur Pilatus Wefitwain Skadelek Yesus
23:1-7
(Mat. 27:1-2, 11-14; Mrk. 15:1-5; Yoh. 18:28-38)
23
Mde na hra ykerek sadir fe Yesus ysidik kadio kat yotik wse Pilatus wak. 2 Yhok yik oko fo, ei yadon ou yto: “Mam mhot mabe na ko wsiok sgia na sa mam mi. Ou wtoji wto mam mfelit dait blasten mse Kaisar wak. Yo, ou wto ou wabe Kristus, hra raja wafleu.”3 Mde Pilatus wefitwain man Yesus wto: “Nto tkoin, nen nabe raja na sa Yahudi yfe?”
Ofo Yesus wsamenie wto: “Ee, mtatol mde le nen nrana okom.”
4 Mde Pilatus wrana man imam yifle yidien na marok om wto: “Tet ttatiere fe dait na ko wsiok ni masgia mrem, ou wdain!”
5 Mahin ei yhorot, yteden eye yto: “Hau, ou wkakniet sawuan ni man na marok kadio kat yik fobi Yudea ko, wbalalan wkowiri-wara nai se bo ysablit yse ou wak. Ou wteik wahin fobi Galilea, kawuak de whok wak ko.”
6 Pilatus woso ni eke, ofo wefitwain oli wto: “Na ko wahin Galilea, afe?” 7 Woso kmo mabe Yesus wahin Galilea, fobi hra Raja Herodes wslonti okom, mde wbahe nai yotik ou wse Herodes wak, fe hra oko Herodes wak fot Yerusalem.
Herodes Wefitwain Skadelek Fot Yesus
23:8-12
8 Hra oko fo Herodes whot kmo Yesus, wde ou wkashok kat, fe hra madien kamuolo ou whot dait latiot ou. Ha, ou woso sawuan deri nai yrana fe Yesus, kayi de ou wbahoin wto whot Yesus wsiok ni owuok-awak mrem. 9 O le ma Herodes wefitwain skadelek ni warok yin Yesus, mahin Yesus wada dait ni mre. 10 Hra oko fo imam yifle yidien guru agama ei ykro ykohli yka ysadir bayit, yteden eye ni ytian yin ou. 11 Mde Herodes wadien ou wfe kaisin eke ytbekein yasak tlo ou ywien kein ou, ysadir sinis-sanas ou, yhanfat ou wsgia. Mde ei ysiok wanik ou wtrik not lis mabot hra raja wfe, ysria wain wsalit oli wse Pilatus wak. 12 Madien hra oko fo Herodes wadien Pilatus la ybalifis ylok-lok. Fe hra masayen latiot, la ykrek mawain.
Yesus Wsalit Oli Wse Gubernur Wak
23:13-25
(Mat. 27:15-26; Mrk. 15:6-15; Yoh. 18:38–19:16)
13 Mde Pilatus wkoyo imam yifle yidien na yifle hra yslonti fobi yidien fot na marok om yka, 14 mde wrana man ei wto: “Nan notik wale na oko wse tet tak, nadon nto ou wkowiri-wara sawuan na marok se bo ykro wat. Tet tefitwain skadelek wale ou wak nan nbariomo, mahin tet ttatiere fe dait ni masgia mre mak ou wak. 15 Herodes wtatiere fe dait fot ni masgia mre man ou. O le ma ou wteye ou wsalit oli wse faf fik. Nto tkoin kat, na ko wsiok dait ni masgia mrem mtatol mabe nai yhirit ou wkak, mdain. 16 Oko le ma tet tbahe nai ybahrabat ou, mde tnahla / bhait kat ou wain.” 17 [Pilatus wrana wde le ke fe hra wna bhait kat sawuan lokdi na wahirit mreu wadien konon Paskah.]
18 Mahin na marok om msalo kaf kat yto: “Nska wata na oko! Nnahla kat Barabas wan mam!” 19 (Ha, Barabas ou nai yhirit wale wak bui fe hra ou wsadir wekya wto na Israel yhokti kat yehin fobi Roma, yibe ykro wat. Nai yhirit fot ou wabe wska fot wale na.)
