Na Ysin Mabe Yska Yesus
22:1-2
(Mat. 26:1-5; Mrk. 14:1-2; Yoh. 11:45-53)
22
Mataren mabe na yeit konon Roti Mdain Ragi, hra nai yto Paskah. 2 Imam-imam yifle yidien guru-guru agama ei ybaret lolot Yesus wan yska kat wabe yelieksi na marok,Yudas Wsafo Yesus
22:3-6
(Mat. 26:14-16; Mrk. 14:10-11)
3 Mde klebet ou wsisik wale Yudas hra na yto Iskariot, hra wahin fot wedla yahar teit lak eke. 4 Mde Yudas wain wse imam-imam yifle yidien na yislonti bol kohok Nago wfem yibe yrana sas fe, yto mde le sie ma wbaret lolot whnak Yesus wan kaisin ei yska. 5 Mde ei ykashok ysamenie fe bo yhnak pitis mre yin ou. 6 Mde ou wsamenie fe ou, mde mahin hra oko ou wnok mtatol madien tali hra oko.
Na Yoyo Krek Ni Eit Konon Paskah
22:7-13
(Mat. 26:17-19; Mrk. 14:12-16)
7 Mde mtatol mabe konon Roti Madien Dait Ragi, tali wabe na ykerek domba konon. 8 Mde Yesus wbahe Petrus wadien Yohanes, wto: “La nein nsiok kein ni eit konon man faf mabe bot faf feit fot.” 9 Ofo ei yefitwain man ou yto: “Nen naisi nto mam msiok kein mak bol man sio?” 10 Wto: “Nan nto nloit nse kota okom, la nan ntatiere fe na dla mreu wkafe buolo madien kla, ofo la nan nidien nein nse wfe bol hra wase om la nan nloit, 11 Nrana man Tuan hra wkain bol okom nto: ‘Guru ou wefitwain wto: wi om mak sio fe hra bo mam meit sisi konon Paskah?’ 12 Ofo na oko wkahit man nan sit mafle man hra mse mbat man ago mabe madien wale ni ytatol, mak le oko mabe na yeit konon okom.” 13 Mde la yein ysiok kayi mde le hra Yesus wrana fe okom.
Yeit Konon Madien Amuk Hra Oko
22:14-23
(Mat. 26:20-29; Mrk. 14:17-25; Yoh. 13:21-30; 1Kor. 11:23-25)
14 Hra oko ofo mtatol kayi mabe na yeit konon Paskah, Yesus wleli sisi wadien wfe wedla Rasul ei. 15 Wto man ei: “Tet thlet dait latiot ni hra basak malmias man tet ofo, Tet taisi tat krek sisi ni eit konon Paskah tadien nan. 16 O le ma Tet trana man nan kom: Tet tat dait oli kawuak de mtatol sba madien kerajaan Nago wfe om.” 17 Oli kdie ofo ou wlouk fien met hra mhon fe kla anggur om, mde wsikafit man Nago, ofo wto: “Nwien la kla kom man noko sisim. 18 Fe hra tet trana man nan: madien hra ko Tet tako oli dait kla anggur yehin biele kayi de Nago wfe kerajaan om mhok sba.” 19 Mde ou wwien fien roti man wsikafit ofo werek-arak man whnak man ei, mde wto: “Tet tkan fokot le ma kom. Bo tet thnak man nan; nsiok ni kom mabe kait wain man nan.” 20 Mde fot sago met om yeit wale ni, ofo wto: “Met kom mabe kadoin waifi, o le ma Tet tfe hen, hra mti msror mse fobi kom.
21 Mahin, nan nhot, na hra wtik lolot tet, ou fot le ma wadien sisi Tet, fik meja kom. 22 Na tkoin yfe wet bo waigi kayi mtatol madien Nago wbatok wale, yo, kafir mat na hra wbaret lolot ou!” 23 Mde yefitwain frit-frat man ei yto: “Na sio ma wsiok buon ni wde le eke ou?”
