Na Semit Om Mhnak Ni Sanfe
21:1-4
(Mrk. 12:41-44)
21
Mak bol sikafit Nago wfe, Yesus whot na yikohok ylak pitis sanfe yse tho sanfe. 2 Ou whot fot na semit hra masgia om, mom mtik pitis keping tembaga ykdois lak. 3 Mde Yesus wto: “Noso la, na semit kom mhnak sanfe ei yrok yewer kat yehin na kadio kat. 4 Fe hra ei yhnak yehin yfe hrien warok, mahin semit kom mahnak ni sanfe yehin om mfe hrien yikahlia kat.”Nago Wfe Bol Kohok Basak Na Ybatdak
21:5-6
(Mat. 24:1-2; Mrk. 13:1-2)
5 Na mre yrana fe mabe bol kohok Nago wfem hra na ysiok om yhriet madien amak yibot-bot yidien fot ni hra nai ysanfe yin Nago. O le ma Yesus wrana man ei wto: 6 “Basak mayi fe ofo, ni kadio hra nan nhot ekei basak na ytdak kadio kat; amak mre oli dait maheit mkro mbafit man amak man om masa, ha, kadio kat eke yti.
Hlet Masayen
21:7-19
(Mat. 24:3-14; Mrk. 13:3-13)
7 Wedla ei yefitwain man Yesus, yrana yto: “Guru, waka ma ni okom mhok? Madien kyat, bo okom basak mhok?” 8 Ou wto: “Nsiton-ton, se bo na ysiok sgia dait nan. Fe hra na marok basak yka yidien ylolot dienen madien tet tkedim, mde yto: ‘Tet le ma ou,’ yto fot yto: ‘Hra ko ofo mataren wale.’ Nan nidien amot ei yila. 9 Madien nan nto noso na ysin yto khan afe yhoyok frit, ofo nan nteit rioro amot. Fe hra ni kadio eke yhok sba yelin, mahin oko mabe dait fobi makahlia hra maka tamli om.”
10 Ou wrana man ei: “Na sa man ei ysidik ykhan yidien na sa man ei madien kerajaan man ei ykhan yidien kerajaan man ei, 11 Mak fobi katak frero wkolot fobi mrioro msamsa kat mak fobi katak mde fot le buoros walbir kat wak fobi katak, madien katot fle, madien fot ni wat man hra yhok yehin yik ago. 12 Mahin ni eke dait latiot ofo na yslon nan ybahrabat, yotik nse bol sikafit, yhirit ntrik nse bol hirit, yotik nse raja yidien na yifle yislonti fobi mabe hra tet tkedi kom. 13 Ni okom mbot man nen mabe nen nrana tet tkedi kom. 14 O le ma nnok tiktol mak deri nabri, se bo nan kei nnok wat dait ni mre yewer yehin tet tak. 15 O le ma tet tmres deri bo tet thnak man nen ni rana hra ytatol, se bo nen na mre yhar kat dait afe na hra yidien sgia nen ytbekein dait. 16 Mabe nan bo na trar ei, na man, nahano, naliwet, nfe mna ei yhnak nen nse kaisin yska nen. 17 Mde nan kei na ykrek kadio kat fe hra tet tkedi kom. 18 Mahin nen nkan kadio kat kayi de nsagien kyamre kat wanik, mahin masak dait. 19 Nan nto nslonti kayi tet ttodo tan nan, ofo bo nan nkain kayi ron kawuak om.”
Yesus Wrana Fe Yerusalem Mti
21:20-24
(Mat. 24:15-21; Mrk. 13:14-19)
20 “Mde hra nan nhot kaisin ylalo Yerusalem mabe yfit nan, nnok fe hra mataren wale mabe kota okom mesik kat. 21 Hra oko fo na hra yese yik Yudea ytain kayi yse sfa. Man hra yiheit sonat yik kota ytain yehinti kat kota, yidien man hra yik wale tlein yloit oli dait yse kota. 22 Fe hra tali hra oko wabe na ykerek sadir mabe na yhirit mtatol madien ni sroin mak katik fari kom. 23 Kafir man na dli hra ykmat wet afe ysio wet yidien hra oko! Fe hra kafir mafle hra mhok malbir mak fobi okom madien na sa-sa kadio mdiris kat. 24 Man hra na yskalit yidien yiris***, man hra na yotik yein ytrik bol hirit yse na sa wat; madien na hra ynok dait Nago, ei ykait eye kota Yerusalem kawuak de mtatol madien Tuhan man ei om.”
Na Tkoin Yfe Wet Waka
Flet Mabe Wkoit Ara
21:25-33
(Mat. 24:29-35; Mrk. 13:24-31)
25 Basak hra oko ofo kyat mabe talim, mok, twon, yska heit-hat yik fobi, na sa-sa ei yeliek, ykahiowain yhot felek bra, wadien alwkafa wak siwan katak. 26 Na tkoin yeliek karmiak kat, biarak wa yeigi yhot ni kafir fle hra yhok yeitsi na kadio mak fobi katak kom, fe hra ni owuok-awak ylais hra yhok yehin yik ago, ykahroro, ykowiri-wara na kadio. 27 Oko tnes o le ma na tkoin yfe wet, na yhot waka wak yik wabat wadien fle kohok hra mlais kat mafle om. 28 Basak ni kadio kat ekei yto yhok ofo nsidik ngiele mse ago, fe hra bo wsigi kat nan nron kawuak.”
29 Mde Yesus wrana flet ko wan ei: “Nsmit lien la wkoit ara afe wkoit wat mre. 30 Mde hra nan nto nhot wkoit ylelen yfori, ofo nan nnok deri mabe melin fle wataren. 31 Mde fot le nan nto nhot ni eke yhok, ofo nnok deri mabe kerajaan Nago wfem mataren. 32 Tet trana toron man nan: na hra yidien hra ko yron kayi de yhot sba ni eke yhok. 33 Yik wadien fobi bo yseal kat, ha, giet hra tet trana kom masak dait.”
Ojin Mabe Nsiton-ton
21:34-38
34 “Nkein hao nkan om, se bo nabrim mhon fe dait ni yisgia hra yde le nmsit, nsiwisi fe ni mre wat, mde mtatol mabe Tuhan waka ro kat ofo mde le sie. 35 Fe hra tali hra oko ou waka wde le na wasliak wak na marok mak fobi katak kom. 36 Nsiton-ton kawuak, nsikafit, se bo nan nkanas, se bo nbren kat nehin ni hra bo yhok eke, se bo nan nkro bren kat nik wet na tkoin yfe wbariomo.”