20 Gubernur Pilatus waisi wto wna bhait kat Yesus. O le ma hra ou wsalit wrana oli man na marok om. 21 Mahin ei ysalo kamyi kat yto: “Hau, nskarok wata ou! Nskarok wata ou!”
22 Ofo Pilatus wrana mao tolik fe man ei wto: “Fe hra ou wsiok ni mit ma msgia om? Tet ttatiere fe dait ni mre msgia man ou hra ytatol mabe nai yska ou wkak. Tet tto tbahrabat ou se bo tnahla kat wain.”
23 Mahin ei ysalo tkan yto: “Nskarok kat kayi ou we!” Ei ysalo kaf kat sanini kawuak 24 kayi de Pilatus wsamenie fe ni hra ei yeisi, ou wkerek sadir wto whnak kafir man kayi Yesus wkak. 25 Ou wna bhait kat na hra ei ywaini ou, na hra nai yhirit wse bui fe hra wska nai, yibe fot wsin wto na sa Israel ykro wat. Ha ou whirit wata Yesus wkak wde hra ei yeisi fe.
Na Sae Kahat Yskarok Yesus
23:26-32
26 Hra oko fo ei yidien twa Yesus wse wi skarok. Yik fan kedi fo ei ytatiere fe na dla mreu wahin Kirene, wkedi le ma Simon. Ou eke whok kmo wahin tlein waka wse kota. Mde wak fan kedi fo ei yslon fien ou, ykosia wkoit skarok om maka, ylak mak ou wkbek ago, ybahe yit yto ou wkaka, wkafe wanik wain heles. 27 Na marok om yein heles yehin Yesus wsbiele, yidien fot na dli hra ywa fe yidien ysalo kamyi kat. 28 Yesus wlelek wsmit ei, de wto: “Na dli Yerusalem nan, nowa fe dait tet ha, [basak kaisin yka yse kota okom yska nan nkak mde,] nowa fe deri na mna nan nidien fot nfe wet ei! 29 Tet trana man nan, basak tali man okom ofo bo nan nrana nto: ‘Mabot ma na dli hra ysa, na dli hra ysois dait, ysio dait wet mre! Ha, yidli hra ykafe wet, bo yhot nai yska yfe wet ei.’ 30 Bo kaisin yka yska nan nde nan nhlet nkoko msamsa kat. Kayi de nsalo kaf kat nse sfa riere nto:
‘Bet mlion wata, sfa nan nlilik nba eye wata mam se meigi tamli!’
31 Nto madien hra ke ko nai ysiok sgia wkoit mabra tet tde la ke, se bo basak nai ysiok sgia ya wkoit maslo nan nde sok sie?”
32 Yik wi oko, na sae kahat yotik fot na dla lak wat kdie mre hra ysiok ni ysgia, yibe yskarok sisi yidien Yesus.
23:33-43
(Mat. 27:33-44; Mrk. 15:22-32; Yoh. 19:17-24)
33 Yein kayi de yhok yik riere hra nai yto: ‘Riere Safakos,’ ofo ei yskarok Yesus wadien sisi na lak ei - mre wse Yesus wna tkoin, mre wse wna wait. 34 Ofo Yesus wsikafit man wono wto: “Tono, nyan kat wata ei yfe satian, fe hra ynok dait ni hra ei ysiok man tet.”
35 Na marok om mkro mak oko yhot kmiet ni kadio eke. Mde na Yahudi yfe na yfle ytbekein yto: “Hyee, ou weren wale na marok om. Wto wabe toron kayi Mesias, na hra Nago wlouk helwain ou, ofo na mna wkaka hai na mna ou!”
36 Na sae kahat ei yka ytbekein fot ou. Ei yyit anggur mkla ma afi man ou, 37 mde yto: “Nen nto nabe raja na Yahudi yfe, ofo nkothok kat na mna nen!”