Bo Ei Yti Kadio Kat
22:24-38
(Mat. 26:31-35; Mrk. 14:27-31; Yoh. 13:36-38)
24 Mde fot le Yesus wfe wedla ei yhoyok frit yto ei eke man sio ma wfle wewer wahin ei yik. 25 Yesus wrana man ei wto: “Na sa-sa ei yfe raja yslonti yfe rakyat ei madien na man hra yslonti yidien yfe fle om o le ma na yto yska deheti. 26 Mahin nan nde dait eke, ha, nan nto nibe na yifle ofo nibe la na dihan. 27 Fe hra na sio ma wto wfle: ofo waleli wat ni eit ou wafe, hra wadihan na ou. Mahin tet tak sisi nan nik oko tabe na dihan. 28 Nan le ma niheit nidien sisi Tet fik wi ma lolot dienen hra malmias man tet om. 29 Fe hra Tet le ma tbatok man nan mde fot le Tono wbetok man tet. 30 Bo basak nan neit sisi ni eit nidien tet fik kerajaan tet tfe om mde nan nleli nik wi mayehet mabe nsarife na sa sa yahar teit lak yehin Israel.
31 Simon, Simon, nhot la! Klebet wafle wto wale bo whlio nan ni wadien thom, nde la gandum. 32 Mahin Tet tsikafit man nen, se bo nen nhron nkanas kat, ha, nti dait. Nto nnok tmol kayi ni eke, nhnak hron fe fot nanak nen na ei.” 33 Mde Petrus wto: “Tuhan, tet taisi ttrik bui madien taigi sisi tadien nen! “ 34 Ofo Yesus wrana wto: “Tet trana man Petrus nen, hra ko klen kokok wsalo dait latiot, ofo nen nkesi keben tet mao tolik wale nto, na man oko tet tnok dait ou.”
35 Mde ou wto man ei wto: “Kaman tet tbahe nan nein notik dait hrien mre, ni eit mre, yidien teit katak mre, ofo nan ndain kadio ni eke?”
36 Ei yto: “Ni kadio ydain.” Wto oli man ei: “Mahin madien hra ko, na sio ma ykain hrien, ofo yotik wata, mde fot le man hra ykain ni eit; yidien fot man hra ydain ofo ysafo kat yfe not trik jubah ei, se bo ykain ni eit. 37 Fe hra Tet trana man nan, mabe ni sroin makohok kom nan nsiok kayi mtatol man tet: fe hra basak ni sroin kom mabe tet bo mtatol.”
38 Mde ei yto: “Tuhan, sak lak le mke.” Ou wto: “Ytol wale.”
Wak Biele Getsemani
22:39-46
(Mat. 26:36-46; Mrk. 14:32-42)
39 Mde Yesus whok wahin kota wain wse tlein mde hra wain sawuan wse Riere Zaitun. Ou wfe wedla ei fot yidien ou yein. 40 Ei yhok wale yik wi okom mde ou wrana man ei: “Nsikafit deri kawuak se bo nan nti dait nse wi lolot dienen.” 41 Ofo ou wkatdin wahinti kat ei bo mal kayi na yklat amak mse koit, ofo wleli batoko mde wsikafit, wto: 42 “Yo, Tono nen, nen nto naisi, nkosia kat met kafir kom mahinti kat Tet; mahin dait tet tak ha, mahin deri nen nak o le mhok.” 43 Mde malaikat mre whok wahin yik ago waka whnak kanas fe ou. 44 Ou waliak karmiak kat mde hra oko fo wsikafit homo-homo kat, mde wsebi om mdok mde le hen hra mti mse fobi, mhnak hron fe. 45 Mde ou wsidik wahin wi ma sikafit om mde wsalit oli wse wfe wedla ei yik, mahin ou whot ei yleli yrwe. 46 Wrana man ei: “Hra nan nese fe me ? Nsidik, nsikafit, se bo nan nti dait nse lolot dienen.”
Kaisin Yslon Yesus
22:47-53
(Mat. 26:47-56; Mrk. 14:43-50; Yoh. 18:1-11)
47 Yesus wrana samne ni wadien ou wfe wedla ei. Mde Yudas, Yesus wfe wedlau ou, whok wti kein kaisin om maka, ofo ou wain wse Yesus wak, wto wkmois ou. 48 Mahin Yesus wto: “Hee Yudas, hra nen nto nkmois tet tabe? Nen nke nbaret lolot Na Tkoin Yfe Wet tet!”