38 Nai ysroin yik wkoit masa ago: “Raja na Yahudi yfe le wko.”
39 Na wasiok ni yisgia mre hra nai yskarok wak fot Yesus wklik wtbekein kayit-yit Yesus wto: “Hee, nen nke nabe Na Waeren kaka Na, afe? Nto mde ke fo, neren kaka nen nadien fot la mam!”
40 Mahin wanak na wasiok ni yisgia kdie man ou whar kat ou wto: “Hyee, bo hra nen naliak dait Nago? Fe hra la faf nai yskarok sisi fidien ou. 41 Nai yskarok la faf ftatol fidien ni hra la faf fsiok ysgia ei, mahin na ko wsiok dait ni mre msgia!”
42 Mde ou wto man Yesus wto: “Yesus, basak sba nen naka oli nabe Raja, ofo nnok tmol fot tet!”
43 Mde Yesus wrana man ou wto: “Tet trana toron man nen, bot kei nen nadien tet, la faf fik sisi wi mabot Firdaus, wi maron kawuak.”
Yesus Waigi
23:44-49
(Mat. 27:45-46; Mrk. 15:33-41; Yoh. 19:28-30)
44 Bo mal kayi tali mkro trik, tali wkedi yahar teit lak, ofo tali mhak oli dait, ha, mmian maisti kat fobi okom kayi de tali wkedi tolik siwit. 45 Ofo not hra mloyo mkdati wi makohok mak bol kohok Nago wfe okom mtahak mfan lak. 46 Mde Yesus wsalo mfle, wkader kohok man wono wto: ‘Tono, tet thnak thalie kom mse nen nak!” Ou wrana kayi msaswe, ofo wkaso mti, waigi.
47 Na sae kahat wafle hra wsiokti na sae kahat, whot wale ni hra yhok ytatol yin Yesus, ofo ou whdin Nago. Mde ou wrana wto: “Nto tkoin kat, na ko wsiok dait ni mre msgia!” 48 Hra oko fo na marok hra ybalifis ykro yibe ysayo ni eke ymlawhei. Ei yba ykmuon yrwe fe ou, mde ysalit oli. 49 Mahin na kadio hra yidien lokdi Yesus, na dli fot hra yidien ou yein yehin Galilea, ei yiheit ykro ykadlo afat yik koit, ysayo kadio kat ni eke.
Nai Ykali Yesus Kristus Wkan Eigi Om Mse Hin Knawato
23:50-56
(Mat. 27:57-61; Mrk. 15:42-47; Yoh. 19:38-42)
50 Na mre wkedi le Yusuf wahin kota Arimatea fobi Yudea, ou eke na wabot, nai ygiele ou. Ou wwade kein basak sba Nago waka wabe Raja wsiokti na kadio. 51 Wabe wata na sidang agama, mahin wsamenie fe dait ni hra ei ykerek sisi sadir okom mabe yto yska Yesus. 52 Yusuf oko wain wse Pilatus wak, wwaini fien Yesus wkan eigi om man ou wkali, ofo Pilatus wsamenie fe. 53 Mde Yusuf wain wkotefek eigi ou wahinti kat wkoit skarok okom. Waka fo, whobor wkohli wadien not lenan malis, ofo wtrik fali, wkali wse hin knawato amak mabri ra hra nai ykak mak riere olo. Hin okom mifi sonat, na mre ykali latiot eigi fem. 54 Hra oko fo tali Jumat siwit kat, mataren mabe tali Sabat.
55 Na dli hra yka yidien Yesus yehin Galilea, ei le ma yka fot yidien Yusuf, yhot hin om, yhot eigi ou wbries wak tato man sio. 56 Mde ei ysalit oli yse bol, yadir krek rempah yidien ni yrnoin mre yibe yyan eigi ou. Mahin ei ysiok dait ni mre yidien tali Sabat oko fe hra ei ysiwain ni hra Nago wbahe fe. [Ha ei ysin deri yto, tali Sabat mewer sba fo, yein oli yse hin.]