49 Mde ei hra yidien sisi Yesus, yhot ni hra yhok eke, mde yto: “Tuhan, mam mska fot ei?” 50 Mde wedla mre wahin ei yik wsat kerek kat imam wafle wfe na dihan ou wtefit mse wna tkoin om mkerek.
51 Mahin Yesus wto: “Mtol!” Mde wlak wna man wtefit om mde klis om mdain.
52 Mde Yesus wrana man imam yifle yidien na sebe hra yslonti sawuan na sae kahat yik bol kohok Nago wfem, yidien fot nai yifle hra na sa Yahudi yfe, ei yikan kadio hra yka yse oko yibe yslon ou – ofo ou wefitwain wto: “Hra nan nnok tet tabe na khan? Nan nke nka notik mnian yiris yidien kbat nto nkami nan nfe yomon tet! 53 Tali warok tet tadien sisi sawuan nan, faf fik bol Nago wfem, mahin nan nslon dait tet. Ha, mayi fe amri ko, ofo mtatol man nan nsiok hlok ni sgia ei, mabe klebet wafleu wsiokti nan nibri.”
Petrus Wkesi Keben Fe Yesus
22:54-62
(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)
54 Mde na yslon Yesus wan yotik wain wse Imam wafle wfe bol. ha Petrus wain kaliowain wahin wsbiele. 55 Na yseli sala mak bol mklik mabe yleli ykohli ykomin oko ofo Petrus wleli fot wadien ei yik oko. 56 Mde na dli dihan mrem msmit torot ou mde mto ro kat mto: “Na hra ko le ma wadien fot na kom.”
57 Mde Petrus wkesi keben wto: “Mdain! Tet tnok dait na man ko!”
58 Oli kdie fo na mre whot ou mde wto: “Nen fot le ma nadien ei!” Mahin Petrus wto: “Hau, tet tdain!”
59 Mde man bri kat oli kdie fo na mre wrana man ou wto: “Nto tkoin, na hra ko fot wadien sisi ou, fe hra ei sisi na Galilea.”
60 Mde Petrus wto: “Mdain! Tet tnok dait ni hra nen nrana eke.” Oko fo klen kokok wsalo mao tolik. 61 Mde Tuhan wlelek, wsmit torot Petrus. Ofo Petrus wnok tmol ni hra kaman Tuhan krek wale ei mabe: “Bot ke, klen kokok wsalo dait latiot mao tolik, ofo nen nkesi keben tet mao tolik.” 62 Mde ou whok wse tlein wawo wmokol tiak.
Nai Ysadir Trar Fe Yesus
22:63-71
(Mat. 26:63-68; Mrk. 14:60-65; Yoh. 18:19-24)
63 Kaisin hra yslon Yesus ytbekein ou kayi de ybahrabat. 64 Ei ylakti wsifuon ei ofo yefitwain yto: “Yoma, nto la, na sie ma hra yba nen ei?” 65 Madien fot yrana ytbekein ni hra yisgia yin ou.
66 Sies mkerek fo, na sidang agama ei ybalifis yife mres – na sa Yahudi yfe nai yifle yo, imam yifle yo, guru agama ei – yibe yto ysadir trar fe Yesus. Ofo nai yotik Yesus wain wse ei yik. 67 Mde ei yefit delek wain man ou yto: “Nrana tahak man mam nto nen nabe Mesias, Raja Waeren kaka Na, afe ndain?” Mahin Yesus wrana man ei wto: “Tet tto trana tahak man nan, ofo bo nan noso kmiet dait tet. 68 Yo, tto tefitwain man nan, ofo nan nrana tahak dait man tet. 69 Ha, madien hra ko fo, Na Tkoin Yfe Wet bo wleli wak Nago Hra Wfe Fle Kohok om Mewer Kat, ou wna tkoin.”
70 Mde ei yikan kadio yefitwain yto: “Mto mde ke fo, nen nke Nago Wfe Wet nen?”
Ofo Yesus wsamenie wto: “Esree, mde le nan nrana om!”
71 Mde ei yrana yto: “Yo, mtatol wale! Faf fidihar na mre waka wrana oli ni yibe? Faf foso sorhoi wale mahin na mna ou wgiet, [wlolot dienen wto ou wabe Nago wfe wet]!”